Jake Jibwil Kin Kainemõn Eo Jehovah Ej Letok
“Ke kim jela bwe einwõt komij bõk mõtõn iñtan ko, ein drein bareinwõt ainemõn.”—2 KORINT 1:7.
1, 2. Ta eo ro emwij air erom Christian rainin emwij air loe?
ELÕÑ ro rej konono Imõniaroñroñ eo kiõ rar rittolok ilo an kar ejelok juõn air jelalokjen kin mol eo an Anij. Bõlen men in ej bar mol ilo kwe. Elañe eindein, kememej kin wãwen eñjake eo am ke mejen jelalokjen eo am ear jino bellok. Ñõn wanjoñok, ke kwar jino melele bwe ro remij rejjab iñtan ak ejelok air jelalokjen, kwar jab ellã im rõlok ke? Im ke kwar katak kin kejatdikdik eo kin ro remij, bwe billion armij renaj jerkakbiji ñõn mour ilo lõl eo ekãl an Anij, kwar jab jokane ke?—Ecclesiastes 9:5, 10; John 5:28, 29.
2 Ak ta kin kallimur eo an Anij ñõn an kajemlok nana im ñõn ukõt lõl in ñõn juõn paradise? Ke kwar katak kin men in, ear jab kainemõn ke yuk im kobrak yuk kin kõnan eo ewor kõtmene ie? Ewi wãwen am eñjake ke kwar jino katak kin maroñ eo ñõn jamin bar mij ak ñõn mour im ellãlok ñõn loan Paradise eo ilõl ej itok? Ejelok bere kwar bwilõñ. Aet, kwar oktak im erom juõn eo ej ri bõk ennan in kainemõn eo an Anij eo rej kwalok kake kiõ ibelakin lõl jen Ri Kennan ro an Jehovah—Psalm 37:9-11, 29; John 11:26; Revelation 21:3-5.
3. Etke ro rej bõk kwunair ilo ennan in kainemõn eo an Anij ibben ro jet rej bareinwõt bõk iñtan?
3 Bõtab, ke kwar kajeoñ in jaketo-jaketak ennan eo ilo Bible ibben ro jet, kwar bareinwõt kile bwe “e jab ir otemjej rej tõmak.” (2 Tessalonika 3:2) Bõlen jet ian ro jeram mokta rar kajirere kake yuk kin am kwalok am tõmak ilo kallimur ko ilo Bible. Kwo maroñ kar iñtan jen matõrtõr kin am wõnmanlok wõt im katak Bible im kobalok ibben Ri Kennan ro an Jehovah. Jumae eo emaroñ kar laplok ke kwar jino kõmmõn oktak ko ñõn kõmmõn bwe mour eo am en errã ibben nan in kaiñi ko ilo Bible. Kwar jino iione matõrtõr eo Satan im lõl in an ej bõktok ion ro otemjej rej bõk kainemõn eo an Anij.
4. Ilo wãwen et ko reinjuõn elõñ ro rekãl im ewor air itoklimo rej emmakit ñõn iñtan?
4 Ekaburomõj, einwõt an kar Jesus kanan, iñtan ej kõmmõn an jet latibñõl im bõjrak jen air kobalok ibben congregation eo an Christian. (Matthew 13:5, 6, 20, 21) Ro jet rej kijenmij iumin iñtan ko ilo air debij wõt air lemnak ilo kallimur in kainemõn ko rej katak kaki. Inem rej etal im wujleplok mour ko air ñõn Jehovah im baptais einwõt ri kalor ro an Nejin, Jesus Christ. (Matthew 28:19, 20; Mark 8:34) Bwebota, iñtan ejjab bõjrak ilo an juõn Christian baptais. Ñõn wanjoñok, debij wõt an erreo emaroñ juõn men eo ebin kamadmõde ibben juõn armij eo ear etton wãwen mour eo an. Ro jet rej aikwij kijenmij jumae ko emakijkij air walok jen ro uan family eo rej jab bed ilo tõmak eo. Jekdon kain iñtan rot, ro otemjej rej tiljek wõt ilo air jibadõk juõn mour in wujleplok ñõn Anij remaroñ liki kin juõn men. Ilo juõn wãwen eo ej ñõn juõn armij make, renaj lo kainemõn im jibañ eo an Anij.
