Naan ko Ad Ren Jipañ im Kakajoor Armej

1, 2. (1) Ta juon iaan menin letok ko an Jeova ñan kõj? (2) Jet armej rej kõjerbale menin letok in ilo wãween ko rejjab jim̦we. Ewi wãween?

BAJ l̦õmn̦ak m̦õk kõn men in: Jen ba bwe ewõr juon waam̦ wa. Bõtab, kwaar lel̦o̦ke wa in waam̦ ãinwõt juon menin lel̦o̦k ñan juon jeram̦. Kwõl̦ak roñ tok, armej in jeram̦ ej kõjerbale wa eo ñan an debdeb armej. Kwõnaaj ke m̦õn̦õn̦õ ippãn armej in jeram̦? Ejjel̦o̦k pere kwõban kar.

² Aolep ‘menin letok rem̦m̦an im reweeppãn’ rej jãn Jeova. Juon iaan menin letok kein jãn E ej maroñ eo ñan kõnono. (Jemes 1:17) Jej oktak jãn menin mour ko kõnke jemaroñ kõnono im kwal̦o̦k l̦õmn̦ak ko ad im bareinwõt eñjake ko ad ñan armej ro jet. Bõtab, ãinwõt kar wa eo ilo waanjoñak eo ilõñ, elõñ armej rej kõjerbale menin letok in jãn Anij ilo wãween ko rejjab jim̦we. El̦ap an Jeova bũrom̦õj ñe wãween an armej ro kõnnaan elukkuun nana im ej kõmetak ro jet!

3. Bwe jen maroñ pãd wõt ilo yokwe eo an Anij, ewi wãween jej aikuj kõjerbale menin letok eo an?

³ Bwe jen maroñ pãd wõt ilo yokwe eo an Anij, jej aikuj kõjerbale menin letok in an ilo wãween eo ekõn̦aan. Em̦õj an Jeova kwal̦o̦k ñan kõj kadede kain kõnono rot ko me ej buñbũruon kaki. Naan eo An ej ba: “Kom̦win jab kõjerbal naan ko reddo ilo ami kõnono. Kõjerbal wõt naan in jipañ, ko remaroñ kalõk im jipañ aikuj an armej, bwe men ko kom̦ij ba ren em̦m̦an ñan ro rej roñjake kom̦.” (Epesõs 4:29, UBS) Jenaaj etale jilu men ko ilo katak in. Kein kajuon, jenaaj etale unin jej aikuj kõjparok wãween ad kõnono. Kein karuo, jenaaj lale kain kõnono rot ko rejekkar im jej aikuj kõjparok kõj jãni. Im kein kajilu, jenaaj etale ta ko jemaroñ kõm̦m̦ani bwe jen kwal̦o̦k wõt naan ko rem̦m̦an im remaroñ jipañ ak kakajoor armej ro.

UNIN JEJ AIKUJ KÕJPAROK WÃWEEN AD KÕNONO

4, 5. Ta ko bok in Jabõn Kõnnaan ej ba kõn naan ko ad?

⁴ El̦ap an naan ko ad jelõt armej ro. Eñin ej juon iaan un ko raorõk unin jej aikuj kõjparok wãween ad kõnono im naan ko jej kõjerbali. Jabõn Kõnnaan 15:4 ej ba: “Lo eo ejouj, juon wõjke in mour; ak ñe enana, ej menin rupe bũruon.” Ta mel̦el̦ein men in? Eokwe, jejel̦ã bwe dãn elukkuun aorõk ñan wõjke ko, kõnke dãn ej jipañ wõjke kein bwe ren emmourur im em̦m̦an aer eddek. Ilo wãween in l̦o̦k wõt, naan ko rem̦m̦an im rejouj remaroñ jipañ armej ro. Bõtab, naan ko renana im reddo remaroñ ko̦kkure im kõmetak armej ro. Ealikkar bwe naan ko me jej kõjerbali remaroñ jipañ armej ro, ñe eab ko̦kkure im kõmetak er.​—Jabõn Kõnnaan 18:21, UBS.

