Wãwen Ar Maroñ Mour In Drio

KWO jela ke ta eo ledrik in im ro jeran rej readi? Aet, ejja buk in wõt me kwoj readi—Aõ Buk in Bwebwenato Ko Jen Baibel. Im rej readi ejja bwebwenato eo me kwoj readi kiõ—“Wãwen Ar Maroñ Mour in Drio.”

Kwo jela ke ta eo rej katak? Mokta, bwe jej aikwij in jela kin Jeova im Nejin Jisõs elañe je naj bõk mour in drio. Baibel eo ej ba: ‘Eñin wãwen bõk mour in drio. Katak kin Anij eo emol, im kin Nejin eo e ar jilkintok ñõn lõl, Jisõs Kraist.’

Ewi wãwen bwe jen katak kin Jeova Anij im Jisõs Nejin? Juõn wãwen ej ilo ar readi Aõ Buk in Bwebwenato Ko Jen Baibel jen jinoin ñõn jemlokin. Elap an konono kin Jeova im Jisõs, ejjab ke? Im elap an konono kin men ko me r’ar kõmõni kap men ko re naj kõmõni. Ak ejjab bwe ar baj readi buk in wõt.

Kwoj lo ke buk eo juõn i lõl? Ej Baibel eo. Kwon kajitõk bwe bar juõn en readi mõttõn in Baibel eo ñõn yuk me r’ar bõk bwebwenato ko ilo buk in jen i. Baibel eo ej letok ñõn kij aolepen men ko jej aikwij in jela kaki bwe en jimwe ar jerbal ñõn Jeova im bõk mour in drio. Inem jen kar kaminineik kij bwe en mãkij ar katak Baibel eo.

Ak ar baj katak kin Jeova Anij im Jisõs Kraist wõt ejjab bwe. E maroñ lukkun lap ar jela kin ir im men in katak ko air, ak jej maroñ wõt jab bõk mour in drio. Kwo jela ke bar ta eo jej aikwij?

Jej aikwij in mour ekkar ñõn men ko jej katak kaki. Kwoj kememij ke Judas Is-kar’i-õt? E ar juõn ian lõmaro 12 me Jisõs e ar kãlet ir bwe ren an dri jilik. E ar lap an Judas jela kin Jeova im Jisõs. Ak ta eo e ar walok ñõn e? Elikin jirik ien e ar oktak im kubbon, im e ar ketak Jisõs ñõn dri kijirat ro kin 30 mõttõn silver. Inem Judas e jamin naj bõk mour in drio.

Kwoj kememij ke Gi-he’zai, leo im j’ar katak kake ilo Bwebwenato 69? E ar kõnan bõk jet nuknuk im mõnni ko me r’ar jab an. Kin men in e ar riõp bwe en bõk men kein. Ak Jeova e ar kajeik e. E naj kajeik kij bareinwõt elañe jejjab bokake kien ko an.

Ak e kanuij lõñ armij ro remõn im r’ar jerbal ñõn Jeova ilo tiljek ien otemjej. Je kõnan bwe jen einwõt ir, jejjab ke? Ladrik eo Samuel ej juõn joñõk emõn bwe jen lore. Kememij, einwõt j’ar katak ilo Bwebwenato 55, e ar emen ak lailim wõt yiõ ridtan ke e ar jino jerbal ñõn Jeova ilo tempel eo. Inem jekron ewi joñan am drik, kwojjab drik jen am maroñ jerbal ñõn Jeova.

Emol, armij eo me kij aolep je kõnan lore ej Jisõs Kraist. Meñe e ar juõn ladrik wõt, einwõt Bwebwenato 87 e ar kwalok, e ar ber ilo tempel eo im konono ñõn ro jet kin Jemen i lõñ. Jen anõk joñõk eo an. Jen kamaat ar maroñ im kennanek armij ro kin aruij Anij Jeova, im Nejin Jisõs Kraist. Elañe jej kõmõni men kein, je naj maroñ mour in drio ilo paredais eo ekãl an Anij ion lõl.