Kabwe Aikwij eo ñan Kalek Kingdom Hall Ko
1, 2. Katak in enaj kalaplok ad melele kin program et eo?
1 Kin an jabwe money im ri jerbal ro rekabel ilo elõñ ailiñ ko, men kein rar kabõjrak aikwij ko ñan kalek Kingdom Hall ko. Kin men in, ilo November 1999 kumi in Governing Body eo ear beek ñan kajutak juõn program kin jerbal in ekkal Kingdom Hall ko ilo ailiñ ko me ejabwe aikwij ko ie. Ikijen katak in, kim kõnan kalaplok am melele kin ewi wãwen congregation ko ilo aolep ene ko rej bed ilo iumin ra eo ilo Guam remaroñ bok tokjen jen karõk ko enaj kõmmani.
2 Ilo ran kein ad, program in ej jerbal ñan kabwe aikwij ko an ro jeid im jatid ilo 115 ailiñ ko. Ñan kabwe aikwij eo im kajerbal jabawõt ko ilo juõn wãwen emeletlet, kumi in Governing Body eo ear karõk bwe Department eo ilo jikin kwelok in Brooklyn rej naetan Design im Build (Pijaik im Ekkal Em) enaj lolorjake karõk in im ej jerbal ibben lalem Regional Office ko. Congregation ko ilujen Micronesia, ekoba Guam im jikin eo CNMI, renaj bõk jibañ jen Regional Office eo ilo ra eo ilo Australia.
3. (a) Ta mejenkajjik eo an program eo kin jerbal in ekkal Kingdom Hall? (b) Ewi wãwen jerbal in ekkal Kingdom Hall eo ilo Micronesia ej wõnmanlok wõt?
3 Mejenkajjik eo an program in kin jerbal in ekkal Kingdom Hall ej ñan kalek Kingdom Hall ko relamwan, rekeie, rejjab lukkun lap wõnãir, im rejjab aolep ien aikwij in kõkãle ilo bũdej eo im emelim ekkar ñan kien ko ilo ailiñ eo renaj bed ie. Ekkar ke men in ilo Micronesia? Program in ej juõn menin aikwij ke ilo Micronesia? Uak ñan kajitõk kein jimor ej aet! Emwij jinoe juõn karõk ñan kalek 26 Kingdom Hall ko elap aikwiji, im jikin jokwe an missionary ro im office ko an ro rej ukok. Ewi wãwen jerbal in enaj walok?
Unin Kingdom Hall Construction Desk Eo
4, 5. Ta eddo ko rej bed ibben Kingdom Hall Construction Desk (Department eo kin jerbal in ekkal Kingdom Hall eo)?
4 Kingdom Hall Construction Desk (juõn Department kin jerbal in ekkal Kingdom Hall) emwij an walok im jerbal ilo ra eo ilo Guam ñan tel jerbal in ekkal. Department in ej bed iumin tel eo an Branch Committee eo im ej jerbal ibben Service Department eo. Ilo wãwen in, remaroñ kõmman bebe ko remõn im meletlet bwe congregation ko me aikwij ko air relaplok jen ro jet ir eo ren bõk jibañ mokta. Ilo ejja ien eo wõt, ekkar ñan nan in kakabilek eo ilo 1 Dri Korint 9:26, remaroñ kabwe aikwij ko ilo jikin ko jet ilo ejja ailiñ wõt me tõbrak ko remaroñ walok ilo mõkaj. Karõk ko rekeie im jejjet emwij air kõmmani ekkar ñan wãwen ko an jikin ko kajjojo. Meñe karõk ko kin jekjekin Kingdom Hall ko renaj kabidodolok jerbal in ekkal eo, men ko rej kajerbali ñan kalek im kõl ko armij ro ilo bukwon eo rej kajerbali renaj bar lori. Joñan kilep im jekjekin Kingdom Hall eo enaj ekkar ñan oran ri kwalok ro renaj kajerbal jikin kwelok eo ekoba maroñ eo an congregation ñan rejetak wõnãn im kejbãroke.