⁵ Ñan kaalikkarl̦o̦k wõt joñan an l̦ap an naan ko ad jelõt armej ro, bok in Jabõn Kõnnaan ej ba: “Naan ko an juon ri jajel̦o̦kjen̦ remaroñ ko̦kkure juon armej ãinwõt juon jãje.” (Jabõn Kõnnaan 12:18, UBS) Em̦õj ke an lukkuun metak bũruom̦ kõn wõt naan ko an ro jet? El̦aññe juon armej ej m̦õkaj im kõnnaan, naan ko an remaroñ kõmetak bũruon armej ro im ko̦kkure kõtaer. Bõtab el̦aññe juon armej ekõn̦aan l̦oore Anij, enaaj kate ñan kwal̦o̦k wõt naan ko rejouj im remaroñ kaenõm̦m̦an im jipañ ro jet. Naan kein an reban rupe jem̦jerã ko, bõtab renaaj jipañ bwe en em̦m̦anl̦o̦k im epaakl̦o̦k wõt. Kwõj ke keememeje juon iien me kwaar lukkuun bũrom̦õj ak inepata, im juon ear iwõj im kaenõm̦m̦an eok kõn naan ko an rejouj? (Jabõn Kõnnaan 16:24, UBS) Kiiõ ke jejel̦ã bwe el̦ap an naan ko ad jelõt ro jet, jej aikuj kõjparok wãween ad kõnono. Jej aikuj kõjparok bwe naan ko ad ren jipañ im kaenõm̦m̦an ro jet, im jab ko̦kkure im kõmetak er.

6. Etke elukkuun pen ñan ad kõjparok wãween ad kõnono?

⁶ Jekdo̦o̦n ewi joñan ad lukkuun kate kõj, bõtab jet iien jenaaj baj jirilo̦k ilo wãween ad kõnnaan. Kõnke kõj ri jerawiwi im jejjab weeppãn, epidodo ad kwal̦o̦k naan ko rejjab em̦m̦an. Eñin ej un eo kein karuo unin jej aikuj kate wõt kõj im kõjparok wãween ad kõnono. Keememej bwe naan ko jej kwal̦o̦ki rej itok jãn bũruod. Baibõl̦ ej ba bwe ‘enana l̦õmn̦ak ko ilo bũruon armej.’ (Jenesis 8:21; Luk 6:45, UBS) Kõn men in, ebwe an pen kõjparok loõd ak wãween ad kõnnaan. (Jemes 3:2-4, UBS) Meñe jet iien jemaroñ jirilo̦k ilo wãween ad kõnono, bõtab jemaroñ kate wõt kõj bwe jen kakõm̦anm̦anl̦o̦k wãween ad kõnnaan. Ñan waanjoñak, ekkã an l̦ap an aet ikõtaan mejje ko. Im ñe armej ro rej tuwaak ak etal ilo juon mejje, rej aikuj lukkuun kate er meñe el̦ap an aet bwe ren maroñ etal ñan ãne eo juon. Ãindeinl̦o̦k wõt, jej aikuj kate kõj im jum̦aeiki kõn̦aan in enana ñan kõnono ilo wãween ko rejjab em̦m̦an.

7, 8. Ewi joñan an naan ko ad jelõt wãween ad kabuñ ñan Jeova?

⁷ Naan ko ad rej jelõt jem̦jerã eo ad ippãn Jeova. Eñin ej un eo kein kajilu unin jej aikuj kõjparok wãween ad kõnono im naan ko jej kõjerbali. Naan ko jej kõjerbali rej jelõt jem̦jerã eo ad ippãn armej ro jet. Bõtab, el̦apl̦o̦k an naan kein jelõt jem̦jerã eo ad ippãn Jeova. Jemes 1:26 (UBS) ej ba: “Ewõr ke en̦ ej l̦õmn̦ak bwe e ri tõmak? El̦aññe ejjab kõjparok loõn, ejjel̦o̦k tokjãn tõmak eo an, im ej make m̦on̦e.” Ãinwõt ad kar katak kake ilo kar katak eo l̦o̦k, wãween ad kõnono ej ekkejell̦o̦k ñan wãween ad kabuñ ñan Jeova. Joñan, el̦aññe jej kõjerbale naan ko reddo im renana, enaaj ejjel̦o̦k tokjãn aolep jerbal ko me jej kõm̦m̦ani ñan Anij. Kwõj ke loe im kile joñan aorõkin ad aikuj kõjparok wãween ad kõnono?​—Jemes 3:8-​10, UBS.

