Juon Ilju im Jekl̦aj Eaenõm̦m̦an im Ejokwane—Aolep Armej rej Kõn̦aan Men In
Kain ilju im jekl̦aj rot eo kokõn̦aan? Ejjel̦o̦k pere bwe ãinwõt enañin aolep armej, kokõn̦aan juon ilju im jekl̦aj eo eaenõm̦m̦an im ejokwane ñan kwe im baam̦le eo am̦—juon ilju eo me elem̦õn̦õn̦õ, em̦m̦an ãjmour ko ami ie, eaenõm̦m̦an, im el̦ap tõprak ak jeraam̦m̦an ko ie.
Ijoke, elõñ armej rej pere bwe emaroñ wõr juon aer ilju im jekl̦aj eo me ekkar ñan kõn̦aan eo aer. Em̦õj aer lo an wal̦o̦k iien kab wãween ko rejidimkij me rar jab kõtmãne kaki—ãinwõt nañinmej in COVID-19—me ekõm̦m̦an an oktak im jorrããn juon jukjukun pãd, jorrããn wãween mour ak apañ on̦ããn mour, im ekõm̦m̦an an mour ko aer pãd ilo kauwõtata. Tokjãn men kein, rej bõk eñjake eo bwe elukkuun to bwe en wõr juon aer ilju im jekl̦aj eo eaenõm̦m̦an im ejokwane.
Kõn wõt wãween ko me ejidimkij aer wal̦o̦k, armej rej kate er pukot juon wãween ak juon men me emaroñ tõll̦o̦k er ñan juon ilju im jekl̦aj eo em̦m̦an. Jet armej rej tõmak bwe mour ko aer rej pedped ioon jet kain kajoor ko jejjab maroñ loi me rej kõm̦m̦an an wal̦o̦k jeraam̦m̦an ak juon men ilo mour ko an armej. Elõñ rej jibadek jel̦ãl̦o̦kjen̦ im kõttõpar bwe ren m̦weiie, kõnke rej l̦õmn̦ak bwe men kein renaaj kõm̦m̦an bwe en tõprak men ko rekõn̦aan. Ro jet rej l̦õmn̦ak bwe men eo de eo rej aikuj in kõm̦m̦ane bwe en em̦m̦an mour ko aer ej ilo aer mour ãinwõt juon armej eo em̦m̦an.
Aolep wãween kein me kar kwal̦o̦k kaki renaaj ke kõm̦m̦an bwe kwõn maroñ lo juon ilju im jekl̦aj eo kokõn̦aan? Ñan lo uwaak eo, kwõj aikuj l̦õmn̦ak kõn kajjitõk kein:
Ta eo ilju im jekl̦aj eo am̦ ej lukkuun wawa ioon?
Pukot jel̦ãl̦o̦kjen̦ kab jããn remaroñ ke kõm̦m̦an bwe kwõn lo juon wãween mour eo em̦m̦anl̦o̦k?
Am̦ juon armej eo me em̦m̦an enaaj ke kõm̦m̦an bwe kwõn lo juon ilju im jekl̦aj eaenõm̦m̦an im ejokwane?
Ia eo kwõmaroñ bõk jipañ eo me kwõmaroñ lõke bwe enaaj lukkuun jipañ eok ñan lo juon ilju im jekl̦aj eo eaenõm̦m̦an im ejokwane?
Naan in Keeañ in enaaj jipañ eok ñan lo uwaak ko.