Kajeoñe Anij In Mol
“Inem komin dri kajeoñwe Anij, einwõt ajiri re jitenburu.”—DRI EPESÕS 5:1.
1. Ta eo jet rej tõmak kake kin mol eo, im etke lemnak eo air ebwid?
“TA EO mol?” (Jon 18:38) Kajitõk in, me Pontius Pilate ear kajitõk kake ilo kajirere enañin 2,000 yiõ ko remotlok, ej kwalok lemnak eo bwe mol eo elukkun bin melele kake ñan ad maroñ jibadõke. Elõñ rainin renaj errã. Lukkun wãwen mol eo rej kajitõk kake. Kwomaroñ kar roñ bwe kajjojo armij rej make bebe kin ta mol eo, ak bwe mol eo ej ekkejel ion men ko jet, ak bwe mol eo ej ukõktak. Kain lemnak rot kein rebwid. Lukkun mejenkajjik eo kin research (etale) im education (jelãlokjen) ej ñan katak kin men ko remol kin lal in ijo jej jokwe ie. Mol eo ejjab baj lemnak eo an juõn armij make. Ñan wanjoñok, aan armij, eban mij ak ej mij. Satan ej lukkun bed ak ejjab. Ewõr juõn unin mour ak ejelok. Ilo wãwen kein kajjojo, juõn wõt uak ejimwe. Juõn ej mol, im eo juõn ejjab mol; rej jab maroñ jimor im jimwe.
2. Ilo wãwen et ko Jehovah ej Anij in mol, im ta kajitõk ko jenaj bwebwenato kaki kiõ?
2 Ilo katak eo lok juõn, jaar katak bwe Jehovah ej Anij in mol. Ej jelã mol eo ilo men otemjej. Ilo an oktak jen ri kijirãt eo an eo ej etao Satan Devil eo, Jehovah ien otemjej ej mol. Bareinwõt, Jehovah ilo an emmol ej kwalok mol eo ñan ro jet. Ri jilek Paul ear rejañ Ri Christian ro mõttan: “Inem komin dri kajeoñwe Anij, einwõt ajiri re jitenburu.” (Dri Epesõs 5:1) Einwõt Ri Kennan ro an Jehovah, ewi wãwen jemaroñ kajeoñe e ilo ad konono im mour ekkar ñan mol eo? Etke eaorõk ñan ad kõmmane men in? Im ta eo ej kamol bwe Jehovah ej buñburuen kake ro rej jibadõk ial in mol eo. Jen lale.
3, 4. Ewi wãwen ri jilek ro Paul im Peter rar kwalok kin ta eo enaj kar walok ilo “ran ko eliktata”?
3 Jej mour ilo juõn ien ñe jab mol ko an kabuñ rej laplok. Einwõt ri jilek Paul ear kanan kake iumin kakõrmol an Anij, elõñ armij ilo “ran [kein] eliktata” rej kõmanman wãwen mwiliir a ilo burueir rej karmijete emõn. Jet rej jumae mol eo, im “burueir re kõt.” Bareinwõt, “armij renana im ro dri jela mon . . . naj laplok ilo air nana, re naj mone im naj mone ir.” Meñe armij rein rej katak wõt, rejjab maroñ “tõbar jela mol jabrewõt ien.”—2 Timote 3:1, 5, 7, 8, 13.
4 Kar bareinwõt kakõrmole ri jilek Peter ñan jeje kin ran kein eliktata. Einwõt ear kanan, armij rejjab karmijeteik wõt mol eo ak bareinwõt rej kajirere kake Nan eo an Anij im ro rej keañ kin mol eo. “Bwe rej kõnan,” ri kajirere rein rej kajekdon mol eo bwe lal eo ilo ran ko an Noah ear jako ke den ear kalibubu e, im ej likit juõn joñok kin ran in ekajet eo ilo ran ko renaj itok. Men eo rekõnan bwe en mol enaj melelen jorrãn ñan ir ñe ej itok ien eo Anij enaj kokkure ro renana.—2 Piter 3:3-7.
