KATAK 51
Ewi Wãween Kwõmaroñ Kabuñbũruon Jeova ilo Wãween Am̦ Kõnono?
Ke Jeova ear kõm̦anm̦an kõj, ear letok ñan kõj juon menin letok elukkuun em̦m̦an—maroñ eo ñan kõnnaan. Eaorõk ke Ippãn wãween ad kõjerbale menin letok in? Aet, elukkuun aorõk Ippãn! (Riit Jemes 1:26.) Innem ewi wãween jemaroñ kõjerbale maroñ in ad ñan kõnono ilo juon wãween ej kabuñbũruon Jeova?
1. Ewi wãween ad aikuj kõjerbale menin letok eo ñan kõnono?
Baibõl̦ eo ej ba ñan kõj bwe jen “wõnm̦aanl̦o̦k wõt im kõkajoor doon im kõketak doon.” (1 Tessalonika 5:11) Kwõmaroñ ke l̦õmn̦ak kõn jet armej me rej aikuj bõk kõkajoor? Ta eo kwõmaroñ kõm̦m̦ane bwe en em̦m̦anl̦o̦k aer mour? Lukkuun kaalikkar ñan er bwe el̦ap aer aorõk ippam̦. Bõlen kwõmaroñ kwal̦o̦k ñan er ta ko kwõj kam̦m̦oolol er kaki. Kwõmaroñ ke l̦õmn̦ak kõn juon eoon emaroñ kõkajoor juon eo kwõjel̦ã kajjien? Elõñ eoon ko kwõmaroñ kããlõti. Bareinwõt keememej bwe wãween ad ba juon men ej ejja joñan aorõkin wõt naan ko jej ba, im emaroñ lukkuun l̦ap an jelõt ro jet. Kõn men in, kwõn kajjioñ kõnono ilo jouj im ineem̦m̦an aolep iien.—Jabõn Kõnnaan 15:1.
2. Kain kõnono rot ko jej aikuj kõjparok kõj jãni?
Baibõl̦ eo ej ba: “En ejjel̦o̦k naan enana ej diwõjtok jãn lo̦ñiimi.” (Riit Epesõs 4:29.) Mel̦el̦ein men in bwe jejjab kanijnij im kõjerbale naan ko renana ak naan ko reddo ñan kõmetak ro jet. Jej aikuj bar kõjparok kõj jãn ad kõnono kõn ro jet ilo juon wãween enana im jãn ad ruruwe.—Riit Jabõn Kõnnaan 16:28, UBS.
3. Ta eo enaaj jipañ kõj ñan kõnono ilo juon wãween me enaaj kõkajoor ro jet?
Ekkã an men ko jej kõnono kake kaalikkar ta ko rej pãd ilo bũruod im ta ko jej l̦õmn̦ak kaki. (Luk 6:45) Kõn men in, jej aikuj kammineneik kõj ñan l̦õmn̦ak wõt kõn men ko rem̦m̦an—men ko rewãnõk, men ko rerreo, men ko rej kõm̦akũt juon ñan kwal̦o̦k yokwe, im men ko remmejaja. (Pilippai 4:8) Bwe jen maroñ l̦õmn̦ak wõt kõn men kein, jej aikuj kããlõt menin kam̦õn̦õn̦õ ko im ro m̦õttad ilo mãlõtlõt. (Jabõn Kõnnaan 13:20) Bareinwõt, emaroñ jipañ ñe jej bõk iien im l̦õmn̦ak m̦okta jãn ad kõnono. L̦õmn̦ak kõn wãween an naan ko am̦ naaj jelõt ro jet. Baibõl̦ ej ba: “Naan ko an juon ri-jajel̦o̦kjen̦ remaroñ ko̦kkure juon armej ãinwõt juon jãje; ak naan ko an juon ri-jel̦ãl̦o̦kjen̦ remaroñ kãjmour juon armej.”—Jabõn Kõnnaan 12:18, UBS.
KAM̦WILAL̦L̦O̦K AM̦ MEL̦EL̦E
Katak kilen kõnono ilo juon wãween ej kabuñbũruon Jeova im kõkajoor ro jet.
4. Jel̦ã irooj ioon wãween am̦ kõnono
Jet iien, kõj aolep jej ba naan ko me jej ajl̦o̦k kaki tokãlik. (Jemes 3:2) Riit Galetia 5:22, 23, innem bwebwenato kake kajjitõk kein:
Ewi iaan kadkad kein kwõmaroñ jar kaki ñan jipañ eok jel̦ã irooj ioon wãween am̦ kõnono? Ewi wãween kadkad kein remaroñ jipañ eok?