5 Eddo eo ej bed ibben Kingdom Hall Construction Desk ñan lolorjake jerbal ko aolep ilo jerbal in ekkal ko kajjojo. Men in ej koba jikin eo mweo enaj bed ie, karõk kin jekjekin mweo, melim ko im maroñ ko kin ekkal, im jerbal in ekkal. Ro renaj kejbãrok Kingdom Hall eo im kõkãle renaj bõk jibañ kin wãwen lale bwe en aetok an bed elõñ yiõ ko tokelik. Enañin ruo yiõ kajjojo, juõn armij me ej jutak kin Kingdom Hall Construction Desk enaj etale mweo im lelok nan in kakabilek ñan ro rej lale jikin eo kin wãwen ko remaroñ kejbãrok im kõkãle Kingdom Hall eo.
Kingdom Hall Construction Group Eo
6. Wõn ro rej ejaakKingdom Hall Construction Group (Kumi in Jerbal in Ekkal), im ta mejenkajjik eo air?
6 Kumi in Governing Body eo ear kowãppene lajrak in Kingdom Hall Construction Group (kumi ko kin jerbal in ekkal Kingdom Hall) bwe en walok ñan kamõkajlok jerbal in ekkal Kingdom Hall ko. Kumi kein rej jibañ congregation ko ilo air kalek Kingdom Hall ko im bareinwõt kilen lale wõnãn ñan kajerbale. Oran ri kalek ro im ro rej mõnõnõ im jibañ ñan kalek Kingdom Hall ko rej jiljino ñan rualitõk armij. Ilo wãwen et rein rej jibañ bwe jerbal in ekkal en lo tõbrak?
7. Ta menin aikwij ko juõn enaj aikwij kõmmani bwe en bõk kunan ilo jerbal in ekkal Kingdom Hall? (Kobaik ennan ko ilo box eo)
7 Ri karejar ro ilo jerbal in ekkal Kingdom Hall: Rein me rej mõttan ro rej jerbal ro full-time rejej uan rej ro jeid im jatid ilo jitõb me elap air iminene ilo jerbal in ekkal. Jet ien rej kowãppen ri belele ro bwe ren jerbal einwõt ri karejar ro ilo program in kin jerbal in ekkal Kingdom Hall. Aikwij ko an jerbal in ej bwe aolep rej aikwij baptais elõñlok jen juõn yiõ aetokin, rej maroñ in jerbal ñan ien ko raetok, rej aikwij 19 ñan 55 dettair, emõn air ejmour, remaroñ bõk kunair ilo jerbal ko rebin, im emõntata bwe ren jerbal full-time einwõt juõn regular pioneer. Renaj aikwij in kwalok maroñ ko air einwõt juõn eo emõnõnõ in ekkal Kingdom Hall moktalok jen air bõk maroñ eo ñan jerbal einwõt juõn ri karejar ej full-time ejej uan.
8. Ewi wãwen eo emõnõnõ in lelok e make ilo jerbal in ekkal Kingdom Hall ko ej oktak jen ri karejar eo ilo jerbal in ekkal?
8 Ro remõnõnõ in lelok ir make ilo jerbal in ekkal iumin jidik ien: Aikwij ko an ro remõnõnõ rej joñan wõt juõn ibben aikwij ko an ri karejar ro ilo jerbal in ekkal Kingdom Hall ko. Jerbal in ekkal eo ej kitibuj ruo ñan jilu alliñ ko. Jet ien, ro jeid im jatid rekabel remaroñ ekkeini im jerbal part-time. Ñe elõñ jerbal ko an Kingdom Hall Construction Group eo ilo juõn jikin, ro rekõnan kanne application ko (A-25) remaroñ jilkinloki ñan congregation ko rebak.
Jerbal in Ekkal Kingdom Hall —Juõn Jerbal an Congregation
9, 10. Ewi wãwen ro uan congregation eo remaroñ kwalok air rejetake jerbal in ekkal Kingdom Hall eo?
9 Congregation eo me rej bebe in jino jerbal in ekkal Kingdom Hall renaj aikwij watõk jerbal eo ej air make. Ej bebe eo an ro uan congregation eo ñan bõk kunair joñan wõt air maroñ ilo jerbal eo im tokelik lolorjake wõnãn ñan kajerbale im bar aikwij ko jet an Kingdom Hall eo emwij an jutak. Jen jinoin, elder ro rej bõk kunair ilo jerbal in ekkal rej rejañ ro jet bwe ren bareinwõt mõnõnõ kin Kingdom Hall eo ekãl. Congregation ko me rej bõk jibañ kin wõnãn remaroñ kwalok air kamolol ikijen air beek ñan lelok jabawõt ko kajjojo alliñ ñan ra eo bwe ren kajerbale ñan Kingdom Hall ko. Men in ekkar ñan nan in kaiñi eo ilo Jabõn Kennan 3:9: “Kwõn kaibujuij Jeova kin mweiõm.”