“Anij in Kainemõn Otemjej”
5. Koba ibben elõñ melejoñ ko Paul ear iñtan kaki, ta eo ear bareinwõt loe?
5 Juõn eo emwilõl an kar kamolol kin kainemõn eo Anij ej letok kar ri jilek Paul. Elikin juõn ien eo ear lap melejoñ ie ilo Asia im Macedonia, ear lo an lap an jokane ke ej roñ bwe congregation eo ilo Korint ear emõn an uak ñõn letter in kauwe eo an. Men in ear kammakit e ñõn an jeje ñõn ir letter eo an kein karuo, eo ej kwalok kin nan in nebar kein tok ilokan: “Jen nebar Anij eo Jemen ar Iroij Jisõs Kraist, Jemen tiriamokake, im Anij in ainemõn otemjej, Eo ej kainemõne kim ilo am jorran otemjej.”—2 Korint 1:3, 4.
6. Ta eo jej katak kake jen nan ko an Paul jej loi ilo 2 Korint 1:3, 4?
6 Nan in kakõrmol kein elap melele ko rej litok ñõn kij. Jen etali nan kein. Ke Paul ej kwalok an nebar ak kamolol ñõn Anij ak kõmmõn juõn kajitõk kin e ilo letter ko an, ekkã ad lo bwe ej bareinwõt kobaik kamolol eo emwilõl kin Jesus, Bõran congregation eo an Christian. (Rome 1:8; 7:25; Epesõs 1:3; Hebrew 13:20, 21) Kin men in, Paul ej kwalok nan in nebar in ñõn “Anij eo Jemen ar Iroij Jisõs Kraist.” Inem, ilo ien eo moktata ilo jeje ko an, ej kajerbal juõn nan in Greek eo rej ukõte “tiriamokake ko rej yokwe.” Nan in ej itok jen nan eo rej kajerbale ñõn kalikar buromõj kin iñtan eo an bar juõn. Ilo wãwen in Paul ej kwalok kin eñjake in tiriamokake ko an Anij ñõn jabdewõt ri karejar ro An retiljek ro rej iñtan kin matõrtõr—eñjake in yokwe ko rej kammakit Anij ñõn kwalok tiriamokake ñõn ir. Eliktata, Paul ear reilok ñõn Jehovah einwõt unjen kadkad in emõn ilo an kir e “Jemen tiriamokake ko.”
7. Etke jemaroñ ba bwe Jehovah ej “Anij in kainemõn otemjej”?
7 “Tiriamokake ko” an Anij ej walok ilo rõlok jen an juõn iñtan kin men in kaiñtan ko. Inem ej Paul etal wõt im kwalok kin Jehovah einwõt “Anij in kainemõn otemjej.” Kin men in, jabdewõt kainemõn eo jemaroñ loe jen joij eo an ri tõmak ro mõttad, jemaroñ reilok ñõn Jehovah einwõt unjen eo. Ejelok kainemõn eo emol, im ej indio elañe unjen ejjab jen Anij. Bareinwõt, ej e eo ear kõmõnmõn armij ilo nememen wõt e, im ilo wãwen in kamaroñ kij bwe jen ri kainemõn. Im ej jitõb kwojarjar eo an Anij eo ej kammakit ro ri karejaran ñõn air kwalok tiriamokake eo ñõn ro rej aikwij kainemõn.
Katak ñõn Ri Kainemõn
8. Meñe Anij ejjab unjen melejoñ ko ad, ta tokjen eo emõn emaroñ itok iod ilo ad kijenmij wõt ilo iñtan?
8 Ke Jehovah Anij ej kõtlok an elõñ kain melejoñ ko itok ion ro ri karejaran retiljek, ejjab E eo ej unjen kain melejoñ rot kein. (James 1:13) Bõtab, kainemõn eo ej letok ñe jej kijenmij iumin iñtan emaroñ katakin kij ñõn an laplok ad eñjake kin aikwij ko an ro jet. Kin ta tokjen eo? “Bwe kimin maroñ in kainemõne ro rej ber ilo jabrewõt jorran, kin ainemõn eo kimij mõke ainemõn kake jen Anij.” (2 Korint 1:4) Ilo wãwen in Jehovah ej katakin kij bwe en bolemen ad bõk kwunad kin kainemõn eo an ibben ri tõmak ro mõttad im ro jej iion ir ilo jerbal in kwalok nan eo ad ke jej kajeoñwe Christ im “kainemõn ro otemjej rej liãjlol.”—Isaiah 61:2; Matthew 5:4.
