Naanin Tõl ko ñan Kweilo̦k in Jerbal Eo Ad im Wãween Ad Mour

Kobban

1. Naanin tõl kein renaaj jipañ aolep ro ewõr kun̦aaer ilo kweilo̦k in Jerbal Eo Ad im Wãween Ad Mour. M̦okta jãn aer kõpooji katak ko aer, ro ewõr kun̦aaer rej aikuj etale naanin tõl ko ilo Jerbal eo Ad im Wãween Ad Mour—Kein Katak eo im bareinwõt ilo kõmel̦el̦e kein. Epel̦l̦o̦k ñan an aolep ri-kwal̦o̦k naan ro bõk kun̦aaer ilo jikuul̦ eo im kõm̦m̦ani katak ko. Armej ro jet me rej kobal̦o̦k ippãn eklejia eo remaroñ bõk kun̦aaer el̦aññe rej err ippãn aolep katak ko ilo Baibõl̦ im rej mour ekkar ñan naanin kakapilõklõk ko ie. Em̦m̦aan eo ej loloodjake kweilo̦k in Jerbal Eo Ad im Wãween Ad Mour ej aikuj etali men ko juon armej me ejjab ri-kwal̦o̦k naan ej aikuj kõm̦m̦ani bwe en maroñ del̦o̦ ilo jikuul̦ eo. Innem ej aikuj kwal̦o̦k ñan armej eo ekõn̦aan del̦o̦ ilo jikuul̦ eo el̦aññe ekkar ñan an bõk kun̦aan. Em̦m̦aan eo ej aikuj kõm̦m̦ane men in ippãn eo ej katak Baibõl̦ ippãn (ak ippãn juon jemãn ak jinen me ej rũttõmak). Men ko armej eo ej aikuj kõm̦m̦ani ej ejja men ko wõt juon armej ej aikuj kõm̦m̦ani bwe en maroñ erom juon ri-kwal̦o̦k naan me ejjañin peptaij.—od chap. 8 pãr. 8.

NAANIN KÕPPEL̦L̦O̦K KO

2. Juon minit. Kajjojo wiik, ãlikin an kõpel̦l̦o̦k kweilo̦k eo kõn al im jar, chairman eo an kweilo̦k in Jerbal eo Ad im Wãween Ad Mour enaaj kãitoklimoik im lujure aolep ri kweilo̦k ro bwe ren liñõri bũrookraam̦ eo me enaaj wal̦o̦ktok. Chairman eo enaaj bwebwenato kõn boin ko me enaaj l̦ap tokjãer ñan eklejia eo.

KATAK KO RAORÕK JÃN NAANIN ANIJ

3. Katak: Jooul minit. Ilo Jerbal eo Ad im Wãween Ad Mour—Kein Katak eo ewr juon unin tõl in katak im ruo ak jilu boin ko rel̦l̦ap. Juon em̦m̦aan ej lale eklejia ak juon rijjipañ ej aikuj kwal̦o̦k katak in. Ñe jenaaj riit im katak juon bok kããl ilo Baibõl̦ ilo kweilo̦k in lukwõl̦pãn wiik eo, jenaaj kõjo̦e juon pijain alwõj me ej kõmel̦el̦e kõn bok in. Ri-knono eo emaroñ kwal̦o̦k kõn jet wãween ko pijain alwõj eo ej ekkejell̦o̦k ñan unin tõl in katak eo. Bõtab, ej aikuj kwal̦o̦k aolepen boin ko rel̦l̦ap ilo kein katak eo. Ñe ewõr iien, emaroñ bareinwõt bwebwenato kõn pija ko ilo kein katak eo me kar kõm̦m̦ane ñan rejetake boin ko rel̦l̦ap ilo katak in. Emaroñ kobaiki kõmel̦el̦e ko jet me katak eo ej jitõñl̦o̦k ñani toon wõt an kõmel̦el̦e kein kaalikkarl̦o̦k wõt boin ko rel̦l̦ap ilo katak eo.

4. Kũbwij Naanin Anij: Jooul minit. Katak in ej kajjitõk im uwaak wõt im ejjel̦o̦k naanin kõppel̦l̦o̦k ak naanin kõjjem̦l̦o̦k. Juon em̦m̦aan me ej lale eklejia ak juon rijjipañ ej aikuj kwal̦o̦k katak in. Ri-kõnono in ej aikuj kwal̦o̦k kajjitõk ko ruo ñan ippãn ri-kweilo̦k ro. Bareinwõt, emaroñ pepe el̦aññe eklejia eo en riiti eoon ko katak eo ej kwal̦o̦ki ak jaab. Ro me renaaj uwaak rej aikuj uwaak ium̦win 30 jekn wõt ak dikl̦o̦k.

