Juõn Famili Elap An Jekob

BAJ lale mõk famili in elap. Rein rej lõmaro 12 nejin Jekob. Im eor nejin kõra bareinwõt. Kwo jela ke ãt ko etan jabrewõt ian ajiri rein? Jen katak kin jet iair.

Li’a e ar keutak Ru’ben, Sim’i-on, Li’vai im Juda. Ke Rejel e ar lo bwe ejelok nejin ajiri, e ar lukkun buromõj. Kin men in e ar lelok lio korijeran, Bi’la ñõn Jekob, im Bi’la e ar keutak ruo nejin ladrik, etair Dan im Nap’ta-lai. Inem Ii’a e ar bareinwõt lelok Zil’pa, lio korijeran ñõn Jekob, im Zil’pa e ar keutak ñõn Jekob Gad im Ash’er. Eliktata Li’a e ar bar keutak ruo nejin ladrik, Is’sa-kar im Zeb’u-lun.

Tokelik Rejel e ar maroñ keutak juõn nejin ajiri. E ar naetan Josep. Tokelik enaj laplok ar katak kin Josep, kinke e ar erõm juõn armij e lukkun lap tokjen. Ir rein lõmaro 11 nejin Jekob im r’ar lotak ñõn e ke e ar jokwe iben Le’ban, jemen Rejel.

E ar bareinwõt wor jet kõra ro nejin Jekob, ak Baibel eo ej kwalok etan juõn wot iair. Ãt eo etan kar Dai’na.

E ar jejjit ien eo bwe Jekob e ar kõnan ilok jen Le’ban im jeblak lok ñõn Ke’nean. Inem e ar ain famili eo an elap im bwij in sip im kau ko an relap, im jino ilok ilo ial eo an e aitok.

Elikin an Jekob im famili eo an jeblak im ber ilo Ke’nean iomin jirik ien, Rejel e ar keutak bar juõn nejin ladrik. Men in e ar walok ke r’ar ilok juõn ien im etolok jen mweo imweir. E ar abañ im lukkun bin ñõn Rejel, im e ar mij ilo ien eo ej keutak. Ak ladrik eo e ar lotak im emõn an mour. Jekob e ar likit etan Benjamin.

Je kõnan kememij etan lõmarein 12 nejin Jekob kinke aolepen ailiñ in Israel e ar itok jen ir. Ilo mol, bwij ko 12 in Israel rej etnake lõmaro 10 nejin Jekob im ruo ian lõmaro nejin Josep. Aisak e ar mour manlok wõt iomin elõñ yiõ elikin an aolep ladrik rein lotak, im e aikwij kar juõn men in kamõnõnõik e kin an lõñ lõmaro jibwin. Ak jen lale ta eo e ar walok ñõn Dai’na, ledrik eo jibwin.