Jesus—Bũrij L̦apl̦ap eo Ad me El̦ap Tũriam̦o Ippãn

1-2. (1) Etke Jeova ear jilkintok eo Nejin ñan lal̦ in? (2) Ta ko jenaaj etali ilo katak in? (Hibru 5:​7-9)

ENAÑIN 2,000 iio ko remootl̦o̦k, Jeova Anij ear jilkintok eo Nejin me ejitõnbõro ippãn ñan lal̦ in. Etke? Juon un ej ñan karõl̦o̦k armej ro jãn jerawiwi im mej im ñan n̦amejal̦an aolep apañ ko rej wal̦o̦k kõn wõt Setan. (Jon 3:16; 1 Jon 3:8) Jeova ear bareinwõt jel̦ã bwe wãween ko Jesus enaaj kar iiooni ijin ioon lal̦ renaaj kar jipañe bwe en erom juon Bũrij L̦apl̦ap ñan kõj me emel̦el̦e kõn eñjake ko ad im el̦ap an tũriam̦o. Jesus ear jino jerbal eo an ãinwõt juon Bũrij L̦apl̦ap ãlikin an kar peptaij ilo iiõ eo 29 C.E.a

² Ilo katak in, jenaaj etale wãween an men ko Jesus ear iiooni ijin ioon lal̦ kar kõpooje bwe en juon Bũrij L̦apl̦ap me el̦ap tũriam̦o ippãn. Ilo ad kam̦wilal̦l̦o̦k ad mel̦el̦e kõn wãween kar kõpooj Jesus bwe en “weeppãn” ak jejjet ñan jerbal in an, jenaaj kile bwe epidodol̦o̦k ad jar ñan Jeova im epaakel̦o̦k E, meñe jej ebbweer kõn jerawiwi ko jaar kõm̦m̦ani ak kõn m̦õjn̦o̦ ko ewõr ippãd.—Riit Hibru 5:​7-9.

EO NEJIN ANIJ ME EJITÕNBÕRO EJ ITOK ÑAN LAL̦ IN

3-4. Ta oktak ko rel̦l̦ap Jesus ear iiooni ke ear pãd ijin ioon lal̦?

³ Kõj aolep ear wõr juon iien ear wõr oktak ko ilo mour ko ad, ãinwõt ad aikuj em̦m̦akũt jãn m̦õko im̦õd im etal jãn baam̦le ko ad im ro m̦õttad. Emaroñ kar jab pidodo ñan kõm̦m̦ani oktak kein. Bõtab ejjel̦o̦k juon iaad ear kõm̦m̦ane joñan oktak ko Jesus ear kõm̦m̦ani. Ke ear pãd ilañ, ear enjel̦ eo eutiejtata iaan aolepen enjel̦ ko jet. Jeova ear lukkuun yokwe Jesus, im Jesus ear m̦õn̦õn̦õ aolep iien kõnke ear pãd ‘ianmoon̦in’ pein Jemãn im jerbal ippãn. (Sam 16:11; JK. 8:30) Ijoke, Pilippai 2:7 ej ba bwe Jesus ear m̦õn̦õn̦õ in “kaarmejjeteik men otemjej” ilañ bwe en mour ijin ioon lal̦ ippãn armej ro rejjab weeppãn.

⁴ Bareinwõt, l̦õmn̦ak kõn men ko rar wal̦o̦k ilo mour eo an Jesus ilo tõre eo ear juon niñniñ im juon ajri. Jesus ear l̦otaktok ñan juon baam̦le me rar jeram̦õl. Jej kile men in ikijjeen kein katok eo an jemãn im jinen ilo tampel̦ eo ãlikin an kar l̦otak. (Liv. 12:8; Luk 2:24) Ke Kiiñ Herod ear roñ bwe Jesus ear l̦otak, ear kajjioñ in m̦ane. Bwe Herod en jab jibwe er, baam̦le eo ear ko ñan Ijipt im jokwe ie ãinwõt ruwamãejet ro ium̦win jidik iien. (Matu 2:​13, 15) Alikkar bwe ear lukkuun oktak mour eo an Jesus ijin ioon lal̦ jãn mour eo an ilañ!

5. Ta ko Jesus ear loi ke ear pãd ijin ioon lal̦, im ewi wãween an kar men in kõpooje ñan jerbal eo an ãinwõt Bũrij L̦apl̦ap eo ad? (Bar lale pija eo.)

