Eñin Ran In Lomor!
“Lo, kiõ ien emõn; lo, kiõ ran in lomor.”—2 KORINT 6:2.
1. Ta eo jej aikwiji ñan bõk juõn jutak emõn ibben Anij im Christ?
JEHOVAH emwij an karõk juõn ran ñan ekajete armij. (Jerbal 17:31) Elañe enaj juõn ran in lomor ñan kij, jej aikwij mi juõn buñburu ibben im ibben Ri Ekajete eo emwij jitõñe, Jesus Christ. (Jon 5:22) Juõn jutak rot in ej aikwiji bwe mwilid en errã ibben Nan in Anij im juõn tõmak me ej kamakit kij ñan jibañ ro jet ñan erom ri kalor ro remol an Jesus.
2. Etke lal in armij ej jenolok jen Anij?
2 Kin ad jolet jerawiwi, lal in armij ej ruwa maejet jen Anij. (Dri Rom 5:12; Dri Epesõs 4:17, 18) Kin men in, ñan ro jej kwalok nan ñan ir remaroñ bõk lomor elañe Anij ej kilajrõk ir ñan e. Ri jilek Paul ear kalikar men in ke ear jeje ñan Christian ro ilo Korint. Jen etale 2 Dri Korint 5:10–6:10 ñan lale ta eo Paul ear ba kin ekajet, bõk kilajrõk ibben Anij, im lomor.
“Kimij Karel Armij”
3. Ewi wãwen Paul ear “karel armij,” im etke jej aikwij kõmman men in rainin?
3 Paul ear kakobaik ekajet ibben kwalok nan ke ear je: “Bwe kij otemjej je naj walok iman ken jijõt in ekajet an Kraist; bwe jabrewõt iar en bõk men ko kõmõnmõni ilo enbwinin, ekar ñõn kõmõn eo an elañe emõn ak enana. Inem kin am jela mijõk Iroij, kimij karel armij.” (2 Dri Korint 5:10, 11) Ri jilek eo ear ‘karel armij’ ilo an kwalok news eo emõn. Ta kin kij? Kinke jej jelmaik jemlokin jukjuk im bed in enana, jej aikwij kõmman joñan wõt ad maroñ ñan kareel ro jet ñan bõk buñten ne ko rej aikwiji ñan bõk juõn ekajet emõn ibben Jesus im bõk buñburu ibben eo ej Unjen lomor eo, Jehovah Anij.
4, 5. (a) Etke jen jab kemjãje kin tõbrak ko ad ilo jerbal eo an Jehovah? (b) Ewi wãwen Paul ear kemjãje “kin Anij?”
4 Bõtab, elañe Anij ear kajerammõn jerbal in kwalok nan eo ad jejjab aikwij kemjãje kake. Ilo Korint jet rar utiej buru kin ir make ak kin armij ro jet, im ilo wãwen in kõmman jebel ilo congregation eo. (1 Dri Korint 1:10-13; 3:3, 4) Ilo an jitõñlok ñan wãwen in, Paul ear je: “Kim jab bar kwalok karkarim ñõn kom, a kimij lewoj ñõn kom ken kimjãje kin kim, bwe en or ami nan in uak ro rej kimjãje ilo mejeir, im jab ilo burueir. Bwe elañe kim uriekak, e ñõn Anij; ak elañe kim jelalokjen, e ñõn kom.” (2 Dri Korint 5:12, 13) Ro rar utiej buru rar jab itoklimo kin burukuk im emõn eo ilo jitõb an congregation eo. Rar kõnan kemjãje kin wãwen ko ilikin jen air jibañ ri tõmak ro mõttair ñan kaddek buru ko remõn ibben Anij. Kin men in, Paul ear kauweik congregation eo im tokelik ear ba: “A eo ej kimjãje, en kimjãje ilo [Jehovah].”—2 Dri Korint 10:17.
