Jekob Ej Ilok Ñõn Heran

KWO jela ke wõn lõmarein Jekob ej konono ñõn ir? Elikin an ilok iomin elõñ ran, Jekob e ar iion ir iturin juõn aibij lõl. R’ar lale sip ko air. Jekob e ar kajitõk: ‘Komro itok jen ia?’

R’ar ba, ‘Jen He’ran.’

‘Komro jela ke kajien Le’ban?’ Jekob e ar kajitõk.

‘Aet,’ r’ar uak. ‘Lale mõk, kora eo nejin, Rejel ne tok iben sip kõn an jemen.’ Kwoj lo ke an Rejel itok jen ijueo?

Ke Jekob e ar lo an Rejel itok iben sip ko an dri korean, Le’ban e ar ilem karebillok dreka eo jen mejen aibij lõl eo bwe sip ko ren maroñ irak. Inem Jekob e ar mejenmaik Rejel im ba kajien ñõn e. Lio e ar lukkun kumlok im e ar etal ñõn mweo imõn im jiroñ Le’ban, jemen.

Le’ban e ar lukkun mõnõnõ bwe Jekob en jokwe iben. Im ke Jekob e ar kajitõk an belek Rejel, Le’ban e ar loñliñ. Bõtap, e ar kajitõk iben Jekob bwe en jerbal ilo jikin kallip eo an iomin jiljilimjuõn yiõ bwe en kap bõk Rejel. Kinke e ar lap an yokwe Rejel, Jekob e ar kõmõne men in. Ak ke e ar jejjit ien ñõn belele eo, kwo jela ke ta eo e ar walok?

Le’ban e ar lelok Li’a, lio nejin e ridtolok ñõn Jekob im jab Rejel. Ke Jekob e ar erra bwe en jerbal iomin bar jiljilimjuõn yiõ ñõn Le’ban, e ar lelok Rejel bwe en belen. Ilo ien ko, Anij e ar kotlok bwe en lõñlok jen juõn belen juõn eman. Ak kiõ, einwõt an Baibel eo kwalok, juõn eman e aikwij juõn wõt belen.