⁸ Elukkuun alikkar bwe elõñ ko un ko raorõk unin jej aikuj kõjparok bwe en jab bõd wãween ad kõjerbale menin letok in an Anij. Jen kiiõ bwebwenato kõn kain kõnono rot ko rejakkar im Kũrjin ro rem̦ool rej aikuj kõjparok er jãni. Tokãlik, jenaaj kõnnaan kõn naan ko rem̦m̦an im remaroñ jipañ ak kakajoor armej ro.

NAAN KO REDDO, RETTOON IM REJEKKAR

9. Ilo lal̦ in rainin, kain naan rot ko me el̦ap an armej ro kõjerbali?

⁹ Kanejnej im naan ko rettoon. Ilo lal̦ in rainin, el̦ap an armej ro kanejnej im kwal̦o̦k naan ko rettoon im rejekkar. Jet armej ñe rej illu, eitok wõt bwe ren kanejnej ak kõjerbal naan ko rettoon im rejekkar. Im jet, ñe rej kõm̦m̦an kõjak im kattõñ ro jet, ekkã aer kõjerbal naan ko rettoon. Ejjab kein kõm̦m̦an kõjak men kein! Rebõd im rettoon. Enañin 2,000 iiõ ko remootl̦o̦k, rijjelõk Paul ear rõjañ Kũrjin ro ilo Kolosse bwe ren jol̦o̦k “naan ko rettoon” jãn ibwiljier. (Kolosse 3:8) Ke Paul ear jejel̦o̦k ñan eklejia eo ilo Epesõs, ear laajraki jet iaan men ko me rejjab aikuj wal̦o̦k ibwiljier. Juon iaan men kein ej ‘kõjak ko renana.’​—Epesõs 5:3, 4.

10. Etke jej aikuj kõjparok kõj bwe jen jab kanejnej im kõjerbal naan ko rettoon im rejekkar? (Jouj im lale kõmel̦el̦e jiddik ko itulõñ.)

¹⁰ Jeova elukkuun dike kanejnej im naan ko rettoon. Armej ro me rej yokwe Jeova rej bar dike men kein. Im kõnke jej yokwe Jeova, jej kõjparok kõj jãn kanejnej im jabdewõt naan im kõm̦m̦an kõjak ko rettoon. Paul ear kõllaajraki men ko renana im rejekkar me rej itok jãn “kõn̦aan ko an armej.” M̦anit im kõm̦m̦an kab naan ko me ‘rettoon’ rej m̦õttan men kein. (Galetia 5:19-21, UBS) Men kein rejjab men bajjek im men dikdik wõt. Ñan waanjoñak, jen ba bwe juon armej ej wõnm̦aanl̦o̦k wõt im kanejnej im kõjerbal naan ko rettoon meñe elõñ alen an em̦m̦aan ro me rej lale eklejia eo kajjioñ jipañe. Kwõjel̦ã ke ta eo enaaj wal̦o̦k ñan e? Eokwe, remaroñ bukwel̦o̦ke armej in jãn eklejia eo.a

11. (1) Ta eo ekkã an armej ro bwebwenato kake? (2) Ta ko rebõd im renana me remaroñ wal̦o̦k ñe armej ro rej bwebwenato kake ro jet?

