Jemen Im Elder​—Kajejjet Kitten Jerbal Ko Ruo Jimor

“A elañe armij e jaje kin an iroij i mweo imõn, ekijkan an lale eklisia an Anij?”​—1 TIMOTHY 3:5.

1, 2. (a) Ilo ebeben eo kein, ewi wãwen an kar overseer ro rar make iair im ro rar belele im ejelok nejiir rar maroñ jerbal ñõn ro jeiir im jatiir? (b) Ewi wãwen an kar Aquila im Priscilla juõn joñok ñõn elõñ ri belele ro rainin?

OVERSEER ro ilo congregation eo jinoin an Christian emaroñ kar maan ro rej make iair ak maan ro ri belele im ejelok nejiir ajiri ak maan ro ewor nejiir. Ejelok bere bwe jet ian Christian rein rar maroñ loor nan in kakabilek eo an Paul ear lelok ilo letter eo an kein kajuõn ñõn ri Korint ro, jebta 7, ilo air bed wõt im make iair. Jesus ear kwalok: “Bwe jet eunõk rej mõke kõmõn ir eunõk kin ailiñ in lõñ.” (Matthew 19:12) Maan rein rej make iair, einwõt Paul im bõlen jet ian ri itoitak ro mõttan, rar anemkwoj ñõn air itoitak in jibañ ro jeiir im jatiir.

² Bible eo ejjab ba elañe Barnabas, Mark, Silas, Luke, Timothy, im Titus rar maan ro rar make iair. Elañe rar ri belele ro ealikar ear bwe air anemkwoj jen eddo ko an family ñõn air maroñ itoitak ñõn air kõtõbrak elõñ jerbal ko rar kabbeik ir kaki. (Jerbal 13:2; 15:39-41; 2 Korint 8:16, 17; 2 Timothy 4:9-11; Titus 1:5) Limaro beleir remaroñ kar illok ibbeir lok, einwõt Peter im “ri jilek ro jet,” ro ealikar rar bõk kõrã ro beleir ibbeir lok ke rar illok jen jikin ñõn jikin. (1 Korint 9:5) Aquila im Priscilla rar juõn joñok in ri belele ro rar mõnõnõ in bar emmakit, im loor Paul jen Korint ñõn Epesõs, inem emmakit lok ñõn Rome, im bar jeblak ñõn Epesõs. Bible eo ejjab ba elañe ear wor nejiir ajiri. Jerbal eo air ñõn ro jeiir im jatiir ear bõktok ñõn ir kamolol jen “eklisia otemjej an dri ailiñ ko.” (Rome 16:3-5; Jerbal 18:2, 18; 2 Timothy 4:19) Rainin, ejelok bere elõñ ri belele ro, einwõt Aquila im Priscilla, rej maroñ jerbal ilo congregation ko jet, bõlen ilo air emmakit lok ñõn ijoko elaplok aikwij ie.

Jemen im Elder

3. Ta eo ej kalikar bwe elõñ elder ro ilo ebeben eo kein kajuõn rar maan ro ri belele im wor air family?

³ Ear alikar bwe ilo ebeben eo kein kajuõn C.E., elõñ wõt ian elder ro kar maan ro ri belele im ewor nejiir. Ke Paul ear kwalok kadkad ko rar men in aikwij ñõn an juõn emaan “bukot bwe en dri kaki elap,” ear kwalok bwe kain Christian rot in ej aikwij juõn emaan eo “emõn an iroij i mweo imõn, bwe ro nejin ren bokake e, im en mwilin armij.”​—1 Timothy 3:1, 4.

