Read Bible—Ewõr Tokjen Im Ekamõnõnõ

“Kwon . . . konono kake ran im boñ.”​—JOSHUA 1:​8, New World Translation.

1. Ta jet ian tokjen ko jej bõki jen ad read bajjek im elaptata jen ad read Bible?

READI katak ko remõn ej juõn jibadbad ewõr tokjen. Ri meletlet in kien eo ilo France Montesquieu (Charles-Louis de Secondat) ear je: “Ñan ña, ien otemjej katak kar mejelan eo emõntata kin mõk ilo mour. Ejelok jabdewõt inebata ewõr ibba im ejamin jako ilo aõ read iumin juõn awa.” Ñan joñan eo elaptata, men in ej mol an jerbal ñan ad read Bible. Ri jeje psalm iumin kakõrmol an Anij ear ba: “Kien Jeova e wãppen im ej karok an; nan in katak an Jeova e bin im ej kameletlet ro re jaje. Nan ko nan in kaiñi an Jeova re jime im re kalõñliñ buruer.”​—Sam 19:​7, 8.

2. Etke Jehovah ear kejbãrok Bible eo iumin elõñ yiõ ko, im ta eo ej kõtmene an armij ro an kõmman kake?

² Einwõt Eo ear kõmman bwe ren jeje Bible eo, iumin elõñ buki yiõ ko Jehovah Anij ear kejbãroke jen jumae eo an ri kijirãt ro, an kabuñ im kien jimor. Kinke ej ankil an bwe en “lomoren armij otemjej, im bwe ren item jela mol,” ear kõmman bwe Nan eo an en bellok ñan armij otemjej. (1 Timote 2:4) Rej antonelok bwe ilo air kajerbal 100 kajin ko remaroñ jibadõk enañin 80 percent in armij ro ion lal. Nan ko an aolepen Bible eo ej bellok ilo 370 kajin ko, im remaroñ read mõttan ko in Jeje Ko ilo 1,860 kajin ko jet relap im redik. Jehovah ekõnan bwe armij ro an ren read Nan eo an. Ej kajerammõn ri karejar ro an me rej lale Nan eo an, aet, ro rej readi ran otemjej.​—Sam 1:​1, 2.

Read Bible ej juõn Men in Aikwij an Overseer ro

3, 4. Ta eo Jehovah ear aikwij an king in Israel ro kõmmane, im un ta ko kin men in aikwij in rej bareinwõt jerbal ñan Christian elder ro rainin?

³ Ilo kebojak kin ien eo ñe ailiñ in Israel enaj wõr juõn king ion lal, Jehovah ear ba: “Im ñe ej jijõt ion tron in ailiñ eo an, en jeje ñõn e kien in ilo juõn buk, jen buk eo ej iman pris ro, dri Livai: im en ber iben, im en konono ie ran otemjej in mour eo an; bwe en maroñ in jela mijõk Jeova an Anij, bwe en bokake nan ko otemjej an kien in im nan in kaiñi kein bwe en kõmõni; bwe en jab utiej buruen jen ro jein im jãtin, im en jab jeõrlok jen kien eo ñõn anbijmaroñõn ak anmiñin.”​—Duteronomi 17:​18-​20.

⁴ Lale un ko unin Jehovah ear aikwiji an aolep king ro ilo Israel bwe ren read book in kien eo ekwojarjar ran otemjej: (1) “bwe en maroñ in jela mijõk Jeova an Anij, bwe en bokake nan ko otemjej an kien in im nan in kaiñi kein bwe en kõmõni”; (2) “bwe en jab utiej buruen jen ro jein im jãtin”; (3) “im en jab jeõrlok jen kien eo ñõn anbijmaroñõn ak anmiñin.” Christian overseer ro rainin rejjab aikwij ke ñan mijak Jehovah, bokake kien ko an, kejbãrok bwe ren jab kautiej ir make ilañin ro jeiir im jatiir, im bõbrae air jeor jen kien ko an Jehovah? Read Bible ran otemjej ejjab diklok an aorõk ñan ir jen kar ñan king ro ilo Israel.

5. Ilo yiõ ko kiõ ta eo Governing Body eo ear je ñan ro uan Branch Committee ko ikijen read Bible, im etke ej emõn bwe aolep Christian elder ro ren lor nan in kakabilek in?

