Jesus Ej Kadiwõjl̦o̦k Ruwiakake Ro jãn Tampel̦ Eo

Ilo kar turinl̦o̦k allõñin Eprõl̦ ilo iiõ eo 30, Jesus ear etal ñan Jerusalem. Elõñ armej rar itok ñan ijin bwe ren pãd ilo Kwõjkwõjin Kijoone eo. Ilo iien rot kein, ekkã aer katok kõn menninmour ko ilo tampel̦ eo. Jet rar bõktok menninmour ko ippãertok, ak jet rar wia ilo Jerusalem.

Ke Jesus ear etal ñan tampel̦ eo, ear lo an armej ro wiakake menninmour ko. Armej rein rar kõm̦m̦an jããn ilo im̦õn kabuñ eo an Jeova! Ta eo Jesus ear kõm̦m̦ane? Eokwe, ear kõm̦m̦an toin deñdeñ im ubaakel̦o̦k jiip im kau ko jãn lowaan tampel̦ eo. Ear ukõji tebõl̦ ko an rijãnij jããn ro im lutõki jããn jiddik ko ñan lal̦. Jesus ear ba ñan ro rej wiakake m̦ul̦e: ‘Kom̦win bũki men kein jãn ijin! Kom̦win jab likũt im̦õn Jema bwe en jikin wia!’

Armej ro rar lukkuun bwilõñ kõn men ko Jesus ear kõm̦m̦ani. Joñan rijjilõk ro an rar keememejtok kanaan eo kõn Messaia eo me ej ba: ‘El̦ap aõ kijejeto bwe en em̦m̦an aer kõjerbal m̦weo im̦õn Jeova.’

Tokãlik, ilo kar iiõ eo 33, Jesus ear karreoik tampel̦ eo bar juon alen. Ear jab kõtl̦o̦k bwe armej ro ren kõm̦m̦ani men ko me rej kwal̦o̦k aer jab kautiej m̦weo im̦õn Jemãn.