Ri Karejar ro an Jehovah Rej Jelã Mol eo
5. Ekkar ñan ri kanan eo Daniel, ta eo enaj walok ilo “jemlokin ien eo,” im ewi wãwen ear jejjet kitien kanan in?
5 Ilo an kwalok kin “jemlokin ien eo,” ri kanan eo Daniel ear kanan kin juõn men eoktak ibwiljin armij ro an Anij—juõn jeblak kin mol ko an kabuñ. Ear je: “Elõñ renaj ito-itak, im jelãlokjen eo emol enaj oktak im lap.” (Daniel 12:4, NW) Armij ro an Jehovah rejjab kõtlok bwe Ri Etao eo elap en kabwok ak telbiloik ir. Ilo air etale Bible eo, rar bõk jelãlokjen eo emol. Ilo ebeben eo kein kajuõn, Jesus ear kameramlok ri kalor ro an. Ear “kebellok air lolãtãt, bwe ren jela Jeje ko.” (Luk 24:45) Ilo ran kein ad, Jehovah ear emmakit ilo ejja wãwen eo wõt. Ikijen Nan eo an, jitõb eo an, im dolul eo an, ear kamaroñ elõñ million armij ro ibelakin lal ñan melele kin ta eo ejelã kadede kake—mol eo.
6. Ta mol ko ilo Bible armij ro an Anij rej melele kaki rainin?
6 Einwõt armij ro an Anij, je melele kin elõñ men ko me jejamin kar jelã kaki. Jej jelã uak ko ñan kajitõk ko me ri meletlet ro an lal in rar kate ir in jelã kaki iumin elõñ thousand yiõ ko. Ñan wanjoñok, jej jelã kin etke armij rej eñtan, etke armij rej mij, im etke armij rejjab maroñ kõtõbrak ainemõn im burukuk ibelakin lal. Kar letok ñan kij bareinwõt juõn vision kin ta eo ej bed imad—Ailiñ eo an Anij, juõn paradise ion lal, im mour indio ilo wãppen. Jej jelã kin Jehovah, Eo Eutiejtata. Jaar katak kin kadkad ko raibujuij kadkadin im bareinwõt ta eo jej aikwij kõmmane ñan bõk kajerammõn eo an. Ad jelã mol eo ej kamaroñ kij ñan kile ta eo ejjab mol. Ad jerbale mol eo ej kejbãrok kij jen jibadbad ko ejelok tokjeir, kamaroñ kij ñan bõk men eo emõntata ilo ad mour, im ej letok ñan kij juõn kejatdikdik eaibujuij kin ilju im jeklaj.
7. Mol ko ilo Bible rej bellok ñan wõn ro, im ñan wõn ro rejjab bellok ñan ir?
7 Kwoj melele ke kin mol eo ilo Bible? Elañe aet, elap am jerammõn. Ñe juõn ri jeje ej je juõn book, ekkã an kõmmane ñan kareel juõn kain kumi in armij. Jet book ko kar jeje ñan ro remeletlet, ko jet ñan ajiri ro, im ko jet bareinwõt ñan armij ro rej bed ilo juõn kain jerbal. Meñe Bible eo ebellok ñan aolep, kar karõke bwe juõn kain kumi in armij en melele im kamolol kake. Jehovah ear eiki ñan ro re inemõn im ettã burueir ion lal. Armij rein remaroñ bõk melele eo kin Bible eo, jekdon jelãlokjen, manit, wãwen mour, ak kumi in ailiñ eo air. (1 Timote 2:3, 4) Ijo tu-rãjet, ro ejjab tellokiir, jekdon ewi joñan air meletlet ak kabel, rejamin bõk air melele kin mol ko ilo Bible. Ro reutiej burueir, re jua, rejjab maroñ melele kin mol ko raorõk ilo Nan eo an Anij. (Matu 13:11-15; Luk 10:21; Jerbal 13:48) Anij wõt emaroñ kõmmane juõn book rot in.
Ri Karejar ro an Jehovah Rej Mol
8. Etke Jesus ear kõkkar kin mol eo?
8 Einwõt Jehovah, Ri Kennan ro an retiljek rej kwalok mol. Jesus Christ, Ri Kennan eo eutiejtata an Jehovah, ear kamole mol eo ikijen men ko ear katakin im ilo wãwen an kar mour im mij. Ear jurake mol eo kin nan ko im kallimur ko an Jehovah. Kin men in, Jesus make ear mol eo, einwõt e make ear ba.—Jon 14:6; Reveles̃õn 3:14; 19:10.
