Jipañ ñan Kõrã ro Enana an Ro Jet Kõm̦m̦an ñan Er
“IPEL̦AAKIN lal̦ in, elõñ milien kõrã ro im ledik ro me enana an ro jet kõm̦m̦an ñan er. Kwõj ke juon iaaer? Etale etke Anij ej kea kõn eok im etke ekõn̦aan bwe kwõn bõk kõjparok, im ta eo enãj kõm̦m̦ane ñan ro rej kõmetak ak m̦ane eok.”
Erkein ej naanin ijjino ko ilo katak eo etan “Women’s Safety—The Bible’s Perspective” ilo jw.org. Ilo jem̦l̦o̦kin katak in, ewõr juon link ñan taunl̦outi katak in. Innem, ñe kokõn̦aan, kwõmaroñ bũriini im nukiji ilo emãn m̦õttan ko bwe en erom juon tũrããk me emãn peij ie. Juon jeid im jatid kõrã jãn America etan Stacy ej ba: “Iar bũriini kaape in katak in, im kõm̦ro juon jeid im jatid kõrã ear bũkil̦o̦k kaape kein ñan juon shelter me kõrã ro rej ko ñane bwe ren bõk kõjparok. Shelter in ej pãd ilo teretore eo an eklejia eo ammim.”
Juon ri-jerbal in shelter eo ear kajjitõk ñe kõrã rein jeid im jatid remaroñ bar lel̦o̦k jejjo kaape in tũrããk in bwe en leto-letak ñan ro jet ilo shelter in. Tokjãn men in, kar bar lel̦o̦k 40 kaape in tũrããk in im 30 jw.org kaat jidikdik ko. Tokãlik ke kõrã ro jeid im jatid rar bar jepl̦aak, mãnija eo an shelter in ear kõn̦aan bwe ren kwal̦o̦k ñan kõrã ro rej jokwe ijin kilen aer maroñ katak Baibõl̦.
Stacy im bar ruo jeid im jatid kõrã rar bar lo tõprak ilo bar juon shelter. Rar lel̦o̦k l̦alem kaape in tũrããk in im ri-jerbal ro rar kajjitõk ñe remaroñ bar lel̦o̦k elõñl̦o̦k kaape ko. Juon iaan ri-jerbal ro ijin ear ba: “Tũrããk in enaaj jipañ kõrã ro ijin.” Ej wõnm̦aanl̦o̦k wõt im ba: “Jelukkuun aikuji tũrããk in.” Tokãlik ke kõrã ro jeid im jatid rar bar jepl̦aak, jet iaan kõrã ro ijin rar kobal̦o̦k im kõrã ro jeid im jatid rar kwal̦o̦k ñan er ta ko rej wal̦o̦k ñe jej katak Baibõl̦ ippãn armej ro. Innem, ruo iaan kõrã ro rar kõn̦aan etal im kweilo̦k ippãer ilo kweilo̦k eo tok juon me ej wal̦o̦k ilo wiikããn.
Stacy ej ba: “Kõmar lukkuun bwilõñ kõn an armej ro m̦õn̦õn̦õ in riiti tũrããk in elukkuun em̦m̦an. Ke kõmar bũriini im nukiji tũrããk in ilo emãn m̦õttan ko, ear lukkuun jejjet im aiboojoj tũrããk in ñan ad kwal̦o̦k ennaan eo kõn Aelõñ eo ñan kõrã rein me ear nana an ro jet kõm̦m̦an ñan er. Elukkuun kar tõpar bũruommim ke kõmar lo an elõñ armej m̦õn̦õn̦õ in bõk tũrããk in. Kõmij lukkuun kijooror in loe wãween an naaj Jeova kõjeraam̦m̦ane aolep kate ko ammim ñan tõpar rein kõn ennaan eo em̦m̦an.”