⁵ Ke Jesus ear pãd ijin ioon lal̦, ear lo an armej ro eñtaan im an lukkuun pen mour ko aer. Ejjel̦o̦k pere Jesus emel̦el̦e kõn joñan ad metak ñe ej mej juon eo ejitõnbõro ippãd kõnke emaroñ kar wõr ro rejitõnbõro ippãn me rar mej, ekitibuj Josep, eo jemãn me ear kõkkaajiririik e. Ke Jesus ear kõm̦m̦ane jerbalin kwal̦o̦k naan eo an, ear iioon armej ro relõba, repilo, rejjab maroñ em̦m̦akũtkũt, im ro me ear mej ajri ro nejier. Jesus ear lukkuun tũriam̦okake armej rein. (Matu 9:​2, 6; 15:30; 20:34; Mark 1:​40, 41; Luk 7:13) Em̦ool bwe ke Jesus ear pãd ilañ, ear lo an armej ro eñtaan. Bõtab ke ear mour ãinwõt juon armej ijin ioon lal̦, ear l̦apl̦o̦k an mel̦el̦e kõn eñjake ko armej rej bũki kõn wõt aer eñtaan. (Ais. 53:4) Wãween ko Jesus ear iiooni ijin lal̦ rar jipañe ñan mel̦el̦e kõn eñjake ko an armej ro im joñan aer eñtaan kõn apañ ko reppen rej iiooni ilo mour ko aer. Im ãinwõt armej ro jet, Jesus bareinwõt ear m̦õk, inepata, im bũrom̦õj.

JESUS EJ KWAL̦O̦K AN YOKWE ARMEJ RO

6. Ta eo jej katak jãn waanjoñak ko an ri-kanaan Aiseia kõn an Jesus kwal̦o̦k tũriam̦o ñan armej ro? (Aiseia 42:3)

⁶ Ilo jerbalin kwal̦o̦k naan eo an, Jesus ear kwal̦o̦k an lukkuun tũriam̦o ñan ro rar m̦õjn̦o̦ im ear nana an ro jet kõm̦m̦an ñan er. Ke ear kõm̦m̦ane men in, ear kajejjet kũtien kanaan eo Jeova ear kwal̦o̦k ikijjeen ri-kanaan Aiseia. Jet iien, Jeje ko ilo Kajin Hibru ej keidi armej ro ekajoor tõmak ko aer ñan juon jikin kallib ewãmourur ak wõjke ko raetok im rekajoor. (Sam 92:12; Ais. 61:3; Jrm. 31:12) Ijoke, ekkã an Baibõl̦ keidi ro rejeram̦õl im ro rem̦õjn̦o̦ ñan juon koba ak menin eddek me ekob im ñan juon l̦aam̦ me edik an urur—men ko me ro jet rej watõk bwe ejjel̦o̦k tokjãer. (Riit Aiseia 42:3; Matu 12:20) Jeova ear kõm̦akũt ri-kanaan Aiseia ñan kõjerbal waanjoñak kein ñan kanaan kõn wãween an naaj Jesus kwal̦o̦k yokwe im tũriam̦o ñan armej ro me ro jet rar reilal̦l̦o̦k ñan er.

7-8. Ewi wãween an kar Jesus kajejjet kũtien kanaan eo an Aiseia?

⁷ Ri-jeje Gospel eo Matu ear kwal̦o̦k bwe Jesus ear kajejjet kũtien kanaan eo an Aiseia me ear ba: “Juon koba eobab Ejjãmin ruje, im l̦aam̦ eo edik an urur Ejjãmin kune.” Ikijjeen menin kabwilõñlõñ ko an, Jesus ear jipañ armej ro me ro jet rar kõjekdo̦o̦n er im remaroñ kar l̦õmn̦ak bwe rej ãinwõt juon menin eddek ekob. Bareinwõt, ear jipañ ro ejjel̦o̦k aer kõjatdikdik me remaroñ kar l̦õmn̦ak bwe rej ãinwõt juon l̦aam̦ edik an urur im ej pojãn kun. Juon iaan armej rein ear juon em̦m̦aan me ear l̦ap an lõba. Emaroñ kar ejjel̦o̦k an em̦m̦aan in kõjatdikdik bwe enaaj mour jãn nañinmej in an ak bwe enaaj bar kobal̦o̦k ippãn baam̦le eo an im ro m̦õttan. (Luk 5:​12, 13) Jesus ear bareinwõt iioone juon em̦m̦aan me ear jarroñroñ im ear pen an kõn̦aan. Baj pijaikl̦o̦k m̦õk wãween an em̦m̦aan in maroñ kar eñjake ke ear lo an ro jet m̦õn̦õn̦õ ilo aer bwebwenato ak ejjab maroñ mel̦el̦e ta ko rej ba. (Mark 7:​32, 33) Bõtab, ebar wõr juon men me ear kõm̦m̦an an lukkuun kabũrom̦õjm̦õj wãween eo em̦m̦aan rein rar iioone.