5 Paul ear jab make kemjãje ke? Jet remaroñ kar lemnak eindein kin ta eo ear ba kin an juõn ri jilek. Ak ear aikwij kemjãje “kin Anij.” Ear kemjãje kin kadkadin einwõt juõn ri jilek, bwe Ri Korint ro ren jab ilok jen Jehovah. Paul ear kõmman men in ñan karoltok ir ñan Anij kinke ri jilek ro rewan rar ukõt ir ñan juõn ial ebwid. (2 Dri Korint 11:16-21; 12:11, 12, 19-21; 13:10) Ak, Paul ear jab ien otemjej kajeoñ in kabwilõñ armij kin tõbrak ko an.—Jabõn Kennan Ko 21:4.
Yokwe eo an Christ Ej Kamakit Yuk ke?
6. Ewi wãwen yokwe an Christ en kar jelet kij?
6 Einwõt juõn ri jilek emol, Paul ear katakin ro jet kin binmour eo an Jesus. Ear jelet mour eo an Paul ilo juõn wãwen elap, bwe ear je: “Bwe yokwe an Kraist e relel ilo buruem; bwe ein drein am lemnok, Juõn e ar mij kin otemjej, inem ro otemjej r’ar mij; Im E ar mij kin otemjej bwe ro rej mour ren jab bar mour ñõn ir mõke, a ñõn Eo e ar mij im jerkakbiji kin ir.” (2 Dri Korint 5:14, 15) Jesus ear kwalok yokwe eo an elap ilo an lelok an mour kin kij! Emol en kar juõn kajur ej kamakit ilo mour ko ad. Kamolol ñan Jesus kin an lelok an mour kin kij en kar kamakit kij ñan ad kijejeto ilo jerbal in keañ kin news eo emõn kin lomor eo letok in Jehovah ikijen Nejin jitenburu ibben. (Jon 3:16; keidi Sam Ko 96:2.) “Yokwe an Kraist” ej kamakit yuk ke ñan am bõk kunam ilo kijejeto ilo jerbal in kwalok kin Ailiñ eo im ñan kõmman ri kalor ro?—Matu 28:19, 20.
7. Ta melelen ñan “jab jela jabrewõt armij ekar ñõn kõniek”?
7 Ilo air kajerbal mour ko air ilo juõn wãwen ej kwalok air kamolol kin ta eo Christ ear kõmman kin ir, ri kabit ro rej jab bar mour ñõn ir mõke, a ñõn Eo e ar mij im jerkakbiji kin ir.’ “Kin men in,” Paul ear ba, “jen kiõ kim jab jela jabrewõt armij ekar ñõn kõniek; meñe kim ar jela Kraist ekar ñõn kõniek, a jen kiõ e jamin ein drein am jela kajen.” (2 Dri Korint 5:16) Christian ro ren jab lemnak kin armij ekkar ñan wãwen kanniek, bõlen yokwe ri Jew ro elaplok jen armij ro jen ri ailiñ ko ak ro remweie jen ro rejeramel. Ri kabit ro “rejjab jela jabrewõt armij ekar ñõn kõniek,” bwe kõtan eo air ilo jitõb ibben ri tõmak ro mõttair ej men eo eaorõk. Ro rar ‘jela Kraist ekar ñõn kõniek’ rar jab armij ro wõt im rar lo Jesus ke ear bed ion lal. Meñe jet ro rar kejatdikdik ilo Messiah eo rar lo Christ ekkar ñan wãwen kanniek, rar jab bar maroñ kõmman eindrein. Ear lelok enbwinin einwõt juõn binmour im kar kajerkakbiji e einwõt juõn jitõb ej kemour. Ro jet me rar jerkakbiji ñan mour ilañ rar lelok enbwin kanniek ilo air jab lo Jesus Christ ilo kanniek.—1 Dri Korint 15:45, 50; 2 Dri Korint 5:1-5.
