Etke Baam̦le ko Kajjojo an Ri Kõnnaan ro an Jeova Rej Katak Baibõl̦ Ippãn Doon?

Jãn kar iien ko etto, Jeova ear baj kõn̦aan wõt bwe l̦eo im lio kab ajri ro nejier ren kõm̦m̦an aer iien ippãn doon. Ilo wãween in, remaroñ ejaake juon jem̦jerã epaak ippãn Anij im bar epaakel̦o̦k doon ãinwõt juon baam̦le. (Duteronomi 6:6, 7) Eñin unin baam̦le ko kajjojo an Ri Kõnnaan ro an Jeova rej kõm̦m̦an aer iien kajjojo wiik bwe ren katak im kabuñ ñan Anij ippãn doon. Elukkuun mel̦ak iien katak kein aer im rej bwebwenato kõn katak ko jãn Baibõl̦ eo me remaroñ jipañ er aolep. Meñe kwõj make iaam̦, kwõmaroñ kõjerbale iien in ñan katak kõn jabdewõt men eo kokõn̦aan jel̦ã jãn Baibõl̦ eo bwe kwõn maroñ epaakel̦o̦k wõt Anij.

Ej iien an baam̦le eo kate er bwe ren epaakel̦o̦k Jeova. “Kom̦win ruwaakl̦o̦k ñan Anij, im Enaaj ruwaakwaj ñan kom̦.” (Jemes 4:8) Enaaj l̦apl̦o̦k ad jel̦ã kajjien Jeova ñe jej katak kõn kain Anij rot e im kõn men ko ej kõm̦m̦ani ilo ad etale Baibõl̦ eo. Juon wãween epidodo ñan jino katak Baibõl̦ eo ippãn doon ãinwõt juon baam̦le ej ilo ami riit Baibõl̦ ippãn doon. Kom̦ maroñ kõm̦m̦ane men in ikijjeen ami l̦oore laajrak in riit Baibõl̦ eo ñan kweilo̦k eo, Jerbal eo Ad im Wãween Ad Mour. Aolep ro ilo baam̦le eo remaroñ bõk kun̦aaer im riit. Ãlikin, kom̦ maroñ bwebwenato kõn men ko kom̦ar katak jãn eoon ko.

Ej iien an l̦eo, lio im ajri ro epaakel̦o̦k wõt doon. Ilo iien aer katak Baibõl̦ ippãn doon, ri pãlele ro rej epaakel̦o̦k wõt doon. Ajri ro rej bar epaakel̦o̦k wõt jineer im jemãer ilo iien kein. Iien katak kein rej aikuj iien ko rekam̦õn̦õn̦õ im iien aenõm̦m̦an. Ej aikuj juon iien me aolep ro ilo baam̦le eo rej kijooror kake kajjojo wiik. Rũtto ro remaroñ kããlõt katak ko me remaroñ jipañ ajri ro nejier ekkar ñan joñan dettaer. Bõlen remaroñ kããlõt katak ko jãn Naan in Keeañ im bok ko jet ak jãn website eo ad, jw.org im bwebwenato kake ippãn doon. Kom̦ maroñ bwebwenato kõn juon apañ me ekkã an ro nejõmi iioone ilo jikuul̦ im bwebwenato ippãn doon kõn wãween remaroñ kõm̦adm̦õde apañ eo. Bar ta ko kom̦ maroñ kõm̦m̦ani ilo iien ami katak Baibõl̦ ippãn doon? Eokwe, bõlen kom̦ maroñ alwõje juon iaan bũrookraam̦ ko ilo JW Broadcasting im kõnono ippãn doon kake ãlikin ami alwõje. Ak kom̦ maroñ kõmmãlmeli al ko me jenaaj al kaki ilo iien kweilo̦k ko ilo wiik eo. Bõlen em̦m̦an ñe ej lõñ jidik kõm̦aolal̦ bwe baam̦le eo en maroñ m̦õñã ippãn doon ãlikin katak.

Ñe baam̦le eo ej kabuñ ñan Jeova ippãn doon kajjojo wiik, men in enaaj jipañ er aolep bwe ren m̦õn̦õn̦õ ilo aer katak Baibõl̦. Anij enaaj lukkuun kajeraam̦m̦an eok kõn am̦ kate eok ñan kõm̦m̦ane men in.​—Sam 1:1-3.

• Etke jej kõm̦m̦an ad iien ñan katak Baibõl̦ ippãn doon ãinwõt juon baam̦le?

• Ta ko rũtto ro remaroñ kõm̦m̦ani bwe aolep ro ilo baam̦le eo ren m̦õn̦õn̦õ ilo iien aer katak Baibõl̦ ippãn doon?