Jikuul̦in Kwal̦o̦k Naan eo an 2015 Ej Jipañ Kõj Kal̦apl̦o̦k Ad Jel̦ã Katakin

¹ Rijeje sam eo Devid ear ba: “Naan ko jãn loõ, im l̦õmn̦ak ko ilo bũruõ, ren em̦m̦an im̦aan mejam̦, O Jeova aõ dekã im aõ Rũlo̦mo̦o̦r.” (Sam 19:14) Kõj bareinwõt jekõn̦aan bwe naan ko ad ren kabuñbũruon Jeova kõnke jej kaorõk jeraam̦m̦an eo ad ñan kwal̦o̦k katak ko rem̦ool ilo eklejia eo im ilo jerbal in kwal̦o̦k naan. Jikuul̦in Kwal̦o̦k Naan eo ad ej juon iaan wãween ko Jeova ej litok ñan kammineneik kõj bwe jen jel̦ã kilen kwal̦o̦k naan. Kajjojo wiik jikuul̦ in ej wal̦o̦k ilo elõñl̦o̦k jãn 111,000 eklejia ko iaolepen lal̦ in. Ear jipañ elõñ ro jeid im jatid jãn pel̦aakin lal̦ im eokkõtaktak wãween aer mour ñan erom rukwal̦o̦k naan ro kõn nuuj eo em̦m̦an. Jikuul̦ in ear jipañ er ñan jel̦ã kwal̦o̦k naan, jel̦ã kõmmaanwa im kareel ro jet, im kaperan er.​—Jrb. 19:8; Kol. 4:6, UBS.

² Ilo jikejuul̦ in jikuul̦ eo an 2015, naaj kobaiki bok in, “Ta ko Jemaroñ Katak jãn Naanin Anij?” im bar bok kein, “Yokwe eo an Anij” im “Ennaan Em̦m̦an.” Bareinwõt, em̦õj kõm̦m̦an oktak kõn joñan minit ko ñan kõm̦m̦ane katak eo me brother ro rej kwal̦o̦k boin ko rel̦l̦ap jãn Baibõl̦ im Katak No. 1. Jenaaj lale kiiõ oktak kein kar kõm̦m̦ani ekoba naanin jiroñ ko kõn kilen kõm̦m̦ani katak ko ilo jikuul̦ eo ad.

³ Boin ko Rel̦l̦ap jãn Baibõl̦: Em̦m̦aan eo ej kõm̦m̦ane katak in enaaj kwal̦o̦ke 1 boin em̦m̦an im ejejjet jãn jebta ko an wiik eo. Im enaaj kwal̦o̦ke ium̦win 2 minit. Ñe em̦m̦an an kõpooje boin in me eaorõk ñan eklejia eo eban l̦e jãn joñan minit kein an. Ãlikin an kõm̦m̦ane men in, ro ilo eklejia eo renaaj kwal̦o̦k boin ko rem̦m̦an ippãer ium̦win 6 minit ãinwõt ad kõn kõm̦m̦ane aolep iien. Ewõr 30 jekõn ak dikl̦o̦k ñan kajjojo ruwaak. Bwe uwaak ko ad ren em̦m̦an im jejjet ekkar ñan 30 jekõn, jej aikuj kõpooji l̦o̦k im̦aan im bõjrak ñe ejejjet 30 jekõn. Em̦m̦an men in bwe ej kammineneik kõj ñan kajejjet iien. Ej bar kõtl̦o̦k iien ñan an ro jet uwaak im kwal̦o̦k boin ko rar loi ke rar katak ippãer make.

