Ebar Mour L̦adik eo Nejin

Ilo iien eo ear jab wõt, Jeova ear ba ñan Ilaija: ‘Kwõn etal ñan Zarepat. Juon en̦ kõrã emej l̦eo pãleen im enaaj lewaj kijõm̦ m̦õñã.’ Ke Ilaija ej jutak ilo kõjãmin del̦o̦ñ ko an jikin in, ear reilo̦k im loe an juon kõrã ae an kan̦e. Kõrã in ejeram̦õl im emej l̦eo pãleen. Ilaija ear kajjitõk ippãn bwe en lel̦o̦k limen dãn. Ke ej etal im bõktok limen, Ilaija ear ikkũrl̦o̦k ñane im ba: ‘Jouj im bar bõktok jidik kijõ pilawã.’ Ak kõrã in ear ba: ‘Ejjel̦o̦k pilawã mat ippa, ak ewõr wõt jidik pilawã amej kab jidik weil̦, im rebwe wõt ñan kõm̦ro l̦adik en̦ nejũ.’ Ilaija ear ba: ‘Jeova ear kallim̦ur bwe ñe kwõnaaj kõmat kijõ pilawã, innem eban maat am̦ pilawã amej kab weil̦ m̦ae iien eo enaaj bar wõt.’

Kõrã in ear etal ñan m̦weo im̦õn im kõmat kijen rũkanaan in an Jeova pilawã. Innem ãinwõt an kar Jeova kallim̦ur, ear jab maat kijen kõrã in im l̦adik eo nejin m̦õñã ilo aolepen raan ko ear jab wõt. Ear bool̦ wõt kobban nien pilawã amej eo an im nien weil̦ eo an.

Ak tokãlik juon men enana ear wal̦o̦k. L̦adik eo nejin kõrã in ear lukkuun nañinmej, im ear mej. Kõrã in ear akwel̦ap ñan Ilaija bwe en jipañe. Innem Ilaija ear bõk l̦adik eo jãn jinen im kotake lõñl̦o̦k ñan ruum̦ eo ilõñ ilo m̦weo. Ear kõbabuuki ioon jikin kiki eo, im ear jar im ba: ‘Jeova, jouj im bar kõmour l̦adik in.’ Kwõjel̦ã ke etke elukkuun kabwilõñlõñ men in Jeova ej itõn kõm̦m̦ane? Kõnke ejjañin kar wal̦o̦k an juon rimej bar jerkak im mour. Im ejjab men in wõt, ak kõrã in im l̦adik in nejin rejjab jãn aelõñin Israel.

Innem l̦adik eo ear jino an bar menono, im ear mour! Ilaija ear ba ñan jinen l̦adik in: ‘Lale m̦õk! L̦adik n̦e nejũm̦ ebar mour.’ Jinen ear lukkuun m̦õn̦õn̦õ im ear ba ñan Ilaija: ‘Elukkuun m̦ool bwe kwe juon rũkarejar an Anij. Ijel̦ã men in kõnke kwõj kwal̦o̦k wõt men ko Jeova ej jiroñ eok bwe kwõn ba, im aolep iien rej jejjet kũtieer.’