Ewõr Ke Juõn Am Jitõb eo Eban Mij?

“JEJE ko otemjej emwij letok kin kakõrmol an Anij, ej bareinwõt or tokjeir kin katakin, im kowe, im kajime, im kajelaik armij ilo kwojarjar,” ri jilek Paul ear je. (2 Timote 3:​16) Aet, Bible ej juõn book in mol eo ej itok jen Anij eo emol, Jehovah.​​—⁠Sam 83:⁠18.

Ke Jehovah ej Ri Kõmanman eo an men ko otemjelok, ekoba armij, ejelã ta eo ej walok ñan kij ñe jej mij. (Dri Hibru 3:4; Reveles̃õn 4:​11) Im ilo Nan in kakõrmol eo an, Bible eo, emwij an letok uak ko remol im rekajuburu ñan kajitõk ko kin elikin ijin.

Ta Jitõb eo?

Ilo Bible, nan ko jinointata rej ukõt “jitõb” rej bedbed ion melele in “emmenono.” Ak elaplok ijo menin ej kwalok kake jen baj jerbal in emmenono wõt. Ñan wanjoñok, ri jeje Bible eo James, ej kwalok: “Enbwin eo ejelok an jitõb ej mij.” (James 2:​26, New World Translation) Eindein, ej jitõb eo ej lelok mour ñan enbwin eo.

Kajur in lelok mour eban baj emmenono eo wõt ak kõto, eo ej makitkit ilo ãr ko. Etke jab? Kinke elikin an emmenono eo bõjrak, mour ej bed wõt ilo kij ko ilo enbwin iumin jidik ien eo ekadu​​—⁠“iumin jejjo wõt minit,” ekkar ñan book eo World Book Encyclopedia. Kin un in, jibadbad ko ñan bar kemour emaroñ wõr tõbrak ie. Ak ilo ien eo mour eo jejjab loe kin mejed ej kunlok jen kij ko ilo enbwin, jabdewõt jibadbad ñan bar kajeblak mour eo ejelok tokjeir. Aolepen emmenono eo, ak kõto, ilo lal in rejjab maroñ bar kemour meñe juõn kij. Inem jitõb eo, ej kajur in mour eo jeban loe​​—⁠ej kamakit wõt mour eo bwe kij in enbwin ko im armij eo ren mour wõt. Kajur in mour in emmenono eo ej kemouri.​​—⁠Job 34:​14, 15.

Jitõb in ej emmakitkit wõt ilo armij ke? Bible ej jibañ kij ñan tõbar juõn jemlok eo ejimwe ilo menin. King eo emeletlet Solomon ear kamol bwe armij im menin mour ko “ibbeir otemjej juõn wõt jitõb,” im ear kajitõk: “Wõn e jelã jitõb an armij, elañe ej wanliñlok, im jitõb an kidu eo elañe ej wanlallok ñan lal?” (Ecclesiastes 3:​19-21, NW) Inem menin mour ko im bareinwõt armij rej konono kake ir bwe ewõr juõn air jitõb. Ewi wãwen an maroñ eindein?

Jitõb eo, ak kajur in mour eo, jemaroñ keidi ñan kajur in jarom eo ej toor ibulen juõn machine ak juõn men eo ej jerbal kin jarom. Jarom eo jeban lo kin mejed emaroñ kõmman elõñ kain jerbal, ekkar ñan kein jerbal eo ej lelok jarom ak kajur ñane. Ñan wanjoñok, juõn stove jarom remaroñ kõmmane ñan an kõmman kijeek ak mãnãn, juõn computer ñan bõk melele jene, im juõn television ñan kwalok annañ im ainikien. Ak, aetin jarom eo ejjab aikwiji ejaakin ak jekjekin kein jerbal eo ej kakajur e. Ej baj bed wõt einwõt juõn kajur. Ilo wãwen in lok wõt, kajur in mour eo ejjab bõk jabdewõt kadkadin menin in kõmanman eo ej lelok kajur in mour ñane. Ejelok eñjake in armij ibben im ejelok an maroñ in lemnak. Armij im menin mour ko “ewõr juõn wõt jitõb.” (Ekklisiastis 3:​19) Kin menin, ñe juõn armij emij, jitõb eo an ejjab etal wõt im mour ilo bar juõn wãwen einwõt juõn jitõb ak enjel.

Inem, ta, wãwen eo ri mij ej bed ie? Im ta eo ej walok ñan jitõb eo ñe juõn armij ej mij?