⁵ Schedule eo an Christian elder ro rainin elap an boub, im ej kõmman bwe air read Bible ran otemjej en juõn aitwerõk elap. Ñan wanjoñok, ro uan Governing Body eo an Ri Kennan ro an Jehovah im ro uan Branch Committee ko ibelakin lal rej aolep maan ro reboub. Ak, juõn letter ilo ran kein jen Governing Body eo ñan aolep Branch Committee ko ear kalikar aikwij eo ñan read Bible ran otemjej im kin manit in katak ko remõn. Men in, letter eo ear kalikare, enaj kalaplok yokwe eo ad ñan Jehovah im kin mol eo, im enaj “jibañ kij ñan kejbãrok tõmak, lañliñ, im kijenmij eo ad ñan jemlokin eo eaibujuij.” Aolep elder ro ilo congregation ko an Ri Kennan ro an Jehovah rej kile ejja aikwij eo wõt. Read jen Jeje ko ran otemjej enaj jibañ ir ñan “jerbal ilo meletlet.” (Joshua 1:​7, 8, NW) Ñan ir, elaptata, read Bible ewõr “tokjeir kin katakin, im kowe, im kajime, im kamineneik armij ilo wãnik.”​—2 Timothy 3:​16, Revised Standard Version.

Juõn Men in Aikwij ñan Ro Redik im Ro Reritto

6. Etke Joshua ear kalaj an read aolep nan ko an kien Jehovah iman bwij ko rekweloklok bwijin Israel im ruwamaejet ro?

⁶ Ilo ien ko etto, kar ejelok juõn copy in Jeje Ko ñan an kajjojo armij kajerbale, inem read Bible kar kõmmane iman jar in congregation eo. Elikin an Jehovah kõmman bwe en anjo ion jikin kwelok in Ai, Joshua ear kokweloklok bwij ko in Israel iman Tol Ebal im Tol Gerizim. Inem, bwebwenato eo ej jiroñ kij: “Im tokelik e ar konono nan otemjej ilo kien eo, nan in kejerammõn im nan in kalia, ekar ñõn men otemjej emwij jeje ilo buk in kien. Ejelok juõn nan ian nan ko otemjej, Moses e ar jiroñ kake, ko Joshua e ar jab konono iman aolepen jar an Israel, im kõra ro, im ajiri ro, im ro drua maijet rar etallok ibeir.” (Joshua 8:​34, 35) Ro redik im ro reritto, armij ro an ailiñ eo im ruwamaejet ro, rar aikwij jek, einwõt ba ilo nan in kõkkar, ilo burueir im lemnak ko air kin kain mwil rot renaj kar bõktok jerammõn ko jen Jehovah im ta ko ear jab buñburuen kaki. Keini ad read Bible emol an naj jibañ kij ilo men in.

7, 8. (a) Wõn ro rainin rej einlok wõt “drua maijet ro,” im etke rej aikwij read Bible ran otemjej? (b) Ilo wãwen ta ko “ajiri ro” ibwiljin armij ro an Jehovah remaroñ lor joñok eo an Jesus?

⁷ Rainin, elõñ million ri karejar ro an Jehovah rej einwõt “drua maijet” rein ilo kõkkar kake. Mokta, rar mour ekkar ñan wãwen lal in, ak kiõ emwij air ukõt wãwen air mour. (Dri Epesõs 4:​22-​24; Dri Kolosse 3:​7, 8) Ekkã air aikwij kakememej ir make kin kien ko an Jehovah kin mwil emõn im nana. (Amos 5:​14, 15, NW) Read Nan in Anij ran otemjej ej jibañ ir ñan kõmman men in.​—Dri Hibru 4:​12; Jemes 1:25.

