Josep Ej Ber Ilo Prisõn

JOSEP e ar 17 wõt yiõ ridtan ke r’ar bõklok e ñõn Ijipt. Ijo r’ar wiakake ñõn juõn eman, etan Pot’i-par. Pot’i-par ej jerbal ñõn kiñ in Ijipt eo, naetan Per’o.

Josep e ar lukkun kate e jerbal ñõn karo eo an, Pot’i-par. Inem ke Josep e ar ridtolok, Pot’i-par e ar likit e dri lale aolepen mweo imõn. Inem etke Josep ej ber ijin ilo prisõn? Ej kin lio belen Pot’i-par.

Josep e ar ridtolok im erõm juõn likao e wuleo, im lio belen Pot’i-par e ar kõnan bwe en babu iben. Ak Josep e ar jela bwe men in e bwir, im e ar abwin kõmõne. Lio belen Pot’i-par e ar lukkun illu. Inem ke leo belen e ar itok ñõn mweo, e ar riõp ñõn e im ba: ‘Josep e ar kamakokoik iõ bwe in babu iben!’ Pot’i-par e ar tõmak lio belen, im e ar lukkun illu iben Josep. Inem e ar ba bwe ren jolok e iloan prisõn.

E mõkaj an leo ej lale prisõn kile bwe Josep ej juõn likao emõn. Inem e ar likit e bwe en dri lale aolep ro jet ilo prisõn. Tokelik, Per’o e ar illu iben dri ititõk eo an im dri kõmãt eo an, im likit ir ilo prisõn. Juõn boñ kaju iair r’ar tõnak, ak re jaje melelen tõnak ko air. Ran eo juõn Josep e ar ba: ‘Komin jiroñ iõ tõnak ko ami.’ Im ke r’ar jiroñ e, kin jibañ jen Anij, Josep e ar kwalok melelen tõnak ko air.

Ñon dri ititõk eo, Josep e ar ba: ‘Mõttõn jilu ran im naj kadrioj yuk jen prisõn im kwo naj bar erõm dri ititõk ñõn Per’o.’ Inem Josep e ar ba: ‘Ñe kwoj drioj, kwon kennanek Per’o kin iõ, im jibañ iõ bwe in drioj jen ijin.’ Ak ñõn dri kõmãt eo, Josep e ar ba: ‘Mõttõn jilu ran im Per’o enaj jõbarre yuk.’

Lokin jilu ran e ar jejjit men ko Josep e ar ba. Per’o e ar jiroñ bwe ren jõbbare dri kõmãt eo. Ak, r’ar kadriojlok dri ititõk eo jen prisõn im e ar bar jino an jerbal ñõn kiñ eo. Ak dri ititõk eo e ar lukkun meloklok aolep men otemjej kin Josep! E ar jab kennanek Per’o kin e, im Josep e ar berwõt ilo prisõn.