Riit 1 Korint 15:33, innem bwebwenato kake kajjitõk in:
Ewi wãween an ro m̦õttam̦ im menin kam̦õn̦õn̦õ ko kwõj kããlõti maroñ jelõt wãween am̦ kõnono?
Ta eo emaroñ jelõt wãween am̦ kõnono?
Riit Ekklisiastis 3:1, 7, innem bwebwenato kake kajjitõk in:
Ñããt eo emaroñ juon menin mãlõtlõt ñan ikõñ wõt ak kõttar ñan juon iien em̦m̦anl̦o̦k ñan kõnono?
5. Kõnono kõn men ko rem̦m̦an kõn ro jet
Ewi wãween jemaroñ kõjparok kõj jãn ad kõmetak ro jet ak ba men ko rejjab jouj ñan er? Kõjo̦e PIJAIN ALWÕJ eo, innem bwebwenato kake kajjitõk kein:
Ilo pijain alwõj eo, etke em̦m̦aan eo jeid im jatid ear kõn̦aan ukot wãween an kõnnaan kõn ro jet?
Ta eo ear kõm̦m̦ane bwe en maroñ kõm̦m̦an oktak?
Riit Ekklisiastis 7:16, innem bwebwenato kake kajjitõk in:
Ta eo jej aikuj keememeje ñe jej itõn kõn̦aan kõnono kõn men ko rejjab em̦m̦an kõn ro jet?
Riit Ekklisiastis 7:21, 22, innem bwebwenato kake kajjitõk in:
Ewi wãween an eoon kein maroñ jipañ eok ñan kõjparok bwe en jab m̦õkaj am̦ illu ñe juon ej kõnono kõn men ko rejjab em̦m̦an kõn kwe?
6. Kwal̦o̦k jouj ñe kwõj kõnono ñan baam̦le eo am̦
Jeova ekõn̦aan bwe jen kõnono ñan ro ilo baam̦le eo ad ilo juon wãween ejouj im yokwe. Kõjo̦e PIJAIN ALWÕJ eo, innem bwebwenato kake kajjitõk in:
Ta eo enaaj jipañ eok ñan kõnono ilo jouj ñan ro ilo baam̦le eo am̦?
Riit Epesõs 4:31, 32, innem bwebwenato kake kajjitõk in:
Kain kõnono ro ko ej kõkajoore juon baam̦le?
Jeova ear kwal̦o̦k l̦õmn̦ak im eñjake ko an kõn eo Nejin, Jesus. Riit Matu 17:5, innem bwebwenato kake kajjitõk in:
Ewi wãween kwõmaroñ anõke Jeova ilo wãween am̦ kõnono ippãn ro ilo baam̦le eo am̦?
Pukot iien ko repel̦l̦o̦k ñan nõbar ro jet
JET ARMEJ REJ BA: “Imaroñ ba jabdewõt men ikõn̦aan ba jekdo̦o̦n ñe ro jet rej errã ak jaab.”
Kwõj ke errã ilo men in? Etke kwõj ba men in?
TARLEP IN KATAK EO ILO TUKADU
Men ko jej ba remaroñ jipañ ak kõmetak ro jet. Jej aikuj lukkuun l̦õmn̦ak kõn men ko jej ba, ñããt eo jenaaj ba, im wãween eo jenaaj ba.
Ãlij
Ta jet iaan wãween ko kwõmaroñ kõjerbal maroñ in kõnono eo am̦ ñan jipañ ro jet?
Kain kõnono rot ko kokõn̦aan kõjparok jãni?
Ta eo emaroñ jipañ kõj bwe jen aolep iien kõnono ilo juon wãween ejouj im ej kõkajoor ro jet?
KAL̦APL̦O̦K AM̦ MEL̦EL̦E
Ta eo emaroñ jipañ kõj ñan kõnono ilo juon wãween ej kõkajoor ro jet?
Katak im lale ta eo emaroñ jipañ eok ñan jab kanijnij ak kõjerbal naan ko renana.
Lale ewi wãween kwõmaroñ kõjparok eok jãn am̦ po ilo aujiid eo ñan ruruwe.
Lale ewi wãween an kar Jeova jipañ juon em̦m̦aan ñan jol̦o̦k an kanijnij.
“I Began to Think Seriously About Where My Life Was Headed” (The Watchtower, August 1, 2013)