5. Riit Baibõl̦: Emãn minit. Juon jeid im jatid em̦m̦aan ak likao enaaj riiti Baibõl̦. Ri-jikuul̦ eo ej aikuj riit wõt eoon ko im jab kwal̦o̦k juon naanin kõppel̦l̦o̦k ak kõjjem̦l̦o̦k. Eo ej chairman ekõn̦aan jipañ ri-jikuul̦ rein ñan kakõm̦anm̦anl̦ok wãween aer riit. Ñan waanjoñak, chairman eo ekõn̦aan jipañ ri-jikuul̦ ro bwe en jim̦we im jejjet aer riit, bwe ren mel̦el̦e men ko rej riiti, bwe en mel̦ak aer riit, bwe ren jel̦ã kilen bõjrak jidik ilo iien ekkar, bwe en jim̦we aer ba naan ko, bwe en em̦m̦an ainikieer, im bwe ren kõnono jãn bũrueer. Kõnke jet eoon ko me ri-jikuul̦ ro rej riiti remaroñ aetokl̦o̦k jãn eoon ko jet, eo ej kõm̦m̦an jikejuul̦in jikuul̦ eo enaaj kããlõt ri-jikuul̦ ro ekkar ñan maroñ ko aer.

KAL̦APL̦O̦K AM̦ JEL̦Ã KWAL̦O̦K NAAN

6. Jooul l̦alem minit. Kar kõm̦m̦ane m̦õttan kweilo̦k in ñan kammineneik kõj aolep kõn jerbalin kwal̦o̦k naan im kakm̦anm̦anl̦o̦k wãween ad bwebwenato ippãn armej im kwal̦o̦k naan im katakin er. Ñe emenin aikuj, em̦m̦aan ro me rej lale eklejia remaroñ bar kwal̦o̦k katak kein. Kajjojo ri-jikuul̦ ej aikuj jerbale naanin kakapilõklõk eo jãn brochure ko etaer Kate Eok ñan Kal̦apl̦o̦k Am̦ Jel̦ã Kilen Riit im Katakin im Yokwe Armej—Kõm̦m̦an Ri-Kal̦oor me ej wal̦o̦k iturin katak eo am̦ ilo Jerbal Eo Ad im Wãween Ad Mour—Kein Katak. Jet iien, enaaj wõr juon katak naaj karke ñan bwebwenato ippãn ri-kweilo̦k ro im kwal̦o̦k kajjitõk. Juon em̦m̦aan ej lale eklejia ak juon rijjipañ enaaj aikuj kwal̦o̦k katak in.—Lale pãrokõrããp 15 kõn kilen kõm̦m̦ane katak ko kõn bwebwenato im kwal̦o̦k kajjitõk ippãn ri-kweilo̦k ro.

7. Jino Bwebwenato Ippãn Armej: Juon jeid im jatid em̦m̦aan ak kõrã emaroñ kwal̦o̦k katak in. El̦aññe ri-jikuul̦ eo ej juon em̦m̦aan, rijjipañ eo an ej aikuj bar juon em̦m̦aan ak el̦aññe ej juon kõrã, eokwe rijjipañ eo ej aikuj juon kõrã. Ñe ejjab, eokwe rijjipañ eo ej aikuj juon uwaan baam̦le eo an. Erro emaroñ jijet ak jutak.—Ñan kal̦apl̦o̦k am̦ jel̦ã kõn mel̦el̦e ko katak eo am̦ enaaj pedped ioon im wãween am̦ naaj kwal̦o̦k naan, lale pãrokõrããp 12 im 13.

8. Bar Jepl̦aak: Juon jeid im jatid em̦m̦aan ak kõrã emaroñ kwal̦o̦k katak in. El̦aññe ri-jikuul̦ eo ej juon em̦m̦aan, rijjipañ eo an ej aikuj bar juon em̦m̦aan ak el̦aññe ej juon kõrã, eokwe rijjipañ eo ej aikuj juon kõrã. (km 5/97 peij 2) Ri-jikuul̦ eo im rijjipañ eo an remaroñ jijet ak jutak. Ri-jikuul̦ eo ej aikuj kwal̦o̦k juon waanjoñak kõn ta eo enaaj ba ñe ej bar bwebwenato ippãn armej eo me ear kwal̦o̦k an itoklimo ilo iien eo jinoin an kar kõnnaan ippãn.—Ñan kal̦apl̦o̦k am̦ jel̦ã kõn mel̦el̦e ko katak eo am̦ enaaj pedped ioon im wãween am̦ naaj kwal̦o̦k naan, lale pãrokõrããp 12 im 13.

