Famili Eo Ej Emõkit Ñõn Ijipt

JOSEP e ban kõkabwirbwir e lok wõt. Ej jiroñ aolep ro dri korijeran bwe ren driojlok jen rum eo. Ke ej mõke wõt iben ro jein im jatin, Josep e jino an jõñ. Je maroñ kile joñan an lõmaro jein im jatin lokjenair, ke re jaje unin an jõñ. Eliktata ej ba: ‘Ña Josep. Jema ej mour wõt ke?’

Joñan an lõmaro jein im jatin bwilõñ, re ban konono. Re kumlok. Ak Josep ej ba: ‘Komin joij im druaktok.’ Ke rej druaklok, e ba: ‘Ña Josep, jatimi, eo kom ar wiakake ñõn Ijipt.’

Josep e’ar konono wõt ilo joij. ‘Komin jab na ruemi kin ami kar wiakake iõ ñõn ijin. Anij eo e ar jilkintok iõ ñõn Ijipt bwe in lomoren armij ro. Per’o e ar kairoij iõ ion aolepen enin. Inem kiõ komin kaiur kom im jeblak ñõn iben jema im kenanek e. Im ba en itok im jokwe ijin.’

Inem Josep e ar likit pein ion ro jein im jatin, im e ar atbokwõj im mejenmaik aolepeir. Ke Per’o ej roñ bwe ro jein im jatin Josep r’ar itok, e ar jiroñ Josep im ba: ‘Ren bõk wagon ko im ilem bõktok jemeir im ro nukiir im roltok ñõn enin. Inaj lelok ñõn ir ene eo emõn tata ilo aolepen Ijipt.’

Eñin men eo r’ar kõmõne. Ijin kwo maroñ lo Josep ke e ar wõnmaik jemen ilo ien eo e ar itok ñõn Ijipt iben aolep ro nukin.

Famili eo an Jekob e ar lukkun lap. Aolepeir e ar wor 70 ke r’ar emõkitlok ñõn Ijipt, koba Jekob im ro nejin im ro jibwin. Ak e ar bareinwõt wor limaro beleir, im bwelen elõñ dri korijerair bareinwõt. Rein aolep r’ar jokwe ilo Ijipt. Kar naetair dri Israel, kinke Anij e ar ukõt etan Jekob ñõn Israel. Dri Israel r’ar armij ro an Anij, einwõt ar naj loe tokelik.