¹¹ Ruruwe im riab. Ekkã an armej ro bwebwenato kõn ro jet im men ko me rej wal̦o̦k ilo mour ko an armej rein. Ejjab aolep iien enana men in. Ñan waanjoñak, bõlen jemaroñ bwebwenato ñan ro jet kõn wõn ro me rar peptaij ak wõn ro me bõlen rej aikuj jipañ. Ilo kar iien ko etto, Kũrjin ro rar kõn̦aan jel̦ã ennaan ko kõn ri tõmak ro m̦õttaer. Rar kwal̦o̦k ennaan ko rem̦m̦an kõn ri tõmak ro m̦õttaer el̦aññe ekkar. (Epesõs 6:21, 22; Kolosse 4:8, 9) Bõtab, ebõd im enana el̦aññe juon ej bwebwenato kõn ro jet im ej ukote mel̦el̦e ko ak kwal̦o̦k men ko me ejekkar an aolep armej jel̦ã. Etke? Kõnke ñe armej in ej ãindein, jidik kõn jidik enaaj kõm̦m̦an bwe en jino an ruruwe ak riab kõn ro jet. Ñe juon ej ruruwe bar juon, ej riab im kõm̦m̦an bwe en ettoon im nana etan armej eo. Ilo kar iien ko etto, Parisi ro rar kajjioñ in riab im ruruwe Jijej kõnke rekõn̦aan bwe en nana etan. (Matu 9:32-​34; 12:22-​24) Ekkã an wal̦o̦k poktak im apañ ko kõn wõt men in ruruwe.​—Jabõn Kõnnaan 26:20, UBS.

12. Etke ro me rej kabuñ ñan Jeova rej aikuj kõjparok bwe ren jab ruruwe im riab?

¹² Jouj im keememej bwe kõnono ej juon menin letok jãn Anij. Jeova edike armej ro me rej kõjerbale menin letok in an ñan kõmetak ro jet im kõm̦m̦an jepel bõro. Edike ro rej “kõm̦m̦an poktak ikõtaan ro rej jem̦jerã.” (Jabõn Kõnnaan 6:16-19, UBS) Naan in “Tepil̦” ej itok jãn juon naan ilo kajin Grik etan di·aʹbo·los. Mel̦el̦ein naan in ej “ri riab” ak “ri ruruwe.” Tepil̦ ej juon iaan ãt ko etan Setan. Etke? Kõnke Tepil̦ eo ej ruruwe Anij im ba men ko reriab kõn E. (Revelesõn 12:9, 10) Ealikkar bwe jej aikuj kõjparok kõj bwe jen jab ruruwe im riab. El̦aññe jejjab, eokwe jenaaj ãinwõt Tepil̦ eo. Eklejia eo ejjab jikin riab im ruruwe. Men kein rej kõm̦m̦an bwe en wõr bõro jepel im poktak ilowaan eklejia eo. (Galetia 5:19-​21, UBS) Kõn men in, ñe juon ej kwal̦o̦k juon ennaan ñan kwe im kwõj pojak in kwal̦o̦k ñan ro jet, kwõn bõjrak im kajjitõkin eok make: ‘Em̦ool ke men in ij tõn ba? Enaaj ke em̦m̦an ñan armej eo bwe in ba? Ewõr ke tokjãn aõ ba ak kwal̦o̦ke ennaan in ñan ro jet?’​—1 Tessalonika 4:11, UBS.

13. Ewi wãween naan ko reddo im rekõmetak rej jelõt armej ro?

¹³ Naan ko reddo im rekõmmetak. Ãinwõt ad kar etale m̦oktal̦o̦k, naan ko jej kõjerbali remaroñ kõmetak armej ro. Jet iien kõn ad jab weeppãn, jej ba jet naan ko me tokãlik jej ajl̦o̦k kaki. Bõtab, Baibõl̦ eo ej kakkõl kõn kain kõnono ko me relukkuun jekkar im ren kar jab wal̦o̦k ilo eklejia eo im bareinwõt ilo baam̦le ko me rej Kũrjin. Ta in? Paul ear jiroñ Kũrjin ro im ba: “Kom̦win jol̦o̦k meo̦ otemjej, illu im anniabeab otemjej. Kom̦win jab bar ko̦uwaroñroñ im kaillu; kom̦win jab bar kõjdat.” (Epesõs 4:31, UBS) Baibõl̦ ko jet rej ukote naan kein “ko̦uwaroñroñ im kaillu” im ba “naan ko renana,” “naan ko rekõmmetak,” im “naan ko reddo.” Men kein ej kitibuj ad kajjirere ak kakitõtõik ro jet el̦e jãn joñan. Etke elukkuun nana im jekkar aolep wãween kein? Kõnke ñe jej kõm̦m̦ani ñan ro jet, ekõm̦m̦an menin aer l̦õmn̦ak bwe ejjel̦o̦k tokjãer im rejjab aorõk ñan jidik. El̦ap an naan im kõnnaan rot kein ko̦kkure im kõmetak ajri ro. Etke? Kõnke el̦ap aer lõke im tõmak rũtto ro. Innem, ñe rũtto ro rej ba naan rot kein ñan er, el̦ap aer naaj bũrom̦õj im metak.​—Kolosse 3:21, UBS.