9. Kõm̦m̦an Ri-Kal̦oor: Juon jeid im jatid em̦m̦aan ak kõrã emaroñ kwal̦o̦k katak in. El̦aññe ri-jikuul̦ eo ej juon em̦m̦aan, rijjipañ eo an ej aikuj bar juon em̦m̦aan ak el̦aññe ej juon kõrã, eokwe rijjipañ eo ej aikuj juon kõrã. (km 5/97 peij 2) Ri-jikuul̦ eo im rijjipañ eo an remaroñ jijet ak jutak. Ri-jikuul̦ eo en kõm̦m̦ane katak in ãinwõt ñe em̦õj an jinoe katak eo kadede. Kõn men in, ri-jikuul̦ eo ejjab aikuj kwal̦o̦k juon naanin kõppel̦l̦o̦k ak kõjjem̦l̦o̦k. Iien eo wõt ri-jikuul̦ eo emaroñ aikuj kwal̦o̦k juon naanin kõppel̦l̦o̦k ak naanin kõjjem̦l̦o̦k ej ñe kar kajjitõk ippãn ñan jerbale boin kein ilo katak eo an. Ejjab juon menin aikuj ñan riiti aolep pãrokõrããp ko ilo katak eo, bõtab ri-jikuul̦ eo emaroñ kããlõt ñan kõm̦m̦ane men in ñe ekõn̦aan.

10. Kõmel̦el̦eik Tõmak eo Am̦: Ñe baat in enaaj wal̦o̦k ãinwõt juon katak, juon likao ak em̦m̦aan eo jeid im jatid ej aikuj kwal̦o̦k katak in. Ijoke, ñe baat in enaaj wal̦o̦k ãinwõt juon waanjoñak, juon jeid im jatid em̦m̦aan ak kõrã emaroñ kwal̦o̦k katak in. El̦aññe ri-jikuul̦ eo ej juon em̦m̦aan, rijjipañ eo an ej aikuj bar juon em̦m̦aan ak el̦aññe ej juon kõrã, eokwe rijjipañ eo ej aikuj juon kõrã. Ñe ejjab, eokwe rijjipañ eo ej aikuj juon uwaan baam̦le eo an. Ri-jikuul̦ eo ej aikuj uwaake kajjitõk eo katak eo ej pedped ioon ilo juon wãween ealikkar im jouj ekkar ñan kõmel̦el̦e ko ej pãd ilo Kein Katak eo. Ri-jikuul̦ eo emaroñ pepe el̦aññe ekõn̦aan kwal̦o̦k kõn ia eo kõmel̦el̦e ko rej itok jãne ak jaab ilo iien eo ej kwal̦o̦k katak eo an.

11. Katak: Juon jeid im jatid em̦m̦aan ej aikuj kwal̦o̦k katak in ñan eklejia eo. Ñe katak eo ej pedped ioon juon boin jãn kõmel̦el̦e ko jet 1 ilo brochure eo Yokwe Armej, ri-jikuul̦ eo ej aikuj kwal̦o̦k wãween ad maroñ kõjerbali eoon ko ilo jerbalin kwal̦o̦k naan. Ñan waanjoñak, emaroñ kõmel̦el̦eik iien eo ekkar ñan kwal̦o̦k eoon eo, mel̦el̦ein eoon eo, im wãween ad maroñ kõmel̦el̦eik eoon in ñan juon armej. Ñe katak eo ej pedped ioon juon boin jãn juon iaan katak ko ilo brochure eo Yokwe Armej, ri-jikuul̦ eo ej aikuj kwal̦o̦k kõn wãween ad maroñ jerbale boin in ilo jerbalin kwal̦o̦k naan. Emaroñ kwal̦o̦k kõn waanjoñak eo me ej wal̦o̦k ilo boin 1 ilo katak eo ak emaroñ bar kwal̦o̦k kõn eoon ko jet ilo katak eo ñe men in emaroñ jipañ ri-roñjake ro.

12. Mel̦el̦e ko an Katak Eo: Kõmel̦el̦e ko ilo pãrokõrããp in im pãrokõrããp eo tok juon ej jerbal wõt ñan katak ko “Jino Bwebwenato Ippãn Armej” im “Bar Jepl̦aak.” Mejãnkajjik eo an ri-jikuul̦ eo ej ñan kwal̦o̦k juon men em̦ool ilo Baibõl̦ me ej ekkar ñan armej eo ej kõnnaan ippãn im ñan kõm̦m̦an karõk ñan an bar jepl̦aak im bwebwenato ippãn. Ri-jikuul̦ eo ej aikuj kõnnaan kõn juon men me el̦ap an jejjet im ekkar ñan ijo ej pãd ie. Emaroñ kããlõt el̦aññe ekõn̦aan kwal̦o̦k juon iaan bok ko ad ak pijain alwõj ko ilo Nien Kein Jerbal eo Ad ñan Katakin. Ijello̦kun aer kakkilõklõki naan ko aer, ri-jikuul̦ ro rej aikuj kõmmãlmel wãween aer bwebwenato ippãn armej, ãinwõt aer kwal̦o̦k itoklimo kõn armej eo im ilo aer kõnono jãn bũrueer.

