KATAK 56
Dãpij Wõt Bõrokuk eo ilo Eklejia Eo
Ñe jej pãd ibwiljin rũttõmak ro m̦õttad, jej bar bõk ejja eñjake eo wõt an kar Kiiñ Devid ke ear ba: “Enañin em̦m̦an im menin m̦õn̦õn̦õ, ñe ro jemjein im jemjatin rej pãd ippãn doon ilo bõro juon”! (Sam 133:1) Bõrokuk ejjab make pãd im wal̦o̦k. Kõj aolep ewõr ijo kun̦aad ñan dãpij wõt bõrokuk eo ilo eklejia eo.
1. Ta eo elukkuun kabwilõñlõñ ibwiljin armej ro an Anij?
El̦aññe kwõj pãd ilo juon kweilo̦k an eklejia ilo bar juon aelõñ, kwõmaroñ jab mel̦el̦e kajin eo, bõtab ilo elõñ wãween ko, kwõnaaj eñjake am̦ ruwainene im eñjake yokwe eo me ej wal̦o̦k ibwiljin armej ro an Anij. Etke? Kõnke ipel̦aakin lal̦ in, jej kõjerbale ejja bok ko wõt ñan katak Baibõl̦. Im jej lukkuun kate kõj ñan kwal̦o̦k yokwe ñan doon. Jekdo̦o̦n ia eo jej pãd ie ak jokwe ie, kõj aolep jej “kũr ñan etan Jeova bwe [jen] karejar ñan E kõn juon wõt bõro.”—Zepanaia 3:9.
2. Ta eo kwõmaroñ kõm̦m̦ane ñan kowõnm̦aanl̦o̦k bõrokuk eo?
“Kom̦win kanooj yokwe doon jãn bũruomi.” (1 Piter 1:22) Ewi wãween am̦ maroñ jerbale naanin kakapilõk in? Ijello̦kun am̦ kalimjek wõt likjab ko an ro jet, kate eok ñan kalimjek kadkad ko rem̦m̦an ippãer. Ijello̦kun am̦ aetõl wõt ippãn ro me rej itoklimo kõn men ko kwõj bar itoklimo kaki, kate eok ñan kal̦apl̦o̦k am̦ jel̦ã kajjien ro jeim̦ im jatũm̦ me reoktak jãn kwe. Jemaroñ bareinwõt kate kõj ñan julo̦k jabdewõt kain eñjake in kalijekl̦o̦k me emaroñ wõr ippãd.—Riit 1 Piter 2:17.a
3. Ta eo kwõnaaj kõm̦m̦ane ñe ewõr apañ ikõtaam̦ im bar juon Kũrjin?
Jej bõrokuk ippãn doon, ak jej bareinwõt jab weeppãn. Jet iien jej kainepataik doon ak kõmetak doon. Kõn men in, Naanin Anij ej jiroñ kõj ñan wõnm̦aanl̦o̦k wõt im “m̦õn̦õn̦õ in jol̦o̦k an doon bõd . . . Ãinwõt an kar Jeova m̦õn̦õn̦õ in jol̦o̦k bõd ko ami, kom̦ij aikuj bareinwõt kõm̦m̦ane ejja wãween in wõt.” (Riit Kolosse 3:13.) Elukkuun lõñ alen ad kõmetak Jeova, ak meñe ãindein ej jol̦o̦k ad bõd. Kõn men in, ej kõtmãne bwe jen jol̦o̦k an ro jeid im jatid bõd. El̦aññe kwõj kile bwe em̦õj am̦ kar kõmetak juon, m̦õkaj im em̦m̦akũt ñan kõm̦adm̦õde apañ eo.—Riit Matu 5:23, 24.b
KAM̦WILAL̦L̦O̦K AM̦ MEL̦EL̦E
Pukot wãween ko kwõmaroñ kõm̦m̦ani ñan kõkajoorl̦o̦k bõrokuk im aenõm̦m̦an eo ilo eklejia eo.
Ta eo kwõnaaj kõm̦m̦ane bwe en wõr aenõm̦m̦an?
4. Jol̦o̦k kalijekl̦o̦k
Jekõn̦aan yokwe aolep ro jeid im jatid. Bõtab, emaroñ pen ad m̦õttãik juon armej me eoktak jãn kõj. Ta eo emaroñ jipañ? Riit Jerbal 10:34, 35, innem bwebwenato kake kajjitõk kein:
Jeova ej m̦õn̦õn̦õ in bõk aolep kain armej jãn jabdewõt aelõñ bwe ren Ri-Kõnnaan ro an. Ewi wãween an men in aikuj jelõt l̦õmn̦ak eo am̦ ak wãween am̦ watõk ro jet me rej oktak jen kwe?
Ewi wãween an armej ro kwal̦o̦k kalijekl̦o̦k ilo ijo jikũm̦? Etke kwõj aikuj kõjparok jãn kain kalijekl̦o̦k rot kein?
Riit 2 Korint 6:11-13, innem bwebwenato kake kajjitõk in:
Ewi wãween am̦ maroñ ruwaakl̦o̦k ñan ro jeim̦ im jatũm̦ me reoktak jãn kwe?
