Jisõs Ej Karreoik Tempel Eo

JISÕS ej lukkun mejen illu ijin, ejjab ke? Kwo jela ke ta unin an illu? Ej kinke lõmarein ilo tempel eo an Anij ilo Jerusalem re lukkun kubbon. Rej kajeoñ in koorlok mõnni jen armij ro im r’ar itok ñõn ijin bwe ren kabuñ ñõn Anij.

Kwoj lo ke aolep kon in kau kein im sip im muli? Eokwe, lõmarein rej wiakaki men in mour kein ijin, iloan wõt tempel eo. Kwo jela ke ta unin? Ej kinke dri Israel ro rej aikwij men in mour ko im bao bwe ren katok ñõn Anij kaki.

Kien Anij e ar ba bwe ñe juõn dri Israel e ar bwir, en kõmõn juõn men in katok ñõn Anij. Im e ar bar wor ien ko jet, me dri Israel ro r’ar aikwij in katok. Ak juõn dri Israel enaj bõk jen ia bao im men in mour ko bwe en katok ñõn Anij?

Jet dri Israel ro r’ar nejnej bao im men in mour im lali. Inem r’ar maroñ kajerbal menkein ilo katok. Ak elõñ dri Israel ro e ar ejelok air bao ak men in mour. Im ro jet, joñan an etolok jikin jokwe ko air jen Jerusalem, r’ar jab maroñ bõktok juõn ian men in mour ko air ñõn tempel eo. Kin men in, armij ro rekõn itok ñõn ijin im wia men in mour ak bao ko me r’ar aikwij. Ak lõmarein r’ar le jen joñan air kalaplok wõnan men kein ñõn armij ro. R’ar jab mol ñõn armij ro. Bareinwõt, ren kar jab wia kin menkein ijin, iloan wõt tempel eo an Anij.

Eñin men eo im ej kaillu Jisõs. Kin men in ej ukõji tebel ko an lõmaro rej lale mõnni eo im ej kajibliklik mõnni dreka ko air. Bareinwõt, ej kõmõn juõn ken dreñdreñ jen to ko im ubaki men in mour ko jen loan tempel eo. Ej jiroñ lõmaro rej wiakake muli ko im ba: ‘Komin kadriojlok menkein jen ijin! Komin jab kõmõn mweo imõn Jema bwe en juõn jikin koorlok mõnni.’

Jet ian ro dri kaloran Jisõs rej ber iben ilo tempel eo ilo Jerusalem. Rej bwilõñ kin men eo rej lo an Jisõs kõmõne. Inem rej kememij eon eo ilo Baibel eo im ej konono kin Nejin Anij im ba: ‘Yokwe imõn Anij e naj urur iloan einwõt kijeek.’

Ilo ien eo Jisõs ej ber ilo Jerusalem im lale kwojkwoj in Kijone eo, ej kõmõn elon men in kabwilõñlõñ ko. Tokelik, Jisõs ej ilok jen Ju-di’a im jino jeblak ñõn Gal’i-li. Ak ilo an jeblak, ej ilok ilujen bukwon in Sa-mer’ia. Jen lale ta eo ej walok ijin.