⁴ Katak No. 1: Em̦õj kadikl̦o̦k minit ko an eo ej riit Baibõl̦ ñan 3 minit ak dikl̦o̦k. Im enaaj kiiõ iietl̦o̦k eoon ko ej riiti. Ro kar lel̦o̦k kun̦aaer bwe ren riit rej aikuj riit elõñ alen im kõmmãlmel. Ilo aer kõmmãlmel, em̦m̦an ñe rej kwal̦o̦k ainikien aer riit im lale bwe en jejjet im jim̦we aer ba naan ko bwe en alikkar an naaj aolep mel̦el̦e kõn men ko rej riiti. Aolep armej ro an Jeova ej aikuj em̦m̦an aer riit kõnke el̦ap ad kõm̦m̦ane men in ilo ad kabuñ ñan Jeova. El̦ap ad m̦õn̦õn̦õ bwe elõñ iaan ajri ro nejid relukkuun jel̦ã riit! Jej nõbar ro ewõr nejier kõn aer kate er ñan jipañ ajri ro nejier bwe ren erom ro relukkuun jel̦ã riit.

⁵ Katak No. 2: Naaj lel̦o̦k katak in ñan juon leddik ak kõrã bwe en kõm̦m̦ane ium̦win 5 minit. Eo ej kõm̦m̦ane katak in en kõjerbal unin tõl in katak eo kar lel̦o̦k ñane. Im en kwal̦o̦ke katak eo ikijjeen an kõjerbal juon iaan kõl ko rej kõjerbale kõn kilen kwal̦o̦k naan ilo jikin eo ej pãd ie. Ñe ewõr eoon me taitõl̦in katak eo an ej pedped ioon emaroñ bar kobaiki ilo katak eo an. Eo ej lale jikuul̦ eo enaaj kããlõt juon an rijjipañ.

⁶ Katak No. 3: Katak in enaaj wal̦o̦k ium̦win 5 minit im naaj lel̦o̦k ñan juon jeid im jatid em̦m̦aan ak kõrã bwe en kõm̦m̦ane. Ñe juon leddik ak kõrã ej kõm̦m̦ane katak in, ej aikuj l̦oore ejja wãween aer kõm̦m̦ane Katak No. 2. Ak ñe juon likao ak em̦m̦aan ej kõm̦m̦ane, eokwe katak eo an ej aikuj pedped ioon mel̦el̦e ko ilo bok kein Ennaan Em̦m̦an ak “Yokwe eo an Anij.” Im en jutak ijo im̦aan ãinwõt ñe ej kwal̦o̦k juon katak ilo im̦õn kweilo̦k eo im kõnono ñan rukweilo̦k ro. Bareinwõt, enaaj aikuj l̦oore unin tõl in katak eo kar lel̦o̦k ñane, im emaroñ make kããlõt eoon ko rekkar ñan an kõjerbali.

⁷ Wãween eo Ekããl ñan Katak No. 3 me Ej ñan Em̦m̦aan Ro: El̦aññe katak in ej pedped ioon bok in, “Ta ko Jemaroñ Katak jãn Naanin Anij?”, em̦m̦aan eo ej kwal̦o̦ke ej aikuj kõm̦m̦ane ãinwõt ñe ej iien kabuñ an baam̦le ak ej kwal̦o̦k naan ñan juon armej. Eo ej lale jikuul̦ eo enaaj kããlõt rijjipañ eo an im ia eo ej kõm̦m̦ane men in ie (setting). Rijjipañ eo ej aikuj uwaan baam̦le eo an em̦m̦aan eo ej kõm̦m̦ane katak in, ñe ejjab emaroñ juon likao ak em̦m̦aan ilo eklejia eo. Emaroñ bar kobaiki eoon ko me taitõl̦in katak eo an ej pedped ioon. Jãn iien ñan iien, naaj lel̦o̦k katak in ñan em̦m̦aan ro rej lale eklejia bwe ren kõm̦m̦ane. Em̦m̦aan rein remaroñ make kããlõt rijjipañ eo aer im ia eo rej kõm̦m̦ane men in ie. Ejjel̦o̦k kajjitõk bwe men in enaaj lukkuun rõjañ eklejia eo ñe rej loe kilen an em̦m̦aan rein katakin armej eo ej uwaan baam̦le eo an ak juon jeid im jatid em̦m̦aan.

