E Rup Wa Eo Ilo Juõn Ene

LALE mõk! E jorran wa eo! E rup ion bar im elõñ mõttõn ko! Kwoj lo ke armij ro im r’ar kelok i lojit? Emwij an jet iair tõbar barijet eo. Leen ej Paul ke? Jen lale ta men ko r’ar walok ñõn e.

Kememij, bwe iomin ruo yiõ Paul e ar ber ilo prisõn ilo Sis-e-ri’a. Elikin ien in r’ar likit e kap bar jet dri prisõn ilo juõn wa, im r’ar jerak ñõn Rom. Ke r’ar ebake eneo etan Krit, e buñ juõn kõto elap ioir. Joñan an kajur kõto eo, e jalia wa eo im e bẽlok. Im rejjab maroñ lo al ilo ran ak iju ko ilo boñ. Tokelik, elikin elõñ ran, e joko kejatrikrik eo an aolep ro rej uwe ion wa eo bwe re naj mour.

Ilo ien in e jutak Paul im ba: ‘Ejelok juõn iami e naj joko; a wa in wõt. Bwe boñ, juõn enjel an Anij e ar itok ñõn ibã im ba, “Kwon jab mijõk Paul! Kwoj aikwij in jutak iman Sizar, iroij in Rom. Im Anij e naj kejbarok aolep ro rej jerak ibõm.”’

Ilo lukwõn lok boñ in ran eo ken ka 14 in air bẽlok, dri jerbal ro ilo wa eo rej kile bwe e bijbij lok lojit! Kin air mijõk air naj itaak ilo dreka, rej jolok ankõr ko air bwe en jab bar bẽlok wa eo. Jibbõn in ran eo juõn rej lo ene. Rej bebe bwe ren kajeoñ in tõbe enelok wa eo ñõn barijet.

Eokwe, ke rej wanene lok wõt, rej itaak im lorak ilo juõn bok. Inem no ko re jino buñõt wa eo im e rup ilo elõñ mõttõn ko. Leo ej jeban dri tõrinae ro ej ba: ‘Aolep ro re jela ao ren kelok jen wa eo im ao ene lok. Im komeo komij jaje ao, komin kelok ilikiir im jibwe jet mõttõn ra ko bwe komin drebiji. Ilo wãwen in aolepen 276 iair ion wa eo rej wanene lok im jab jorran, einwõt enjel eo e ar kalimur.

Etan eneo ej Malta. Armij ro re kanuij joij, im rej kejbarok ro r’ar itok jen wa eo. Ke e ar joko kõto eo, r’ar likit Paul ion bar juõn wa im bõklok e ñõn Rom.