⁸ Ilo tõre ko an Jesus, elõñ iaan ri-Ju ro rar tõmak bwe unin an armej ro wõr aer nañinmej ak utam̦we ilo ãnbwinnier, ej kõn jerawiwi ko aer ak an ro jineer im jemãer. (Jon 9:2) Kõn wõt tõmak in ebõd, ear nana an ro jet kõm̦m̦an ñan rein renañinmej, im men in ear kõm̦m̦an aer l̦õmn̦ak bwe ejjel̦o̦k tokjãer. Jesus ear kõmour ro rar eñtaan kõn nañinmej ko aer im kõm̦m̦an bwe en bar wõr aer kõjatdikdik ilo Anij. Ilo an kar ãindein, Jesus ear kajejjet kũtien kanaan eo an Aiseia. Ta eo men in ej katakin kõj kõn wãween an Jesus watõk kõj ilo raan kein?

9. Ewi wãween an Hibru 4:​15, 16 kaalikkar bwe Bũrij L̦apl̦ap eo ad elukkuun mel̦el̦e kõn eñjake ko an kõj armej ro rejjab weeppãn?

⁹ Riit Hibru 4:​15, 16. Jemaroñ lõke bwe aolep iien Jesus enaaj kwal̦o̦k tũriam̦o ñan kõj. Ta mel̦el̦ein men in? Juon eo etũriam̦o ej mel̦el̦e kõn eñjake ko an ro rej bũrom̦õj ak iioon eñtaan. Naanin Grik eo ñan “mel̦el̦e” ej mel̦el̦ein ñan bõk eñjake ko an bar juon armej. (Bar lale Hibru 10:​34, ijo me Paul ej kõjerbale ejja naanin Grik in wõt.) Bwebwenato ko ilo Baibõl̦ kõn menin kabwilõñlõñ ko an Jesus rej kwal̦o̦k joñan an kar Jesus lukkuun kea im tũriam̦okake armej ro. Ear jab l̦õmn̦ak bwe ej aikuj kõmour armej ro kõnke ej juon jerbal ej aikuj kõm̦m̦ane. Ijoke, ear lukkuun kea kõn er im ear kõn̦aan jipañ er. Ñan waanjoñak, ke Jesus ear kõmouri em̦m̦aan eo ear lõba, emaroñ kar kõm̦m̦ane menin kabwilõñlõñ in jãn juon jikin ettol̦o̦k, bõtab ijello̦kun an ãindein, ear em̦m̦akũt im uñũri em̦m̦aan eo. Bõlen eñin ej iien eo jinointata juon armej ej bar uñũri em̦m̦aan in ium̦win elõñ iiõ ko! Bareinwõt, Jesus ear kwal̦o̦k jouj ñan em̦m̦aan eo ejarroñroñ ikijjeen an kar kõmouri ilo juon jikin ejjel̦o̦k armej im ekkeroro ie. Im ke juon ri-Parisi ear reilal̦l̦o̦k ñan kõrã eo ear ukel̦o̦k me ear katutuuk neen Jesus kõn dãnnin kõmjaal̦al̦in mejãn im kõmõrãiki neen kõn kool̦an bõran, Jesus ear lukkuun jojomare e. (Matu 8:3; Mark 7:33; Luk 7:44) Jesus ear jab kõjekdo̦o̦n ro ear wõr aer nañinmej ak ro rar kõm̦m̦ani jerawiwi ko rel̦l̦ap. Ijello̦kun an ãindein, ear lukkuun karwaineneik er im kwal̦o̦k an yokwe er. Jemaroñ lõke bwe wãween dein an Jesus kwal̦o̦k tũriam̦o ñan kõj.

ANÕKE BŨRIJ L̦APL̦AP EO AD ILO RAAN KEIN

10. Ta menin letok ko jãn Jeova jemaroñ kõjerbali ñan jipañ ro repilo im ro rejarroñroñ ilo raan kein? (Bar lale pija ko.)

