Ruo M̦õttan Kõba

Juon wãween jej rejetake men ko an Aelõñ eo ej ilo ad jabawõt ñan jipañ jerbal in kwal̦o̦k naan eo ipel̦aakin lal̦. Ta el̦aññe ejiban peid ñan jabawõt?

Juon iien Jijej ear lo juon kõrã ejako pãleen ej ãti ruo m̦õttan kõba me edik tokjãer ilo nien m̦ani eo an tampel̦ eo. Yokwe eo an kõrã in ñan Jeova ear kõm̦akũt bũruon ñan “ãti men ko an otemjej, aet aolepen men in mour an.” (Mark 12:​41-44) An Jijej kar kwal̦o̦k kõn men in ej kalikkar bwe jabawõt eo an kõrã in ear l̦ap im aorõk im̦aan mejen Anij. Kar bar ãindein Kũrjin ro ilo raan ko an rijjelõk ro, rar watõke bwe ej juon jeraam̦m̦an ñan lel̦o̦k jabawõt ko. Kũrjin ro rem̦weiie im jeram̦õl jim̦or rar lel̦o̦k ekkar ñan joñan maroñ ko aer. Rijjelõk Paul ear kwal̦o̦k kõn joñak eo an Kũrjin ro ilo Masedonia me meñe rar kanooj “jeram̦õl . . . rar kanooj akwel̦ap im kajjitõk . . . bwe ren maroñ lel̦o̦k kun̦aaer ñan jipañ.”​—2 Ko. 8:​1-4, UBS.

Kõn men in, el̦aññe ewõr baj jidik ad maroñ ñan jabawõt ãinwõt kõrã eo ear lel̦o̦k ruo m̦õttan kõba, jen keememej bwe meñe edik jabawõt ko jej lil̦o̦k ak remaroñ oktak ñan juon joñan el̦ap. El̦aññe jej lel̦o̦k jãn tum̦wilal̦ in bũruod, men in enaaj kabuñbũruon Jemed ilañ kõnke “Anij ej yokwe eo e m̦õn̦õn̦õ in lel̦o̦k.”​—2 Ko. 9:⁠7.