13. Wãween an Naaj Ri-Jikuul̦ eo Kwal̦o̦k Naan: Ri-jikuul̦ eo ej aikuj jerbale wãween eo ñan kwal̦o̦k naan me ej pãd ilo Kein Katak eo ekkar ñan ijo ej pãd ie. Ñan waanjoñak:

(1) Em̦ ñan Em̦: Wãween in ej kitibuj ad kwal̦o̦k naan jãn em̦ ñan em̦—emaroñ ilo m̦weo im̦õn armej eo, ilo talboon, ak ilo lõta—im ilo ad bar jepl̦aak ippãn juon armej jaar bwebwenato ippãn ilo jerbalin em̦ ñan em̦.
(2) Kwal̦o̦k Naan ilo Iien Em̦m̦antok: Wãween in ej kwal̦o̦k ad maroñ kortokjn juon iien epel̦l̦o̦k ñan ukote ad bwebwenato ippãn juon armej ñan juon iien jej kwal̦o̦k naan ñane. Men in emaroñ kitibuj ad kõnono kõn juon men jãn Baibõl̦ ippãn ro jej iioon er ilo jikin jerbal, ilo jikin jikuul̦, ilo bukwõn eo ad, ñe jej uwe ilo wa ko, ak jabdewõt bar jikin jemaroñ pãd ie ilo ad kõm̦m̦ani m̦akũtkũt ko ad kajjojo raan.
(3) Kwal̦o̦k Naan Ilo̦bwilej: Wãween in emaroñ kitibuj ad kwal̦o̦k naan ilo ad kõjerbal wabwilbwil eo, ilo ad kwal̦o̦k naan ñan armej ro ilo jikin peejnej ko, ilo ad kwal̦o̦k naan itrerein ial̦ ko, ak ilo baak ko, jikin baak wa ko, ak jabdewõt jikin armej ro rej pãd ie.

14. Wãween an Ri-Jikuul̦ Ro Maroñ Kõjerbal Pijain Alwõj ko im Bok ko Ad: Pedped ioon katak eo, ri-jikuul̦ eo emaroñ kããlõt ñan kwal̦o̦k juon pijain alwõj ak juon iaan bok ko ad. El̦aññe juon katak ej kitibuj an ri-jikuul̦ eo aikuj kwal̦o̦k kõn juon pijain alwõj ak el̦aññe ri-jikuul̦ eo ej make kããlõt ñan kwal̦o̦k juon pijain alwõj, eokwe emaroñ kwal̦o̦k im bwebwenato kake pijain alwõj eo ak en jab kõjo̦e.

MOURIN KŨRJIN

15. Ãlikin juon al, m̦õttan kweilo̦k in me 15 minit aetokin enaaj kwal̦o̦k juon ak ruo katak ñan jipañ ri-kweilo̦k ro ñan jerbale Naanin Anij. Em̦m̦aan ro rej lale eklejia ak rijjipañ ro remaroñ kwal̦o̦k katak kein. Bõtab, juon iaan em̦m̦aan ro rej lale eklejia ej aikuj kwal̦o̦k katak eo kõn aikuj an eklejia. Ñe katak eo ej juon bwebwenato iktaan ri-kõnono eo im ri-kweilo̦k ro im ej pedped ioon juon iaan katak ko ilo bok eo Jerbal Eo Ad im Wãween Ad Mour—Kein Katak, ri-kõnono eo me ej kõm̦m̦ane katak in emaroñ kwal̦o̦k kajjitõk ko jet. Ej aikuj kwal̦o̦k naanin ijjino ko an ilo tukadu bwe en maroñ kaalikkarl̦o̦k boin ko raorõk im kõtl̦o̦k an ri-kweilo̦k ro uwaak. El̦aññe katak eo ej kitibuj juon interpiu, em̦m̦anl̦o̦k ñe armej eo rej interpiu ki en kwal̦o̦k uwaak ko an jãn ijo im̦aan ijello̦kun an jijet jãn jea eo an, ñe emaroñ.