9. (a) Ta eo enaj jibañ kij kijenmij ilo iñtan? (b) Ewi wãwen an ro jet bõk kainemõn ñe jej tiljek wõt iumin iñtan?
9 Paul ear kijenmij kin elõñ iñtan ko an ilo kamolol kin kainemõn eo elap ear bõk jen Anij ikijen Christ. (2 Korint 1:5) Kij bareinwõt jemaroñ lo kainemõn eo elap ilo ad kalmenlokjen kin kallimur ko remõn an Anij, ilo ad jar kin rejtak eo an jitõb kwojarjar eo an, im ilo ad loe uak ko an Anij ñõn jar ko ad. Ilo wãwen in jenaj bõk kakajur ñõn ad etal wõt im jurake iroij bõtata eo an Jehovah im kamol bwe Devil eo ej juõn ri riap. (Job 2:4; Jabõn Kennan 27:11) Ñe jej kijenmij ilo tiljek jabdewõt wãwen iñtan, jej aikwij, einwõt Paul, lelok aolepen tokjen eo ñõn Jehovah, eo kainemõn eo an ej kamaroñ Christian ro ñõn air bed wõt im tiljek iumin melejoñ. Kijenmij eo an Christian ro retiljek ewor juõn tokjen kainemõn eo ej walok jene ion dolul eo an jimjen jimjatin, im kõmmõn bwe ro jet ren beek ilo burueir ñõn air “kijenmij ilo ejja kain iñtan ko wõt.”—2 Korint 1:6.
10, 11. (a) Ta jet men ko rar kõmmõn iñtan ñõn congregation eo ilo Korint eo etto? (b) Ewi wãwen an kar Paul kainemõn congregation eo an Korint, im ta kejatdikdik eo ear kalikare?
10 Ri Korint ro rar bõk ijo kwunair ilo iñtan ko rar itok ion Christian ro remol. Kobatok ibben men in, rar aikwij kakabilek ñõn bukwelok ri lũñ ro rar jab ukwelok. (1 Korint 5:1, 2, 11, 13) Likjap in kõmmõne men in im ñõn bõktok juõn jemlok ñõn bwoktak im jibel ko ear bõktok elap jorrãn ion congregation eo. Ak eliktata rar jerbale nan in kakabilek eo an Paul im kalikar ukwelok eo emol. Kin men in, ear nebar im ba bwe uak eo air emõn ñõn letter eo an ear kainemõn e. (2 Korint 7:8, 10, 11, 13) Alikar, armij eo kar bukwelok ear bareinwõt ukwelok. Inem Paul ear kakabilek ir bwe ren ‘jolok an nana im kainemõn e, ñe ab juõn einwõt en jo ilo an buromõj elaplok.’—2 Korint 2:7.
11 Letter eo kein karuo an Paul ej aikwij kar lap an kainemõn congregation eo ilo Korint. Im men in kar juõn ian karõk ko an. Ear kamelele: “Ke kim jela bwe einwõt komij bõk mõtõn iñtan ko, ein drein bareinwõt ainemõn.” (2 Korint 1:7) Ilo jemlokin letter eo an, Paul ear kõketak: “Etal wõt . . . im komin mour ilo kainemõn, . . . im Anij in yokwe im ainemõn e naj bed ibemi.”—2 Korint 13:11.
12. Ta aikwij eo ñõn aolep Christian ro otemjej?
12 Ej juõn katak elap an aorõk jemaroñ bõk ad katak jene! Ro otemjej uan congregation eo an Christian rej aikwij “bõk kwunair ilo kainemõn eo” Anij ej letok ikijen Nan eo an, jitõb kwojarjar eo an, im dolul eo an ilõl. Meñe ro emwij bukwelok ir remaroñ aikwij kainemõn elañe emwij air ukwelok im kajimwe ial eo air ebwid. Kin men in, “ri korijer eo e tiljek im meletlet” emwij an ejake juõn men in letok in tiriamokake ñõn jibañ ir. Juõn alen ilo juõn yiõ ruo elder remaroñ lolok jet ro emwij kar bukwelok ir. Rein emaroñ jako air kwalok juõn lemnak in jumae ak kõmmõn elap jerawiwi im remaroñ aikwij jibañ ñõn bõk buñten nee ko rej men in aikwij ñõn air maroñ bar jeblak.—Matthew 24:45; Ezekiel 34:16.
