Tõnak Ko An Pero

RUO yiõ r’ar motlok im Josep ej berwõt ilo prisõn. Dri ititõk eo ejañin kememij e. Inem juõn boñ Per’o e ar tõnak ruo alen, im e ar lokjenan ta meleleir. Kwoj lo ke an kiki ijene? Jiboñon in ran eo juõn, Per’o e ar kirtok aolep dri meletlet ro an im kennanek ir men ko e ar tõnaki. Ak r’ar jab maroñ kameleleik ñõn e tõnak ko an.

Kiõ dri ititõk eo ej kap naj kememij Josep. E ar ba ñõn Per’o ‘Ke iar ber ilo prisõn, e ar wor juõn eman ijo eo e maroñ kwalok melelen tõnak ko.’ Per’o e ar jiroñ bwe ren mõkaj in kadriojtok Josep jen prisõn eo.

Per’o e ar jiroñ Josep tõnak ko an im ba: ‘I ar lo jiljilimjuõn kau ko re kilep, im re mãtõk. Inem i ar lo jiljilimjuõn kau ko re airik, im re bõj. Im kau ko re airik r’ar kõñi kau ko re kilep.

‘Im ilo tõnak eo aõ ken ka ruo, i ar lo jiljilimjuõn urur in wit re ibeb im re kãmõn, rej edrek ilo juõn kan. Inem i ar lo jiljilimjuõn urur re jiburikrik im raimerlok. Im urur in wit ko re jiburikrik r’ar kõñi urur ko jiljilimjuõn re ibep im kãmõn.’

Josep e ar ba ñõn Per’o: ‘Tõnak ko ruo rej juõn wõt meleleir. Kau ko jiljilimjuõn remõn im urur ko jiljilimjuõn re ibep rej melelen jiljilimjuõn yiõ ko, im kau ko jiljilimjuõn re airik im urur in wit ko jiljilimjuõn re jiburikrik rej melelen bar jiljilimjuõn yiõ ko. Enaj wor jiljilimjuõn yiõ ñe e naj lõñ ekõn ilo Ijipt. Inem e naj wor jiljilimjuõn yiõ in ñitta.’

Inem Josep e ar ba ñõn Per’o: ‘Kwon kãlet juõn eman e meletlet bwe en ain ekõn iomin yiõ ko jiljilimjuõn remõn. Kin men in armij ro re jamin kwuli iomin yiõ ko jiljilimjuõn ñe e naj walok ñitta.’

Emõn lemnõk in iben Per’o. Im e ar kãlet Josep bwe en ain ekõn ko, im kokwoni. Ijallokin Per’o, Josep e ar erõm armij eo elap tokjen ilo Ijipt.

Drualitõk yiõ tokelik ilo ien ñitta eo, Josep e ar lo jet eman r’ar itok. Kwo jela ke wõn rein? Rej lõmaro 10 jein! Jemair Jekob e ar jilkinlok ir ñõn Ijipt kinke enañin maat kijiir ijo ilo Ke’nean. Josep ej kile lõmaro jein, ak rejjab kile e. Kwo jela ke ta unin? Kinke e ridtolok Josep, im e oktak nuknuk ko ej kõnõki.

Josep e ar kememij bwe ke ej ladrik, e ar tõnak kin an lõmaro jein iten barikrik ñõn e. Kwoj kememij ke am kar konono kin men in? Inem Josep ej kile bwe Anij e ar jilkinlok e ñõn Ijipt, im kin juõn un emõn. Ta eo kwoj lemnõk Josep e ar kõmõne? Jen lale.