⁸ Naanin Kakapilõk: Ãlikin an kajjojo rijikuul̦ kõm̦m̦ane katak eo an, eo ej lale jikuul̦ eo enaaj kõjerbal 2 minit ñan lel̦o̦k naanin nõbar im bar naanin kakapilõk ko jãn bokin jikuul̦ eo. Ilo iien eo ej kũr kajjojo iaan rijikuul̦ ro bwe en kõm̦m̦ane katak eo an, eban kõjjel̦ã ñan aolep ta eo rijikuul̦ eo ej jerbale. Ãlikin wõt an m̦õj katak eo an rijikuul̦ eo, ej kab kiiõ nõbare im kwal̦o̦k boin eo rijikuul̦ eo ear jerbale. Lukkuun kaalikkare etke em̦m̦an men eo rijikuul̦ eo ear kõm̦m̦ane, ak kõmel̦el̦e ñan rijikuul̦ eo ilo jouj etke eaorõk bwe en kar lukkuun kaalikkar boin eo ej jerbale.

⁹ Naanin kakapilõk ko ñan kajjojo rijikuul̦ repãd ilo peij 79 ñan 81 ilo bokin jikuul̦ eo (Ministry School) aer make. Ãlikin an juon rijikuul̦ kõm̦m̦ane katak eo an, eo ej lale jikuul̦ eo enaaj kakõl̦l̦eiki bok eo an. Im enaaj kajjitõk ippãn ñe emakel̦o̦k iaan el̦aññe ear lale naanin tõl ko me repãd ilo jem̦l̦o̦kin katak eo ej jerbale ilo bokin jikuul̦ eo an. Em̦m̦aan eo emaroñ nõbare im bar kwal̦o̦k ta ko jet emaroñ kõm̦m̦ani im renaaj jipañe ãlikin wõt kweilo̦k ak bar juon iien. An em̦m̦aan eo kõm̦m̦ane men in ñan ro ewõr kun̦aaer ilo jikuul̦ eo ej juon men jen watõke bwe em̦m̦an kõnke enaaj jipañ er ñan kõm̦m̦an wõnm̦aanl̦o̦k.​—1 Ti. 4:15, UBS.

¹⁰ El̦aññe el̦e minit ko an juon rijikuul̦, eo ej lale jikuul̦ eo ak rijjipañ eo an ej aikuj kõm̦m̦ane juon jeknõl̦ ñane, bõlen kõjañ juon peel̦ ak kattõñtõñ juon men ñan kaalikkar bwe eawa. En kõm̦m̦ane men in ilo jouj. Rijikuul̦ eo ej aikuj kile men in im kõjem̦l̦o̦k l̦o̦k jãntõj eo ear itõn ba im to jãn ijo im̦aan.​—Lale bok in jikuul̦ eo (Ministry School) p. 282, pãr. 4.

¹¹ Jej rõjañ aolep ro rej pokake kien ko an Anij im em̦m̦an aer wõnm̦aanl̦o̦k ñan del̦o̦ñ ilo Jikuul̦in Katak Baibõl̦ eo. (Lale bok eo Ministry School, p. 282, pãr. 6.) Jikuul̦ in me doulul eo an Jeova ej kõm̦m̦ane ear kamaroñ ro doon Jeova ñan jel̦ã kwal̦o̦k naan im katakin ro jet kõn nuuj eo em̦m̦an kõn Aelõñ eo ilo peran, kautiej, im yokwe. Ejjel̦o̦k pere bwe Jeova elukkuun m̦õn̦õn̦õ ñe ej loe an aolep bõktok nõbar ñane itok wõt jãn aer kar pãd im ekkatak jãn jikuul̦in Baibõl̦ in.​—Sam 148:12, 13; Ais. 50:4, UBS.