Iñtan eo an Paul ilo Asia
13, 14. (a) Ewi wãwen an kar Paul kwalok kin juõn ien eo ear lap iñtan ie im ear iione ilo Asia? (b) Ta men eo emaroñ kar bed ilo lemnak eo an Paul?
13 Kain iñtan eo congregation eo ilo Korint ear iione tok ñõn point in jejjab maroñ keiri ibben elõñ iñtan ko Paul ear aikwij kijenmij kaki. Kin men in, ear maroñ kakememej ir: “Bwe kim jab kõnan, ro jãtiõ, bwe komin jaje kin am jorrãn eo ej itok ñõn kim ilo Es̃ia, bwe e ar kanuij lap am iñtan, elap jen am maroñwe, einwõt bwe ejoko kõtõmene otemjej kin mour. Aet, kim ar mõke lemnok kim drien mij, bwe kimin jab mõke liki kim, a Anij eo Ej kejerkakbiji ro remij. Eo e ar lomoren kim jen keien mij eo elap, im E naj lomor; kin E kim kejatrikrik kim bwe E naj bareinwõt lomoren kim.”—2 Korint 1:8-10.
14 Jet scholar (ri meletlet kin Bible) ro rej tõmak bwe Paul ear jitõñlok ñõn kiojaljal eo ilo Epesõs, eo emaroñ kar bõk mour eo an Paul im bareinwõt mour ko an ri itoitak ro ruo mõttan jen Macedonia, Gaius im Aristarchus. Christian rein ruo rar jibwe ir im bõk ir lok ñõn loan juõn imõn aluij eo eobrak kin kumi in kõmmõn jorrãn eo ear “lamõj iumin enañin ruo awa: ‘Elap Artemis [anij kõrã eo ewan] an ri Epesõs!’” Eliktata, juõn ri kien in jikin kwelok eo ear maroñ kabõjrak an jar eo ellamõjmõj. Men in kauatata in ñõn mour ko an Gaius im Aristarchus emaroñ kar lap an kainebataek Paul. Ilo mol, ear kõnan deloñ in kammanwa ibben jar in kõmmõn jorrãn eo, ak rar kabõjrak e jen an kõmmõn kauatata ñõn mour eo an ilo wãwen in.—Jerbal 19:26-41.
15. Ta wãwen eo elap remaroñ kar kwalok kake ilo 1 Korint 15:32?
15 Bõtab, Paul emaroñ kar kwalok kin juõn wãwen eo elaplok an lap jen wãwen eo ej walok ijin iman. Ilo letter eo an kein kajuõn ñõn ri Korint ro, Paul ear kajitõk: “Elañe einwõt armij I ar iri iben kiru rawia i Epesõs, ewi an kakajuror iõ?” (1 Korint 15:32) Men in emaroñ melelen bwe mour eo an Paul ear bed ilo kauatata ejjab kin armij ro einwõt menin mour ak kin lukkun menin mour awia ko ilo jikin ikkure eo ilo Epesõs. Ro rej kõtõrãik kien jet ien rej kaje ir ikijen air iun ir bwe ren ire ibben menin mour awia ko ke jar in armij ro rej kijoror in katorlok bõtõktõk rej reilok im aluij. Elañe kar melele eo an Paul in bwe ear jelmae lukkun menin mour awia ko, emaroñ kar ilo minute eo eliktata ear ellã ilo kabwilõñlõñ jen juõn mij eo elej, ejja einwõt an kar Daniel bõk lomor jen loñin lion ko.—Daniel 6:22.
Wanjoñok ko ilo Ran Kein
16. (a) Etke elõñ Ri Kennan ro an Jehovah remaroñ kile ir ilo kain iñtan ko Paul ear iñtan ie? (b) Ta eo jemaroñ liki ikijen ro rar mij kin tõmak eo air? (c) Ta tokjen eo emõn ej walok ñe Christian ro rej lo jidik wõt ial in air deor jen mij?