8. Ewi wãwen armij ro kajjojo rar maroñ “ber ilo Kraist”?
8 Ilo an konono wõt ñan ri kabit ro, Paul ear kobaik: “Inem elañe jabrewõt armij ej ber ilo Kraist e men in kõmõnmõn ekal: men ko mokta re lotlok; lo rej erom kal.” (2 Dri Korint 5:17) Ñan “ber ilo Kraist” ej melelen ñan lañliñ kin juõn burukuk ibben. (Jon 17:21) Kõtan in ear walok ñan armij eo ñe Jehovah ear karuaklok e ñan ibben Nejin im kabit armij eo kin jitõb kwojarjar. Einwõt juõn nejin Anij emwij kabite kin jitõb kwojarjar, ear juõn “men in kõmõnmõn ekal” kin kejatdikdik eo ñan bõk kunan ibben Christ ilo Ailiñ eo ilañ. (Jon 3:3-8; 6:44; Dri Galetia 4:6, 7) Christian ri kabit rein rar bõk juõn jerammõn in jerbal elap.
“Komin Rel Ñõn Anij”
9. Ta eo Anij ear kõmmane ñan kilajrõk armij ñan e?
9 Jehovah elap an buñburuen kin “men in kõmõnmõn ekal”! Paul ear ba: “A men otemjej rej jen Anij, eo E ar kilajrõk kij ñõn E kin Kraist, im E ar letok ñõn kim jerbal in kilajrõk; Eñin bwe Anij e ar ber ilo Kraist im Ej kilajrõk lõl ñõn E mõke, im jab watõk air jerawiwi ñõn ir, im E ar likit na ibem nan in kilajrõk.” (2 Dri Korint 5:18, 19) Armij rar ruwa maejet jen Anij jen ien eo Adam ear jerawiwi. Ak Jehovah ilo yokwe ear make kabellok ial in kilajrõk eo ikijen katok in binmour eo an Jesus.—Dri Rom 5:6-12.
10. Ñan wõn ro Jehovah ear lelok jerbal in kilajrõk eo, im ta eo rar kõmmane ñan kajejjete?
10 Jehovah ear lelok jerbal in kilajrõk eo ñan ri kabit ro, inem Paul ear maroñ ba: “Inem kim dri keañ kin Kraist, einwõt elañe Anij ej akwelap ilo kim: kim akwelap ñõn kom kin Kraist, komin rel ñõn Anij.” (2 Dri Korint 5:20) Ilo ien ko etto, ri keañ ro kar jilkinlok ir ilo ien eo kar walok airwaro ñan lale elañe remaroñ kabõjrak an walok juõn tarinae. (Luk 14:31, 32) Kinke lal in armij ejerawiwi ej ruwa jenolok jen Anij, ear jilkinlok ri keañ ri kabit ro ñan kejelãik armij kin aikwij ko an kin kilajrõk. Einwõt ro rej binej jenkwon Christ, ri kabit ro rej akwelap: “Komin rel ñõn Anij.” Akwelap in ej juõn nan in rejañ etiriamo ñan bukõt ainemõn ibben Anij im bõk lomor eo ej letoke ikijen Christ.
11. Ikijen tõmak ilo katok in binmour eo, wõn ro elaptata enaj bõk juõn jutak ewãnik iman Anij?
11 Armij otemjej me rej jerbale tõmak ilo binmour eo remaroñ kilajrõk ir ñan Anij. (Jon 3:36) Paul ear ba: “Eo [Jesus] e ar jab jela jerawiwi, E [Jehovah] ar kõmõn E jerawiwi kin kij, bwe jen erom wãnik in Anij ilo E.” (2 Dri Korint 5:21) Armij eo ewãppen Jesus kar katok in jerawiwi eo kin aolep ro nejin Adam me kar lomoriir jen jerawiwi eo rar jolete. Rar erom “wãnik in Anij” ikijen Jesus. Wãnik in, ak juõn jutak ewãnik iman Anij, ear itok mokta ñan 144,000 iroij ro mõttan Christ. Iumin Thousand Yiõ in Iroij eo an, juõn jutak ewãnik einwõt armij ro rewãppen naj itok ñan ro nejin ion lal nejin Jemeir Indio, Jesus Christ. Enaj leliñlok ir ñan juõn jutak ewãnik ilo air wãppen bwe ren maroñ kamol air tiljek ñan Anij im bõk men in letok eo kin mour indio.—Aiseia 9:6; Reveles̃õn 14:1; 20:4-6, 11-15.