¹⁰ Ãinwõt ri-kal̦oor ro an Jesus me retiljek, jej lukkuun kate kõj ñan anõke joñak eo an ikijjeen ad kwal̦o̦k yokwe, tũriam̦o, im bũrom̦õj ippãn ro rej eñtaan. (1 Pit. 2:21; 3:8) Em̦ool bwe jejjab maroñ kõmour ro repilo ak ro rejarroñroñ, ak jemaroñ jipañ er ñan katak kõn Jeova im epaakel̦o̦k E. Ñan waanjoñak, em̦õj ukote bok ko ad ilo elõñl̦o̦k jãn 100 kajin ko an ro rejarroñroñ. Im ñan ro repilo ak epen aer lol̦o̦kjen̦, kar kõm̦m̦ani bok ko ad ilo elõñl̦o̦k jãn 60 kajin ko ilo braille ak bok ko ñan repilo. Bareinwõt, ilo elõñl̦o̦k jãn 100 kajin ko, kar kõm̦m̦ani pijain alwõj ko ad bwe en wõr juon ainikien me ej kõmel̦el̦eik ta ko rej wal̦o̦k ilo pija eo. Menin letok kein rej ñan jipañ ro repilo im ro rejarroñroñ ñan epaakel̦o̦k Jeova im eo Nejin.

11. Ewi wãween an doulul eo an Jeova anõke Jesus ilo aer kwal̦o̦k tũriam̦o ñan aolep armej? (Jerbal 2:​5-7, 33) (Bar lale pija ko.)

¹¹ Doulul in an Jeova ej lukkuun kate ñan jipañ armej otemjej ipel̦aakin lal̦ in ñan epaakel̦o̦k Jeova. Keememej bwe ãlikin an kar Jesus jerkakpeje, ear lutõkl̦o̦k jetõb kwõjarjar ioon ri-kal̦oor ro an bwe aolep ro me rar pãd ilo Kwõjkwõjin Pentekost eo ren maroñ roñ ennaan eo em̦m̦an “ilo kajin ko aer” kajjojo. (Riit Jerbal 2:​5-7, 33.) Ium̦win tõl eo an Jesus, doulul in ad ej kõm̦m̦ani bok ko me rej pedped ioon Baibõl̦ ilo elõñl̦o̦k jãn 1,000 kajin ko, meñe jejjo wõt armej rej kõnono ilo jet iaan kajin kein. Ñan waanjoñak, jejjo wõt iaan armej ro me rej jokwe ilo North im South America rej kõnono ilo jet iaan kajin ko an armejin Amerindian. Meñe ãindein, ak em̦õj ukoti bok ko ad ilo elõñl̦o̦k jãn 160 iaan kajin kein ñan jipañ elõñ armej bwe ren roñ kõn ennaan eo em̦m̦an. Bareinwõt, em̦õj ukot bok ko ad ilo elõñl̦o̦k jãn 20 kajin Romany. Elõñ to̦ujin armej ro me rej kõnono ilo kajin kein rej kiiõ karejar ñan Jeova.

12. Ta ko jet doulul eo an Jeova ej kõm̦m̦ani ñan jipañ armej ro ilo raan kein?

¹² Kobal̦o̦k ippãn an doulul eo an Jeova kate er ñan kajeeded ennaan eo em̦m̦an, rej bareinwõt lel̦o̦k jipañ ñan ro rar iioon jorrããn jãn l̦añ ko rel̦l̦ap ak men ko ãierl̦o̦kwõt. Kõn men in, elõñ to̦ujin iaan ro jeid im jatid repojak in kõjerbal iien im maroñ ko aer ñan jipañ ro jeid im jatid me rej pãd ilo aikuj. Doulul in ad ej bareinwõt kalõk Im̦õn Kweilo̦k ko rel̦amwaan ñan an armej ro koba ippãn doon im kal̦apl̦o̦k aer jel̦ã kõn joñan an Anij yokwe er.

BŨRIJ L̦APL̦AP EO AD EMAROÑ JIPAÑ EOK

13. Ta jet iaan wãween ko Jesus ej jipañ kõj?

¹³ Ãinwõt jabõt eo ad em̦m̦an, Jesus ej kabwe aikuj ko ad kajjojo ilo jetõb bwe jen maroñ epaake wõt Jeova. (Jon 10:14; Eps. 4:7) Jet iien, wãween ko reppen jej iiooni ilo mour ko ad remaroñ kõm̦m̦an ad ebbweer, joñan jemaroñ bõk eñjake eo bwe jej ãinwõt juon l̦aam̦ edik an urur ak juon menin eddek ekob. Jemaroñ lukkuun ebbweer kõnke jaar bõk juon nañinmej ekauwõtata, jaar kõm̦m̦ane juon bõd, ak ejjab em̦m̦an kõtaan eo ad ippãn juon iaan ro jeid im jatid. Emaroñ lukkuun pen ñan ad l̦õmn̦ak wõt kõn kõjatdikdik eo ad ilju im jekl̦aj im jab l̦õmn̦ak wõt kõn apañ ko jej iiooni. Bõtab, keememej bwe Jesus ej loe wãween ko kwõj iiooni im elukkuun mel̦el̦e kõn eñjake ko am̦. Kõn an Jesus tũriam̦okake eok, ej em̦m̦akũt im jipañ eok. Ñan waanjoñak, ñe kwõj m̦õjn̦o̦, emaroñ kõjerbal jetõb kwõjarjar ñan kõkajoor eok. (Jon 16:7; Tai. 3:6) Bareinwõt, Jesus emaroñ kõjerbal em̦m̦aan ro me rej “menin letok” im rũttõmak ro jeid im jatid ñan kõkajoor, kõketak, im jipañ eok.—Eps. 4:8.