16. Katak Baibõl̦ an Eklejia: Jilñuul minit. Juon em̦m̦aan ej lale eklejia eo enaaj kwal̦o̦k katak in. (El̦aññe ejabwe em̦m̦aan ro rej lale eklejia ñan kwal̦o̦k katak in, rijjipañ ro remaroñ kõm̦m̦ane.) Kumi in em̦m̦aan ro rej lale eklejia eo rej aikuj lale wõn iaan rijjipañ ro ekkar ñan an kõm̦m̦ane Katak Baibõl̦ an Eklejia eo. Ro em̦õj kããlõt er ñan kwal̦o̦k katak in rej aikuj kajejjet minit ko aer, kaalikkar eoon ko raorõk, im jipañ aolep ri-kweilo̦k ro ñan bõk tokjãn jãn katak eo. Rein renaaj lo kõl ko rem̦m̦an kilen kõm̦m̦ane katak in ilo aer etale naanin tõl ko kõn kilen kõm̦m̦ane katak ko me rej kajjitõk im uwaak. (w23.04 peij 24, bo̦o̦k eo) El̦aññe em̦õj am̦ etali aolep boin ko ilo katak in, kwõjjab aikuj kõmaat bween minit ko. Ñe emaroñ, en okkõtaktak em̦m̦aan ro rej kõm̦m̦ane katak in im ro rej riiti pãrokõrããp ko kajjojo wiik. El̦aññe chairman eo ej kaalikkar bwe ej aikuj kadul̦o̦k katak in, innem eo ej kwal̦o̦ke ej aikuj pepe kõn wãween an naaj kakadul̦o̦k katak eo. Emaroñ kããlõt ñan jab riiti jet pãrokõrããp ko.

NAANIN KÕJJEM̦L̦O̦K KO

17. Jilu minit. Chairman eo enaaj ãliji boin ko raorõk jãn kweilo̦k in. Ilo tukadu ej aikuj bar kwal̦o̦k kõn katak ko me renaaj wal̦o̦k ilo wiik eo tok juon. Emaroñ kwal̦o̦k wõn ro ewõr kun̦aaer ilo wiik eo tok juon ñe ej wõr wõt iien. Chairman eo ej aikuj kwal̦o̦k naanin kõjjel̦ã ko im riiti lta ko m̦okta jãn an kõjem̦l̦o̦k kweilo̦k in. Ejjab aikuj kwal̦o̦k kõjjel̦ã ko kõn laajrakin kweilo̦k in kwal̦o̦k naan ñe ejjel̦o̦k oktak, im laajrak ko ñan karreo im̦õn kweilo̦k eo. Ijoke kõjjel̦ã kein remaroñ likũti ilo board in kõjjel̦ã eo. El̦aññe ejabwe iien ñan riiti aolep kõjjel̦ã im lõta ko ilo iien eo em̦õj karõkl̦o̦k im̦aan, eo ej chairman ej aikuj kajjitõk ippãn em̦m̦aan ro rej kwal̦o̦k katak ko ilo Mourin Kũrjin bwe ren kakadul̦o̦k katak ko aer ekkar ñan aikuj eo. (Lale pãrokõrããp 16 im 19.) Kweilo̦k in enaaj kõjjem̦l̦o̦k kõn al im jar.

NAANIN NÕBAR IM KAKAPILÕKLÕK KO

18. Ãlikin an kajjojo ri-jikuul̦ eo kwal̦o̦k katak eo an, chairman eo enaaj bõk tarrin juon minit ñan lel̦o̦k naanin nõbar im kakapilõklõk ko me rej pedped ioon boin eo ear aikuj jerbale. Ñe chairman eo ej kũrtok ri-jikuul̦ eo ñan kwal̦o̦k katak eo an, en jab kwal̦o̦k naanin kakapilõklõk eo ej jerbale ilo katak eo an. Ijoke, ñe ededel̦o̦k an ri-jikuul̦ eo kwal̦o̦k katak eo an im chairman eo ej kwal̦o̦k jet naanin nõbar ko rekkar, emaroñ kiiõ kwal̦o̦k boin eo jãn brochure eo ri-jikuul̦ eo ear jerbale im unin an em̦m̦an wãween an jerbale boin in ilo katak eo an. Emaroñ bareinwõt kwal̦o̦k ilo jouj kõn unin im wãween an ri-jikuul̦ eo maroñ kakm̦anm̦anl̦o̦k wãween an aikuj jerbale boin eo. Chairman eo emaroñ bar kwal̦o̦k wãween ko jet ri-jikuul̦ eo ak ri-kweilo̦k ro remaroñ bõk tokjãn jãn katak ak waanjoñak eo an. Bareinwõt, emaroñ lel̦o̦k naanin kakapilõklõk ko rem̦m̦an me rej pedped ioon brochure ko Yokwe Armej, Kate Eok ñan Kal̦apl̦o̦k Am̦ Jel̦ã Kilen Riit im Katakin, ak bok eo juon etan Ministry School ippãn ri-jikuul̦ eo ãlikin kweilo̦k eo ak bar juon iien em̦m̦an. Chairman eo emaroñ kõnnaan ippãn kõn boin eo ear jerbale ilo katak eo an ak bar juon boin.—Ñan kal̦apl̦o̦k am̦ jel̦ã kõn jerbal eo an chairman eo ñan kweilo̦k in Jerbal Eo Ad im Wãween Ad Mour im jerbal eo an eo ej jipañ chairman eo (auxiliary counselor), lale pãrokõrããp 19, 24, im 25.

