Juon Rũkõm̦akoko me Ear Pokake Anij

Josep ear juon iaan l̦adik ro rediktata nejin Jekob. L̦õm̦aro jein rar kile bwe el̦apl̦o̦k an kar l̦al̦l̦ap eo jemãer kaorõk Josep jãn er. Kwõl̦ak lale, ta kar l̦õmn̦ak eo aer kõn men in? Eokwe rar ebbanbane Josep im rar dike. Bareinwõt, ear ettõn̦ake jet ettõn̦ak ko rekabwilõñlõñ im ear bwebwenato kaki l̦o̦k ñan l̦õm̦arein jein. Ke rar roñ, rar l̦õmn̦ak bwe ettõn̦ak kein an rej kaalikkar bwe juon raan renaaj badikdik ñan Josep. Kõn men in, ear l̦apl̦o̦k wõt aer dike l̦adik in jatier!

Juon raan, l̦õm̦arein jein Josep rar lale jiip ko nejier ilo juon jikin epaake jikin eo etan Shikem. Jekob ear jilkinl̦o̦k Josep bwe en etal im lale ejet an l̦õm̦aro jein pãd. Ke rar reilo̦k im loe Josep, rar kõnnaanek doon im ba: ‘Eñn̦e l̦eo el̦ap wõt an ettõn̦ak. Jen m̦ane!’ Innem rar bõke im jol̦o̦ke ñan lowaan juon ro̦ñ em̦wilal̦. Ak Juda, juon iaan l̦õm̦aro jein, ear ba ñan er: ‘Kom̦win jab m̦ane! Em̦m̦anl̦o̦k jen wiakake bwe en juon rũkõm̦akoko.’ Kõn men in, rar wiakake Josep kõn 20 jããn jelba ñan ruwiakake ro jãn Midia me rej etal ñan Ijipt.

Innem l̦õm̦aro jein rar bõk kopã eo an Josep im katulo̦ke ilo bõtõktõkin juon ko̦o̦t, im rar bõkl̦o̦k kopã in an ñan jemãer im ba: ‘Eñin ke kopã eo an l̦eo nejũm̦?’ Kõn men in, Jekob ear l̦õmn̦ak bwe juon menninmour elãj ear m̦an Josep. Ear lukkuun bũrom̦õj, joñan ejjel̦o̦k en̦ ear maroñ kaenõm̦m̦ane.

Ke Josep ear pãd ilo Ijipt, rar wiakake e bwe en rũkõm̦akoko ñan juon ruutiej etan Potipar. Bõtab Jeova ear pãd ippãn Josep. Potipar ear kile bwe Josep ear juon eo ejel̦ã jerbal im bwe emaroñ lõke. Ejjabto tokãlik, ear jitõñ Josep bwe en rũlale aolepen men ko m̦weien.

Kõrã eo pãleen Potipar ear jino kõn̦aan Josep kõn an wũlio im kajoor. Elõñ raan in an kajjitõk ippãn Josep bwe en babu ippãn. Ta eo Josep enaaj kar kõm̦m̦ane? Eokwe, ear m̦akoko in babu ippãn. Ear ba: ‘Jaab! Ejjab jim̦we men in. Irooj en̦ aõ el̦ap an lõke eõ, im kwe kwõj kõrã eo pãleen. El̦aññe inaaj babu ippam̦, innem inaaj jerawiwi n̦ae Anij!’

Juon raan, kõrã in pãleen Potipar ear kajjioñ iuun Josep bwe en babu ippãn. Ear jibwe nuknuk ko an im kanõkel̦o̦k ñan ippãn, ak Josep ear m̦õkaj im ko. Ke Potipar ear ro̦o̦l ñan m̦weo, kõrã in pãleen ear riab im ba bwe Josep ear kajjioñ iuuni bwe en babu ippãn. Potipar ear lukkuun illu, im ear likũt Josep ilo jikin kalbuuj eo. Ak Jeova ear jab mel̦o̦kl̦o̦k Josep.