⁸ Ewõr bareinwõt elõñ “ajiri ro” ibwiljin armij ro an Jehovah me jemeir im jineir rar katakin ir kin kien ko an Jehovah ak rej aikwij kamol ñan ir make kin jimwe in ankil an. (Dri Rom 12:​1, 2) Ewi wãwen remaroñ kõmmane? Ilo Israel, kar kakabilek priest ro im maan ro reritto: “Kwon konono kake kien in iman aolepen Israel ilo air roñjake. Kwon kokweloktok armij ro, man im kõra, im ajiri, im am drua maijet eo ej ilo kejem ko am, bwe en roñjake, im bwe ren katak, im mijõk Jeova am Anij, im lali in kõmõn nan ko otemjej an kien in; im bwe ro nejir, ro rar jaje kake, ren roñjake im jela mijõk Jeova am Anij.” (Duteronomi 31:​11-​13) Ilo an mour iumin Kien eo, Jesus ke ear 12 yiõ dettan ear kwalok an itoklimo in melele kake kien ko an Jemen. (Luk 2:​41-​49) Tokelik, kar manit eo an ñan roñjake im bõk kunan in read Jeje Ko ilo temple eo. (Luk 4:​16; Jerbal 15:21) Rej rejañ ro redik rainin ñan lor wanjoñok eo an Jesus ilo air read Nan in Anij ran otemjej im ilo keini air bed ilo kwelok ko ijo rej read im katak Bible eo.

Read Bible—Men eo En Bed Imantata

9. (a) Etke jej aikwij kãlet ta eo jej readi? (b) Ta eo armij eo ear jino kõmmane magazine in ear ba ikijen kein jibañ ko ñan katak Bible?

⁹ King eo emeletlet Solomon ear je: “Emõn kowe yuk: ejelok jemlokõn air kõmõn elõñ buk; im katak elap ej men in kamõk kõniek.” (Ekklisiastis 12:12) Juõn emaroñ kobaik im ba bwe air readi elõñ book ko rej kõmmani rainin ejjab men in kamõk kanniek wõt ak, ilo mol, ej kauwatata ñan lemnak eo. Inem eaorõk bwe jen kãlet ta eo jej readi. Ijellokin ad read book in katak Bible ko ad, jej aikwij read Bible eo make. Armij eo ear jino kõmmane magazine in ear je ñan ro rej readi: “Jab meloklok bwe Bible ej Kien eo ad im meñe book in jibañ ko ad rej men in letok ko jen Anij rej ‘men in jibañ ko’ wõt im rejjab bõk jikin Bible eo.”a Kin men in, meñe jejjab jerwane ad read book ko rej wawa ion Bible eo, jej aikwij read Bible eo make.

10. Ewi wãwen “dri korijer e tiljek im meletlet” ear kalikar aorõkin read Bible?

¹⁰ Ilo lemnak kin aikwij in, iumin elõñ yiõ ko kiõ “dri korijer e tiljek im meletlet” ear karõk juõn schedule in read Bible ilo program eo ilo Theocratic Ministry School ilo kajjojo congregation. (Matu 24:45) Program in read Bible eo kiõ emaroñ kajemlok air read aolepen Bible eo iumin jiljilimjuõn yiõ. Schedule in ewõr tokjen ñan aolep ak elaptata ñan ro rekãl me rejañin read aolepen Bible eo. Ro rej etal ñan Watchtower Bible School of Gilead ñan missionary ro im Ministerial Training School eo im bareinwõt ro uan rekãl ilo family in Bethel eo rej aikwij readi aolepen Bible eo iumin juõn yiõ. Jekdon schedule ta eo kwoj lore, ñan kwe make ak einwõt juõn family, ñan kajejjete kwoj aikwij kõmman bwe read Bible en bed imantata ilo karõk in men ko kwoj aikwij kõmmani.

Ta eo Manit in Read ko Am Rej Kalikare?

11. Ewi wãwen im etke jej aikwij bõk kajur jen nan ko an Jehovah ran otemjej?

¹¹ Elañe ebin am kajejjet schedule in read Bible eo am, ej ekkar am kajitõkin kwe make: ‘Manit ko aõ in read ak aluij TV ej jelet maroñ eo aõ in read Nan ko an Jehovah ilo wãwen et?’ Kememej ta eo Moses ear je​—im nan ko Jesus ear eliji⁠—bwe “Armij e jamin mour kin bred wõt, a kin nan otemjej rej waloktok jen loñin Anij.” (Matu 4:4; Duteronomi 8:3) Einwõt jej aikwij mõñã bread ak men ko einlok wõt ran otemjej ilo ad mour bwe jen kejbãrok enbwinid ilo kanniek, eindein jej aikwij bõk lemnak ko an Jehovah ñan kejbãrok mour in jitõb eo ad. Jemaroñ bõk lemnak ko an Anij kajjojo ran ilo ad read Jeje Ko.

