“Inaaj Pukot Jiip ko Rar Jako”

ELÕÑ alen an Jeova keidi e make ñan juon jabõt rot in me el̦ap an kaorõk jiip ko nejin. Ej jiroñ kõj ilo Naan eo an im ba: “Ña inaaj make kappukot jiip ko aõ im kõjparok er.”​—Ezekiel 34:11, 12, UBS.

“Kom̦ij Jiip ko Aõ Ij Naajidiki”

Wõn ro rej jiip ko an Jeova? Jiip ko an Jeova ej armej ro rej yokwe e im kabuñ ñane. Baibõl̦ ej ba: “Jen kabuñ im badikdik; jen bukwelõlõ im̦aan Jeova adwõj Rũkõm̦anm̦an. Bwe E adwõj Anij, im kõj ro riaelõñ an mel̦aaj eo An, im jiip ko an pein.” (Sam 95:6, 7) Ãinwõt an jiip ko pokake jabõt eo aer, ãindein, ro rej kabuñ ñan Jeova rej m̦õn̦õn̦õ in pokake e ãinwõt Jabõt eo aer. Ak rein renaaj ke jim̦we aolep iien? Jaab. Ewõr jet iien, rũkarejar ro an Jeova rar ãinwõt jiip ko “rar ejjeplõklõk.” Im rar bar “ãinwõt jiip ko rejebwãbwe,” im ro ‘rekõn jebwãbwe’ jãn jiip ko jet. (Ezekiel 34:12, UBS; Matu 15:24, UBS; 1 Piter 2:25) Bõtab, ñe juon armej ej jebwãbwe, Jeova ejjab kõjekdo̦o̦ne im l̦õmn̦ak bwe armej in eban jepl̦aak ñane ñan jidik.

Kwõj ke watõk wõt Jeova bwe ej am̦ Jabõt? Ewi wãween an Jeova kaalikkar ilo raan kein ad bwe ej juon Jabõt? Eokwe, jen lale jilu wãween ko:

Ej naajdik kõj ilo kõkkar. Jeova ej ba: “Inaaj naajdik er ilo juon mel̦aaj em̦m̦an, im jikin jokwe eo aer enaaj ioon tol̦ ko reutiej in Israel. Ijo renaaj babu ilo juon jikin jokwe em̦m̦an, im renaaj m̦õñã ilo juon mel̦aaj ekowa.” (Ezekiel 34:14) Aolep iien Jeova ej letok elõñ ekkan ko ilo kõkkar ak katak ko jãn Baibõl̦ ñan kakajoor kõj. Ewõr ke juon katak me juon ear kwal̦o̦ke ak bõlen ear wal̦o̦k ilo bok ko ad ak ilo pija ko ad im ekar uwaake jar eo am̦? Men in ear jab ke kam̦ool ñan kwe bwe Jeova ej lukkuun kaorõk eok?

Ej lale im kõjparok kõj. Jeova ej kallim̦ur im ba: “Inaaj . . . kõjepl̦aaktok [jiip] ko rar jebwãbwe, im kor ko rekinejnej, im kãjmour ko rar nañinmej.” (Ezekiel 34:16, UBS) Jeova ej kakajoor ro rem̦õjn̦o̦ im ro rej inepata kõn an l̦ap aer iioon apañ ko. Im el̦aññe rar metak kõn wãween an ro jet ekoba rũttõmak ro m̦õttaer kõm̦m̦an ñan er, Jeova ej kore kinej ko kinjen jiip kein an im jipañ er jol̦o̦k aer metak. Bareinwõt, ej kõjepl̦aaktok ro rar jebwãbwe im ro me rej bõk eñjake ko rekabbeerer.

Ej inepata im pukpukot kõj ñe jej jako. Jeova ej ba: “Inaaj kõjepl̦aaktok er jãn aolep jikin ko rar ejjeplõklõk ie.” Im “inaaj pukot jiip ko rar jako.” (Ezekiel 34:12, 16, UBS) Ippãn Jeova el̦aññe juon jiip ejebwãbwe ejjab mel̦el̦ein bwe ejjel̦o̦k tokjãn im eban bar kõn̦aan jepl̦aak. Ejel̦ã ñe juon jiip ej jako im ej pukpukote ñan ñe eloe. Im ñe ej loe el̦ap an m̦õn̦õn̦õ. (Matu 18:12-14, UBS) Bareinwõt, ñe ej kõnnaan kõn ro rej kabuñ ñane ej ba, “Jiip ko aõ ij naajidiki.” (Ezekiel 34:31, UBS) Im kwe, kwõj bar juon iaan jiip kein.

“Kwõn Kõkããl Raan ko Am” Ãinwõt Kar M̦okta

Etke Jeova ej pukpukot eok im kũr eok bwe kwõn bar jepl̦aak ñane? Kõnke ekõn̦aan bwe kwõn m̦õn̦õn̦õ. Ej kallim̦ur bwe enaaj kajeraam̦m̦an jiip ko an. (Ezekiel 34:26) Im kallim̦ur in ejjab juon kallim̦ur bajjek. Kwe make em̦õj am̦ kar kam̦ool men in.

Kwõn m̦õk bar kakeememej eok make kõn jinoin am̦ kar jel̦ã kõn Jeova. Ñan waanjoñak, ta kar l̦õmn̦ak ak eñjake eo am̦ ke kwaar jel̦ã kõn etan Anij im kõn karõk eo an ñan armej ro? Kwõj ke keememej iien ko m̦aantak me ear em̦m̦an am̦ mour ñe kwõj loe ro jeim̦ im jatũm̦ ilo iien kweilo̦k ko rel̦l̦ap? Im ke kwaar kwal̦o̦k naan ippãn juon eo ear lukkuun itoklimo in roñjake, men in ear jab ke kõm̦m̦an am̦ m̦õn̦õn̦õ im jubũruom̦ ke kwaar ro̦o̦l ñan m̦weo im̦õm̦?

Kwõmaroñ bar reilikl̦o̦k ñan iien ko m̦okta me rekar lukkuun kam̦õn̦õn̦õ. Rũkarejar ro an Anij ilo iien ko etto rar jar im ba: “Kwõn kõjepl̦aak kõm ñan Kwe, O Jeova, im kõm naaj jepl̦aak; Kwõn kõkããl raan ko am ãinwõt etto.” (Liaajlo̦l̦ 5:21) Jeova ear eo̦roñ jar in aer, im armej ro rar bar jepl̦aak im karejar ñane im rar bar m̦õn̦õn̦õ ãinwõt kar m̦okta. (Nihimaia 8:17) Jeova enaaj bar kõm̦m̦ane men in ñan kwe.

Bõtab, emaroñ pidodo ad ba bwe jemaroñ jepl̦aak ñan Jeova, ak epen ñan ad kõm̦m̦ane. Lale jet iaan wãween ko remaroñ kõm̦m̦an bwe en pen an juon jepl̦aak, im ta ko kwõmaroñ kõm̦m̦ani ñan anjo̦ ioer.