16 Elõñ Christian ro ilo ran kein remaroñ karõklok ñõn iñtan ko Paul ear iñtan kaki. (2 Korint 11:23-27) Rainin, bareinwõt, Christian ro “e ar kanuij lap [air] iñtan,” im elõñ rar jelmae wãwen ko ‘ejoko kõtõmene otemjej kin mour.’ (2 Korint 1:8) Jet rar mij ilo pein ri uror ro im ro relej rej matõrtõr ir. Jemaroñ liki bwe kajur in kainemõn eo an Anij ej kamaroñ ir ñõn air kijenmij im bwe rar mij ilo an burueir im lemnak ko air bin wõt ilo kajejjet kitien kin kejatdikdik eo air, meñe juõn kejatdikdik ñõn mour ilõñ ak juõn kejatdikdik eo ñõn lõl. (1 Korint 10:13; Pilippai 4:13; Revelation 2:10) Ilo bar wãwen ko jet, Jehovah ej na kilen wãwen ko, im ro jeid im jatid rej deod jen mij. Ejelok bere bwe ro rar bed iumin deod rot in emwij air kalaplok liki eo air “ilo Anij eo ej kejerkakbiji ro remij.” (2 Korint 1:9) Elikinlok, remaroñ konono kin juõn liki eo elaplok ke rej bõk kwunair in jaketo-jaketak ennan in kainemõn eo an Anij ibben ro jet.—Matthew 24:14.
17-19. Ta bwebwenato ko rej kwalok bwe ro jeid im jatid ilo Rwanda rej ro rej bõk kwunair ilo kainemõn eo an Anij?
17 Ilo ien kein rej kab motlok jitenburu ro jeid im jatid ilo Rwanda rar bed ilo juõn wãwen eo einlok wõt eo Paul im ro mõttan rar iione. Elõñ rar luji mour ko air, ak jibadbad ko an Satan rar likjap in jolok tõmak eo air. Ak, ro jeid im jatid ilo ailiñ in rar lo kainemõn eo an Anij ilo elõñ wãwen ko an juõn armij make. Ilo ien eo rar iten torlokbõki ri Tutsi ro im ri Hutu ro rar jokwe ilo Rwanda, ear lõñ ri Hutu ro rar kauatataik mour ko air make ñõn kejbarok ri Tutsi im ri Tutsi ro ñõn kejbarok ri Hutu ro. Jet ri jumae ro air rar man ir kin air kejbarok ri tõmak ro mõttair. Ñõn wanjoñok, juõn ri Hutu Ri Kennan etan Gahizi rar mane elikin an kar nooj juõn sister in Tutsi etan Chantal. Leo belen Chantal juõn emaan in Tutsi etan Jean, juõn sister in Hutu etan Charlotte ear noje ilo bar juõn jikin. Iumin 40 ran ko Jean im bar juõn brother in Tutsi rar tilekek wõt ilo juõn chimney, im dioj jene iumin jidik wõt ien ilo boñ. Ilo aolepen ien in, Charlotte ear lelok mõñã im kejbarok ir, meñe ear jokwe ebakelok juõn camp an jar in ri tarinae ro an Hutu. Ilo peij in, kwo maroñ lo juõn pija in an Jean im Chantal bar iion don, im rein rej kamolol bwe ri Hutu ri kabuñ ro mõttair ‘rar janilik kin kenwair’ kin ir, ejja einwõt an kar Prisca im Aquila kõmmõn ñõn ri jilek Paul.—Rome 16:3, 4.
18 Bar juõn Ri Kennan in Hutu, Rwakabubu, ear bõk nebar jen newspaper eo Intaremara kin an kar kejbarok ri tõmak in Tutsi ro mõttan.a Ear ba: “Ebareinwõt wor Rwakabubu, juõn ian Ri Kennan ro an Jehovah, eo ear etal wõt im noje armij ro ijin im ijuweo ibwiljin ro jein im jatin (eñin wãwen eo ri tõmak ro mõttair rej kir don). E ekin jolok aolepen juõn ran eyu in bõklok mõñã im den ñõn ir meñe e juõn ri nañinmij in orlok. Ak Anij ear kõmmõn bwe kajur eo an en einjuõn.”