14. Ñe juon armej ej imminene in kõjerbal naan ko reddo ñan ko̦kkure im kõmetak ro jet, etke jemaroñ ba bwe armej in ej make likũt mour eo an ilo kauwõtata?

¹⁴ Baibõl̦ eo ej kajju kwal̦o̦k joñan an nana ñe armej ro rej imminene in kõjerbal naan ko reddo, rettoon im naan in kajjirere ko ñan aer ko̦kkure im kõmetak ro jet. El̦aññe juon armej ej imminene in kõm̦m̦ani men kein, eokwe ej make likũt mour eo an ilo kauwõtata. Kõn men in, em̦m̦aan ro ilo eklejia eo renaaj kajjioñ jipañ e. Bõtab el̦aññe armej in ejjab kõm̦m̦an oktak ko, eokwe remaroñ jol̦o̦ke ak bukwel̦o̦ke jãn eklejia eo. El̦aññe ejjab kõm̦m̦an oktak, emaroñ jab bõk jeraam̦m̦an ko me Aelõñ ak kien eo an Anij enaaj bõktoki. (Galetia 5:19-21, UBS) Jeban pãd ilo yokwe eo an Anij el̦aññe jej imminene in kwal̦o̦k naan ko rettoon, naan ko reddo, im naan ko rejjab m̦ool. Kõnnaan im naan rot kein rej ko̦kkure im kõmetak armej ro.

NAAN KO ME REJ “KALÕK IM JIPAÑ” ARMEJ RO

15. Kain naan ak kõnono rot ko me “remaroñ kalõk im jipañ” armej?

¹⁵ Ewi wãween jemaroñ kõjerbale menin letok eo an Anij ilo wãween eo ekõn̦aan? Eokwe, jouj im keememej bwe Naan in Anij ej rõjañ kõj bwe jen “kõjerbal wõt naan in jipañ, ko remaroñ kalõk im jipañ aikuj an armej.” (Epesõs 4:29, UBS) Jeova ej m̦õn̦õn̦õ ñe jej kwal̦o̦k naan ko me rej jipañ, rõjañ, im kakajoor ro jet. Bwe jen maroñ kwal̦o̦k naan rot kein, jej aikuj l̦õmn̦ak m̦okta jãn ad kõnnaan. Baibõl̦ eo ejjab kwal̦o̦k ta ko jej aikuj ba. Im ejjab bar letok juon laajrak in naan ko rem̦m̦an me jemaroñ kããlõti im kõjerbali. (Taitõs 2:8) Bwe jen maroñ kõjerbale wõt naan ko me remaroñ jipañ armej ro, jej aikuj keememej jilu men ko raorõk. Kein kajuon, naan ko ad rej aikuj erreo. Kein karuo, naan ko ad rej aikuj m̦ool. Im kein kajilu, naan ko ad rej aikuj jouj. Jouj im keememej wõt men kein jilu ilo ad naaj kwal̦o̦k jet waanjoñak ko kõn kain kõnono ko me rej kakajoor im jipañ armej ro.​—Jouj im lale bo̦o̦k eo etan “Naan ko Aõ Rej Ke Rõjañ im Jipañ Armej Ro?”