AETOKIN KATAK KO

19. Aolep katak ko ren jab le jãn joñan aetokin minit ko ak overtime, ekoba naan ko an chairman eo. Meñe Jerbal Eo Ad im Wãween Ad Mour—Kein Katak ej kaalikkar aetokin kajjojo katak ko, ak ejjab menin aikuj ñan kakobaik mel̦el̦e ko jet ñan kõjerbale aolep minit ko am̦ el̦aññe em̦õj am̦ kwal̦o̦k aolep boin ko ilo katak eo. El̦aññe katak ko jet ilo kweilo̦k eo rej overtime, chairman eo ak eo ej jipañ chairman eo (auxiliary counselor) ej aikuj lel̦o̦k naanin kakapilõk ko ñan ro rar kõm̦m̦ane katak eo ak jab im̦aan eklejia eo. (Lale pãrokõrããp 24 im 25.) Aetokin kweilo̦k in, ekoba al im jar, ej aikuj juon awa im 45 minit aetokin.

IIEN LOTOK EO

20. Ilo iien lotok eo an juon eklejia, naaj l̦oore wõt laajrak eo an Jerbal Eo Ad im Wãween Ad Mour—Kein Katak ijello̦kun wõt men kein: Katak eo an em̦m̦aan eo ej lol̦o̦k eklejia eo me 30-minit aetokin, enaaj bõk jikin Katak Baibõl̦ an Eklejia. M̦okta jãn an ri-lotok eo kwal̦o̦k katak eo an, chairman eo enaaj ãliji ilo tukadu boin ko raorõk jãn kweilo̦k eo, enaaj kwal̦o̦k katak ko renaaj wal̦o̦k wiik eo tok juon, enaaj kwal̦o̦k naanin kõjjel̦ã ko im riiti lõta ko me remenin aikuj, innem enaaj kũrtok ri-lotok eo ñan kõm̦m̦ane katak eo an. Ãlikin an ri-lotok eo kwal̦o̦k katak eo an, enaaj kõjem̦l̦o̦k kweilo̦k eo kõn juon al me ear kããlõte. Emaroñ kããlõt bar juon jeid im jatid em̦m̦aan ñan kõjem̦l̦o̦k kweilo̦k eo kõn jar. Naaj ejjel̦o̦k bar kilaaj ak kumi in ri-jikuul̦ ro me renaaj kõm̦m̦an katak ko an eklejia ilo wiik eo em̦m̦aan eo ej lotok eklejia eo. Juon kumi me ej kõnono bar juon kajin emaroñ kõm̦m̦ane wõt kweilo̦k eo aer ilo iien lotok eo an eklejia eo me ej loloodjake kumi in. Bõtab, kumi eo ej aikuj kobal̦o̦k ippãn eklejia eo ñe ri-lotok eo ej kwal̦o̦k katak eo an ilo lukwõl̦pãn wiik eo.

WIIK IN KWEILO̦K KO REL̦L̦AP

21. Ilo wiik in kweilo̦k ko rel̦l̦ap, ejjel̦o̦k kweilo̦k an eklejia eo. Naaj aikuj kakeememej eklejia eo bwe kajjojo ri-kwal̦o̦k naan ro ak baam̦le ko rej aikuj etale katak ko ñan kweilo̦k kein me rej wal̦o̦k ilo ejja wiik ko an kweilo̦k kein rel̦l̦ap.

WIIK IN KWÕJKWÕJ EO

22. Ñe raanin Kwõjkwõjin Keememej Eo ej wal̦o̦k ilo lukwõl̦pãn juon wiik, eokwe ejjel̦o̦k kweilo̦k in Jerbal Eo Ad im Wãween Ad Mour ilo wiik eo.

