KATAK 11

Ewi Wãween Am̦ Maroñ Lukkuun Bõk Tokjãn jãn Am̦ Riit Baibõl̦?

Printed Edition

Kwõnañin ke eddodo ak inepata kõn am̦ naaj jino juon jerbal el̦ap? Bwe en dikl̦o̦k am̦ eddodo, bõlen kwaar aikuj in kõm̦m̦ane jerbal in jidik kõn jidik. Kwõmaroñ kõm̦m̦ane ejja men in wõt ñe kwõj riiti Baibõl̦ eo. Kwõmaroñ l̦õmn̦ak im ba, ‘Ewi wãween aõ maroñ jinoe?’ Ilo katak in, jenaaj etale jet men dikdik ko kwõmaroñ kõm̦m̦ani me renaaj jipañ eok lo m̦õn̦õn̦õ ilo am̦ riit im katak Baibõl̦.

1. Etke jej aikuj ekkeini ad riit Baibõl̦?

Armej eo me ej ekkeini an riit Baibõl̦ ak “kien Jeova,” enaaj m̦õn̦õn̦õ im lo tõprak ilo mour eo an. (Riit Sam 1:1-3.) Kwõmaroñ jinoe ilo am̦ riit ium̦win jejjo wõt minit kajjojo raan. Ñe kwõnaaj kal̦apl̦o̦k am̦ jel̦ã kõn Naanin Anij, enaaj l̦apl̦o̦k am̦ itoklimo im m̦õn̦õn̦õ ilo am̦ riiti Baibõl̦ eo.

2. Ta eo enaaj jipañ eok ñan bõk tokjãn jãn am̦ riit Baibõl̦?

Ñan lukkuun bõk tokjãn jãn ad riit Baibõl̦, jej aikuj bõjrak jidik im l̦õmn̦ak kõn ta eo jej riiti. Jej aikuj riit im bareinwõt “kõl̦mãnl̦o̦kjen̦” kake. (Joshua 1:8) Ilo am̦ riit, kajjitõk ippam̦ make kajjitõk rot kein: ‘Ta eo men in ej katakin eõ kõn Jeova? Ewi wãween aõ maroñ jerbale men in ilo mour e aõ? Ewi wãween aõ maroñ kõjerbale eoon kein ñan jipañ ro jet?’

3. Ewi wãween am̦ maroñ kõm̦m̦an iien ñan riit Baibõl̦?

Epen ke am̦ kõm̦m̦an iien ñan riit Baibõl̦? Elõñ iaad ebar pen ad kõm̦m̦ane men in. Kate eok ñan ‘kõjerbal iien ko am̦ ilo mãlõtlõt.’ (Epesõs 5:16) Kwõmaroñ kõm̦m̦ane men in ilo am̦ karõk juon iien kajjojo raan ñan am̦ riit Baibõl̦. Jet armej rej kõm̦m̦an karõk ñan riit Baibõl̦ ilo jibboñtata. Ro jet rej kããlõt ñan riit ilo raelep, bõlen ilo iien aer kakkije im m̦õñã in raelep. Im ebar wõr ro jet rej riiti Baibõl̦ eo ilo jota m̦okta jãn aer kiki. Ak kwe, awa ta eo enaaj jejjet ñan kwe?

KAM̦WILAL̦L̦O̦K AM̦ MEL̦EL̦E

Katak kilen kõm̦m̦an bwe en l̦apl̦o̦k an kãitoktoklimo am̦ riit Baibõl̦. Bareinwõt katak kilen ñan kõppojakl̦o̦k im̦aan ñan iien katak eo am̦ bwe kwõn lukkuun bõk tokjãn jãn iien katak Baibõl̦ kein am̦.

Pija ko: Jidik kõn jidik, juon l̦addik ej katak ñan jel̦ã kilen m̦õñã juon kain m̦õñã. 1. L̦adik eo ej iukkure kõn m̦õñã eo kijen. 2. Tokãlik, ejja l̦adik in wõt ej kañe m̦õñã eo kijen. 3. Ke ej rũttol̦o̦k jidik, ej m̦õn̦õn̦õ ilo an kañe m̦õñã eo kijen. — Ãinwõt ad maroñ katak ñan m̦õñã im m̦õn̦õn̦õ kõn m̦õñã ko jet, ãindeinl̦o̦k wõt, jemaroñ bar katak ñan lo m̦õn̦õn̦õ ilo ad riit Baibõl̦

4. Katak ñan lo m̦õn̦õn̦õ ilo am̦ riit Baibõl̦

Emaroñ jab pidodo ñan jino riiti Baibõl̦ eo. Bõtab, jemaroñ “ejaake juon kõn̦aan” ñan kõm̦m̦ane men in, ãinwõt an juon armej maroñ ejaake juon kõn̦aan ñan m̦õñã ekkan ko rekããl. Riit 1 Piter 2:2, innem bwebwenato kake kajjitõk in:

Kwõj ke l̦õmn̦ak bwe ñe kwõj riiti Baibõl̦ eo aolep raan, enaaj juon men kwõj itoklimo kake im kokijooror in kõm̦m̦ane?