4. Ta kar men in aikwij eo ñõn elder ro rar ri belele im wor nejiir ajiri?

⁴ Einwõt ad kar loe, juõn overseer ear jab aikwij bwe en wor nejin ajiri, ak meñe belele. Ak elañe ear belele, ñõn an tellokin juõn elder ak juõn ministerial servant, juõn Christian ear aikwij jimwe an jerbal im tel ilo yokwe lio belen im kalikar e make bwe emaroñ kejbarok ajiri ro nejin bwe en jimwe air kõttãik ir. (1 Korint 11:3; 1 Timothy 3:12, 13) Elañe ear wor jabdewõt mõjno ko ilo an lale ro ilo mweo imõn men in enaj kõmmõn an jab juõn brother eo ej tellokin jerbal ko remõn ilo congregation eo. Etke? Paul ej kamelele: “A elañe armij eo e jaje kin an iroij i mweo imõn, ekijkan an lale eklisia an Anij?” (1 Timothy 3:5) Elañe ro ilo family eo an rar jab kõnan kõttãik ir ñõn tel eo an, ewi wãwen an naj ro jet emmakit?

“Ewor Ajiri ro Rej Tõmak”

5, 6. (a) Ta aikwij eo ikijen ajiri Paul ear kwalok kake ñõn Titus? (b) Ta eo rej watõk kin elder ro ewor nejiir ajiri?

⁵ Ke ear katakin Titus ñõn an jitõñ overseer ro ilo congregation eo an Crete, Paul ear kakien: “Elañe jabrewõt eman ejelok notan, im belen wõt juõn, im eor nejin retiljek, ro re jab kinaklok ir kin abje, im re jab jelomene. Bwe emõn dri kaki elap enjelok notan, einwõt dri kõmñe an Anij.” Ta melelen men in aikwij in “nejin re tiljek”?—Titus 1:6, 7.

⁶ Kajin in “nejin re tiljek” ej jitõñlok ñõn ajiri ro ededelok air wujleplok mour ko air ñõn Jehovah im emwij air baptais ak ñõn ro redik ro rej wõnmanlok wõt ñõn air wujleplok im baptais. Ro uan juõn congregation rej watõk an emõn mwilin ajiri ro nejin elder ro im rej bokake. Ej aikwij alikar bwe juõn elder ej kõmmõn joñan wõt an maroñ ñõn kalek tõmak eo an ajiri ro nejin. Kiiñ Solomon ear je: “Kwon kibel juõn ajiri ilo ial eo en etal ie; im ñe e ridto e jamin illok jen e.” (Jabõn Kennan 22:6) Ak ta elañe juõn jodikdik eo emwij an bõk katak rot in ej makoko in karejar ñõn Jehovah ak meñe kõmmõne juõn bwid elap?

7. (a) Etke ealikar bwe Jabõn Kennan 22:6 ejjab kwalok kake juõn rule eo ejjab ukoktak? (b) Elañe ajiri eo nejin juõn elder ejjab kãlet ñõn an karejar ñõn Jehovah, etke men in make ejamin kõmmõn an elder eo luji jerammõn ko an?

⁷ Ealikar bwe jabõnkennan in kar eliji ijin ilõñ ejjab kwalok kin juõn rule eo ebin. Ejjab kabõjrak kien eo kin jokãlet eo ewor anemkwoj ie. (Deuteronomy 30:15, 16, 19) Ñe juõn nejin maan ak kõrã ej tõbar joñan rittan eo ej bõk eddo ie, ej aikwij kõmmõn juõn bebe eo an make ikijen wujleplok im baptais. Elañe elder eo jemen jodikdik eo ear alikar an lelok jibañ, tel, im kauwe eo ej aikwiji ilo jitõb, ak jodikdik eo ejjab kãlet ñõn an karejar ñõn Jehovah, jemen ejjab aikwij jako jen an juõn overseer. Ijo turãjet, elañe juõn elder elõñ nejin ajiri jidik rej jokwe imweo ro, juõn elikin juõn rej oktak im nañinmij ilo jitõb im lorak ilo jorrãn, e emaroñ jako jen air watõk e juõn emaan eo “emõn an iroij i mweo imõn.” (1 Timothy 3:4) Point eo in, ej aikwij alikar bwe juõn overseer ej kõmmõn joñan wõt an maroñ bwe en wor ‘nejin retiljek, ro re jab kinaklok ir kin abje, im re jab jelomene.’a

