Rehab Ej Noje Dri Aroñroñ Ro

LÕMAREIN rej iten jorran. Elañe rejjab ko, re naj mij. Rej dri aroñroñ in Israel, im kõra eo ej jibañ ir ej Re’hab. Re’hab e jokwe ijin ilo juõn im ion worwor in jikin kwelok eo etan Jer’i-ko. Jen lale un in an lõmarein iten jorran.

Dri Israel ro rej bojak in driblok River Jordan ñõn loan enen Ke’nean. Ak mokta jen air kõmõne men in, Joshua e ar jilkinlok dri aroñroñ ro ruo. Ej jiroñ ir im ba: ‘Komro en ilen wate eneo, Jer’i-ko.’

Ke dri aroñroñ ro r’ar itok ñõn Jer’i-ko, r’ar ilok ñõn mweo imõn Re’hab. Ak Juõn armij e ar kennanek kiñ in Jer’i-ko im ba: ‘Emwij an ruo armij dreloñtok ijin boñin in, ian ro nejin Israel, bwe ren wate enin.’ Ke e ar roñ men in, kiñ eo e ar jilkinlok man ro ñõn iben Re’hab, im rej jiroñ e im ba: ‘Kwon kadrioijtok armij ro r’ar itok ñõn ibõm! Ak emwij an Re’hab noj dri aroñroñ ro ion borwoj in mweo imõn. Inem e ba: ‘Emol armij ro r’ar itok ñõn ibã, a I jaje ijo r’ar itok jen e. Inem ke e nañin ien kili kejam in jikin kwelok eo, ke e marok, armij ro r’ar droijlok. Elañe e mõkaj ami lukworkwor ir, kom naj jibwe ir!’ Inem lõmaro r’ar lukworkwor irro ilo ial eo.

Elikin air ilok, Re’hab e ar kaiur im wonliñlok ñõn ion borwoj in mweo, im ba: ‘I jela bwe Jeova e naj lewõj enin ñõn kom,’ ej jiroñ dri aroñroñ ro. ‘Kim ar roñ ekijkan an kar Jeova kabããtlok dren in Lomalo Ekilmir imami, ke kom ar drioijtok jen Ijipt, im kin ami kar mõn kiñ ro ruo, Sai’hon im Og. I ar joij ñõn komro, inem komro en joij im kalimur ñõn iõ, bwe kom naj joij ñõn iõ. Komro en lomoren jema im jinõ, im ro jeiõ im jatiõ man im kõra.’

Dri aroñroñ ro r’ar kalimur air naj kõmõne men in, ak eor juõn men Re’hab ej aikwij in kõmõne. ‘Kwon lukwõj to in ebirõrõ ilo windo in am,’ dri aroñroñ ro rej ba, ‘im kwon kokweloktok aolep ro nukõm ibõm iloan mwin. Im ñe kimij jeblak bwe kimin bõk Jer’i-ko, kim naj lo to in ebirõrõ ilo windo eo am im kim jamin mõn jabrewõt ilo mweo imõm.’ Ke dri aroñroñ ro r’ar jeblak iben Joshua, r’ar kennanek e kin aolep menko r’ar walok.