Unin Airro Kar Luji Jo Jikiir

LALE mõk men eo ej walok kiõ. Rej kadriojlok Adam im Iv jen jikin kallip e aibujuij in Iden. Kwo jela ke ta unin?

Ej kinke r’ar kõmõn juõn men e kanuij nana. Inem Jeova ej kajeik irro. Kwo jela ke ewi men eo enana me Adam im Iv r’ar kõmõne?

R’ar kõmõn juõn men me Anij e ar jiroñ ir bwe ren jab kõmõne. Anij e ar jiroñ ir bwe re maroñ mõña jen wijki ko i jikin kallip eo. Ak jen juõn wijki Anij e ar ba ren jab mõña jen e, bwe ren jab mij. E ar kejbarok wijki eo bwe en an mõke. Im je jela bwe e bwir ar bõk juõn men me ej an bar juõn, jejjab ke? Eokwe, ta eo e ar walok?

Juõn ran ke Iv e ar mõke ian ilo jikin kallip eo, juõn serpent e ar konono iben. Baj lemnõk kin men in! E ar jirõn Iv bwe en mõña leen wijki eo me Anij e ar jiroñ irro bwe ren jab mõña jen e. Kiõ, ke Jeova e ar kõmõnmõn serpent ko e ar jab kõmõnmõn ir bwe ren konono. Inem men in ej aikwij melelen bwe bar juõn eo e ar kõmõn bwe serpent eo en konono. Kar wõn eo?

E ar jab Adam. Inem kar aikwij bwe en juõn ian ro me Jeova e ar kõmõnmõni mokta jen an kõmõn lõl in. Rein rej enjel ro, im je ban lo ir. Enjel in e ar oktak im lukkun utiej buruen. E ar jino lemnõk bwe en juõn iroij einwõt Anij. Im e ar kõnan bwe armij ro ren bokake e jen air bokake Jeova. Kar enjel in eo im e ar kõmõn bwe serpent eo en konono.

Enjel in e ar maroñ in mone Iv. Ke e ar jiroñ e bwe enaj oktak im einwõt. Anij elañe enaj mõña leen wijki eo, e ar tõmak e. Inem e ar mõña, im Adam e ar mõña bareinwõt. Adam im Iv r’ar jab bokake Anij, im eñin unin airro kar luji jo jikiir e aibujuij ilo jikin kallip eo.

Ak juõn ien Anij enaj kõmõn bwe aolepen lõl en aibujuij in wõt kar jikin kallip in Iden. Tokelik jenaj katak kin wãwen am maroñ jibañ kõmõn bwe en eindrein. Ak kiõ, jen lale ta eo e ar walok ñõn Adam im Iv.