10 Elikin air kowãppene juõn jerbal in ekkal, renaj kejelã congregation eo kin ien renaj jino im jete oran armij renaj aikwiji ilo ien kalek eo. Ro rej jerbal ñan kalek air make Kingdom Hall rej jab aikwij kanne juõn application, ak rej aikwij juõn ri kwalok im ejmour eo air en emõn, 17 air yiõ ak rittolok, im bõk melim jen Congregation Service Committee. Emaan ro im kõrã ro ilo jitõb remaroñ bõk kunair ilo jerbal in. Ekoba jerbal eo ñan jerbal ilo jikin ekkal eo, ro uan congregation eo remaroñ jibañ ikijen air keboje mõñã ko kijen ri jerbal ro im kwõlkwõl nuknuk ko an Ro rej Kumi in Jerbal in Ekkal.
11. Ewi wãwen nan in kaiñi ko ilo 1 Dri Korint 14:40 im ilo Dri Hibru 13:17 rej kwalok aikwij eo kin jerbal eo eburukuk an congregation eo?
11 Einwõt kwoj loe, lajrak in kin jerbal in ekkal ej aikwij wõr jibañ an congregation eo im, elaptata, ro rej bõk maroñ in tel. Nan in Anij ej kakememej kij kin nan in kaiñi ko ie. Ñan wanjoñok, ilo 1 Dri Korint 14:40 ej ba: “A ren kõmõn men otemjej ekar im ilo lajrõk.” Emwij air letok nan in tel ko bwe aolep men ko ren jerbal ilo lajrak ekkar ñan Anij. Elap ad kamolol kin nan in tel jen kumi in Governing Body eo kin ewi wãwen jerbal eo en walok iumin program eo jerbal in ekkal Kingdom Hall. Ri jilek Paul ear lelok nan in kakememej in ilo Dri Hibru 13:17: “Komin bokake im kõtãik kom ñõn ro rej tel kom, bwe rej lale ami, einwõt ro re naj kwalok kin air kõmõn, bwe ren kwalok im lõñliñ im jab buromõj. Bwe men in e jab men in kakajuror kom.” Ikijen ad lore nan in kaiñi kein jen Bible, jemaroñ kõtmene bwe Jehovah enaj kajerammõn jibadbad ko ad ñan kalaplok kabuñ eo an.
Buñten Nee ko ñan Kalek juõn Kingdom Hall
12. Ta kamelele ko juõn congregation ej aikwij kwalok ñan ra eo elañe rekõnan kalek juõn Kingdom Hall?
12 Ñe juõn congregation ej lemnak bwe rej aikwiji juõn Kingdom Hall ekãl, renaj aikwij kwalok kajitõk eo air ikijen juõn letter ñan ra eo. Letter eo ej aikwij kamelele kin wãwen an bed jikin eo rej kwelok ie, im remaroñ kwalok men kein ikijen pija ko im jilkinlok ñan Kingdom Hall Construction Desk eo. Kobalok ibben men in, emõn ñan kalikar oran Ri Kwalok ro, oran ro rej kweloktok ilo kwelok in Public Talk, im jete money rej bõke ilo box in jabawõt ko iumin jiljino alliñ ko remotlok (ekoba jabawõt ko rej aini kin jerbal in kwalok nan ibelakin lal, jabawõt ko ñan Society Kingdom Hall Fund, im jabawõt ko ñan aikwij ko an congregation), men kein rej aikwij kwaloki.
13, 14. (a) Ta men ko ro Kingdom Hall Construction Desk ewõr air iminene kaki? (b) Etke congregation ko jet bõlen renaj aikwij kwelok ilo juõn wõt Kingdom Hall?