“Ñõn Brij Kwo Naj Jeblak”

Ke armij eo moktata, Adam, ear jen kõnan eo an make jab bokake kien eo an Anij, Ear ba ñan e: “Kin menokaru in mejõm kwo naj moña ekõn, ñõn ien eo kwoj jeblak ñõn brij; bwe ar bõk yuk jen e: bwe brij kwe, im ñõn brij kwo naj jeblak.” (Jenesis 3:​19) Ia eo Adam ear bed ie mokta jen an kar Jehovah kõmanman e jen bũdej? Eokwe, ear jab bed ilo jabdewõt jikin! Ear jab bed. Inem ke Jehovah Anij ear ba bwe Adam enaj kar “jeblak ñõn brij,” melele eo an in bwe Adam enaj kar mij im jeblak ñan bũdej. Adam ejamin kar ellãlok ñan juõn jikin ilo jitõb. Ilo mij Adam enaj kar bar juõn alen jab bed im mour. Kaje eo an kar mij​​—⁠jako an mour​​—⁠jab oktaklok ñan bar juõn wãwen bed.​​—⁠Dri Rom 6:​23.

Ak ta kin ro jet emwij air mij? Wãwen eo ri mij ro rej bed ie ej alikar ilo Ekklisiastis 9:​5, 10, ijo jej konono: “A ro re mij ejelok air jela . . . Ejelok jerbal, ak men in kine, ak jela, ak meletlet, ilo Hedis.” Kin menin, mij, ej juõn wãwen eo ejelok mour ie. Ri jeje Sam ear je bwe ñe juõn armij emij, “jitõb eo an ej ilok, ej jeblak ñan bũdej eo an; ilo ran eo lemnak ko an rejakolok.”​​—⁠Psalm 146:​4, NW.

Ealikar, bwe ri mij rejjab bed ijoko jabdewõt. Rejjab maroñ jelã jabdewõt. Rejjab maroñ lo yuk, roñ ainikiõm, ak konono ñan yuk. Rejjab maroñ jibañ yuk ak kõmman jorrãn ñan yuk. Kwoj aikwij jab mijak ro remij. Ak ewi wãwen bwe jitõb eo ej “ilok” jen juõn armij ilo ien eo ej mij?

Jitõb eo ej “Jeblak ñan Anij eo Emol”

Bible ej ba bwe ñe juõn armij emij, “jitõb eo make ej jeblak ñan Anij eo emol eo ear lelok.” (Ecclesiastes 12:​7, NW) Melelen menin ke bwe juõn jitõb ej etal imejatoto lok ñan ijo Anij ej bed ie? Ejjab ñan jidik! Wãwen eo Bible ej kajerbal nan in “jeblak” ejjab aikwij lukkun emmakit jen juõn jikin ñan bar juõn. Ñan wanjoñok, Ri Israel ro rejjab tiljek kar jiroñlok ir: “ ‘Jeblaktok ñan iõ, im I naj jeblakwaj ñan kom,’ Jehovah in inelip eo ear ba.” (Malachi 3:​7, NW) ‘Jeblaklok’ eo an Israel ñan Jehovah kar melelen juõn oktaklok jen juõn ial eo ebwid im bar bõk ial eo ewãnik an Anij. Im ‘jeblaklok’ eo an Jehovah ñan Israel kar melelen oktaklok eo an ear bar juõn alen emõn ibben ñan armij ro an. Ilo wãwen kein jimor “jeblak” eo ekitibuj juõn lemnak, jab juõn lukkun emmakit jen juõn jikin eo ej bed ie ñan bar juõn jikin.

Ilo wãwen in lok wõt, ilo mij ejelok lukkun emmakit jen lal ñan ijo ilañ ej walok ñe jitõb eo ej “jeblak” ñan Anij. Ilo ien eo kajur in mour eo emwij an ilok jen juõn armij, Anij wõt ewõr an maroñ in kajeblaklok ñan e. Inem jitõb eo ej “jeblak ñan Anij eo emol” ilo melele in bwe jabdewõt kejatdikdik ñan mour ilo ilju eo ej itok ñan armij eo ej kiõ bed ibben Anij.