12, 13. (a) Ewi wãwen ri jilek Peter ej wanjoñok kin kõnan eo jej aikwij kaddeki kin Nan eo an Anij? (b) Ewi wãwen Paul ej kajerbal wanjoñok eo kin milk ilo juõn wãwen einjuõn jen eo an Peter?

¹² Elañe jej kile Bible eo ejjab, “einwõt nan in armij, a ein drein emol, einwõt nan in Anij,” jenaj reel ñan e einwõt juõn niñniñ ej mako milk an jinen. (1 Tessalonika 2:​13) Ri jilek Peter ear kajerbal wanjoñok in, ilo an je: “Einwõt niñniñ rej kab lotak, komin mako milk emõn im erreo wõt, bwe komin edreklok kake ñõn lomor; Elañe kom ar erjoñ joij an Iroij.” (1 Piter 2:​2, 3) Elañe emol ad erjoñ, ilo ad make lo, “joij an Iroij,” jenaj kaddeklok juõn kõnan ñan read Bible.

¹³ Jej aikwij kile bwe ilo eon in ear oktak wãwen eo Peter ear kajerbal wanjoñok eo kin milk jen wãwen an kar Paul kajerbale. Ñan juõn niñniñ eo ej kab lotak, milk ej kabwe aolep aikwij ko an ikijen mõñã. Wanjoñok eo an Peter ej kwalok bwe ilo Nan in Anij ewõr aolep men ko jej aikwiji ñan “edeklok kake ñõn lomor.” Ijo tu-rãjet, Paul ear kajerbal aikwij eo kin milk ñan kwalok kin manit in mõñã ko renana an jet ro rar ba bwe re ritto ilo jitõb. Ilo letter eo an ñan Ri Hebrew Ri Christian ro, Paul ear je: “Bwe ke, kin ien eo, emõn komin dri kaki, eor ami aikwij bwe ren katakin kom ta men ko mokta an nan in Anij, im emõn ren najirik kom kin milk im jab kin ekõn ko rebin. Bwe armij jabrewõt ej mõña milk wõt, e jab minene ilo nan emõn; bwe e niñniñ. A ekõn ko rebin rej ekar ñõn ro re ridto, aet, ñõn ro kin air minene rej maroñ in jela kajen emõn im nana.” (Dri Hibru 5:​12-​14) Kalmenlokjen ñe kwoj read Bible elap an maroñ jibañ yuk kaddeklok kajur in jelãlokjen ko am im ñan kamakit kõnan eo am kin men ko lor jitõb.

Wãwen eo ñan Read Bible

14, 15. (a) Jerammõn ta eo Ri Jeje kin Bible eo ej letok ñan kij? (b) Ewi wãwen jemaroñ bõk tokjen jen meletlet ekwojarjar? (Kwalok jet wanjoñok ko.)

¹⁴ Wãwen eo ñan read Bible me elaptata an wõr tokjen ej ijjino, ejjab ilo am read, ak ilo am jar. Jar ej juõn jerammõn ekõppalpal. Ej einwõt ñe kwar jino etale juõn book in katak elap an mũlal ilo am kajitõk jibañ jen ri jeje book eo ñan kameleleik yuk kin ta eo kwoj bojak in readi. Ej juõn tokjen elap an kabwilõñlõñ! Ri Jeje kin Bible eo, Jehovah, ej lewõj jerammõn in. Juõn uan governing body eo ilo ebeben eo kein kajuõn ear je ñan jein im jatin: “A elañe jabrewõt iami ej aikwij meletlet, en kajitõk kin e iben Anij, eo Ej wujlep ñõn armij otemjej, im jab enoik kake, im naj lelok ñõn e. A en kajitõk ilo tõmak im jab berre.” (Jemes 1:​5, 6) Governing Body eo ilo ran kein ekkã an rejañ kij ñan bõk kunad ilo read Bible eo ewõr tokjen.

¹⁵ Meletlet ej ñe kwoj jerbale ilo keie jelãlokjen eo am. Inem mokta jen kwoj kabellok Bible eo am, kajitõk ibben Jehovah ñan jibañ yuk kile point ko ilo am read me kwoj aikwij jerbale ilo mour eo am. Kobaik men ko rekãl kwoj katak kaki ibben jelãlokjen eo am mokta. Likit ir ilo “nan ko remol” kwoj melele kaki. (2 Timote 1:​13) Kalmenlokjen kin men ko kar walok ilo mour ko an ri karejar ro an Jehovah ilo ien ko remotlok, im kajitõk yuk make kin ewi wãwen kwonaj kar emmakit iumin wãwen ko einlok wõt.​—Jenesis 39:​7-9; Daniel 3:​3-6, 16-​18, NW; Jerbal 4:​18-​20.

