WÃWEEN BWE EN MAROÑ BÕJRAK AN WÕNM̦AANL̦O̦K WÕT KÕJDAT

3 | Jol̦o̦k Kõjdat Jãn L̦õmn̦ak Eo Am̦

Naanin Kakapilõk eo jãn Baibõl̦:

“Kom̦win kõm̦m̦an oktak ilo ami ukot l̦õmn̦ak ko ami, bwe kom̦win kam̦ool ñan kom̦ make kõn ta ankilaan Anij, eo em̦m̦an im ekkar im eweeppãn.”—ROM 12:2.

Mel̦el̦ein Naanin Kakapilõk In:

Men ko jej l̦õmn̦ak kaki raorõk ippãn Anij. (Jeremaia 17:10, UBS) Em̦ool bwe jej aikuj kõjparok kõj jãn ad ba ak kõm̦m̦ani men ko me rej kwal̦o̦k kõjdat, ijoke ebar wõr men ko jet jej aikuj kõm̦m̦ani. Kõjdat ekkã an jino wal̦o̦k ilo l̦õmn̦ak ko ad im bũruod. Kõn men in, jej aikuj jol̦o̦k jabdewõt l̦õmn̦ak im eñjake ko me rej kõm̦m̦an ad bõk eñjake in kõjdat. Eñin wãween eo wõt jemaroñ lukkuun “kõm̦m̦an oktak” im kõm̦m̦an bwe en bõjrak an wõnm̦aanl̦o̦k wõt kõjdat.

Men eo Kwõmaroñ Kõm̦m̦ane:

Lukkuun etale wãween am̦ l̦õmn̦ak im eñjake kõn ro jet—el̦aptata ro me eoktak aelõñ ko aer ak kil ko kilier. Kajjitõk ippam̦ make: ‘Ewi wãween aõ watõk er? Wãween aõ watõk er ej pedped ioon men ko ijel̦ã kaki kõn er ke, ak ej pedped ioon kalijekl̦o̦k?’ Kõjparok jãn weepjait ko ilo online, pijain alwõj ko, ak menin kam̦õn̦õn̦õ ko me rej kwal̦o̦k kõn kõjdat im lãj.

Naanin Anij emaroñ jipañ kõj ñan jol̦o̦k kõjdat jãn bũruod im l̦õmn̦ak ko ad

Ejjab aolep iien epidodo ñan etale l̦õmn̦ak im eñjake ko ad ilo juon wãween ejim̦we. Bõtab Naanin Anij emaroñ jipañ kõj ñan “kaalikkar l̦õmn̦ak ko im kõn̦aan ko an bõro.” (Hibru 4:12) Innem wõnm̦aanl̦o̦k wõt im etale Baibõl̦ eo. Keidi katak ko ie ñan l̦õmn̦ak ko am̦, im kate eok joñan wõt am̦ maroñ ñan kõm̦m̦an bwe l̦õmn̦ak ko am̦ ren errã ippãn men ko Baibõl̦ ej katakin. Naanin Anij emaroñ jipañ kõj ñan jol̦o̦k kõjdat eo me “elukkuun pen [an] jako” jãn l̦õmn̦ak ko ad im bũruod.—2 Korint 10:4, 5.

Bwebwenatoun Mour eo An—STEPHEN

Ear Ukot Wãween an L̦õmn̦ak

Stephen im ro uwaan baam̦le eo an rar iioon kõjdat jãn ro emouj kilier. Kõn men in, ear itoklimo kõn juon kumi me rar kõm̦m̦an poktak im jum̦ae kien bwe en wõr aer jim̦we im maroñ. Ejjabto tokãlik, ear jino kobal̦o̦k ippãn kumi ko me rej m̦an armej ro redike er. Stephen ej ba: “Juon iien ña im ro m̦õtta kõmar etal ñan juon im̦õn alwõj im alwõje pijain an kar RiAfrica ro jem̦aan eñtaan kõn aer kar kuli ñan ripãlle. Kõn ammim kar lo wãween an kar jab jim̦we aer kõm̦m̦an ñan rein, kõmar m̦an ajri in pãlle ro ilo im̦õn alwõj eo. Innem kõmar etal ñan jikin ko jet repaak bwe kõmin bar kappok ripãlle bwe kõmin m̦an er.”

Ear lukkuun oktak l̦õmn̦ak eo an Stephen ke ear jino katak Baibõl̦ ippãn Ri-Kõnnaan ro an Jeova. Ej keememejtok iien ko im ba: “Kõn aõ kar dik im rũttol̦o̦k ilo jikin ko el̦ap kalijekl̦o̦k ie, men ko rar wal̦o̦k ibwiljin Ri Kõnnaan ro an Jeova rar lukkuun kabwilõñ ña. Ñan waanjoñak, ke juon ripãlle me ej Ri Kõnnaan ro an Jeova ear etal ñan juon jikin ettol̦o̦k, ear likũti ajri ro nejin bwe juon baam̦le in ri kilmeej ren lale er. Bareinwõt, juon baam̦le in ripãlle ear kõtl̦o̦k bwe juon likao in ri kilmeej en jokwe ippãer kõnke ear aikuj jikin an jokwe.” Stephen ear lukkuun tõmak bwe Ri-Kõnnaan ro an Jeova, er eo rej yokwe ro jeier im jatier me Jesus ear kanaan bwe enaaj wal̦o̦k ibwiljin Kũrjin ro rem̦ool.—Jon 13:35.

Ta eo ear jipañ Stephen bwe en maroñ bõjrak jãn kõm̦m̦an ko el̦ap kõjdat ie? Eoon eo ilo Rom 12:2 ear jipañ e. Ej ba: “Iar jino kile bwe ij aikuj ukot wãween aõ l̦õmn̦ak. Iar aikuj kõkããl l̦õmn̦ak ko aõ bwe in jab baj aenõm̦m̦an wõt ippãn ro jet ak in bar kile bwe eñin wãween mour eo em̦m̦antata.” Stephen ej kiiõ m̦õn̦õn̦õ kõn juon mour me ejjel̦o̦k eñjake in kõjdat ie ium̦win elõñl̦o̦k jãn 40 iiõ ko.