EM̦M̦AAN EO EJ LOLOODJAKE KWEILO̦K IN JERBAL EO AD IM WÃWEEN AD MOUR

23. Juon iaan em̦m̦aan ro rej lale eklejia me kumi in em̦m̦aan ro rar kããlõte enaaj lale im loloodjake kweilo̦k in Jerbal Eo Ad im Wãween Ad Mour. Ej eddo eo an ñan lale bwe kweilo̦k in en kon̦ im aolep ro ewõr kun̦aaer ren l̦oore naanin jiroñ kein. Ej aikuj keini an kõnono ippãn em̦m̦aan eo ej jipañe ak auxiliary counselor eo. Ilo iien eo ej wal̦o̦k jikejuul̦ eo ekããl an Jerbal Eo Ad im Wãween Ad Mour—Kein Katak, em̦m̦aan eo ej loloodjake kweilo̦k in enaaj lel̦o̦k ñan ri-jikuul̦ ro katak ko me renaaj wal̦o̦k ium̦win ruo allõñ. Katak kein rej kitibuj katak ko jet me rejjab an ri-jikuul̦ ro im naan ko an chairman eo. (Lale pãrokõrããp 3-16 im 24.) M̦okta jãn an lel̦o̦k katak ko ñan ri-jikuul̦ ro, ej aikuj l̦õmn̦ak kõn iiõ ko dettaer, joñan imminene ko ippãer, im el̦aññe remaroñ kõnono ilo peran kõn men ko katak eo ej kõnono kaki. Ej aikuj kõm̦m̦ane ejja men in wõt ñe ej lel̦o̦k katak ko jet ñan em̦m̦aan ro jein im jatin. Naaj aikuj kaalikkar ñan ri-jikuul̦ ro katak ta ko renaaj kwal̦o̦ki jilu wiik m̦oktal̦o̦k jãn raan eo rej aikuj kõm̦m̦ane katak eo. Naaj aikuj lel̦o̦k ñan ri-jikuul̦ ro peba eo etan Our Christian Life and Ministry Meeting Assignment (S-89) me ej kwal̦o̦k ta katak ko renaaj kwal̦o̦ki. Em̦m̦aan eo ej loloodjake kweilo̦k in Jerbal Eo Ad im Wãween Ad Mour ej aikuj lale bwe jikejuul̦in aolepen kweilo̦k eo en pãd ilo board in kõjjel̦ã eo. Kumi in em̦m̦aan ro rej lale eklejia eo emaroñ kããlõt bar juon em̦m̦aan eo ej lale eklejia ak juon rijjipañ ñan jipañ jerbal kein. Bõtab, em̦m̦aan ro wõt me rej lale eklejia remaroñ kããlõt wõn ro remaroñ kwal̦o̦k katak ko me ri-jikuul̦ ro rejjab kõm̦m̦ani.

CHAIRMAN EO AN KWEILO̦K IN JERBAL EO AD IM WÃWEEN AD MOUR

24. Kajjojo wiik, juon iaan em̦m̦aan ro rej lale eklejia enaaj chairman ñan Kweilo̦k in Jerbal Eo Ad im Wãween Ad Mour. (Ñe ejabwe em̦m̦aan ro rej lale eklejia, rijjipañ ro me em̦õj kããlõt er remaroñ bareinwõt chairman ñan kweilo̦k in, ñe emenin aikuj.) Ej eddo eo an ñan kõpooj naanin kõppel̦l̦o̦k im kõjjem̦l̦o̦k ko im bwebwenato kõn pijain alwõj ko kõn kilen bwebwenato ippãn armej. Ej bareinwõt kũrtok kajjojo iaan ro me ewõr kun̦aaer bwe ren kwal̦o̦k katak ko aer. El̦aññe ejabwe em̦m̦aan ro ñan kwal̦o̦k katak ko, chairman eo emaroñ kwal̦o̦k katak ko jet, el̦aptata ñe katak eo ej kwal̦o̦k wõt kõn juon pijain alwõj im ejjel̦o̦k kajjitõk im uwaak. Naan ko an chairman eo iktaan katak ko rejjab aikuj aetok. Kumi in em̦m̦aan ro rej lale eklejia renaaj kããlõt wõn iaaer rekkar ñan bõk jerbalin chairman eo. Em̦m̦aan ro rekkar im em̦õj kããlõt er renaaj kõm̦m̦ane jerbal in jãn iien ñan iien. Ñe emenin aikuj, em̦m̦aan eo ej loloodjake kweilo̦k in Jerbal Eo Ad im Wãween Ad Mour emaroñ lõñl̦o̦k alen an chairman jãn em̦m̦aan ro jet. El̦aññe juon em̦m̦aan me ej lale eklejia eo ekkar ñan an tõl Katak Baibõl̦ an Eklejia, emaroñ bareinwõt chairman ñan kweilo̦k in Jerbal Eo Ad im Wãween Ad Mour. Jouj im keememej bwe em̦m̦aan eo me ej chairman ñan kweilo̦k in ej aikuj lel̦o̦k naanin nõbar im kakapilõklõk ko ñan ri-jikuul̦ ro ilo juon wãween eyokwe im ejouj. Ej eddo eo an chairman eo ñan lale bwe kweilo̦k in en jem̦l̦o̦k ilo awa eo ejejjet. (Lale pãrokõrããp 17 im 19.) El̦aññe chairman eo ekõn̦aan im ewõr juon jikin ilo stage eo, remaroñ likũt bar juon microphone ilo juon jikin ekkar bwe en kõjerbale ñan kũrtok kajjojo iaan ro me ewõr kun̦aaer, im ilo ejja iien eo wõt eo enaaj kõm̦m̦ane katak eo emaroñ wõnm̦aantak ñan jikin kõnono eo ilo stage eo im pojak in kõm̦m̦ane katak eo an. Bareinwõt, chairman eo emaroñ kããlõt ñan jijet ilo juon tebõl̦ ilo stage eo ilo iien an ri-jikuul̦ ro Riit Baibõl̦ ak kõm̦m̦ane katak ko ilo m̦õttan eo Kal̦apl̦o̦k Am̦ Jel̦ã Kwal̦o̦k Naan. Men in emaroñ kortokjãn iien.

