Ewi Wãween Ad Maroñ Kabuñ ilo Wãween eo Ej Kabuñbũruon Anij?

Ãinwõt ad kar etale ilo katak eo l̦o̦k juon, Anij ejjab buñbũruon kõn aolep kabuñ ko. Ijoke, jemaroñ kabuñ ñan ri-Kõm̦anm̦an eo ad ilo juon wãween ej kam̦õn̦õn̦õiki. Ta wãween kabuñ eo me ej kabuñbũruon Anij? (Jemes 1:27) Lale ta eo Baibõl̦ ej katakin.

1. Wãween ad kabuñ ej aikuj pedped ioon ta?

Wãween ad kabuñ ej aikuj pedped ioon Baibõl̦ eo. Jesus ear ba ñan Anij: “Naan ko am̦ rej m̦ool eo.” (Jon 17:17) Jet kabuñ ko rej kõjekdo̦o̦ne katak ko rem̦ool rej pãd ilo Baibõl̦ eo, ak Naan ko an Anij me em̦õj an kakũrm̦ooli. Ijello̦kun aer kwal̦o̦k kõn katak ko rem̦ool, rej kwal̦o̦k kõn katak ko an armej ekoba m̦anit im imminene ko aer. Bõtab Jeova ejjab m̦õn̦õn̦õ ippãn ro ‘rejjab l̦oore kien ko an Anij.’ (Riit Mark 7:9.) Ilo ijo turãjet, jej kam̦õn̦õn̦õik bũruon ñe jej l̦oore wõt Baibõl̦ eo im naanin kakapilõklõk ko ie.

2. Ewi wãween ad aikuj kabuñ ñan Jeova?

Ãinwõt ri-Kõm̦anm̦an eo ad, Jeova ej tõllo̦kũn bwe jen kabuñ ñane wõt. (Revelesõn 4:11) Mel̦el̦ein bwe jej aikuj yokwe e im kabuñ ñane wõt, im jab kõjerbale jabdewõt annañ ak ekjab ilo ad kabuñ.​—Riit Aiseia 42:8.

Ad kabuñ ej aikuj in ‘kwõjarjar im kabuñbũruon’ Jeova. (Rom 12:1) Mel̦el̦ein bwe jej aikuj mour ekkar ñan kien ko an. Ñan waanjoñak, ro rej yokwe Jeova rej yokwe im pokake kien ko an kõn mourin m̦are. Im rej jum̦ae imminene ko rekauwõtata, ãinwõt kõbaatat, kõjerbale men ko rekajoor ak drug ko, ak jab jim̦we aer kõjerbal dãnnin arkool̦.a

3. Etke jej aikuj kabuñ ñan Jeova ippãn rũttõmak ro m̦õttad?

Kweilo̦k ko ad kajjojo wiik rej kõpel̦l̦o̦k juon iien ñan ad “nõbar [Jeova] . . . ilo iien an ro doon kweilo̦k.” (Sam 111:1, 2, UBS) Juon wãween jej nõbare Anij ej ilo ad al ñane. (Riit Sam 104:33.) Jeova ej kajjitõk bwe jen pãd ilo iien kweilo̦k ko kõnke ej yokwe kõj im ejel̦ã bwe renaaj jipañ kõj ñan m̦õn̦õn̦õ kõn mour ñan indeeo. Ñe jej kweilo̦k ippãn doon im kõkajoore doon, jej bõk el̦ap tokjãn jãn men in.

KAM̦WILAL̦L̦O̦K AM̦ MEL̦EL̦E

4. Jen jab kõjerbal ekjab ko ilo ad kabuñ

PIJAIN ALWÕJ: Does God Approve the Use of Images in Worship? (3:26)

• Ta eo ear wal̦o̦k ke jet iaan armej ro an Anij ilo Baibõl̦ rar kajjioñ kabuñ ñane ikijjeen aer kõjerbale juon ekjab?