14. Ta eo jemaroñ kõm̦m̦ane ñe jej ebbweer?

¹⁴ Ñe kwõj ebbweer, keememej bwe Jesus ej Bũrij L̦apl̦ap eo ad, im kõl̦mãnl̦o̦kjen̦ kõn ta mel̦el̦ein men in ñan kwe. Keememej bwe Jeova ear jilkintok Jesus ñan lal̦ in, ejjab ñan katok kõn mour eo an wõt, ak ñan bareinwõt jipañe bwe en kal̦apl̦o̦k an mel̦el̦e kõn apañ ko me kõj armej jejjab weeppãn jej iiooni. Ñe jej ebbweer kõn wõt jerawiwi ko ad ak m̦õjn̦o̦ ko ewõr ippãd, Jesus ekõn̦aan im epojakin jipañ kõj “ilo iien eo ejejjet.”—Hib. 4:​15, 16.

15. Ta eo ear jipañ juon jeid im jatid em̦m̦aan ñan jepl̦aak ñan eklejia eo?

¹⁵ Jesus ej bareinwõt tõl armej ro an ilo aer kate er ñan pukot im jipañ ro rar jebwãbwe jãn bwij eo an Jeova. (Matu 18:​12, 13) L̦õmn̦ak kõn bwebwenato eo an Stefano.b Kar jol̦o̦ke jãn eklejia eo ium̦win 12 iiõ ko. Juon raan, ear kããlõt ñan etal ñan juon iaan iien kweilo̦k ko. Ej ba: “Meñe ear jab pidodo ñan ña, ak iar kõn̦aan jepl̦aak ñan baam̦le eo an Jeova. Em̦m̦aan ro rej lale eklejia me rar kweilo̦k ippa rar lukkuun karwaineneik eõ. Ewõr iien ko iar bõk eñjake eo bwe ejjel̦o̦k tokja im iar kõn̦aan bõjrak jãn aõ kõm̦m̦an wõnm̦aanl̦o̦k ko. Bõtab, em̦m̦aan ro rej lale eklejia rar kakeememej eõ bwe Jeova im Jesus rekõn̦aan bwe in kate wõt eõ im jab ebbweer. Ke kar kõjepl̦aak eõ ñan eklejia eo, aolep ro ilo eklejia eo rar lukkuun karwaineneik eõ im baam̦le eo aõ. Tokãlik, kõrã eo ippa ear jino katak Baibõl̦ im kiiõ kõm̦ro ej karejar ñan Jeova ãinwõt juon baam̦le.” Ejjel̦o̦k pere bwe Bũrij L̦apl̦ap eo ad me el̦ap yokwe ippãn elukkuun m̦õn̦õn̦õ ñe ej lo an aolep ro ilo eklejia eo jipañ ro rej ukel̦o̦k bwe ren bar jepl̦aak ñan eklejia eo!

16. Etke el̦ap am̦ kam̦m̦oolol bwe ewõr juon ad Bũrij L̦apl̦ap me el̦ap tũriam̦o ippãn?

¹⁶ Ke Jesus ear pãd ijin ioon lal̦, ear jipañ elõñ armej ilo iien eo ejejjet. Rainin, jemaroñ lukkuun lõke bwe enaaj jipañ kõj ilo iien eo jej aikuji. Im ilo naaj lal̦ eo ekããl me ej pedotok, Jesus enaaj jipañ armej ro rej pokake ñan lukkuun rõl̦o̦k jãn jerawiwi im jab weeppãn. El̦ap ad kam̦m̦oolol Anij eo ad, Jeova, kõnke joñan an lukkuun yokwe kõj, ear letok eo Nejin bwe en Bũrij L̦apl̦ap eo ad me el̦ap tũriam̦o ippãn!