Ladrik Eo E Ar Kiki

UMM! Ta eo ej walok ijin? E jorran ke ladrik eo ej babu ilõl? Lale mõk! Juõn ian lõmaro rej driojtok jen mweo ej Paul! Kwoj lo ke Timote ijin bareinwõt? Ladrik eo e ar wõtlok ke jen windo eo?

Aet, eñin men eo e ar walok. Paul e ar kwalok juõn katak ñõn dri kalor ro ijin ilo Tro’as. E ar jela bwe e naj to an naj bar lo mejeir kinke e naj aikwij in jerak ilo juõn wa ran eo juõn. Kin men in e ar konono manlok wõt ñõn lukwõn boñin eo.

Eokwe, ladrik in etan Eu’ti-kõs e ar jijõt ilo windo eo, im e ar kiki. E ar okjak, im wõtlok jen windo eo, jilu dek ñõn lõl! Inem kwo maroñ kile unin an mejen inebata armij ro. Ke lõmaro rej kwotak ladrik eo, e mij, einwõt air kar lemnõk!

Ke Paul ej lo bwe e mij ladrik eo, ej beroane im atbokõje. Inem e ba: ‘Komin jab inebata. E naj emõn!’ Im e mour ladrik eo! Ej juõn men in kabwilõñlõñ! Emwij an Paul kajerkakbiji e! E kanuij loñliñ aolep armij ro.

Aolepeir rej bar wonliñlok ñõn rum eo ilõñ im mõña iben dron. Paul ej konono manlok wõt ñõn ran. Ak kwo maroñ tõmak bwe Eu’ti-kõs e ar jab bar kiki! Tokelik Paul, Timote im ro mõttair rej uwe ilo wa eo. Kwo jela ke ia eo rej jerak ñõn e?

Paul ej kap kadrerelok tirep in kwalok nan eo an ken ka jilu, im ej jeblak ñõn ijo jikin. Ilo tirep in Paul e ar mõke ian ilo jikin kwelok in Ep’e-sõs iomin jilu yiõ. Inem tirep in e aitoklok jen kar eo ken ka ruo.

Elikin an jerak jen Tro’as, wa eo ej bwijrak ilo Mai-li’tõs iomin jirik ien. Ke ebak Ep’e-sõs, Paul ej jilkinlok im kir elder ro ilo congregesõn eo ijen bwe ren itok ñõn Mai-li’tõs bwe en kajemlok ibeir. Tokelik, ke e ien an jerak wa eo, e kanuij lap air buromõj in lo an Paul ilok!

Elikin jirik ien, wa eo ej jeblak ñõn Sis-e-ri’a. Ke Paul ej ber ijin ilo mweo imõn Pilip, dri kalor eo, Ag’a-bõs, dri kanan eo ej kakkil Paul. Ej ba bwe re naj jolok Paul ilo prisõn ñe ej itok ñõn Jerusalem. Im eñin men eo ej walok. Inem, elikin an ber ilo prisõn iomin ruo yiõ ilo Sis-e-ri’a, rej jilkinlok Paul ñõn Rom bwe en jutak ilo ekajet iman Sizar, eo ej iroij in Rom. Jen lale men eo ej walok ilo ial eo ñõn Rom.