Belek Juõn “Kõrã eo Ejjab Tõmak”

8. En ewi wãwen an juõn elder aikwij kõmmõn ñõn lio belen ejjab tõmak?

⁸ Ikijen Christian maan ro rej belek kõrã ro rejjab tõmak, Paul ear je: “Elañe juõn ian jimjãn jimjãten eor belen eo e jab tõmak, im lio e mõnõnõ in jokwe iben, leo en jab ilok jen lio belen . . . Bwe . . . lio e jab tõmak kokwojarjar e kin leo belen; elañe jab ein drein, ro nejemi re jab erreo, a kiõ re kwojarjar. Bwe, . . . ekijkan am jela, O man, elañe kwo naj lomoren lio beleõm?” (1 Korint 7:12-14, 16) Nan in “ejjab tõmak” ijin ejjab jitõñlok ñõn juõn kõrã ri belele eo ejelok an tõmak ilo kabuñ ak ñõn juõn eo ejjab wujleplok ñõn Jehovah. Lio emaroñ kar juõn ri Jew, ak juõn eo ej tõmak ilo anij pagan ko. Rainin, juõn elder emaroñ belek juõn kõrã eo ej jerbale juõn kabuñ eo einjuõn, ej juõn eo ejjab jela elañe ej bed juõn Anij, ak meñe juõn eo ejjab tõmak ilo Anij. Elañe ej mõnõnõ in jokwe ibben leo, leo ejjab aikwij illok jen lio kin wõt an einjuõn tõmak ko an. Leo ej aikwij wõt ‘jokwe iben belemi kin jelalokjen, im kautiej kõra rõn, einwõt jãbi remõjino jen kom,’ im mour ilo kejatdikdik eo ñõn lomoren e.​—1 Peter 3:7; Kolosse 3:19.

9. Ilo ailiñ ko me kien eo ej lelok ñõn leo im lio jimor maroñ eo ñõn kajedmatmat ajiri ro nejiir ñõn tõmak in kabuñ ko air, en ewi wãwen an juõn elder emmakit, im ewi wãwen an naj men in jelet jerammõn ko an?

⁹ Elañe juõn overseer ewor nejin ajiri, enaj jerbale tel eo an leo ej belele im ej jemen ajiri ilo jimwe ilo an kakajiririk ir “ilo kaje im kowe an Iroij.” (Epesõs 6:4) Ilo elõñ ailiñ ko kien eo ej lelok ñõn ri belele ro jimor maroñ eo ñõn katakin ajiri ro nejiir kin kabuñ. Ilo wãwen in lio emaroñ akwelap ñõn an kajerbal maroñ eo an ñõn kajedmatmat ajiri ro nejin ñõn tõmak im manit ko an kabuñ, ko emaroñ koba bõklok ir ñõn imõn jar eo an.b Bwebota, ajiri ro rej aikwij loor bõklikit eo air emwij katakin kin Bible ikijen jab bõk kwunair ilo kemem ko an kabuñ wan ko. Einwõt bõran family eo, jemeir enaj jerbale maroñ eo an make ñõn an katak ibben ajiri ro nejin im bõk ir ñõn kwelok ko ilo Kiiñdom Hall eo ñe emaroñ. Ñe rej tõbar yiõ ko me rej maroñ make kõmmõn air bebe, renaj kõmmõn bebe ñõn ir make kin ial et eo renaj illok ielok. (Joshua 24:15) Elañe elder ro mõttan im ro uan congregation eo remaroñ lo bwe ej kõmmõne aolepen ijo kien eo an Caesar ej kõtlok an kõmmõne ñõn katakin ajiri ro nejin ilo jimwe ilo ialin mol eo, inem rejamin watõk e bwe ejjab tellokin jerbal einwõt juõn overseer.