16. Etke jej aikuj nõbar im kam̦m̦oolol ro jet?

¹⁶ M̦õn̦õn̦õ in nõbar im kam̦m̦oolol ro jet. Jeova im Jijej jim̦or rar nõbar im kam̦m̦oolol ro jet jãn bũrueer. Rar kile bwe ej menin aikuj ñan aer kõm̦m̦ane men in. (Matu 3:17; 25:19-23; Jon 1:47) Im kõnke kõj Kũrjin, jej aikuj m̦õn̦õn̦õ in nõbar im kam̦m̦oolol ro jet. Etke? Bok in Jabõn Kõnnaan 15:23 (UBS) ej ba: “El̦ap wõt an em̦m̦an el̦aññe jej kõjerbal naan ko rejejjet ñan iien eo.” Kajjitõk ippam̦ make: ‘Ewi wãween aõ eñjake ñe juon armej ej nõbar ak kam̦m̦oolol eõ? Naan kein an rej ke kam̦õn̦õn̦õik bũruõ im kakajoor eõ?’ Ñe jej nõbar im kam̦m̦oolol ro jet, jej kaalikkar ñan armej rein bwe jej kaorõk er im kwal̦o̦k ñan er bwe ewõr tokjãn aer kate er. Ñe armej rej kõm̦m̦ane men kein ñan kwe, eokwe enaaj kõm̦m̦an bwe kwõn kajoorl̦o̦k im l̦apl̦o̦k am̦ kate eok jãn kar m̦okta ilo jabdewõt men ko kwõnaaj kõm̦m̦ani. Kwõj ke m̦õn̦õn̦õ ñe ro jet rej kam̦m̦oolol im nõbar eok? El̦aññe aet, eokwe em̦m̦an el̦aññe kwõn bar kate eok im kam̦m̦oolol kab nõbar ro jet.​—Matu 7:12.

17. (1) Ta ko jemaroñ nõbar im kam̦m̦oolol ri tõmak ro m̦õttad ilo eklejia eo kaki? (2) Ta ko jemaroñ nõbar im kam̦m̦oolol eo pãleed kab ro nejid kaki?

¹⁷ Jouj im kate eok bwe kwõn kalimjek wõt men ko rem̦m̦an me ro jet rej kõm̦m̦ani. Innem, kwõn nõbar im kam̦m̦oolol er. Ewi wãween jemaroñ kõm̦m̦ane men in ilo eklejia eo? Eokwe, ñe kwõj roñjake juon katak em̦m̦an ilo eklejia eo, etal im kam̦m̦oolol armej eo. El̦aññe juon jodrikdrik ej kate bwe en tõprak mejãnkajjik ko an ñan Anij, kwõn etal im kam̦m̦oolol im nõbare kõn an kate. Im el̦aññe kwõj loe juon eo erũtto im aolep iien ej kate bwe en pãd ilo iien kweilo̦k ko meñe epen ñan e kõn an bwijwol̦ã, eokwe kwõn etal im nõbar kab kam̦m̦oolole. Eñin ej jet iaan wãween ko kwõmaroñ kam̦m̦oolol im nõbar ro ilo eklejia eo am̦. Ñe jej kam̦m̦oolol im nõbar armej ro jãn bũruod, naan ko ad remaroñ tõpar bũruon armej rein im kõm̦m̦an bwe en l̦apl̦o̦k aer kõn̦aan karejar ñan Jeova. Ak ta kõn baam̦le ko? Eokwe, elukkuun em̦m̦an im eaorõk bwe l̦eo im lio ren kam̦m̦oolol im nõbare doon. (Jabõn Kõnnaan 31:10, 28) Jemen im jinen ajri ro rej aikuj bar nõbar im kam̦m̦oolol ajri ro nejier. El̦ap an naan kein jipañ ajri rein ilo aer dik im rũttol̦o̦k. Etke? Eokwe, jouj im lale waanjoñak in: Juon menin eddek ej aikuj al̦ im dãn bwe en maroñ eddekl̦o̦k im emmourur. Naan in nõbar im kam̦m̦oolol ko ad rej ãinwõt al̦ im dãn. Im ajri ro rej ãinwõt menin eddek ko. Rũtto ro, jouj im kate kom̦ im kam̦m̦oolol kab nõbar ro nejõmi ñe rej kwal̦o̦k wãween ko rem̦m̦an im ñe rej kõm̦m̦ani men ko rem̦m̦an. Naan kein ami renaaj jipañ rein nejõmi bwe ren jel̦ã ke em̦m̦an men eo rar kõm̦m̦ane im bwe ren jab mijak in kõm̦m̦ani men ko ãierl̦o̦kwõt. Men in enaaj lujur er bwe en l̦apl̦o̦k aer kate er ñan kõm̦m̦ani wõt men ko rejim̦we.

