Mõnõnõ Eo Emol Ta Key Eo?
ARMIJ RO kar kõmõnmõn ir bwe ren mõnõnõ. Etke jemaroñ ba men in? Eokwe, baj kalmenlokjen kin mour eo an armij ilo jinointata.
Jehovah Anij ear kõmõnmõn ri belele ro ruo moktata bwe ren mõnõnõ. Ear likit Adam im Eve ilo juõn paradise, juõn jikin kallip kar naetan Eden. Ri Kõmõnmõn eo ear lelok ñõn ir aolep men in aikwij ko ilo kanniek rar aikwiji ñõn mour. Jikin kallip eo kar wor “wijki otemjej re wõleo ñõn mej, im remõn ñõn mõña.” (Genesis 2:9) Adam im Eve kar emõn air mour, kajur, im aibujuij—rar wãppen im kanuij mõnõnõ.
Bõtab, ta kar key eo ñõn mõnõnõ eo air? Kar jikin jokwe in paradise eo air ke ak air mour ilo kanniek im wãppen? Men in letok kein jen Anij kar kalaplok mõnõnõ eo air kin mour. Ak mõnõnõ eo air ear jab atartar ion men kein ilo kanniek. Jikin kallip in Eden kar juõn men elaplok jen juõn jikin kallip eaibujuij wõt. Kar juõn jikin kwojarjar, juõn jikin ñõn kabuñ ñõn Anij. Key eo ñõn air lo mõnõnõ indio kar maroñ eo air ñõn kajutak im debij juõn kõtan ej yokwe ibben Ri Kõmõnmõn eo. Ñõn lo mõnõnõ, rar aikwij bõk juõn lemnak ilo jitõb mokta.—Keiri Matthew 5:3.
Kadkadin Mour in Jitõb Ej Tellok ñõn Mõnõnõ
Ilo jinoin Adam kar wor juõn kõtan ilo jitõb ibben Anij. Kar juõn kõtan ej yokwe, im joij einwõt kõtan eo ikõtan juõn ajiri im jemen. (Luke 3:38) Ilo jikin kallip in Eden, Adam im Eve rar bed ilo wãwen ko remõn me rar kõtlok ir ñõn kamat kõnan eo airro ñõn kabuñ ñõn Anij. Ilo air bokake Jehovah ilo mõnõnõ im yokwe, renaj kar kautiej im kaibujuij Anij ñõn juõn joñan elaplok jen an kar men in mour ko maroñ kaibujuij e. Renaj kar maroñ ilo meletlet nebar Anij kin kadkad ko an reaibujuij im rejtak wãwen iroij eo an. Bareinwõt renaj kar maroñ in bõk kejbarok ej yokwe im joij jen Jehovah.
Kõtan in ebak ibben Anij im bokake eo ñõn kien ko an kar bõktok mõnõnõ eo emol ñõn jemed im jined moktata. (Luke 11:28) Adam im Eve rar jab aikwij bed ilo melejoñ im abañ ko iumin elõñ yiõ ko mokta jen air kar lo key eo ñõn lo mõnõnõ. Rar mõnõnõ jen ien eo kar kõmõnmõn irro. Ilo air ainemõn wõt ibben Anij im kõttaik ir ñõn wãwen iroij eo an rar lo mõnõnõ.
Bõtab, mõnõnõ in ear jemlok, ilo ien eo rar jab bokake Anij. Ilo air jumae, Adam im Eve rar rupe kõtan eo air ilo jitõb ibben Jehovah. Ejako air kar jeran Anij. (Genesis 3:17-19) Ej alikar bwe jen ran eo kar kadiojlok irro jen jikin kallip eo, Jehovah ear kajemlok wãwen kennan otemjej ibbeir. Rar luji mour wãppen eo air, kejatdikdik eo kin mour indio, im jikin jokwe eo air ilo jikin kallip eo. (Genesis 3:23) Ak men eo elaptata, ke rar luji kõtan eo air ibben Anij, rar luji key eo ñõn lo mõnõnõ.
Maroñ eo Ad ñõn Kãlet
Mokta jen airro kar mij, Adam im Eve rar lelok ñõn ajiri ro nejiirro kadkad ko air kadkadin armij, bõklikit eo air rar jolete, im maroñ eo ñõn bõk kadkadin mour in jitõb. Maroñ eo an armij ro rar jab diklok im joñan wõt men in mour ko. Jemaroñ bar bõk juõn kõtan emõn ibben Ri Kõmõnmõn eo. (2 Korint 5:18) Einwõt men in kõmõnmõn ko remeletlet, ej wor wõt ibben armij maroñ eo ñõn kãlet elañe rekõnan bokake Anij ak jab. Men in ear alikar elõñ ebeben ko tokelik ke Jehovah ear lelok ñõn ailiñ eo ej kab jutak ailiñ in Israel maroñ eo ñõn kãlet mour ak mij. Ikijen ri konono eo Moses, Anij ear ba: “I ar likit imam ranin mour im emõn; kab mij im nana.”—Deuteronomy 30:15-18.
