KATAK 16
Ta Jerbal ko an Ri Jipañ ro an Eklejia Eo?
Myanmar
Rej kõm̦m̦an katak
Rej kõm̦m̦an kweilo̦k in kwal̦o̦k naan
Rej karreo im kõjparok Im̦õn Kweilo̦k eo
Baibõl̦ ej kwal̦o̦k kõn ruo kumi in em̦m̦aan ro im rej kõm̦m̦ani jerbal ko rel̦l̦ap ilo eklejia ko an Kũrjin ro. Kumi eo kein kajuon ej ro me rej lale eklejia eo. Im kumi eo kein karuo ej “ri jipañ ro ilo eklejia.” (Pilippai 1:1, UBS) Ekkã an wõr jejjo em̦m̦aan ro me rej kõm̦m̦ani jerbal kein ilo kajjojo eklejia ko. Ta jerbal ko an ri jipañ ro ilo eklejia eo?
Rej jipañ em̦m̦aan ro me rej lale eklejia eo. Likao rein im em̦m̦aan rein me rej ri jipañ relukkuun epaake Anij. Em̦m̦aan im likao rein rejel̦ã kun̦aaer, reniknik im retiljek. Rej kõm̦m̦ani jerbal ko jet raorõk an eklejia eo im jerbal ko ilo Im̦õn Kweilo̦k eo. Ilo wãween in, enaaj l̦apl̦o̦k iien ñan an em̦m̦aan ro me rej lale eklejia eo katakin im jipañ ro ilowaan eklejia eo.
Rej kõm̦m̦ani jerbal ko raorõk. Jet ri jipañ ro rej karwaineneik aolep ro rej itok ñan iien kweilo̦k ko. Jet rej lale jikin kõjañjañ. Bar jet rej lale im ajeji bok ko ñan eklejia eo. Bar jet iaaer kar jitõñ er bwe ren bõk eddon jããn ko an eklejia eo. Jet iaaer rej loloorjake im kwal̦o̦k jikin ko me ri kwal̦o̦k ro remaroñ kwal̦o̦k naan ie. Rej bareinwõt jipañ ilo aer karreoik im kõjparok Im̦õn Kweilo̦k eo. Jet iien, em̦m̦aan ro me rej lale eklejia eo remaroñ kajjitõk ippãer bwe ren jipañ ro rerũtto. Ri jipañ rein rej m̦õn̦õn̦õ in kõm̦m̦ane jabdewõt jerbal ko rej lel̦o̦k ñan er. Kõn aer m̦õn̦õn̦õ in jipañ, aolep ro ilo eklejia eo rej kwal̦o̦k kautiej ñan er.—1 Timote 3:13, UBS.
Em̦m̦aan rein rej juon joñak em̦m̦an ñan Kũrjin ro. Kar jitõñ ri jipañ rein kõnke rej kwal̦o̦k yokwe, jouj, im men ko ãierl̦o̦kwõt. Ñe rej kõm̦m̦ani katak ko ilo iien kweilo̦k ko, men in ej kakajoorl̦o̦k tõmak ko ad. Joñak ko aer rem̦m̦an ilo jerbal in kwal̦o̦k naan rej jipañ kõj bwe jen kijejeto. Kõnke rej kõttãik er ñan em̦m̦aan ro me rej lale eklejia eo, men in ej kõm̦m̦an bwe en l̦ap m̦õn̦õn̦õ im bõrokuk. (Epesõs 4:16, UBS) Juon iien el̦aññe ekkar, renaaj erom juon iaan ro me rej lale kõj ilo eklejia eo.
Kain em̦m̦aan rot ri jipañ ro an eklejia eo?
Ta jerbal ko ri jipañ ro rej kõm̦m̦ani bwe en kon̦ im mel̦ak aolep men ilo eklejia eo?