“Mol Eo Enaj Kanemkwoj Kom”

“Kom naj jelã mol eo, im mol eo enaj kanemkwoj kom.” Eindein an kar Jesus keañ ke ear katakin jarlepju in armij ro ilo temple eo ilo Jerusalem. (John 8:32, New World Translation.) Ri jilek ro an Jesus rar maroñ bojak in kile katak ko an Jesus einwõt mol eo. Rar lo elap menin kamol kin unjen eo ekwojarjar an ri kaki eo air.

BÕTAB, rainin, jet remaroñ lo bwe ebin air kile mol eo Jesus ear konono kake. Einwõt ilo ran ko an ri kanan Isaiah, rainin ewõr “ro rej naetan nana emõn, im emõn ñõn nana; rej likit marok einwõt maram, im maram einwõt marok; rej likit meo einwõt tõñõl, im tõñõl einwõt meo.” (Aiseia 5:20) Kin an lõñ kain lemnak ko, kabel ko, im wãwen mour ko rej laplok ran kein, elõñ armij rej eñjake bwe men otemjej eierlok wõt juõn im bwe ejelok juõn men eo einwõt mol.

Ke Jesus ear jiroñlok ri roñjake ro an bwe mol eo enaj kar kanemkwoj ir, rar uak im ba: “Kim inen Ebream, im ejelok ien kim ar dri korijer ñõn jabrewõt armij: ekijkan Am ba, Kom naj anemkwojami?” (Jon 8:33) Rar jab eñjake juõn aikwij ñan an jabdewõt ak jabdewõt men kanemkwoj ir. Ak Jesus ear kamelele: “Emol, emol Ij ba ñõn kom, Jabrewõt eo ej kõmõnmõn jerawiwi, e dri korijeran jerawiwi.” (Jon 8:34) Mol eo Jesus ear konono kake emaroñ kabellok ial eo ñan anemkwoj jen jerawiwi. Jesus ear ba: “Inem elañe Nejin e naj kõmõnmõn anemkwojami, kom naj anemkwojami wõt.” (Jon 8:36) Inem mol eo ej kanemkwoj armij ej mol eo kin Jesus Christ, Nejin Anij. Kin tõmak wõt ilo katok in mour in armij wãppen eo an Jesus jabdewõt armij emaroñ anemkwoj jen jerawiwi im mij.

Ilo bar juõn ien Jesus ear ba: “Kwon kokwojarjar ir ilo mol: Am in nan mol eo.” (Jon 17:17) Nan in Anij einwõt an walok ilo Bible ej mol eo me emaroñ bõktok anemkwoj jen kabuñ wan ñan jitõb. Ebed ilo Bible mol eo kin Jesus Christ, eo ej tel armij ñan air tõmak ilo e im kabellok ial eo ñan juõn kejatdikdik eo emeram kin ilju eo ej itok. Ej juõn men emõn ñan jelã mol eo kin Nan in Anij!

Elap ke tokjen ñan jelã mol eo? Elõñ kabuñ ko rainin, meñe rej ba bwe rej lor Bible, elap wõt air reel ilo jelãlokjen im manit ko an armij. Ekkã an ri tel in kabuñ ko einwõt lemnak wõt kin ta eo armij ro renaj bõke im jab kin jimwe in ennan eo air. Jet eñjake eo air in bwe Anij ej buñburuen kin jabdewõt wãwen kabuñ, toan wõt an wõr ettã buru. Ak Jesus Christ ear kamelele: “Auõ ej itok, im kiõ, ñe dri kabuñ remol re naj kabuñ ñõn Jemeir ilo Jitõb im ilo mol; bwe Jemeir ej bukot ro eirwõt bwe ren kabuñ ñõn E.”​—Jon 4:23.

Elañe jej kõnan kabuñ ñan Anij ilo wãwen eo ej buñburuen kake, jej aikwij jelã kin mol eo. Menin ej juõn menin konono aorõk. Mõnõnõ eo ad ñan indio ej atartar ion menin. Kin menin, jabdewõt ej aikwij kajitõkin e make: ‘Wãwen aõ kabuñ ej ke kabuñburuen Anij? Emol ke an itoklimoiõ ilo aõ katak mol eo in Nan in Anij? Ak ij mijak ke kin ta eo juõn lukkun etale eo emaroñ kalikar?’