“Kiõ Ien Emõn”
12. Ta jerbal eo eaorõk ri keañ ro im ri jilek ro an Jehovah rej kõmmane?
12 Ñan bõk lomor, jej aikwij jerbal ekkar ñan nan ko an Paul: “Kim jerbal iben [Jehovah] im bareinwõt akwelap ñõn kom bwe en jab jitokjen ami bõk joij an Anij, Bwe Ej ba, Ilo ien ekar I ar eoroñ yuk, im ilo ran in lomor I ar jibõñ yuk; lo, kiõ ien emõn; lo, kiõ ran in lomor.” (2 Dri Korint 6:1, 2) Ri keañ ri kabit ro an Jehovah im ri jilek ro an, “sheep ro jet” eo, ejjab jitokjen air bõk joij eo an Jemeir ilañ. (Jon 10:16) Kin mwiliir emõn im air kijejeto ilo jerbal in kwalok nan ilo “ien in emõn,” rej bukõt buñburu an Anij im rej kejelãik armij ro ion lal bwe ran in ej “ran in lomor” eo.
13. Ta point eo elaptata ej bed ilo Aiseia 49:8, im ewi wãwen ear jejjet kitien ilo ien eo kein kajuõn?
13 Paul ej eliji nan ko ilo Aiseia 49:8, eo ej konono: “Ein drein Jeova ej ba, Ilo juõn ien emõn I ar uak Yuk, im ilo juõn ran in lomor I ar jibõñ Yuk; im I naj kejbãrok Yuk, im lelok Yuk juõn bujen armij ro, bwe Kwon koutiejlok eneo, bwe Kwon kõmõn bwe ren bõk jolit wan ko.” Ien eo moktata kanan in ear jejjet kitien kar ilo ien eo ke rar kanemkwoj armij in Israel ro jen air kamakoko ilo Babylon im tokelik rar jeblak ñan kabijukneir eo ear jeebeplok.—Aiseia 49:3, 9.
14. Ewi wãwen Aiseia 49:8 ear jejjet kitien ilo case eo an Jesus?
14 Ilo jejjet kitien eo elaplok kin kanan eo ilo Isaiah, Jehovah ear lelok “dri korijeran” Jesus einwõt “juõn maram ñõn ro dri ailiñ ko, bwe kwon Aõ aõnan ñõn jemlokõn lõl.” (Aiseia 49:6, 8; keidi Aiseia 42:1-4, 6, 7; Matu 12:18-21.) Alikar “ien emõn,” ak “ien ekar,” ear jerbal ñan Jesus ke ear bed ion lal. Ear jar, im Anij ear “eoroñ” e. Emol ear juõn “ran in lomor” ñan Jesus kinke ear maroñ kejbãrok an tiljek im ilo wãwen in ear “Dri Lomor in drio ñõn ro otemjej rej bokake E.”—Dri Hibru 5:7, 9; Jon 12:27, 28.
15. Jen ñããt Ri Israel ro ilo jitõb rar kate ir ñan tellokin bõk joij an Anij, im kin mejenkajjik et eo?
15 Paul ej jerbale Aiseia 49:8 ñan Christian ri kabit ro, im ear rejañ ir ‘bwe en jab jitokjen air bõk joij an Anij’ ilo air likjap in bukõt emõn eo an ilo “ien ekar” im ilo “ran in lomor” eo me ear letoke. Paul ej kobaik: “Lo, kiõ ien emõn; lo, kiõ ran in lomor.” (2 Dri Korint 6:2) Jen Pentecost 33 C.E., Ri Israel ro ilo jitõb rar kate ir bwe ren tellokin bõk joij an Anij bwe “ien ekar” eo en “juõn ran in lomor” ñan ir.
