Dreor Jen Prisõn

LALE mõk enjel in ijin ej kabellok aur in prisõn eo. Lõmarein ej kadriojlok ir rej dri jilik ro an Jisõs. Jen lale ta eo e ar walok bwe ren likit ir ilo prisõn.

E ar juõn ien ekaru wõt jen ke e ar lutõklok jitõb kwojarjar eo ion ro dri kaloran Jisõs. Im eñin men eo e ar walok: Piter im Jon r’ar ilok ñõn tempel eo ilo Jerusalem juõn ran elikin raelip. Ijin, iturin aur in tempel eo, ej jijõt juõn eman eo e ar kirro jen ke e ar lotak. Armij ro rej inek e tok ñõn ijin aolep ran bwe en oor mõnni iben ro rej dreloñ ilo tempel eo. Ke e ar lo Piter im Jon, ej akwelap ibeir bwe ren lelok juõn men ñõn e. Ta eo dri jilik ro ren kõmõne?

Rej bwijrak im kalimjek leo e jerata. ‘Ejelok aõ mõnni,’ Piter ej ba, ‘ak men eo ibã I naj lewõj. Ilo etan Jisõs, kwon jutak im etetal!’ Ilo ien eo ej ba nan in, Piter ej jibwe pein anbijmaroñõn leo, im e mõkaj an leo jutak im jino etetal. Ke armij ro r’ar lo menin, r’ar lukkun bwilõñ im mõnõnõ kin men in kabwilõñlõñ in emõn.

‘Ej kin kajur eo jen Anij, eo e ar kajerkakbiji Jisõs jen ro remij, me kim ar kõmõn men in kabwilõñlõñ in,’ Piter ej ba. Ke irro Jon rej konono, jet dri tel ro an kabuñ rej itok. Rej illu kinke Piter im Jon rej kennanek armij ro kin an Jisõs jerkakbiji jen ro re mij. Kin men in rej jibwe ir im likit ir ilo prisõn.

Ran eo juõn, dri tel ro an kabuñ rej kõmõn juõn kwelok elap. Rej ãñin tok Piter im Jon, kap leo me r’ar kemour e, imair. ‘Kajur eo an wõn eo kom ar kõmõn men in kabwilõñlõñ in?’ dri tel ro an kabuñ rej kajitõk.

Piter ej jiroñ ir bwe ej kin kajur eo an Anij, eo e ar kajerkakbiji Jisõs jen ro re mij. Pris ro re jaje ta eo ren kõmõne, bwe re ban ba bwe men in kabwilõñlõñ in e ar jab walok. Kin men in rej kakkil dri jilik ro bwe ren jab bar konono kin Jisõs, inem rej kotlok ir.

Iomin ran ko tokelik, dri jilik ro rej kwalok wõt kin Jisõs im kemour ro dri nañinmij. Enan in men in kabwilõñlõñ kein ejererlok wõt. Im kin men in, jar in armij ro jen jikin kwelok ko i bellakin Jerusalem rej ãñin tok ro dri nañinmij ñõn iben dri jilik ro bwe ren kemour ir. Men in ej kõmõn bwe dri tel ro an kabuñ ren lukkun ebanban, inem rej jibwe dri jilik ro im ãti ir ilo prisõn. Ak ejjab to air ber ijo.

Boñin eo wõt, enjel eo an Anij ej kabellok aur in prisõn eo, einwõt am loe ijin. Enjel eo ej ba: ‘Komin ilok im jutak ilo tempel eo, im kennanek wõt armij ro.’ Jibboñ in ran eo juõn, ke dri tel ro an kabuñ rej jilkinlok lõmaro ñõn prisõn eo bwe ren ãñin tok dri jilik ro, re joko. Tokelik lõmaro rej lo air katakin ilo tempel eo im rej ãñin tok ir ñõn imõn San’hi-drin eo.

‘Kim ar lukkun jiroñ kom bwe komin jab bar katakin kin Jisõs,’ dri tel ro an kabuñ rej ba. ‘Ak kom ar kobrok Jerusalem kin ami katakin.’ Ilo ien in dri jilik ro rej uak im ba: ‘Kimij aikwij bokake Anij jen armij.’ Inem rej katakin manlok wõt “nuj eo emõn.” Ejab juõn joñõk emõn bwe jen lore ke?