AUXILIARY COUNSELOR EO

25. Em̦m̦an ñan kããlõt juon em̦m̦aan ej lale eklejia im el̦ap an imminene ilo kõnono im kõm̦m̦an katak ñan kõm̦m̦ane jerbal in. Eddo eo an em̦m̦aan in ej ñan lel̦o̦k naanin kakapilõk ko ñe emenin aikuj, ñan em̦m̦aan ro jet me rej lale eklejia im rijjipañ ro kõn katak ko rej kõm̦m̦ani ilo eklejia eo. Katak kein rej kitibuj katak ko rej kwal̦o̦ki ilo kweilo̦k in Jerbal eo Ad im Wãween Ad Mour, public talk ko, im ñe rej tõl ak riit ilo katak in Naanin Keeañ ak ilo Katak Baibõl̦ an Eklejia. (Lale pãrokõrããp 19.) El̦aññe elõñ em̦m̦aan ro ilo eklejia eo me rekapeel ilo aer kõnono im kõm̦m̦an katak, innem kajjojo iiõ remaroñ kããlõt bar juon em̦m̦aan ñan kõm̦m̦ane jerbalin auxiliary counselor eo. Ejjab menin aikuj ñan an auxiliary counselor eo lel̦o̦k naanin kakapilõk ko kõn aolep katak ko em̦m̦aan ro jeid im jatid rej kõm̦m̦ani.

JUON KILAAJ EDIK ÑAN RI-JIKUUL̦ RO

26. Ñan ejaake juon kilaaj ak kumi rot in ñan kõm̦m̦an katak ko, ej wawa ioon oran ri-jikuul̦ ro. Kajjojo kumi in ej aikuj wõr juon ri-kakapilõklõk, im em̦m̦antata ñe ej juon em̦m̦aan ej lale eklejia. Ñe ejjel̦o̦k, eokwe, juon iaan rijjipañ ro me ekkar emaroñ bõk eddo in. Kumi in em̦m̦aan ro rej lale eklejia rej aikuj kããlõt wõn ro remaroñ bõk jerbal in, im lale el̦aññe en maroñ okkõtaktak em̦m̦aan ro rej kõm̦m̦ane jerbal in. Ri-kakapilõklõk eo ej aikuj l̦oore laajrak eo me ej wal̦o̦k ilo pãrokõrããp 18. El̦aññe eklejia eo am̦ ej kõm̦m̦an kain kilaaj ak kumi rot in, naaj aikuj kajjitõk ippãn ri-jikuul̦ ro ñan aer etal ñan jikin eo kilaaj in enaaj wal̦o̦k ie ãlikin katak eo Kũbwij Naanin Anij ilo m̦õttan kweilo̦k eo etan Katak ko Raorõk jãn Naanin Anij. Ri-jikuul̦ rein rej aikuj bar kobal̦o̦k ippãn ri-kweilo̦k ro jet ãlikin katak eo ãliktata ilo jikuul̦ eo.

PIJAIN ALWÕJ KO

27. Naaj alwõje pijain alwõj ko kar kããlõte ñan kweilo̦k in. Pijain alwõj ko renaaj pãd ilo JW Library® app eo im remaroñ wal̦o̦k ilo jabdewõt device ko.

S-38-MH 11/23