‘Kwalok Karkarim einwõt Dri Jerbal an Anij’
16. Iumin ta wãwen ko rebin Paul ear kwalok kadkadin einwõt juõn ri jerbal an Anij?
16 Jet armij ro im rar koba ibben congregation in Korint rar jab tellokin bõk joij an Anij. Rar ruruwe nae Paul ñan kokkure maroñ eo an einwõt juõn ri jilek, meñe ear bõprae an “kõmõn men in buñ ilo jabrewõt.” Emol ear kwalok kadkadin einwõt juõn ri jerbal an Anij “ilo kijenmij elap, ilo iñtan ko, ilo aikwij ko, ilo jorran ko, Ilo dribitbit ko, ilo prisõn ko, ilo jeurur ko, ilo jerbal ko, ilo mmij ko, ilo jitlok ko.” (2 Dri Korint 6:3-5) Tokelik, Paul ear kõmmanwa bwe elañe ri kijirãt ro an kar ri jerbal ro an Anij, e kar “utiejlok” kinke ear laplok an eñtan kin kalbuj ko, deñdeñ ko, kauwatata ko, im jabwe aikwij ko an.—2 Dri Korint 11:23-27.
17. (a) Ilo ad kwalok kadkad et ko jemaroñ kwalok kadkadid bwe jej ri jerbal ro an Anij? (b) Ta eo “ken tõrinae in wãnik”?
17 Einwõt Paul im ro mõttan, jemaroñ kwalok kadkadid einwõt ri jerbal ro an Anij. Ewi wãwen? “Ilo erreo,” ak mwil erreo, im ilo ad jerbal ekkar ñan jelãlokjen eo ejimwe ilo Bible. Jemaroñ kwalok kadkadid “ilo ad meanwõr” ñe jej kijenmij iumin bwid ko ak ñe rej kaillu kij, im “ilo joij” ñe jej kõmman men in jibañ ko ñan ro jet. Bareinwõt, jemaroñ kwalok kadkadid einwõt ri jerbal ro an Anij ilo ad bõk tel jen jitõb kwojarjar eo an, im ilo ad kwalok “yokwe e jab riõp,” ilo ad konono mol, im ilo ad atartar ion ñan letok kajur ñan kajejjet jerbal in kwalok nan eo ad. Ekaitoktoklimo, Paul ear bareinwõt kamol maroñ in an juõn ri kwalok nan ikijen “ken tõrinae in wãnik i rabijmaroñ im anmiñ.” Ilo ien tarinae ilo ien ko etto, pein anbijmaroñ ekkã an jibwe jãje eo ke anmiñin ear jibwe kein tõrak eo. Ñan tarinae ilo tarinae eo ilo jitõb nae ri kaki wan ro, Paul ear jab kajerbal kein tarinae ko ilo kanniek rejerawiwi—mon, etao, riap. (2 Dri Korint 6:6, 7; 11:12-14; Jabõn Kennan Ko 3:32) Ear kajerbal “ken tõrinae ko” ak ial ko in wãnik, ñan kowõnmanlok kabuñ eo emol. Jej aikwij kõmman eindein.
18. Elañe jej ri jerbal ro an Anij, ewi wãwen jenaj emmakit?
18 Elañe jej ri jerbal ro an Anij, jenaj jerbal einwõt Paul im ri jerbal ro mõttan rar kõmmane. Jenaj emmakit einwõt Christian ro jekdon elañe armij rej kautiej kij ak jab. Report ko renana nae kij rejamin kabõjrak jerbal in kwalok nan eo ad, im jejamin bareinwõt kemjãje elañe report ko rej kautiej kij. Jenaj konono mol im remaroñ kile jerbal ko ad remõn. Ñe jej bed iumin kauwatata jen jerbal ko an ri kijirãt ro ad, jenaj liki Jehovah. Im jenaj bõk kauwe ilo kamolol.—2 Dri Korint 6:8, 9.