‘En Emõn an Iroij I Mweo Imõn’

10. Elañe leo jeban juõn family ej juõn elder, ta eddo eo an moktata?

¹⁰ Meñe ñõn juõn elder eo ej jemen ajiri im lio belen ej juõn Christian eo mõttan, ejjab bidodo ñõn an leo ajeji ien ko an ilo jimwe ikõtan lio belen, ajiri ro, im eddo ko an congregation eo. Ebwe an alikar ilo Jeje ko bwe juõn Christian eo jemen ajiri ewor juõn an eddo ñõn an kejbarok lio belen im ajiri ro nejin. Paul ear je: “A elañe jabrewõt e jakkene ro nukin, im elaplok ro dri mweo imõn, e ar kariõp an tõmak im ej nana jen dri jab tõmak.” (1 Timothy 5:8) Ilo ejja letter in wõt, Paul ear kwalok bwe maan ro wõt me ededelok air kwalok ir make bwe rej ri belele ro remõn im jemen ajiri rej maroñ kãlet ir ñõn air jerbal einwõt overseer ro.​—1 Timothy 3:1-5.

11. (a) Ilo wãwen et ko juõn elder ej lelok “ñõn ro dri loan mweo imõn”? (b) Ewi wãwen an men in maroñ jibañ juõn elder ñõn tõbar eddo ko an congregation eo?

¹¹ Juõn elder ej aikwij “lelok” ñõn e make jab men ko ilo mweiuk wõt ak bareinwõt men ko ilo jitõb im eñjake. Ri meletlet eo Kiiñ Solomon ear je: “Kwon kapojõk am jerbal inabij, im kapoje ñõn yuk ilo jikin kallip inem tokelik kwon kalek mweo imõm.” (Jabõn Kennan 24:27) Inem ñe ej kabwe men ko ilo mweiuk, eñjake, im men in kõmõnõnõ ko rej men in aikwij ñõn lio belen im ajiri ro nejin, juõn overseer ej bareinwõt aikwij kalek ir ilo jitõb. Men in ej bõk ien​—ien eo me ejjab maroñ lelok ñõn men ko an congregation eo. Ak ej ien eo me emaroñ lelok jinekjej ko remõn ikijen mõnõnõ ko an family eo im men ko ilo jitõb. Ilo ien ko tokelik, elañe family eo an ekajur ilo jitõb, elder eo emaroñ aikwij kadiklok ien an jerbale abañ ko an family eo. Men in enaj kõmmõn an laplok an wor ien ñõn kejbarok men ko an congregation eo. Joñok eo an einwõt juõn leo belele im juõn jemen eo emõn enaj juõn tokjen eo ilo jitõb ñõn congregation eo.​—1 Peter 5:1-3.

12. Ilo ta men eo kin family eo ro jemen ajiri ro im rej elder rej aikwij kwalok juõn joñok emõn kake?

¹² Tel ro imweo ilo juõn wãwen emõn ekoba karõk ien ko ñõn an tel ilo an family eo katak Bible. Elaptata an aorõk bwe elder ro ren kwalok juõn joñok emõn ilo wãwen in, bwe family ko rekajur rej kõmmõn an kajur congregation ko. Ien ko an juõn overseer ejjab aikwij boub wõt ilo jerammõn in jerbal ko jet im ejelok ien an katak ibben lio belen im ajiri ro nejin. Elañe kar wãwen eo in, ej aikwij bar etale schedule eo an. Emaroñ aikwij bar karõk schedule eo an ak kadiklok ien eo ej jolok ñõn men ko jet, meñe kadiklok jet ian jerammõn in jerbal ko jet ilo jet ien.

Jerbal in Tel eo Ej Jokkin wõt Juõn

13, 14. Ta nan in kakabilek eo “ri korijer eo e tiljek im meletlet” ej letok ñõn elder ro ewor air family?