9. Ta eo Jeje ko rej ba kin konono mol eo?
9 Jesus ear “obrõk kin joij im mol” im “ejelok mon ilo loñin.” (Jon 1:14; Aiseia 53:9) Ri Christian ro remol rej lor joñok eo Jesus ear likiti ikijen ad mol ñan ro jet. Paul ear kakabileklek ri tõmak ro mõttan: “Komin konono mol, kom otemjej, ñõn dri turumi: bwe kij ran dron.” (Dri Epesõs 4:25) Elõñ yiõ ko mokta lok, ri kanan eo Zechariah ear je: “Komin konono mol ñan don.” (Zechariah 8:16, NW) Ri Christian ro rej mol kinke rekõnan kabuñburuen Anij. Jehovah ej mol im ejelã kin jorrãn eo ej walok jen riap. Kin men in, ej kõtmene bwe ri karejar ro an ren konono mol.
10. Etke armij rej riap, im kin ta tokjen ko renana?
10 Ñan elõñ, riap emaroñ juõn wãwen ñan bõk jet jerammõn ko. Armij rej riap ñan bõprae air bõk kaje, ñan bõk tokjen ilo jet wãwen ko, ak ñan bõk nebar jen ro jet. Ak, manit in riap ej juõn iminene in mwil nana. Bareinwõt, juõn ri riap ejjab maroñ bõk buñburu an Anij. (Reveles̃õn 21:8, 27; 22:15) Ñe armij rej jelã kajjid einwõt ro rej konono mol, ro jet renaj tõmak ta eo jej ba; renaj liki kij. Bõtab, elañe rar lo bwe jaar riap meñe kar juõn wõt alen, ro jet remaroñ bere kin mol in jabdewõt men jemaroñ ba ilo ran ko renaj itok. Juõn jabõn kennan ilo Africa ej ba: “Juõn riap ej kakõt juõn thousand mol ko.” Bar juõn jabõn kennan ej ba: “Ejelok juõn enaj tõmak juõn ri riap, meñe ej konono mol.”
11. Ilo wãwen et eo mol eo ej laplok jen baj konono mol eo?
11 Mol eo elaplok melelen jen baj konono mol. Ej juõn wãwen mour. Ej kalikar wõn kij. Jej kwalok mol eo ñan ro jet ejjab kin ta eo jej ba wõt ak bareinwõt ta eo jej kõmmane. “Kweo kwoj katakin bar juõn, kwo jab mõke katakin yuk ke?” ri jilek Paul ear kajitõk. “Kweo kwoj kwalok ren jab kwot, kwoj kwot ke? Kweo kwoj ba armij en jab lũñ, kwoj lũñ ke?” (Dri Rom 2:21, 22) Elañe jekõnan lelok mol eo ñan ro jet, jej aikwij mol ilo aolep wãwen ko ad. Etad einwõt armij ro remol enaj lap an jelet wãwen eo armij renaj uak ñan ta eo jej katakin.
12, 13. Ta eo juõn jodikdik ear je kin mol, im ta kar unin kien mour erreo eo an eutiej?
12 Ro redik ibwiljin ri karejar ro an Jehovah rej bareinwõt melele kin aorõkin air mol. Ilo juõn katak ilo school, Jenny, eo ear 13 yiõ dettan ilo ien eo, ear je: “Mol ej juõn men elap aõ kaorõke. Ekaburomõjmõj, bwe eiet armij rej lukkun mol rainin. Iar kallimuri ña make bwe ien otemjej I naj kejbãrok bwe in mol ilo mour eo aõ. I naj bareinwõt mol meñe ejamin bõktok tokjen ko ñan iõ ak ro jera. Ij kõmman bwe ro mõtta rej armij ro rej konono mol im rej armij ro remol.”
13 Ilo an kwalok jet nan ko kin katak in, ri kaki eo an Jenny ear ba: “Kwe lukkun dik ñan am kar kaddek juõn lajrak in kien ekajur kin mour im mwil emõn im nana. I jelã kwonaj lor lajrak in kien eo am kinke ekajur kadkad ko kadkadim.” Ta eo kar unin kajur in mour emõn eo an ledik in ej school? Ilo nan in jino eo ilo katak eo an, Jenny ear ba bwe kabuñ eo an ear “likit kien ko ñan mour eo an.” Jiljilimjuõn yiõ ko rar motlok jen ien eo Jenny ear je katak eo. Einwõt ri kaki eo an ear lemnak, Jenny ej wõnmanlok wõt im kwalok bwe ej lor juõn kien eutiej kin mour emõn ilo mour eo an einwõt juõn ian Ri Kennan ro an Jehovah.