Kõjo̦e PIJAIN ALWÕJ eo ñan lale ewi wãween an kar jet jino wõr aer itoklimo ilo aer riit Baibõl̦. Innem bwebwenato kake kajjitõk kein:

VIDEO: Youths Learning to Love God’s Word (5:33)

Ilo pijain alwõj eo, ta men ko reppen jo̦dikdik ro rar anjo̦ ioer?
Ta eo ear jipañ er ñan eddãp wõt ñan mejãnkajjik eo aer ñan ekkeini aer riit Baibõl̦?
Ewi wãween aer kar kõm̦m̦an bwe aer riit Baibõl̦ en juon men ekãitoktoklimo?

Kein jipañ ñan am̦ jinoe:

Kããlõt juon ukokin raan kein me em̦m̦an ñan lõke. Kwõmaroñ kõjerbale Jeje ko Rekkwõjarjar—Ukokin Lal̦ eo Ekããl (Matu-Revelesõn) ilo kajin M̦ajel̦ ak kwõmaroñ riiti aolepen ilo New World Translation ilo kajin Pãlle.
M̦oktata riiti m̦õttan ko kwõj itoklimo kaki. Ñan bõk jipañ, lale jaat eo etan “Jino Riiti Baibõl̦ Eo.”
Kõkal̦l̦eiki ia ko em̦õj am̦ riiti. Kõjerbal jaat eo ilo bok in etan, “Kõkal̦l̦eiki Ia ko Em̦õj Am̦ Riiti ilo Baibõl̦.”
Kõjerbale JW Library^® app. Ilo app in, kwõmaroñ riit ak roñjake ainikien aer riiti Baibõl̦ eo ilo jabdewõt jikin ikijjeen am̦ kõjerbale jeel̦boon ak men ko ãierl̦o̦k wõt.
Kõjerbale bok eo etan Kein Jipañ ñan Katak Naanin Anij. Ilo bok in ewõr mab ko im jaat ko me remaroñ jipañ eok kõm̦m̦an bwe en kãitoktoklimo am̦ riit Baibõl̦.

5. Kõppojakl̦o̦k im̦aan ñan iien katak Baibõl̦ eo am̦

Riit Sam 119:34, innem bwebwenato kake kajjitõk in:

Etke em̦m̦an ñan jar m̦okta jãn am̦ riit Baibõl̦ ak kõppojakl̦o̦k im̦aan ñan iien katak Baibõl̦ eo am̦?

Ewi wãween am̦ maroñ lukkuun bõk tokjãn jãn kajjojo iien ko kwõj katak? Ilo am̦ kõpooje katak ko ilo bok in, kajjioñe wãween kein:

Riiti pãrokõrããp ko ilo jinoin katak eo.
Riiti eoon ko im kajjioñ mel̦el̦e kõn ewi wãween aer ekkejell̦o̦k ippãn katak eo.
Kõkal̦l̦eiki naan ko raorõk me rej uwaaki kajjojo iaan kajjitõk ko. Men in enaaj jipañ eok bwe en em̦m̦an am̦ etale im bwebwenato kake katak eo ippãn eo ej katakin eok.

Pija ko: Juon kõrã ej kõpooje kein katak eo an ñan iien katak Baibõl̦ eo an. A. Ej riiti peij eo jinointata ilo katak eo. B. Ej riiti eoon ko ilo Baibõl̦ me katak eo ej kwal̦o̦k kaki. C. Ej kõkal̦l̦eiki naan ko raorõk ilo katak eo.

Kwaar jel̦ã ke?

Ewõr jet ukokin Baibõl̦ ko me Ri-Kõnnaan ro an Jeova rar kõjerbali m̦okta. Bõtab, elukkuun em̦m̦an ippemmim ukokin New World Translation of the Holy Scriptures kõnke ejejjet im m̦ool, ealikkar, im ej kõjerbale etan Anij.—Lale Katak eo ilo online “Do Jehovah’s Witnesses Have Their Own Bible?”

JET ARMEJ REJ BA: “Elukkuun l̦ap jerbal katak Baibõl̦. El̦ap aõ poub im m̦õk ñan aõ katak.”

Ak kwe, ta am̦ l̦õmn̦ak?

TARLEP IN KATAK EO ILO TUKADU

Ñan lukkuun bõk tokjãn jãn am̦ riit Baibõl̦, karõke juon iien ñan am̦ riit, jar bwe kwõn mel̦el̦e ta ko kwõj riiti, im kõppojakl̦o̦k im̦aan ñan iien katak Baibõl̦ eo am̦.