Ejino Juõn Wãwen Mour E Bin

ILIKIN jikin kallip in Iden, Adam im Iv r’ar iion elõñ abañ. R’ar aikwij in lukkun kate ir jerbal kin kijiir. Jen air lo wijki ko re kouwa im aibujuij, r’ar lo elõñ kaliklik ko im mãr kuj jino edrek i bellakeir. Eñin men eo e ar walok ke Adam im Iv r’ar jab bokake Anij im jolok jimjera eo air Iben.

Ak elap jen baj menkein wõt, Adam im Iv r’ar jino mij. Kememij, Anij e ar kakil irro bwe renaj mij elañe r’ar mõña leen juõn wijki. Eokwe, ejja ran eo wõt im r’ar mõña jen e r’ar jino mij. E mõke lap air bwebwe in jab eoroñ Anij!

Aolep ajiri ro nejin Adam im Iv r’ar lotak elikin an kar Anij kadriojlok jiniir im jemair jen jikin kallip in Iden. Melelen men in bwe ajiri ro renaj bareinwõt aikwij in ridtolok im mij.

Elañe Adam in Iv r’ar baj bokake Jeova, mour en kar juõn men in kamõnõnõik ir kap ro nejiir. Aolepiir re naj kar mour in drio ilo loñliñ ion lõl. Ejelok juõn enaj kar aikwij in ridtolok, nañinmij im mij.

Anij e kõnan bwe armij ro ren mour in drio ilo mõnõnõ, im Ej kalimur bwe juõn ien re naj. Ejjab lõl in wõt im enaj aibujuij, ak aolep armij ro ie renaj ejmour. Im ro otemjej ion lõl renaj jeran dron im jeran Anij.

Ak ejoko an kar Iv jeran Anij. Inem ke e ar keutak ro nejin, e ar jab biruru ñõn e. E ar iñtan. An jab bokake Jeova e ar men in bõktok ion elap buromõj, kwoj kil ke?

E ar lõñ ro nejin Adam im Iv man im kõra. Ke e ar lotak leo manjeir, r’ar naetan Kein. R’ar naetan leo nejiir ken ka ruo, Ebel. Ta e ar walok ñõn ir? Kwo jela ke?