16. Nan in rejañ ta ko rej letoki ñan kamaroñ kij kõmman bwe read Bible eo ad en laplok an wõr tokjen im ekeie?

¹⁶ Kwon jab read ñan baj kajemlok page ko kar karõk kaki. Bõk am ien. Lemnak kin ta eo kwoj readi. Ñe kwoj itoklimo kin juõn point, bukõte ilo cross reference (eon in jibañ) ko elañe ewõr ilo Bible eo am. Elañe ejjab alikar wõt point eo, kakõlleiki bwe kwon kõmman research kake tokelik. Ñe kwoj read, kakõlleik eon ko kwo kõnan kememeji ak jeje kaki. Kwomaroñ bareinwõt je note ko ak eon in jibañ ko ilo margin eo. Kin eon ko kwoj lemnak kwonaj kajerbali ilo jerbal in kwalok nan im katakin, lale nan eo eaorõk im bukõte ilo index in nan ko ilo Bible rej bed tulikin Bible eo am.b

Kõmman Ien Am Read Bible juõn Ien Ekamõnõnõ

17. Etke jej aikwij mõnõnõ in read Bible?

¹⁷ Ri jeje psalm ear konono kin armij emõnõnõ eo ej “lõñliñ ilo kien Jeova; im ej lemnok kin kien eo ran im boñ.” (Sam 1:2) Jen jab watõk ien ad read Bible ran otemjej einwõt juõn jerbal ak en juõn men ekamõnõnõ. Juõn wãwen ñan kõmmane bwe en juõn ien ekamõnõnõ ej ñan lemnak kin aorõkin men ko jej katak kaki. King emeletlet eo Solomon ear je: “E mõnõnõ armij eo ej lo meletlet . . . Ial ko an rej ial in ainemõn, im etetal ko an otemjej rej inemõn. Ej juõn wijki in mour ñõn ro rej kapjere: im e mõnõnõ jabrewõt eo ej drebij e.” (Jabõn Kennan Ko 3:​13, 17, 18) Jibadbad ko kwoj aikwij kõmmani ñan bõk meletlet ej mol an wõr tokjen, bwe ial ko an rej ial ko in ainemõn, inemõn, mõnõnõ, im eliktata, mour.

18. Ijellokin ad read Bible bar ta eo ej juõn men in aikwij, im ta eo jenaj etale ilo katak in tok?

¹⁸ Aet, read Bible ewõr tokjen im ekamõnõnõ jimor. Ak ebwe ke? Ro uan kabuñ ko an Christendom rar read Bible iumin elõñ buki yiõ ko, “rej katak ien otemjej im re jab maroñ in tõbar jela mol jabrewõt ien.” (2 Timote 3:7) Bwe en wõr tokjen ad read Bible, jej aikwij kõmmane ilo lemnak kin jerbale jelãlokjen eo jej bõke ilo mour ko ad im ñan kajerbale ilo jerbal in kwalok im katakin eo ad. (Matu 24:14; 28:​19, 20) Men in ej aikwij ad kate im an wõr kilen katak ko remõn, eo emaroñ bareinwõt kamõnõnõ im wõr tokjen, einwõt jenaj loe ilo katak in tok.

[Kamelele ko itulal]

Kajitõk in Elij Ko

• Nan in kakabilek ta eo kar leloke ñan king ro in Israel im ej jerbal ñan overseer ro rainin, im etke?

• Wõn ro rainin rej einwõt “drua maijet ro” im “ajiri ro,” im etke rej aikwij read Bible ran otemjej?

• “Dri korijer e tiljek im meletlet” ear jibañ kij ilo wãwen ta ko rekeie ñan kõmman bwe en keini ad read Bible?

• Ewi wãwen jemaroñ bõk tokjen im mõnõnõ eo emol jen ad read Bible?

[Pija]

Kar manit eo an Jesus ñan bõk kunan in read jen Jeje Ko ilo temple eo