19. Ewi wãwen jemaroñ ‘namweien elõñ’ ilo jitõb?
19 Ñan kajemlok bwebwenato eo an kin jerbal in kilajrõk eo, Paul ear konono kin e make im ri jerbal ro mõttan “einwõt buromõj, a kim lõñliñ ien otemjej; einwõt jeramel, a kim namweien elõñ; einwõt ejelok ibem, im men ko otemjej ibem.” (2 Dri Korint 6:10) Meñe ri kwalok rein kar wõr unin air buromõj kin eñtan ko air, rar lañliñ. Rar jeramel, ak kar ‘namweien elõñ’ ilo jitõb. Ilo mol, kar wõr ‘men ko otemjej ibeir’ kinke tõmak eo air ear namweiir ilo jitõb—rar bareinwõt bõk kejatdikdik eo ñan erom ro nejin Anij ilañ. Im kar wõr ibbeir juõn mour emweie im lemõnõnõ einwõt Christian ri jerbal ro an Anij. (Jerbal 20:35) Einwõt ir, jemaroñ ‘namweien elõñ’ ilo ad bõk kunad ilo jerbal in kilajrõk eo kiõ—ilo ran in lomor in!
Kwon Liki Lomor eo an Jehovah
20. (a) Ta eo kar kõnan eo an Paul, im etke ear aikwij kakaiuriur kake? (b) Ta eo ej kakõllan ran in lomor eo ijo jej bed ie kiõ
20 Ke Paul ear je letter eo an kein karuo ñan Ri Korint ro ilo 55 C.E., tarrin 15 yiõ ko kar bed ñan jemlokin jukjuk im bed eo an Ri Jew ro. Ri jilek eo ear kõnan bwe Ri Jew ro im Ri Ailiñ ko en wõr juõn kõtan emõn ibben Anij ikijen Christ. En kar juõn ran in lomor, ak ear jab lap bwen ien eo. Eokwe, eindeinlok wõt jen 1914 jaar bed ilo jemlokin lok jukjuk im bed in. Jerbal in kwalok nan kin Ailiñ eo ibelakin me ej wõnmanlok kiõ ej kakõlleik ien in einwõt ran in lomor eo.
21. (a) Ta unin tel in yiõ eo rar kãlete ñan 1999? (b) Ta eo jej aikwij kõmmane ilo ran in lomor in?
21 Armij ro jen ailiñ ko otemjej rej aikwij roñ kin men in letok eo an Anij kin lomor ikijen Jesus Christ. Ejelok ien ñan aiberber. Paul ear je: “Lo, kiõ ran in lomor.” Nan kein ilo 2 Dri Korint 6:2 enaj unin tel in yiõ eo an Ri Kennan ro an Jehovah ilo 1999. Elap an ekkar, bwe jej jelmae juõn jorrãn me enaj laplok an nana jen jeebeplok eo an Jerusalem im temple eo an! Iman lok wõt jidik ej jemlokin aolepen jukjuk im bed in, im enaj kitibuj aolep armij ion lal. Kiõ—jab ilju—ej ien ñan emmakit. Elañe jej tõmak bwe lomor ej itok jen Jehovah, elañe jej yokwe e, im elañe jej kaorõk mour indio, jejamin kajitokjen joij eo an Anij. Kin juõn buru eobrak kin kõnan ñan kautiej Jehovah, jenaj kamol ilo nan im ilo jerbal bwe ej mol nan ko ad ñe jej ba: “Lo, kiõ ej ran in lomor.”
Ewi Wãwen Kwonaj Uak?
◻ Etke bõk kilajrõk ibben Anij ej juõn men eaorõk?
◻ Wõn ro rej ri keañ ro im ri jilek ro rej bõk kunair ilo jerbal in kilajrõk eo?
◻ Ewi wãwen jemaroñ kwalok kadkadid einwõt ri jerbal ro an Anij?
◻ Ta eo unin tel in yiõ eo ilo 1999 an Ri Kennan ro an Jehovah ej melelen ñan kwe?
[Pija ko ilo peij 28]
Einwõt Paul, kwoj kwalok nan ke ilo kijejeto im jibañ ro jet ñan bõk juõn kõtan emõn ibben Anij?
United States
France
Côte d’Ivoire
[Pija ilo peij 30]
Ilo ran in lomor in, kwoj bed ibwiljin jar eo ej bõk kilajrõk eo ibben Jehovah Anij ke?