Jeova Ej Kõkajoore Ilaija

Jezebel ear roñ kõn ta eo ear wal̦o̦k ñan rũkanaan ro an Beal, im ear lukkuun illu. Ear kõjjel̦ãik Ilaija im ba: ‘Ilju kwõnaaj mej ãinwõt an mej rũkanaan ro an Beal.’ Ilaija ear lukkuun mijak im ear ko ñan ãne jem̦aden. Ear jar im ba: ‘Jeova, ejjel̦o̦k aõ maroñ ñan wõnm̦aanl̦o̦k. Kwõn kõtl̦o̦k bwe in mej.’ Kõn an Ilaija lukkuun m̦õk, ear jujen kiki ium̦win juon wõjke.

Innem juon enjel̦ ear karuji. Ilo jouj, ear ba ñane: ‘Kwõn jerkak im m̦õñã.’ Ilaija ear reilo̦k im loe juon pilawã emat ioon jet dekã remããn̦ãn̦ kab juon nien dãn. Ear m̦õñã im idaak im bar kiki. Innem enjel̦ eo ear bar karuji im ba: ‘Kwõn m̦õñã. Kwõj aikuj kajoor bwe kwõn maroñ etal ilo ial̦ eo am̦.’ Im Ilaija ear bar m̦õñã. Ium̦win 40 raan im 40 boñ in an etal ilo ial̦ eo an m̦ae iien ear tõpare Tol̦ Horeb. Ilo tol̦ in, ear del̦o̦ñ ilo juon ro̦ñ im kiki. Ak Jeova ear kõnnaan ñane im ba: ‘Ilaija, kwõj ita ijin?’ Ilaija ear uwaak im ba: ‘RiIsrael ran̦ rar rupe kallim̦ur eo aer ñan eok. Rar ko̦kkure lokatok ko am̦ im m̦an rũkanaan ro am̦. Kiiõ repojak in bar m̦an ña.’

Jeova ear ba ñane: ‘Kwõn etal im jutak ioon tol̦ n̦e.’ Ilo jinoin, juon kõto el̦ap ear wal̦o̦k. Im ear m̦akũtkũt lal̦ innem wal̦o̦k juon kijeek. L̦ak m̦õj, Ilaija ear roñ juon ainikien edik im emera. Ear pinej mejãn kõn kopã eo an im jutak nabõjin ro̦ñ eo. Jeova ear kajjitõk ippãn etke ear ko. Ilaija ear ba: ‘Kõnke ña wõt eo emour me ej karejar ñan kwe.’ Ak Jeova ear ba ñane: ‘Ejjab kwe wõt n̦e kwõmour. Ebar lõñ 7,000 armej ilo Israel rej kabuñ wõt ñan ña. Kwõn etal im kapiti Ilaisha bwe en rũkanaan eo enaaj bõk jikũm̦.’ Innem Ilaija ear m̦õkaj im kõm̦m̦ane men eo Jeova ear ba bwe en kõm̦m̦ane. Kwõl̦ak lale, Jeova enaaj ke bar jipañ eok ñe kwõj kõm̦m̦ane men eo ekõn̦aan bwe kwõn kõm̦m̦ane? Aet, enaaj. Jen lale ta eo ear wal̦o̦k ilo iien eo ear jako an wõt.