19 Lemnak, bareinwõt, kin ruo ri belele ro ear wor air itoklimo etair Nicodeme im Athanasie. Mokta jen ien torlokbõke eo kin armij ro ilo ailiñ eo, ri belele rein rar katak Bible ibben juõn ri Tutsi Ri Kennan etan Alphonse. Meñe ear kauatata ñõn mour ko air, rar noje Alphonse ilo mweo imweir. Tokelik rar kile bwe mweo ear jab juõn jikin eo ejjab kauatata kinke ri Hutu ro ri turiir rar jela kin ri Tutsi eo jerair. Kin men in, Nicodeme im Athanasie rar noj Alphonse ilo juõn roñ ilo melan eo air. Men in kar juõn emmakit emõn kinke armij ro ri turiir rar jino kabukõte Alphonse enañin aolep ran. Ke ear babu ilo roñ in iumin enañin 28 ran ko, Alphonse ear kalmenlokjen kin bwebwenato ko ilo Bible einwõt eo kin Rahab, eo ear noje ri Israel ro ruo ilo bõrwaj in mweo imõn ilo Jericho. (Joshua 6:17) Rainin Alphonse ej wõnmanlok wõt ilo jerbal eo an ilo Rwanda einwõt juõn ri kwalok nan kin news eo emõn, im ej kamolol bwe ri katak Bible in ri Hutu ro an rar likit mour ko air ilo kauatata kin e. Im ta kin Nicodeme im Athanasie? Rej kiõ Ri Kennan ro an Jehovah emwij air baptais im rej katak ibben elõñlok jen 20 ri katak Bible ro ewor air itoklimo.
20. Ilo wãwen et eo Jehovah ear kainemõn ro jeid im jatid ilo Rwanda, ak ta aikwij eo ej wõnmanlok wõt im elõñ wõt iair rej aikwiji?
20 Ilo ien eo ear ijjino torlokbõke eo kin armij ro ilo Rwanda, ear wor 2,500 ri keañ ro kin news eo emõn ilo ailiñ in. Meñe buki rar luji mour ko air ak kar jibed ir bwe ren ko jen ailiñ in, oran Ri Kennan ro ear laplok ñõn elõñlok jen 3,000. Men in ej men in kamol bwe Anij ej lukkun kainemõn ro jeid im jatid. Ak ta kin ajiri ro relõñ im ejelok jemeir im jineir im kõrã ro ejako beleir ibwiljin Ri Kennan ro an Jehovah? Eokwe, rein rej bõk wõt iñtan im aikwiji kainemõn eo ej wõnmanlok wõt. (James 1:27) Den in kemjalal ko air naj kõmõrãikilok ilo wõt ien en ñe enaj walok ien jerkakbiji eo ilo lõl eo ekãl an Anij. Mekarta, kamolol kin kejbarok eo an ro jeir im jatiir im kinke rej ri kabuñ ro an eo ej “Anij in kainemõn otemjej,” rej maroñ in kamadmõd wõt ilo mour in.
21. (a) Bar ia eo ro jeid im jatid rej aikwiji kainemõn eo an Anij, im ta juõn wãwen eo kij aolep jemaroñ jibañ ie? (b) Ñãt enaj dedelok aikwij eo ad ñõn kainemõn?
21 Ilo elõñ jikin ko jet, einwõt Eritrea, Singapore, im Yugoslavia eo mokta, ro jeid im jatid rej wõnmanlok wõt im karejar ñõn Jehovah ilo tiljek meñe rej iion iñtan. Jen jibañ rein jeid im jatid ilo ad nikniki ad jar bwe ren maroñ bõk kainemõn. (2 Korint 1:11) Im jen kijenmij ilo tiljek mae ien eo Anij ikijen Jesus Christ “naj kõmõrãik jen mejeir dren in kemjãlãl otemjej.” Inem jenaj iion juõn joñan eo ededelok in kainemõn eo Jehovah enaj letok ilo lõl eo an ekãl im wãnik.—Revelation 7:17; 21:4; 2 Peter 3:13.
[Kamelele eo itulal]
a The Watchtower, January 1, 1995, peij 26, ej kwalok kin bwebwenato eo an ledik eo nejin Rwakabubu, etan Deborah, eo jar eo an ear kamakit juõn jarin ri tarinae in Hutu im lomoren family eo jen air urore.
Kwo Jela Ke?
◻ Etke Jehovah rej naetan “Anij in kainemõn otemjej”?
◻ En ewi wãwen ad lemnak kin iñtan?
◻ Ibben wõn ro jemaroñ lelok kainemõn?
◻ Enaj ewi wãwen an dedelok aikwij eo ad ñõn kainemõn?
[Pija ilo peij 15]
Jean and Chantal, meñe rej Ri Kennan in Tutsi, Ri Kennan in Hutu ro rar nooj ir ilo jikin tilekek ko reoktak jen don ilo ien torlokbõke eo an armij ro ilo Rwanda
[Pija eo ilo peij 15]
Ri Kennan ro an Jehovah rej wõnmanlok wõt im jaketo-jaketak ennan in kainemõn eo an Anij ibben ro ri turiir ilo Rwanda