18. Etke jej aikuj kate kõj im kaenõm̦m̦an ri tõmak ro m̦õttad?

¹⁸ Naan in kaenõm̦m̦an. Jeova ej yokwe im kaorõk ‘ro ettã bũrueer’ im ro ‘rej bũrom̦õj.’ (Aiseia 57:15) Naan eo An ej rõjañ kõj bwe jen wõnm̦aanl̦o̦k wõt im “kaenõm̦m̦ane doon” im ‘kaperan ro rej ikkũm̦kũm̦’ kab bũrom̦õj. (1 Tessalonika 5:11, 14) El̦aññe jej kate kõj ñan jipañ im kakajoor ri tõmak ro me el̦ap an eddo bũrueer kõn aer bũrom̦õj, eokwe Anij ej loe men in im el̦ap an nõbar im kam̦m̦oolol kõj.

19. Ta ko kwõmaroñ ba ñan kaenõm̦m̦an juon iaan ri tõmak ro m̦õttam̦ me ebũrom̦õj ak ej jino an ebbeer?

¹⁹ Ak kiiõ, ta ko kwõmaroñ ba ñan kaenõm̦m̦an juon iaan ri tõmak ro m̦õttam̦ me ebũrom̦õj ak ej jino an ebbeer? M̦oktata, kwõn jab l̦õmn̦ak bwe kwõj aikuj kõm̦adm̦õde apañ in an. Meñe eiet naan ko jej ba, ak enañin aolep iien remaroñ lukkuun jipañ armej in. Kwõn ba ñan ri tõmak in m̦õttam̦ bwe kwõj yokwe im kaorõke. Kajjitõk ippãn el̦aññe ekõn̦aan bwe komiro en jar ippãn doon. Im ilo amiro jar, kwõn kajjitõk ippãn Jeova bwe en jipañ armej in bwe en make kile bwe el̦ap an aorõk ippãn ri tõmak ro m̦õttan im ippãn Anij. (Jemes 5:14, 15) Kakeememej armej in bwe el̦ap ad aikuji im el̦ap an aorõk ippãn aolep ro ilo eklejia eo. (1 Korint 12:12-26) Riiti l̦o̦k ñane juon eoon me ej kaalikkar bwe Jeova ej yokwe im kaorõk e. (Sam 34:18; Matu 10:29-31) El̦aññe kwõj baj bõk jidik iien im kwal̦o̦k naan ko rejouj im “naan em̦m̦an” ñan armej ro me rej bũrom̦õj, men in enaaj jipañ er bwe ren kile bwe ro jet rej kaorõk er im yokwe er.​—Jabõn Kõnnaan 12:25.

20, 21. Ñe jej kajim̦we ak jipañ juon armej, ta ko jej aikuj kõm̦m̦ani bwe naan ko ad ren tõpar bũruon?

