Ewõr Ke juõn Jitõb Eban Mij Ibbam?

EWÕR KE mour elikin mij? Kajitõk in ear bwokwoji armij in lal iumin millennium ko. Iumin ien kein, armij ro jen kajjojo ailiñ ko rar etale kajitõk in im rar kine kajjojo kain tõmak ko.

Ibelakin lal in, koba ailiñ ko ilo Pacific einwõt Polynesia, Melanesia, im Micronesia, elõñ armij rej tõmak bwe ewõr juõn “jitõb” eo ej mour wõt ñe juõn emij. Ewõr ke juõn men iloan im ej diojlok jen enbwinin eo emij im ej mour manlok? Ta jitõb eo ilo juõn armij eo emour? Ta eo ej walok ñan e ñe jej mij? Nan in Anij ekakõrmol, Bible eo, ej letok uak ko remol im rejuburuõd ñan kajitõk kein.

Ta In Jitõb eo?

Ilo Bible eo, nan ko im rar ukote ñan “jitõb” ej melelen “menono.” Ak men in elaplok melele ie jen baj menono wõt. Ñan wan joñok, ri jeje Bible eo etan James, ear je: “Enbwin e jibil jen an [“jitõb,” New World Translation], e mij.” (Jemes 2:​26) Kin men in, jitõb ej eo im ej kamakit enbwin eo.

Kajur in im ej kamakit juõn eban menono eo, ak mejatoto eo, im ej toor ilo aer ko. Etke jab? Kinke ñe ebõjrak menono, cell ko ilo enbwin rej mour wõt iumin jidik ien​—“kin jet minit ko,” ekkar ñan The World Book Encyclopedia. Eñin unin kõmadmõd ko ñan kejmour juõn bwe en bar menono remaroñ tõbrak, im remaroñ kõrrã mõttan enbwinin juõn armij ibben bar juõn armij. Ak ñe ekun kein kejjo mour eo jen cell ko in enbwin, kõmadmõd ko otemjej ñan bar kejmour juõn reban tõbrak. Menono otemjej ilo lal eban kejmour juõn cell. Inem, jitõb eo, ak kajur-in-mour im jeban loe​—kein kejjo mour eo​—ej kein kejmour cell ko bwe ren mour. Kajur-in-mour in ej mour manlok kin an menono.​—Job 34:14, 15, NW.

Jitõb in ej jerbal ilo armij wõt ke? Bible eo ej letok jibañ kin juõn uak emõn ilo men in. Ri Meletlet eo King Solomon ear je: “Wõn e jela an [“jitõbõn,” NW] armij, elañe ej wõnliñlok; im an [“jitõbõn,” NW] kidu eo, elañe ej wõnlõllok ñõn lõl?” (Ekklisiastis 3:​21) Inem emwij kennan kin menin mour ko einwõt armij ro bwe ewõr jitõbiir. Ewi wãwen an eindein?

Jitõb eo, ak kajur-in-mour, jemaroñ keidi ñan jarom eo ej toor ikijen juõn enjin ak juõn kein jerbal. Naj maroñ kajerbal jarom eo jeban loe bwe en kõtõbrak elõñ men ko, ekkar ñan kein jerbal rot ej kejjo e. Ñan wan joñok, juõn stove emaroñ kõmman kijeek, juõn computer emaroñ kakobaik melele ko im kõmman jerbal in bwinbwin, im juõn television emaroñ kwalok pija ko im ainikien. Bõtab, jarom eban bõk kadkadin enjin eo ak kein jerbal eo ej kejjoiki. Ej juõn kajur wõt. Ilo ejja wãwen in, kajur-in-mour eo ejjab bõk kadkadin eo ej kejmouri. Ejelok kadkadin, ejelok maroñ ibben ñan bebe. Armij ro im menin mour ko jimor ewõr “juõn wõt menono [“jitõb,” NW].” (Ekklisiastis 3:​19) Kin men in, ñe juõn armij emij, jitõb eo an ejjab mour manlok wõt ilo bar juõn jikin.

Inem, ewi wãwen bed eo an ro remij? Im ta eo ej walok ñan jitõb eo an eo emij?

“Ñan Brij Kwo Naj Jeblak”

Ke emaan eo moktata, Adam, ear make kõtõrãi kien Anij, Jehovah ear ba ñan e: “Kin menokaru in mejõm kwo naj moña ekõn, ñõn ien eo kwoj jeblak ñõn brij; bwe ar bõk yuk jen e: bwe brij kwe, im ñõn brij kwo naj jeblak.” (Jenesis 3:​19) Tu ia Adam ear bed ie mokta jen ien eo Jehovah ear kõmanman e jen bũdej? Eokwe, ear ejelok! Ear jab bed. Inem ke Jehovah Anij ear ba bwe Adam enaj “jeblak ñõn brij,” ear melelen bwe Adam enaj mij. Adam eban kar ellã ñan juõn jikin jitõb. Ilo an mij enaj bar ejelok mour ibben, enaj jako. Kaje eo an kar mij​—ejelok mour​—jab bwe en emmakit ñan bar juõn jikin.​—Ri Rom 6:​23.

