Aelõñ eo me Ej Ãinwõt Juon Wõjke Kileplep

Juon boñ ke Nebukadnezar ear kiki, ear ettõn̦ak kõn juon men ekaamijak. Ear ba bwe ren ãñintok rũmmãlõtlõt ro bwe ren kwal̦o̦k ñane mel̦el̦ein ettõn̦ak eo an. Ak ejjel̦o̦k juon iaaer ear maroñ kõmel̦el̦eiki. Tokãlik, kiiñ eo ear kõnnaan ippãn Daniel.

Nebukadnezar ear ba ñan Daniel: ‘Ilo ettõn̦ak eo aõ, iar loe juon wõjke. Ear eddek lõñl̦o̦k im tõpar lañ. Aolep armej jãn pel̦aakin lal̦ in remaroñ reilo̦k im loe. Bõlõk ko bwilikõn relukkuun aiboojoj im elõñ leen. Menninmour ko rar kakkije ium̦win kõn an ellor, im bao ko rar kõm̦m̦an aer el ioon ra ko raan. Innem juon enjel̦ ear wanlal̦tak jãn lañ. Ear lam̦õj im ba: ‘Kom̦win jeke wõjke eo im ra ko raan. Bõtab, kom̦win likũt wõt dãpdep eo an im okran im po̦uti kõn mããl im kõpa. Innem bũruon enaaj oktak jãn bũruon juon em̦m̦aan ñan bũruon juon menninmour. Enaaj ãindein ium̦win jimjuon iien ko. Aolep ro rej mour renaaj jel̦ã bwe Anij eo Eutiejtata ej irooj ioon aelõñ ko an armej, im ej lil̦o̦ki ñan jabdewõt eo ekõn̦aan.’’

Jeova ear kwal̦o̦k ñan Daniel mel̦el̦ein ettõn̦ak in. Ke Daniel ear mel̦el̦e, ear jino mijak. Ear ba: ‘O kiiñ, yokwe bwe ettõn̦ak in en kar jitõñl̦o̦k ñan rũkõjdat ran̦ am̦, ak ejjab, ettõn̦ak in ej kõn kwe. Wõjke kileplep eo kar jeke ej jitõñl̦o̦k ñan kwe. Mel̦el̦ein bwe enaaj jako am̦ irooj ioon aelõñ in am̦, im kwõnaaj ãinwõt menninmour kan̦ im m̦õñã ujooj ko ilo mel̦aaj. Bõtab kõnke enjel̦ eo ear ba bwe ren likũt wõt dãpdep eo an im okran, mel̦el̦ein bwe kwõnaaj bar ro̦o̦l im kiiñ ioon aelõñ in am̦.’

Juon iiõ tokãlik, Nebukadnezar ear etetal ioon bõrwajin m̦weo im̦õn, im ej reito reitak im utiej bũruon kõn aelõñin Babil̦on. Ear ba: ‘Ej baj l̦ap an em̦m̦an jikin in iar kalõke. Elukkuun l̦ap aõ kajoor im mãlõtlõt!’ Nebukadnezar ej kõnnaan wõt, ak juon ainikien jãn lañ ej kũrl̦o̦k ñane im ba: ‘Nebukadnezar! Kiiõ ejako am̦ irooj ioon aelõñ n̦e am̦.’

Ilo iien eo wõt, ear oktak kõl̦mãnl̦o̦kjen̦ eo an Nebukadnezar im ear ãinwõt juon menninmour. Rar kadiwõje l̦o̦k jãn m̦weo im̦õn im ear pãd ilo mel̦aaj ko menninmour ko rej pãd ie. Kool̦an bõran ear eddekl̦o̦k im aetokin wõt kool̦an juon ikõl̦, im akkiin pein rar aetokier wõt akkiin bao ko.

Jimjuon iiõ tokãlik, ear bar em̦m̦an an Nebukadnezar mour im Jeova ear bar kairooje bwe en kiiñ ioon Babil̦on. Nebukadnezar ear ba: ‘Ij nõbar Jeova, Kiiñ eo an lañ. Kiiõ ijel̦ã bwe Jeova ej Irooj. Ej kõttãik ro eutiej bũrueer, im emaroñ lel̦o̦k aelõñ ko ñan jabdewõt eo ekõn̦aan.’