Ej Yokwe Ajiri Ro Redrik

LALE mõk an Jisõs jiburlep ladrik eo ijin. Kwo maroñ kile bwe elap an Jisõs yokwe ro redrik. Lõmaro im rej lale menin ej dri jilik ro an. Ta eo Jisõs ej ba ñõn ir? Jen lale.

Ej kap mwij an Jisõs im dri jilik ro an jeblaktok jen juõn tirep e aitok. Ilo ial eo, dri jilik ro r’ar akwail ibeir mõke. Inem elikin air jeblak, Jisõs ej kajitõk ibeir: ‘Ta eo kom ar akwail kake ilo ial eo?’ Ilo mol, Jisõs e jela kin men eo r’ar akwaile dron kake. Ak ej kwalok kajitõk eo bwe en lale elañe dri jilik ro ren uake.

Dri jilik ro rejjab uak, kinke ilo ial eo r’ar akwail kin wõn eo elaptata iair. Jet ian dri jilik ro re kõnan bwe ren utiej jen ro jet. Ewi wãwen Jisõs enaj jiroñ ir bwe ejjab jimwe air kõnan bwe ren laptata?

Ej ãñin tok ladrik eo, im kajutak e iman mejeir aolep. Inem ej ba ñõn ro dri kaloran: ‘I kõnan bwe komin jela men in, Elañe komij jab oktak im einwõt ajiri ro redrik, kom jamin maroñ dreloñ ilo ailiñ in Anij. Armij eo elaptata ilo ailiñ eo ej eo im ej erõm einwõt ajiri in.’ Kwo jela ke ta unin an kar Jisõs ba men in?

Eokwe, ajiri ro redrik rejjab inebata kin air naj utiej ak laplok jen ro jet. Inem dri jilik ro ren kar katak bwe ren einwõt ajiri ro ilo wãwen in im jab akwail kin air lap ak utiej.

Eor ien ko jet bareinwõt, me Jisõs ej kwalok joñan an yokwe ajiri ro redrik Jet aliñ ko tokelik, jet armij ro rej ãñin tok ajiri ro nejiir bwe ren lo Jisõs. Dri jilik ro rej kajeoñ bõprae ir jen air kebake. Ak Jisõs ej jiroñ dri jilik ro an im ba: ‘Komin kotlok bwe ajiri ro ren itok ñõn ibã, im komin jab bõprae ir, kinke ailiñ in Anij ej an armij ro einwõt ir.’ Inem Jisõs ej jiburlepi ajiri ro, im kajerammõn ir. Ejab juõn men emõn ke ñõn ar jela bwe Jisõs ej yokwe ajiri ro redrik?