¹³ Nan in kakabilek eo ñõn kõmmõn bwe en jokkin wõt juõn eddo ko an family eo im congregation eo ejjab juõn men eo ekãl. Iumin elõñ yiõ ko “ri korijer eo e tiljek im meletlet” ear letok nan in kakabilek ko ñõn elder ro ikijen men kein. (Matthew 24:45) Elõñlok jen 37 yiõ ko remotlok, The Watchtower eo an September 15, 1959, peij 553 im 554, ear kakabilek: “Emol, ejjab ke juõn men kin kõmmõn bwe en jokkin wõt juõn aolep kõnan kein rej bõk ien kein ad? Ilo jokkin wõt juõn in kwoj aikwij kõtlok bwe lale eo ekkar en leloke ñõn tokjen ko ñõn family eo am make. Emol Jehovah Anij ejamin watõk an juõn emaan kajerbal aolepen ien ko an ilo makitkit ko an congregation eo, ilo an jibañ ro jein im jaten im ro ri turen ñõn bõk lomor, im jab lale lomor eo an ro ilo mweo imõn. Lio belen juõn emaan im ajiri ro nejin ej eddo eo an moktata.”

¹⁴ The Watchtower eo an November 1, 1986, peij 22, ear kakabilek: “Bõk kwunam ilo jerbal in kwalok nan eo einwõt juõn family enaj kebaklok yuk, ak aikwij ko reinjuõn an ajiri ro ej aikwiji am lelok ien ko am make im eñjake in kajur eo am. Kin men in, jokkin wõt juõn ej men in aikwij ñõn etale ewi joñan ien eo kwo maroñ kajerbale ñõn . . . eddo ko an congregation eo ke kwoj bareinwõt kejbarok ‘men ko am make’ ilo jitõb, ilo eñjake, im ilo mweiuk. [Juõn Christian] ej aikwij ‘katak mokta kin lale ro nukiir.’ (1 Timothy 5:4, 8)”

15. Etke juõn elder eo ewor belen im nejin ajiri ej aikwij meletlet im jelalokjen?

¹⁵ Juõn jabõnkennan ilo Jeje ko ej kwalok: “Kin meletlet rej kalek juõn im, im kin jelalokjen rej kabin e.” (Jabõn Kennan 24:3) Aet, ñõn an juõn elder kajejjet kitien eddo ko an lõltak jen lõñ im ilo ejja ien eo wõt kalek ro ilo mweo imõn, emol ej aikwij elap meletlet im jelalokjen. Ekkar ñõn Jeje ko, elõñlok jen juõn an melan ñõn an jerbale tel eo an ie. Eddo ko an family eo an im congregation eo an rej jelet e. Ej aikwij jelalokjen ñõn an debij juõn jokkin wõt juõn eo ikõtan eddo kein. (Pilippai 1:9, 10) Ej aikwiji lolokjen ñõn an karõk lãjrak eo an kin ta men ko moktata. (Jabõn Kennan 2:10, 11) Meñe elap an eñjake eddo eo an ñõn kejbarok jerammõn ko ilo congregation eo an, ej aikwij kile bwe einwõt juõn emaan ri belele im jemen ajiri, eddo eo an moktata im letok in Anij ej kejbarok eo im lomor eo an family eo an.

Lõmaro Remõn Jemen Ajiri im Bareinwõt Elder ro Remõn

16. Ta tokjen eo emõn ibben juõn elder elañe e bareinwõt ej juõn jemen ajiri?

¹⁶ Juõn elder eo emõn mwilin ajiri ro nejin emaroñ lukkun juõn tokjen emõn. Elañe ear katak ñõn kejbarok family eo an, inem ej maroñ jibañ family ko jet ilo congregation eo. Ej melele abañ ko air im emaroñ lelok nan in kakabilek eo ej kwalok iminene eo an make. Ekamõnõnõ, bwe elõñ thousand elder ro ibelakin lõl rej kõmmõne juõn jerbal emõn einwõt maan ro ri belele, jemen ajiri ro, im overseer ro.

