Paul Ilo Rom

LALE mõk tomere ko iben Paul, im lale dri tõrinae eo an Rom ej lale. Paul ej juõn dri prisõn ilo Rom. Ej kõttar mae ien Sizar in Rom ej bebe ta eo e naj kõmõn ñõn e. Ke ej juõn dri prisõn, rej kotlok bwe armij ro ren dreloñ im lotok e.

Jilu ran elikin an Paul tõbar Rom, e ar jilkinlok bwe jet dri tel in dri Ju ren item lotok e. Kin men in, elõñ dri Ju ro ilo Rom rej itok ibeir tok. Paul ej kwalok ñõn ir kin Jisõs im ailiñ in Anij. Jet rej tõmak im erõm dri Kristin, ak ro jet rejjab tõmak.

Paul ej bareinwõt kwalok ñõn dri tõrinae ro me rej lale e. Iomin yiõ ko ruo in an lukojak ilo prisõn, Paul ej kwalok nan ñõn aolep ro me emaroñ. Kin men in, jet iloan famili eo an Sizar rej roñ nuj eo emõn kin Ailiñ eo, im jet iair rej erõm dri Kristin.

Ak wõn dri lotok in im ej jijõt iturin tebel eo im jeje? Kwoj kile ke? Aet, ej Timote. Timote e ar bareinwõt ber ilo prisõn kin an kwalok kin Ailiñ eo, ak emwij air kotlok e. Im e ar itok ijin bwe en jibañ Paul. Kwo jela ke ta eo Timote ej jeje? Jen lale.

Kwoj kememij ke jikin kwelok ko etan Pi-lip’pai im Ep’e-sõs ilo Bwebwenato 110? Paul e ar jibañ ejaake congregesõn ko an dri Kristin ro ilo jikin kein. Kiõ, ke ej ber ilo prisõn, Paul ej jeje leta ko ñõn dri Kristin rein. Leta ko rej ber ilo Baibel eo, im etair ej E-pe’sõs im Pi-lip’pai. Ilo ien in, Paul ej jiroñ Timote nan ko bwe en jeje ñõn dri Kristin ro jerair ilo Pi-lip’pai.

Dri Pi-lip’pai r’ar lukkun joij ñõn Paul. R’ar jilkintok juõn mweiuk in tiriamo ñõn iben ijin ilo prisõn, inem Paul ej kamolol ir kake. E-pap-ro-dai’tõs ej leo im e ar bõktok mweiuk in tiriamo eo. Ak e ar lukkun nañinmij im iten mij. Kiõ ej bar mour im bojak in jeblak ñõn jo jikin. E naj bõklok leta in iben lok jen Paul im Timote ñe ej jeblak ñõn Pi-lip’pai.

Ke ej ber ilo prisõn, Paul ej jeje bar ruo leta ko me rej ber ilo Baibel eo. Juõn ej ñõn dri Kristin ro ilo jikin kwelok eo etan Ko-los’se. Kwo jela ke etan buk in? Ko-los’se. Eo juõn ej juõn leta ñõn juõn jeran ebak etan Pai-li’mõn, eo ej bareinwõt jokwe ilo Ko-los’se. Leta in ej konono kin O-nes’i-mõs, eo dri korijeran Pai-li’mõn.

O-nes’i-mõs e ar ko jen Pai-li’mõn im itok ñõn Rom. O-nes’i-mõs e ar roñ bwe Paul e ar ber ilo prisõn ijin. E ar iten lotok Paul, im Paul e ar kwalok nan ñõn O-nes’i-mõs. E ar jab to tokelik im O-nes’i-mõs e ar bareinwõt erõm juõn dri Kristin. Kiõ O-nes’i-mõs ej buromõj bwe e ar ko. Inem kwo jela ke ta eo Paul ej jeje ilo leta in ñõn Pai-li’mõn?

Paul ej kajitõk iben Pai-li’mõn bwe en jolok an O-nes’i-mõs bwir. ‘Ij jilkinwõj e ñõn ibõm,’ Paul ej jeje. ‘Ak kiõ ejjab baj dri korijerõm wõt. Ej bareinwõt juõn jeõm im jatõm emõn ilo Kraist.’ Ke O-nes’i-mõs e ar jeblak ñõn Ko-los’se, e ar bõklok leta kein ruo ibenlok, juõn ñõn dri Ko-los’se ro im eo juõn ñõn Pai-li’mõn. Je maroñ kile joñan an mõnõnõ Pai-li’mõn ke ej roñ bwe leo dri korijeran e ar erõm juõn dri Kristin.

Ke Paul e ar jeje ñõn dri Pi-lip’pai ro im ñõn Pai-li’mõn, e ar kwalok jet nan ko re kanuij emõn. ‘Ij jilkinwõj Timote ñõn ibemi,’ Paul ej jiroñ ro dri Pi-lip’pai. ‘Ak mõttõn wõt jirik I naj bareinwõt lowõj kom.’ Im, ñõn Pai-li’mõn, ej je im ba: ‘Kwon kaboj juõn jikin aõ ber ijene.’

Ke r’ar kotlok Paul e ar lolok dri Kristin ro jein im jatin ilo elõñ jikin ko. Ak tokelik rej bar kalibusi Paul ilo Rom. Ilo ien in e jela bwe re naj mõn e. Kin men in ej jeje ñõn Timote im kajitõk bwe en kaiur tok. ‘I ar tiljek ñõn Anij, Paul ej je, ’im Anij e naj nawõnaõ.’ Jet wõt yiõ elikin air mõn Paul, e bar jebeeplok Jerusalem, kiõ jen pein dri Rom.

Ak e bar lõñ men ko ilo Baibel eo. Jeova Anij ej kajerbal dri jilik Jon bwe en jeje buk ko eliktata, koba buk in Revelesõn eo. Buk in ilo Baibel eo ej kwalok kin men ko re jañin walok. Jen katak kiõ kin mõttõn men ko re naj walok ilo ran ko rej berotok.