Ri Karejar ro an Jehovah Rej Kwalok kin Mol eo
14. Etke ri karejar ro an Anij ewõr juõn air eddo elap ñan jurake mol eo?
14 Emol, ro jet ijellokin Ri Kennan ro an Jehovah remaroñ konono mol im kate ir bwe ren mol. Bõtab, einwõt ri karejar ro an Anij, ewõr ibbed juõn eddo elap ñan jurake mol eo. Kar letok ñan kij mol ko ilo Bible—mol ko me remaroñ tellok juõn ñan mour indio. Kin men in, ewõr juõn eddo ibbed ñan jaketo-jaketak jelãlokjen in ibben ro jet. “Jabrewõt eo emwij lelok elõñ ñõn e, naj bukot elõñ jen e.” (Luk 12:48) Emol ‘naj bukot elõñ’ jen ro rar bõk jerammõn eo kin jelãlokjen eo eaorõk kin Anij.
15. Mõnõnõ ta eo kwoj loe ñe kwoj jaketo-jaketak mol eo ilo Bible ñan ro jet?
15 Ewõr mõnõnõ ñe jej lelok mol eo kin Bible eo ñan ro jet. Einwõt ri kalor ro an Jesus ilo ebeben eo kein kajuõn, jej keañ kin news eo emõn—juõn ennan in kejatdikdik eo ej kõmãnãn buru—ñan ro “rej barõk, im jibliklik einwõt s̃ip ko ejelok air s̃eperd” im ñan ro “katak ko an dimõn rõn” kar kabwok im telbiloik ir. (Matu 9:36; 1 Timote 4:1) Ri jilek John ear je: “Ejelok lõñliñ iba elap jen in, bwe in roñ kin an ro nejiõ etetal ilo mol.” (3 Jon 4) Tiljek eo an ‘ro nejin’ John—bõlen ro ear kwalok mol eo ñan ir—ear lap an kalañliñ e. Elap ad lañliñ ñe jej lo an armij uak ilo kamolol ñan Nan eo an Anij.
16, 17. (a) Etke ejjab aolep rej bõk mol eo? (b) Ta eo kwomaroñ lañliñ kake ke kwoj keañ kin mol eo ilo Bible?
16 Emol, ejjab aolep renaj mõnõnõ in bõk mol eo. Jesus ear konono mol eo kin Anij, meñe armij rar jab mõnõnõ kake. Ñan Ri Jew ro rej jumae ear ba: “Etke kom jab tõmak Iõ. Eo e jen Anij ej roñjake nan ko an Anij: kin men in kom jab roñjaki, bwe kom jab jen Anij.”—Jon 8:46, 47.
17 Kij, einwõt Jesus, jejjab jenliklik in konono kin mol eo eaorõk kin Jehovah. Jejjab kõtmene bwe aolep armij renaj bõk ta eo jej jiroñ ir kake, bwe ejjab aolep rar bõk ta eo Jesus ear ba. Mekarta, jej lañliñ in jelã bwe jej kõmmane men eo ejimwe. Jehovah ilo an yokwe im joij ekõnan bwe mol eo en walok ñan armij otemjej. Kinke mol eo ej bed ibbeir, Ri Christian ro rej erom ri bõkto-bõktak meram ilo juõn lal ej bed ilo marok. Ilo ad kõtlok bwe meram in mol eo en romak ikijen nan im kõmman ko ad, jemaroñ jibañ ro jet ñan kaibujuij Jemed ilañ. (Matu 5:14, 16) Jej kwalok ilobwilij bwe jej karmijete ukok eo ewan an Satan kin mol eo im jej jurake Nan eo erreo im emõn an Anij. Mol eo jej jelã im jej jaketo-jaketak emaroñ lelok anemkwoj eo emol ñan ro rej bõke.—Jon 8:32.