17. (a) Ta eo juõn emaan eo ej juõn jemen ajiri im elder jimor ejjab aikwij meloklok? (b) En ewi wãwen an ro jet ilo congregation eo aikwij kwalok eñjake in lemnak kin ro jet?

¹⁷ Bwe leo jemen family eo en juõn elder, ej aikwij juõn Christian eo eritto eo, ñe ej kejbarok lio belen im ajiri ro nejin, emaroñ karõk jerbal ko an bwe en maroñ kajerbal ien ko an ibben ro jet ilo congregation eo. Ejjab aikwij meloklok bwe jerbal in shepherd eo an ej ijjino ilo mweo. Ilo air jela bwe elder ro ewor beleir im nejiir ajiri ewor air eddo kin jerbal ko jimor ñõn family eo air im congregation eo air, ro uan congregation eo rejamin kajeoñ akwelap kin ien ko air. Ñõn wanjoñok, juõn elder eo ewor nejin ajiri ro rej aikwij etal ñõn school ilo jiboñõn eo juõn ejamin aolep ien maroñ bed iumin jet ien elikin kwelok ko ilo jota. Ro jet uan congregation eo rej aikwij melele men in im kwalok air lemnak kin ro mõttair.​—Pilippai 4:5.

Elder ro Ad Rej Aikwij Jitenburu ñõn Kij

18, 19. (a) Etale eo ad kin 1 Korint jebta 7 ta eo ear kamaroñ kij ñõn ad kile? (b) En ewi wãwen ad lemnak kin kain Christian emaan rein?

¹⁸ Etale eo ad kin jebta 7 ilo letter eo moktata an Paul ñõn ri Korint ro ear kamaroñ kij ñõn ad lo bwe, ilo air loor nan in kakabilek eo an Paul, elõñ maan ro me rej make iair rej kajerbal anemkwoj eo air ñõn jerbale tokjen ko ñõn Ailiñ eo. Bareinwõt ewor thousand brother ri belele ro ejelok nejiir ajiri ro, ñe rej lale kõrã ro beleir, rej bar jerbal einwõt overseer ro remõn ilo district ko, circuit ko, congregation ko, im ra ko an Watch Tower, kin karejar ko rej men in nebar an kõrã ro beleir. Eliktata, ilo iturinlok 80,000 congregation ko an armij ro an Jehovah, ewor elõñ maan ro ewor nejiir ajiri ro me rejjab kejbarok limaro beleir im ajiri ro wõt ak rej bareinwõt bõk ien ñõn air jerbal ñõn ro jeiir im jatiir einwõt shepherd ro rej kea kake ir.​—Jerbal 20:28.

¹⁹ Ri jilek Paul ear je: “Ren koutiej wõt elder ro rej iroij jime, im ro rej bareinwõt jerbal ilo nan im katakin, ren kanuij koutiej ir.” (1 Timothy 5:17) Aet, elder ro rej tel ilo juõn wãwen emõn ilo moko imweir im ilo congregation eo ej tellokin air bõk yokwe im kautiej eo ad. Jej aikwij lukkun “nebar ro einwõt.”​—Pilippai 2:29.

[Kamelele ko itulal]

Ikijen Elij

◻ Ewi wãwen ad jela bwe elõñ elder ro ilo ebeben eo kein kajuõn ear wor air family?

◻ Ta eo ej men in aikwij ñõn elder ro ri belele im ewor nejiir ajiri, im etke?

◻ Ta melelen “eor nejin retiljek,” ak ta elañe ajiri eo nejin juõn elder ejjab kãlet ñõn an karejar ñõn Jehovah?

◻ Ilo wãwen et ko juõn elder ej lelok “ñõn ro dri loan mweo imõn”?

[Pija eo ilo peij 30]

Family ko rekajur rej kõmmõn an kajur congregation ko