13 Elikin Kingdom Hall Construction Desk eo ej bõke letter in kajitõk eo air, renaj karõk ñan kwelok ibben kumi in elder ro ilo bukwon eo, ekoba circuit overseer eo elañe emaroñ, im kumi in elder ko rebak elañe elaplok jen juõn congregation emaroñ bõk tokjen kin juõn Kingdom Hall ekãl. Rein rej jutak ikijen Department in reiminene ñan katakin kumi in elder ko ñan lale aikwij eo kin juõn Kingdom Hall ekãl, kabukõt juõn jikin, kabukõt melele an kien kin makitkit ko, im melele nan in kaiñi ko jen Bible me rej tel jerbal in.
14 Ñe emaroñ, enaj kajitõk ibben congregation ko jet ñan kwelok ilo Kingdom Hall eo ekãl. Ilo wãwen in, remaroñ kajerbal jabawõt ko rej kortokjen ilo juõn wãwen emeletlet, im congregation ko remaroñ jibañ don ñan kõllã wõnãn aikwij ko jet. Renaj likit iman tata jerbal in ekkal Kingdom Hall ko me elaplok ri kwalok ro ie.
15, 16. (a) Ñe elõñlok jen juõn congregation enaj kajerbal juõn Kingdom Hall, ta men ko ren aikwij bwebwenato ibben circuit overseer eo? Kobaik box eo ilo peij 6. (b) Ilo ien bebe wõnãn jerbal in ekkal im jabawõt an congregation eo, ta nan in kaiñi ko jen Bible eo juõn en aikwij lemnak kake, im etke?
15 Ñe enaj laplok jen juõn wõt congregation ej bõk kunan ilo jerbal in ekkal, kumi in elder ro renaj aikwij bwebwenato ibben don elañe congregation ko renaj aikwij koba ibben don elikin an jutak Kingdom Hall eo ekãl. Rej aikwij bwebwenato kake ibben circuit overseer eo im Service Department eo ilo ra eo ilo Guam ej aikwij kamelimi. Kobalok ibben men in, elap an aorõk ñan jelã jete money remaroñ kajerbale ilo jinoin jerbal in ekkal eo. Kingdom Hall Construction Desk eo ej jerbal ekkar ñan nan in kaiñi eo me Jesus ear kwalok kake, eo ej bed ilo Luke 14:28: “Bwe wõn iami, e kõnan kalek juõn imõn bar, e jab jijõt mokta, im bebe kin wõnan, e naj maroñ in kamwijlok ke, jab ke?” Ñan air jelã ewi joñan money eo congregation eo emaroñ jabawõt ñan jerbal in ekkal Kingdom Hall eo im ñan air kõllã jabdewõt kain jibañ renaj bõke, elder ro renaj aikwij kõmmane juõn survey (etale) elikin ien eo rej kwelok ibben ro rej jutak kin Kingdom Hall Construction Desk eo.
16 Ta karõk eo enaj walok ñan lelok jabawõt kein? Reban aini men kein. Jen an eindein, ro uan congregation eo remaroñ likit jabawõt ko air ilo box in jabawõt eo me congregation ej likiti ñan kõllã aikwij ko. Family ko im armij ro kajjojo rej aikwij lemnak kin maroñ ko air kin jããn im ewi joñan remaroñ jabawõt.—1 Kor. 16:1, 2.
17. Ta menin aikwij ko congregation eo enaj aikwij in lali mokta jen an bõk melim kin jerbal in ekkal Kingdom Hall eo?
17 Bar juõn buñten nee ñan kajutak juõn Kingdom Hall ej kitibuj aikwij eo ñan kwalok juõn resolution (bebe) ñan (1) mõnõnõ im bõk pija in jekjekin Kingdom Hall eo, (2) mõnõnõ in bõk bũdej eo an Kingdom Hall eo, (3) mõnõnõ in bõk eddo eo ñan najirik im bukõt jikin kiki an ri jerbal ro, (4) mõnõnõ in bõk eddo eo ñan lale melan Kingdom Hall eo, (5) kwalok jete wõnãn kwonaj kõllã kajjojo alliñ, (6) mõnõnõ in kõttãik iumin tel an Department eo kin jerbal in ekkal im lukkun rejetak karõk ko ñan jibañ kalek Kingdom Hall eo, im (7) mõnõnõ in bõk eddo ñan lale im kejbãrok Kingdom Hall eo ekãl im kõllã wõnãn kin aikwij ko ie. Eliktata, wiaiki kõbwebweien mweo, im bõk maroñ ekkar ñan kien im kejbãroke. Men in enaj kalikar bwe aikwij ko ekkar ñan kien im men ko jet kin kõllã owõj ekkar ñan kien ko ilo alliñ eo rej lore.
