Rehab Ej N̦ooje Riaroñroñ Ro

Ke riaroñroñ ro ruo jãn Israel rar etal ñan Jeriko, rar pãd ilo m̦weo im̦õn juon kõrã etan Rehab. Ke kiiñ eo an Jeriko ear roñ kõn men in, ear jilkinl̦o̦k rũttarin̦ae ro an ñan m̦weo im̦õn Rehab. Ak Rehab ear n̦ooje erro im ear ba ñan rũttarin̦ae ro bwe ren pukote erro ilo bar juon jikin. Innem ear jiroñ riaroñroñ ro im ba: ‘Inaaj jipañ kom̦ kõnke ijel̦ã bwe Jeova ej pãd ippemi im bwe kom̦ naaj anjo̦ ioon ãnin. Jouj im kallim̦ur bwe kom̦ naaj lo̦mo̦o̦ren ña im baam̦le eo aõ.’

Riaroñroñ rein rar ba ñan Rehab: ‘Kõmij kallim̦ur bwe ejjel̦o̦k juon iaan ro rej pãd ilowaan m̦wiin im̦õm̦ enaaj mej.’ Innem rar ba: ‘Kwõn lukwõje juon to bũrõrõ ilo wũntõ in am̦, im kwe im baam̦le n̦e am̦ reban mej.’

Rehab ear lelal̦l̦o̦k juon to jãn wũntõ eo an bwe riaroñroñ rein ren to lal̦l̦o̦k ie. Innem erro ear etal im kũttiliek ilo tol̦ ko ium̦win jilu raan m̦okta jãn aer ro̦o̦l ñan ippãn Joshua. Tokãlik RiIsrael ro rar kijoone Reba Jordan im rar pojak ñan aer naaj bõk Jeriko. Eñin kar jikin eo m̦okta rar anjo̦ ioon. Jeova ear jiroñ er bwe ren m̦aaj im rauni jikin in juon kõttan ilo juon raan, im rar aikuj kõm̦m̦ane men in ium̦win 6 raan. Ilo raan eo kein kajimjuon, rar rauni jikin in 7 kõttan. Innem bũrij ro rar uuki jilel ko aer, im rũttarin̦ae ro rar buul̦ lam̦õj. Ke rar kõm̦m̦ane men in, wõrwõr eo an jikin in ear rup im okjak! Ak m̦weo m̦õn Rehab me ear m̦õttan wõrwõr eo ear jutak wõt. Rehab im baam̦le eo an rar jab mej kõnke Rehab ear kwal̦o̦k an lõke Jeova.