Meñe kiõ, elõñ thousand yiõ ko elikin an kar Paradise eo mokta jako, kij armij ej wor wõt maroñ eo ibbed ñõn kãlet ilo jimwe. Ewor ibbed juõn bõklikit emõn an jerbal im maroñ eo ñõn bokake kien ko an Anij. Bible eo ej konono kin “armij eo iloan.” (2 Korint 4:16; Rome 7:22) Nan kein rej jerbal ñõn maroñ eo jaar bõrañe ñõn kwalok kadkadin Anij, ñõn lemnak ekkar ñõn lemnak ko an, im kwalok kadkadin mour in jitõb.
Ikijen mwilid im bõklikit eo ad, ri jilek Paul ear je: “Bwe ke dri ailiñ ko ro ejelok kien ibeir rej kõmõn kin biktokeir men ko an kien, rein, ejelok kien ibeir, rej einwõt kien ñõn ir mõke; bwe rej kwalok jerbal an kien, eo emwij jeje ilo burueir, im air bõklikõt ej kennan iben, im lemnok ko air, juõn inem bar juõn, rej kinaklok ak kõtlok ir.”—Rome 2:14, 15.
Meletlet eo Ekwojarjar im Bokake—Key Eo
Bõtab juõn emaroñ kajitõk, ‘Elañe kij aolep ewor juõn kõnan ibbed ñõn kabuñ ñõn Anij im, ilo wãwen in, bõk mõnõnõ eo emol, etke jab mõnõnõ ej jededlok ijoko otemjej?’ Kinke elañe jekõnan mõnõnõ, kij kajjojo jej aikwij kaddeklok kadkadin mour in jitõb. Meñe kar kõmõnmõn ir ilo wãwen Anij, armij ro rar kamakelok iair jen ri Kõmõnmõn eo air. (Epesõs 4:17, 18) Kin men in, kajjojo iad jej aikwij kõmmõn karõk ko rejejjet ñõn kajutak im debij juõn kõtan ilo jitõb ibben Anij. Kain kõtan rot in ejjab baj make bed im walok.
Jesus ear kalikar ruo kien ko reaorõk ñõn kaddek kadkadin mour in jitõb ibbed. Juõn ej ñõn bõk jelalokjen eo ejejjet kin Anij, im eo juõn ej ñõn kõttaik kij ilo bokake ñõn ankil an. (John 17:3) Ilo elij nan ko jen Nan in Anij, Jesus ear ba: “Armij e jamin mour kin bred wõt, a kin nan otemjej rej waloktok jen loñin Anij.” (Matthew 4:4) Ilo bar juõn ien, Jesus ear ba: “Kijiõ bwe In kõmõnmõn ankil an Eo e ar jilkintok Iõ, im bwe In kamwijlok jerbal eo An.” (John 4:34) Jejjab aikwij jolok elõñ yiõ ko ñõn etale elañe men ko jej kõmmõni renaj bõktok mõnõnõ ke ak jab. Iminene ejjab key eo ñõn lõ mõnõnõ. Ijellokin men in, meletlet eo ekwojarjar im bokake ri Kõmõnmõn eo ad men kein wõt renaj tel kij ñõn lo lõñliñ eo emol ilo mour.—Psalm 19:7, 8; Ecclesiastes 12:13.
Alikar, mõnõnõ eo ej itok jen ad jerbale meletlet eo ekwojarjar im bõk juõn kõtan emõn ibben Anij ejjab juõn men elle jen jemaroñ tõbare. (Jerbal 17:26, 27) Jelalokjen eo an Jehovah im karõk eo an ej bellok ñõn armij otemjej. Kin an lõñ billion copy ko im emwij ukõti ilo elõñ kajin ko, Bible eo ej wõnmanlok wõt einwõt book eo elaptata an ajededlok ilo belakin lõl. Bible eo emaroñ jibañ yuk bwe kwon erom jeran Anij im lo mõnõnõ eo emol, kinke Jeje ko rej jiroñ kij bwe “emõnõnõ ro dri ailiñ ñe air Anij Jeova.”—Psalm 144:15.
[Pija eo ilo peij 7]
“Emõnõnõ ro rej lemnak kin aikwij ko air ilo jitõb.”—Matthew 5:3, New World Translation