²⁰ Naan in katak im kakapilõk. Kõnke jejjab weeppãn, kõj aolep jej aikuj naan in kakapilõk im jipañ jãn iien ñan iien. Baibõl̦ ej rõjañ kõj im ba: “El̦aññe kwõj roñjake naan in kapilõk im m̦õn̦õn̦õ in katak, innem juon raan kwõnaaj mãlõtlõt.” (Jabõn Kõnnaan 19:20, UBS) Ej ke kun̦aan wõt em̦m̦aan ro me rej lale eklejia eo ñan lel̦o̦k naan in jipañ im kakapilõk ko ñan ro jet? Ejjab. Rũtto ro rej aikuj kajim̦we im lel̦o̦k naan in jipañ ñan ro nejier. (Epesõs 6:4, UBS) Kõrã ro me ekajoor tõmak eo aer remaroñ bar lel̦o̦k naan in kakapilõk im jipañ ñan kõrã ro jet im jiroñ ro. (Taitõs 2:3-5) Jej yokwe armej ro. Kõn men in, jenaaj kate kõj bwe jen jab kõmetak armej ro ñe jej kajjioñ in jipañ im kajim̦we er. Jenaaj bar kate kõj bwe en pidodo an armej eo roñjake im jerbali naan in jipañ kein. Ta eo enaaj jipañ kõj bwe jen kõm̦m̦ane men in? Jen lale jilu men ko me jej aikuj l̦õmn̦ak kaki m̦okta jãn ad lel̦o̦k naan in jipañ ko. Kein kajuon, ej unin am̦ kajim̦we ak lel̦o̦k naan in kakapilõk eo. Kein karuo, ej ia eo kwõj bõk naan in kakapilõk ko am̦ jãne. Im kein kajilu, ej wãween am̦ kõnnaan ñe kwõj kajim̦we ak lel̦o̦k naan in kakapilõk ñan armej ro.

²¹ Ñe kwõj kajim̦we ak jipañ juon armej, ta ko kwõj aikuj kõm̦m̦ani bwe naan ko am̦ ren tõpar bũruon? Eokwe, m̦oktata kwõj aikuj etale eok make. Kwõn kajjitõk ippam̦ make im ba, ‘Ta ko rej jipañ eõ bwe en pidodol̦o̦k aõ roñjake im kõttãik eõ make ñe ro jet rej kajim̦we im jipañ eõ?’ Ñe juon ej kajjioñ jipañ eok im kwõjel̦ã bwe unin an jipañ eok ej kõnke ej yokwe eok im ejjab kõn̦aan kõmetak eok, eokwe enaaj pidodol̦o̦k am̦ roñjake. Kõn men in, ñe kwõj kajjioñ in kajim̦we im jipañ bar juon, ej aikuj alikkar bwe unin am̦ kõm̦m̦ane men in ej kõnke kwõj yokwe e. Kein karuo, el̦aññe jekõn̦aan bwe naan in jipañ im kakapilõk ko ad ren tõpar bũruon armej eo jej kajjioñ jipañe, eokwe jej aikuj kõjerbale naan im mel̦el̦e ko jãn Baibõl̦. (2 Timote 3:16) Eñin unin ñe em̦m̦aan ro me rej lale eklejia eo rej kajim̦we im jipañ juon armej, rej kõjparok bwe ren l̦oore wõt Baibõl̦ eo im jab l̦õmn̦ak ko aer make. Rejjab ukote mel̦el̦e ko jãn Baibõl̦ eo bwe en errã ilo l̦õmn̦ak ko aer make. Kein kajilu, el̦ap an aorõk wãween ad kõnnaan ñe jej kajim̦we im jipañ armej ro. El̦aññe jej kõnnaan ilo jouj, enaaj pidodol̦o̦k an armej ro roñjake im kõm̦m̦an oktak ko. Im reban l̦õmn̦ak bwe ejako aer aorõk ippãn Anij.​—Kolosse 4:6, UBS.

22. Kõnono ej juon menin letok jãn Anij. Ta eo kwõnaaj kate eok ñan kõm̦m̦ane ikijjeen menin letok in jãn Anij?

²² Elukkuun alikkar bwe kõnono ej juon menin letok jãn Anij. Jej yokwe Jeova. Eñin unin jej aikuj kate kõj bwe en jim̦we im jab bõd wãween ad kõjerbale menin letok in. Jen bar keememej bwe el̦ap an naan ko ad jelõt armej ro. Remaroñ kakajoor im jipañ er ñe eab ko̦kkure im kõmetak er. Kõn men in, jen kate kõj ñan kõjerbale menin letok in ilo wãween eo me Anij ekõn̦aan bwe jen kõjerbale, ñan “kalõk im jipañ” armej. El̦aññe jenaaj kõm̦m̦ane men in, wãween ad kõnono enaaj kaenõm̦m̦an im kakajoor armej ro. Bareinwõt, men in enaaj jipañ kõj bwe jen pãd wõt ilo yokwe eo an Anij.