5. M̦õn̦õn̦õ in jol̦o̦k bõd im kõm̦m̦an aenõm̦m̦an
Meñe Jeova elukkuun ban aikuji ad jol̦o̦k an bõd, ak ej m̦õn̦õn̦õ in jol̦o̦k bõd ko ad. Riit Sam 86:5, innem bwebwenato kake kajjitõk kein:
Ewi joñan an l̦ap an Jeova jol̦o̦k bõd?
Etke kwõj lukkuun kam̦m̦oolol E kõn an m̦õn̦õn̦õ in jol̦o̦k ad bõd?
Ta wãween ko me emaroñ kõm̦m̦an bwe en pen ad maroñ bõrokuk ippãn ro jet?
Ewi wãween ad maroñ anõke Jeova im dãpij wõt ad bõrokuk ippãn ro jeid im jatid? Riit Jabõn Kõnnaan 19:11, im bwebwenato kake kajjitõk in:
Ñe juon armej ej kainepataik ak kõmetak eok, ta eo kwõmaroñ kõm̦m̦ane bwe en em̦m̦anl̦o̦k kõtaamiro?
Jet iien jej kal̦õkatip ak kõmetak ro jet. Ñe men in ej wal̦o̦k, ta eo jej aikuj kõm̦m̦ane? Kõjo̦e PIJAIN ALWÕJ eo, innem bwebwenato kake kajjitõk in:
Ilo pijain alwõj eo, ta eo kõrã eo jeid im jatid ear kõm̦m̦ane bwe en wõr wõt aenõm̦m̦an?
6. Pukot men ko rem̦m̦an kõn ro jeim̦ im jatũm̦
Ñe jej epaakel̦o̦k ro jeid im jatid, men in enaaj kõm̦m̦an bwe en l̦apl̦o̦k ad jel̦ã kõn kadkad ko rem̦m̦an ippãer im bar m̦õjn̦o̦ ko aer. Ewi wãween ad maroñ kalimjek wõt kadkad ko rem̦m̦an ippãer? Kõjo̦e PIJAIN ALWÕJ eo, innem bwebwenato kake kajjitõk in:
Ta eo emaroñ jipañ eok bwe kwõn lo kadkad ko rem̦m̦an ippãn ro jeim̦ im jatũm̦?
Jeova ej kalimjek wõt kadkad ko rem̦m̦an ippãd. Riit 2 Kronikel 16:9a, innem bwebwenato kake kajjitõk in:
Ilo am̦ jel̦ã bwe Jeova ej kalimjek wõt kadkad ko rem̦m̦an ippam̦, ewi wãween am̦ eñjake kõn men in?
Meñe juon diamond eaiboojoj ewõr likjab ie, ak ej l̦ap wõt an aorõk. Ejja ãindeinl̦o̦k wõt, ro jeid im jatid rejjab weeppãn, ak el̦ap aer aorõk im̦aan mejãn Jeova
JET ARMEJ REJ BA: “El̦aññe em̦õkaj aõ jol̦o̦k an armej eo bõd, eban kile ewi joñan an kar kõmetak eõ.”
Etke jej aikuj lukkuun kõn̦aan jol̦o̦k an ro jet bõd?
TARLEP IN KATAK EO ILO TUKADU
Kwõmaroñ jipañ ñan dãpij wõt bõrokuk eo ilo eklejia eo ilo am̦ m̦õn̦õn̦õ in jol̦o̦k an ro jet bõd im ilo am̦ kwal̦o̦k yokwe ñan aolep ro jeim̦ im jatũm̦.
Ãlij
Ewi wãween am̦ maroñ jol̦o̦k kalijekl̦o̦k?
Ta eo kwõnaaj kõm̦m̦ane ñe ewõr apañ ikõtaam̦ im bar juon Kũrjin?
Etke kwõj kõn̦aan anõke joñak eo an Jeova kõn wãween an jol̦o̦k an ro jet bõd?
KAL̦APL̦O̦K AM̦ MEL̦EL̦E
Katak im lale wãween an juon iaan waanjoñak ko an Jesus maroñ jipañ kõj ñan jab ekajete ro jet.
Jej aikuj ke jol̦o̦k ad bõd meñe jej l̦õmn̦ak bwe jaar jab kõm̦m̦an jabdewõt bõd?
“Apologizing—A Key to Making Peace” (The Watchtower, November 1, 2002)
Lale wãween an jet armej kar katak ñan jab kwal̦o̦k kalijekl̦o̦k ilo aer kõm̦m̦an ñan ro jet.
Lale wãween am̦ maroñ kõm̦adm̦õde apañ ko ikõtaam̦ im ro jet m̦okta jãn an apañ kein ko̦kkure aenõm̦m̦an eo ilo eklejia eo.
a Kõmel̦el̦e 6 ej kwal̦o̦k kõn wãween an yokwe kõm̦akũt Kũrjin ro ñan kõjparok jãn aer lel̦o̦k nañinmej ko rekapopo ñan ro jet.
b Kõmel̦el̦e 7 ej kwal̦o̦k kõn wãween ad maroñ kõm̦adm̦õde apañ ko kõn peejnej im kain apañ rot ko me court ko rej lale (legal matters).