Jibadõk Ial in Mol
18. Etke im ewi wãwen Jesus ear kwalok an buñburuen kake Nathanael?
18 Jesus ear yokwe im konono mol eo. Ilo jerbal in kwalok nan eo an ion lal, ear kwalok an buñburuen kake ro rar mol. Ikijen Nathanael, Jesus ear ba: “Lo, dri Israel emol, ejelok mon iben.” (Jon 1:47) Tokelik, Nathanael, me ãt eo juõn kar Bartholomew, kar kãlete bwe en juõn ian ri jilek ro 12. (Matu 10:2-4) Juõn jerammõn elap!
19-21. Ewi wãwen juõn emaan eo ear bilo mokta ear bõk jerammõn kin an kar beran in konono mol?
19 Aolepen juõn chapter ilo book in Jon ilo Bible eo ej kwalok kin bwebwenato eo an bar juõn emaan eo emol me Jesus ear kajerammõn e. Je jaje etan. Men eo jej jelã kake ej bwe emaan eo kar juõn ri owar eo ear bilo jen ke ear lotak. Armij rar bwilõñ ke Jesus ear kabellok mejen. Ennan eo kin men in ekabwilõñlõñ ear tõbar lojilñin jet Pharisee ro, ro rar dike mol, me rar bebe ibwiljiir bwe jabdewõt armij ro rar jerbale tõmak ilo Jesus naj jolok ir jen synagogue eo. Ilo air jelã kin karõk eo air, jemen im jinen emaan eo ebilo kin air mijak rar riap ñan Pharisee ro, im ba bwe rar jaje kin ewi wãwen nejiir ej lolokjen kiõ ak wõn eo ear kõmmane.—Jon 9:1-23.
20 Rar bar kirtok leo kar kemour e ñan iman Pharisee ro. Ilo an kajekdon jabdewõt tokjen ko remaroñ walok, ilo beran ear jiroñ ir mol eo. Ear kameleleik ir kin ewi wãwen kar kemour e im bwe Jesus eo ear kõmmane. Ilo an bwilõñ bwe armij rein reutiej im meletlet rar jab tõmak bwe Jesus ear jen Anij, lein eo emour ear beran in rejañ ir ñan bõk men eo ealikar: “Elañe armij in e jab jen Anij, e jab maroñ in kõmõnmõn jabrewõt.” Ilo air jab maroñ uake, Pharisee ro rar kinaak e kin an nana kobban loñin im jolok e.—Jon 9:24-34.
21 Ke Jesus ear roñ kin men in, ilo yokwe ear bõk ien ñan bukõte leo. Elikin an loe, ear kaleke tõmak eo an leo ear bilo. Jesus ear kwalok e make einwõt Messiah eo. Elap an kar leen jerammõn ke ear konono mol! Emol buñburu ekwojarjar ej ion ro rej konono mol.—Jon 9:35-37.
22. Etke jej aikwij jibadõk ial in mol?
22 Jerbale mol eo ej juõn jibadbad jej aikwij lukkun lemnak kake. Eaorõk elañe jekõnan kalek im kejbãrok kõtan ko remõn ibben armij im ibben Anij. Ñan am mol ej melelen kwojjab noje jabdewõt men, kwoj mol, ebidodo kebak yuk, im remaroñ liki yuk, im Jehovah enaj buñburuen kake yuk. (Sam 15:1, 2) Ñan am jab kwalok mol eo ej melelen bwe kwoj etao, rejjab maroñ liki yuk, im kwoj riap, im Jehovah ejjab buñburuen kake yuk. (Jabõn Kennan Ko 6:16-19) Kin men in, kwon jibadõk ial in mol. Emol, ñan kajeoñe Anij in mol, jej aikwij jelã mol eo, konono mol eo, im mour ekkar ñan mol eo.
Ewi Wãwen Kwonaj Uak?
• Etke jemaroñ kamolol bwe jej jelã mol eo?
• Ewi wãwen jemaroñ kajeoñe Jehovah ilo ad mol?
• Ewõr ta tokjen ko ilo ad lelok mol eo ilo Bible ñan ro jet?
• Etke eaorõk ñan jibadõk ial in mol?
[Pija ko ilo peij 26]
Ke kar lelok ñan ir mol eo ilo Bible, Ri Christian ro rej kijejeto in jaketo-jaketake ibben ro jet
[Pija ko ilo peij 28]
Emaan eo ebilo me Jesus ear kemour e ear jerammõn kin an konono mol