18. Etke eaorõk ñan lor nan in tel jen dolul eo im atartar ion Jehovah ilo jar?
18 Enaj bõk ien ñan bõk juõn Kingdom Hall ekãl. Ñan wiaik bũdej eo ak mweo ilo juõn jikin emõn emaroñ juõn ien aitwerõk im jet ien ebin. Bõtab, ad lor nan in tel jen dolul eo im atartar kin jar bwe jen bõk kajerammõn ko an Jehovah, jemaroñ liki bwe Kingdom Hall ko renaj lõñlok.
Jerammõn Ko Relap Jen Karõk Eo Ekãl
19. Kajerammõn ko an Jehovah ej alikar ke ion karõk eo kin jerbal in ekkal Kingdom Hall, im ewi wãwen jemaroñ rejetake?
19 Ke Karõk in kin jerbal in ekkal Kingdom Hall ko ear jino ilo alliñ ko me ejjab bwe money ilo November 1999, elaplok jen 16,300 Kingdom Hall ko kar kaleke ilo 115 alliñ ko. Jabawõt ko an ro jeiir im jatid rej yokwe ibelakin lal rar kowõnmanlok bwe juõn joñan “ebwe” ear walok, inem ‘congregation eo me ejjab aikwiji ejjab lukkun lap, im congregation eo me ejjab bwe ejjab lukkun dik.’ (2 Kor. 8:14, 15) Elõñ wõt jerbal ej aikwij walok. Jerammõn ko ion karõk in enaj wawa ion jabawõt ko jen alliñ eo ad make. Jej reimanlok ñan jerammõn ko an Jehovah ion karõk eo kin jerbal in ekkal Kingdom Hall eo ilo Micronesia.
[Box eo ilo peij 4]
Ro Remõnõnõ in Lelok Ir Make ilo Jerbal in Ekkal Rej Kwalok Juõn Ãt Emõn
Elikin an jutak Kingdom Hall eo air, Congregation in Niebla ilo alliñ in Chile rar jejelok juõn letter ñan ra eo, im kwalok air kamolol kin karõk eo kin jerbal in ekkal Kingdom Hall eo.
“Ro jeiir im jatiir me rar itok ñan jibañ kij rar juõn jerammõn ñan congregation eo,” letter eo ear kamelele. “Kim naj kememej ir kin kadkad ko rar kwalok kake einwõt ettã buru, jitõb in jimwe wõt, im joij.”
Ri jerbal ro rar mõnõnõ kin jerbal in ekkal rar bõk kunair ie ilo jerbal in kwalok nan im emõn air keboj katak ko ilo kwelok ko an congregation. “Kin joñok ko air remõn,” letter eo ear wõnmanlok im ba, “jodikdik ro ilo congregation emwij air kajutak mejenkajjik ko ñan erom ro remõnõnõ in lelok ir make ilo jerbal in ekkal ilo ran ko rej bed imad.”
[Box eo ilo peij 6]
Jabawõt kin juõn Joñan Elap kin Money, Bũdej, im Kõbwebweien Kein Ekkal Ko
◼ Ro rej lemnak in jabawõt kin money ko relap ñan Kingdom Hall ko rej aikwij jilkinlok ñan account eo an office eo ilo ra eo. Jabawõt kein remaroñ kajenolok ñan kajerbali ñan jerbal in ekkal. Armij eo ear jabawõt ej aikwij jeje ñan office eo ilo ra eo kin melele ko jet.
◼ Ro rej lemnak in jabawõt kin bũdej rej aikwij jeje ñan ra eo im kameleleik jikin eo, joñan kilepen, kein kamol eo kin maroñ eo an ion bũdej eo ekkar ñan kien, im elañe ewõr jet men ko ekõnan bwe ra eo en kajejjeti. Ejjab aolep bũdej ko kar jabawõt kake emaroñ wãppen ñan kalek juõn Kingdom Hall ie.
◼ Ro rej lemnak in jabawõt kin kõbwebweien kein ekkal ko rej aikwij kebak ro rej bõk eddon jerbal in ekkal eo etan Kingdom Hall Construction Desk ak overseer eo kar jitõñe ñan lolorjake jerbal in ekkal ilo congregation eo air