Jet armej rej kajjioñ ruwaakl̦o̦k ñan Anij ikijjeen aer kõjerbal ekjab ko ilo aer kabuñ. Bõtab ilo m̦ool, men in ej kattol̦o̦ke E jãn er. Riit Exodus 20:4-6, UBS im Sam 106:35, 36, innem bwebwenato kake kajjitõk kein:

• Kain annañ ak ekjab rot ko em̦õj am̦ loe an armej kõjerbali ilo aer kabuñ?

• Ta eñjake eo an Jeova kõn kõjerbal ekjab ko?

• Ta eñjake eo am̦ kõn kõjerbal ekjab ko?

5. Ad kabuñ ñan Jeova wõt ej karõl̦o̦ke kõj jãn l̦õmn̦ak ko reriab

PIJAIN ALWÕJ: Liberated by Truth (5:16)

Riit Sam 91:14, UBS, innem bwebwenato kake kajjitõk in:

• Ta eo Jeova ej kallim̦ur bwe enaaj kõm̦m̦ane el̦aññe jenaaj kwal̦o̦k bwe jej yokwe e ikijjeen ad kabuñ ñane wõt?

6. Jej kabuñ ñan Anij ilo iien kweilo̦k ko an eklejia

Jej nõbar Jeova im kõkajoor doon ilo ad al im uwaak ilo iien kweilo̦k ko. Riit Sam 22:22, innem bwebwenato kake kajjitõk kein:

• Em̦m̦an ke ippam̦ roñjake uwaak ko an ro jet ilo iien kweilo̦k ko?

• Kokõn̦aan ke kõpooj am̦ uwaak?

7. Jeova ej m̦õn̦õn̦õ ñe jej kwal̦o̦k ñan ro jet men ko jej katak kaki

Jemaroñ kwal̦o̦k kõn katak ko rem̦ool jãn Baibõl̦ ippãn ro jet ilo elõñ wãween ko. Riit Sam 9:1 im 34:1, innem bwebwenato kake kajjitõk in:

• Ta eo em̦õj am̦ katak jãn Baibõl̦ me kokõn̦aan kwal̦o̦k kake ñan bar juon armej?

TARLEP IN KATAK EO ILO TUKADU

Jej kabuñbũruon ri-Kõm̦anm̦an eo ad ñe jej kabuñ ñane wõt, nõbare ilo iien kweilo̦k ko, im kwal̦o̦k ñan ro jet men ko jej katak kaki.

Ãlij

• Ia eo Anij ej kwal̦o̦k ñan kõj kõn wãween eo jej aikuj in kabuñ ñane?

• Etke jej aikuj kabuñ ñan Jeova wõt?

• Etke jej aikuj kabuñ ippãn ro rekõn̦aan kabuñbũruon Anij?

KAL̦APL̦O̦K AM̦ MEL̦EL̦E

Ilo bwebwenato in etan “Ejako Aõ Jerbal ñan Ekjab Ko,” lale ewi wãween an kar juon kõrã bõjrak jãn an kabuñ ñan ekjab.

“Baibõl̦ eo Ej Ukot Mour Ko” (Imõniaroñroñ, Oktoba 2011)

Katak im lale ta ko remaroñ jipañ eok ñan uwaak ilo iien kweilo̦k ko.

“Nõbar Jeova ilo Eklejia Eo” (Naan in Keeañ, Jãnwõde 2019)

Lale ewi wãween an kar juon likao bõk tokjãn jãn iien kweilo̦k ko meñe ear jab pidodo ñan an pãd ilo iien kein.

Jehovah Cared for Me (3:07)

Meñe elõñ armej rej tõmak bwe debwããl eo ej jutak kõn kabuñ an Kũrjin, ak jej aikuj ke kõjerbale ilo ad kabuñ?

“Why Don’t Jehovah’s Witnesses Use the Cross in Their Worship?” (Katak eo ilo online)