Ñan wanjoñok, lemnak kin ta eo Jeje ko rej ba kake kin mij eo an Jesus Christ. Ri jeje Gospel eo Luke ej kalikar: “Jesus ear lamõj kin juõn ainikien elap im ba: ‘Jema, ij lewõj aõ jitõb ilo peim.’ Im ke emwij an ba menin, emij.” (Luke 23:​46, NW) Ke jitõb eo an Jesus ear ilok jene, ear jab etal ilo ial eo an lok ñan lañ. Jesus ear jab jerkakbiji jen mij mae ran eo kein kajilu, im elikin 40 ran ko tokelik ear wanliñlok ñan lañ. (Jerbal 1:​3, 9) Bõtab, ilo ien eo ear mij, Jesus ilo liki ear likit jitõb eo an ilo pein Jemen, im lukkun liki maroñ eo an Jehovah ñan bar kemour e.

Aet, Anij emaroñ bar kajeblaktok juõn armij ñan mour. (Sam 104:30) Juõn jerammõn elap menin ej kabelloke!

Juõn Kejatdikdik Emol

Bible eo ej ba: “Awa ej itok wõt ñe ro otemjej rej bed ilo lũpen ememej ko renaj roñ ainikien [Jesus] im naj diojtok.” (John 5:​28, 29, NW) Aet, Jesus Christ ear kallimur bwe ro otemjej rej bed ilo ememej eo an Jehovah renaj jerkakbiji, ak bar jeblaktok ñan mour. Ibwiljin rein emol enaj ro rar jibadõk juõn ialin kwojarjar einwõt ro ri karejaran Jehovah. Ak million armij ro jet rar mij ilo air kar jab kalikar elañe renaj kar mour ekkar ñan kien ko rewãnik an Anij. Bõlen, rar jab jelã kin men ko Anij ear aikwiji air kõmmani ak ear jabwe ien ñan air kõmman oktak ko rar menin aikwij. Armij ro ilo kain wãwen in rej bareinwõt bed ilo ememej eo an Anij im renaj jerkakbiji, bwe Bible eo ej ba: “ro remõn im ro renana re naj jerkakbiji.”​​—⁠Jerbal 24:⁠15.

Rainin, lal in eobrak kin kijirãt im akwel, kowadoñ im katorlok bõtõktõk, ettonon im nañinmij. Elañe ro remij ren kar jeblaktok ñan mour ion juõn lal eo einwõt in, emol jabdewõt tokjen mõnõnõ enaj mour kadu. Ak Ri Kõmanman eo ear kallimur bwe ejjabto enaj bõktok juõn jemlok ñan jukjuk in bed in kiõ an lal in ej bed iumin kajur eo an Satan Devil eo. (Jabõn Kennan Ko 2:​21, 22; Daniel 2:​44, NW; 1 Jon 5:​19) Juõn jukjuk in bed ewãnik an armij​​—⁠juõn “lõl ekal”​​—⁠inem enaj juõn mol eo emõn.​​—⁠2 Piter 3:​13.

Ilo ien en “dri jokwe ie e jamin ba: ‘I nañinmij.’ ” (Aiseia 33:24) Meñe eñtan in mij enaj jako, bwe Anij “E naj kõmõraik jen mejeir dren in kemjãlãl otemjej, im e naj ejelok bar mij, im re jamin bar liãjlol, ak jõñ, ak iñtan; bwe men ko mokta re joko.” (Reveles̃õn 21:⁠4) Juõn in jerammõn ñan ro “ilo lũpen ememej ko”!

Ñe Jehovah ej jolok nana jen lal, ejamin jolok wãnik ibben nana. (Sam 37:​10, 11; 145:20) Ilo mol, “juõn jar elap” in armij ro “jen ailiñ otemjej, im ian bwij otemjej, im driloabjen otemjej, im konono otemjej” renaj ellã jen “iñtan eo elap,” eo enaj jolok lal in enana kiõ. (Reveles̃õn 7:​9-​14) Eindein, juõn jar elap in armij renaj bed im karuwaineneiktok ro remij.

Kwoj kijoror ke in bar lo ro am jitenburu? Kwoj kõnan ke mour indio ilo Paradise ion lal? Inem kwoj aikwij bõk jelãlokjen eo ejimwe kin ankilan Anij im karõk ko an. (Jon 17:⁠3) Ej ankilan Jehovah bwe “armij otemjej rej aikwij bõk lomor im itok ñan juõn jelãlokjen eo ejimwe in mol.”​​—⁠1 Timothy 2:​3, 4, NW.

[Pija]

“Brij kwe im ñõn brij kwo naj jeblak”

[Pija]

Jitõb eo emaroñ kõkkar ñan jarom

[Pija]

Jerkakbiji eo enaj bõktok lañliñ eo ej indio