Ta kin ro jet im rar mij? Wãwen bed eo an ro remij ealikar ilo Ecclesiastes 9:​5, 10, ijo jej konono: “Ro remij ejelok jabdewõt jelã ibbeir . . . Ejelok men rej kõtõbari, ejelok menin kine, ejelok jelã ak air kabel, ilo lũp eo.” (Moffatt) Kin men in, mij ej ñe juõn ejako. Ri jeje Sam ear je bwe ñe juõn armij emij, “menono an [“jitõb eo an,” NW] ej ilok, ej jeblak ñõn lõl eo an; ilo ran eo lemnõk ko an rejokolok.”​—Sam 146:​4.

Ealikar, ro remij rejajelokjen, ejelok maroñ ibbeir. Ejelok air jelã kin jabdewõt men. Rejjab maroñ lo yuk, eoroñ yuk, ak kennan ibbam. Ejelok air maroñ ñan jibañ yuk ak kokkure yuk. Kwojjab aikwij mijak ro remij. Ak ewi wãwen jitõb eo ej “drioijlok” jen juõn ilo ien emij?

Jitõb eo “Ej Jeblak ñan Anij eo Emol”

Bible eo ej ba bwe ñe juõn armij emij, “jitõb eo ej jeblak ñan Anij eo emol eo ear lelok e.” (Ecclesiastes 12:​7, NW) Ej melelen ke bwe juõn mõttan in jitõb eo ej lukkun weaklok ilo mejatoto bwe en walok iman Anij? Jab ñan jidik! Wãwen Bible ej kajerbal nan eo “jeblak” ejjab watõk an juõn aikwij emmakit jen juõn jikin ñan bar juõn. Ñan wan joñok, kar jiroñ Ri Israel ro rar jab tiljek: “ ‘Komin jeblaktok ñan iõ, im Inaj jeblakwõj ñan kom,’ Jehovah in inelip ear ba.” (Malachi 3:​7, NW) An Israel ‘jeblak’ ñan Jehovah ear melelen air oktak jen ial eo air ebwid im bar lor ial eo ewãnik an Anij. Im an Jehovah ‘jeblak’ ñan Israel ear melelen enaj emõn an bar lolorjake ro don. Ilo wãwen kein ruo “jeblak” ear melelen wãwen lemnak ko air, jab bwe ren lukkun emmakit jen juõn jikin ñan bar juõn.

Eindein, ilo ien mij ejelok juõn emmakit jen lal ñan jikin ilañ ñe jitõbõn juõn ej “jeblak” ñan Anij. Kememej, jitõb eo ej kajur-in-mour. Ñe kajur in ej ilok jen eo emij, Anij wõt enaj maroñ kajeblake ñan e.  Inem jitõb eo ej “jeblak ñan Anij eo emol” ilo wãwen in bwe mour eo an kin ilju eo ej atartar wõt ibben Anij.

Ñan wanjoñok, kalmenlokjen, kin ta eo Jeje ko Rekwojarjar rej ba kin mij eo an Jesus. Ri jeje gospel Luke ej ba: “Im ke emwij an Jisõs lamij kin elap ainiken, E ba, Jema Ij lewoj Aõ [“jitõb eo aõ,” NW] ilo peõm: im ke emwij an ba men in, e mij.” (Luk 23:​46) Ke jitõbõn Jesus ear ilok jen e, ear jab lukkun wanliñlok ñan lañ. Kar jab kajerkakbijeik Jesus jen ro remij mae ran eo kein kajilu. Im kar aikwij bar 40 ran ko mokta jen an kar wanliñlok ñan lañ. (Jerbal 1:​3, 9) Bõtab, ilo ien an mij, Jesus ear likit jitõb eo an ilo pein Jemen, ilo an lukkun liki bwe Jehovah emaroñ kejmour e bwe en bar mour.

Aet, Anij wõt emaroñ kajeblaktok juõn bwe en bar mour. (Sam 104:30) Ewi joñan an lap kejatdikdik ko rekabwilõñlõñ rebellok!

Juõn Kejatdikdik Ebin

Bible eo ej ba: “Auõ ej itok, ilo eo ro otemjej rej ber ilo lũp ko [“lũp in ememej ko,” NW] re naj roñ ainiken [Jesus], im naj drioijtok.” (Jon 5:​28, 29) Aet, Jesus Christ ear kallimur bwe ro Jehovah ej ememeji enaj kajerkakbijeik ir, ak kajeblaktok ir bwe ren bar mour. Jen an walok kejelã ko rekaburomõjmõj kin ro im rar mij, kejelã ko rekamõnõnõ renaj walok kin ro emwij karoltok ñan mour. Ewi joñan lañliñ eo naj walok in karuwaineneik ro rejitenburu jen lũp eo!

Kwo kõnan ke kalaplok am jelã kin wãwen am maroñ bõk tokjen jen kejatdikdik in eo ej jen-Anij? Kimij kir yuk bwe kwon jeje ñan address in im ej bed ilal kin juõn copy in brochure eo Kwomaroñ Jeran Anij!