Debij Wõt An Romak “Kejatdikdik Eo Am Kin Lomor”!

“En bed . . . einwõt juõn helmet kejatdikdik eo kin lomor.”​—1 DRI DRI TESSALONIKA 5:⁠8.

1. Ewi wãwen an “kejatdikdik in lomor eo” jibañ ilo kijenmij?

KEJATDIKDIK eo kin bõk lomor emaroñ jibañ juõn armij ñan debij wõt meñe ilo wãwen ko elap air kauwatata. Juõn wa eo ejorrãn im armij eo ej ebbebe ilo juõn kein aõ in ebbebe emaroñ tolok an lap an kijenmij elañe ejelã bwe ewõr jibañ ej itok. Ilo wãweninlok wõt, iumin thousand yiõ ko, kejatdikdik ilo “lomor eo an Jehovah” ej kejbãrok maan im kõrã ro ri tõmak ilo ien abañ ko, im kejatdikdik in ejañin tellok ñan inebata. (Exodus 14:13; Sam Ko 3:8; Dri Rom 5:⁠5; 9:​33) Ri jilek Paul ear kõkkar kin “kejatdikdik in lomor” eo ñan “helmet” in tõrak eo ilo jitõb an juõn Christian. (1 Dri Tessalonika 5:⁠8; Dri Epesõs 6:​17) Aet, ad liki bwe Anij enaj lomore kij menin ej kejbãrok kajur in lemnak ko ad, jibañ kij debij wõt an jimwe ad lemnak meñe ewõr jab errã, jumae, im kabo.

2. Ilo wãwen et ko “kejatdikdik in lomor eo” ej bedbed eo ñan kabuñ eo emol?

² “Kejatdikdik eo kin ilju eo ej itok ear jab juõn kadkad an lal in pagan eo,” lal eo ear kabol Christian ro ilo ebeben eo kein kajuõn, book eo The International Standard Bible Encyclopedia, ej ba. (Dri Epesõs 2:​12; 1 Dri Tessalonika 4:​13) Ak, “kejatdikdik in lomor eo” ej juõn mõttan bedbed in kabuñ eo emol. Ewi wãwen an eindein? Moktata, lomor eo an ro ri karejaran Jehovah ej ekkejellok ibben ãt eo etan make. Ri jeje psalm Asaph ear jar: “Kwon jibañ kim, O Anij in amuij lomor, kin aibujuij in etõm, im kadeod kim.” (Psalm 79:9; Ezekiel 20:​9, New World Translation) Bareinwõt, liki ilo jerammõn ko Jehovah ear kallimur kaki elap tokjen ñan an wõr juõn kõtan eo emõn ibben. Paul ear likit ilo wãwen in: “Im, elañe ejelok tõmak, armij re ban kabuñburuen; bwe eo ej itok ñõn Anij, emõn en tõmak kin an Anij ber, im kin An lelok jinekjij ñõn ro rej kabukot E.” (Dri Hibru 11:6) Bareinwõt, Paul ear kamelele bwe lomor ñan ro rej ukwelok kar juõn key ñan unin itok eo an Jesus ñan lal. E ar keañ: “Remol nan kein im emõn eoroñ wõt, bwe Kraist Jisõs e ar itok ñõn lõl bwe En lomoren ro dri jerawiwi.” (1 Timote 1:​15) Im ri jilek Peter ear jitõñlok ñan lomor einwõt ‘jemlokin [ak, tokjen jemlok] in tõmak eo ad.’ (1 Piter 1:9) Ealikar, ejimwe ñan kejatdikdik kin lomor. Ak ta eo ej lukkun lomor? Im ta eo ej menin aikwij ñan tõbare?

Ta In Lomor?

3. Ta kain lomor eo ro ri karejaran Jehovah ilo ien ko etto rar loe?

³ Ilo Jeje ko ilo Hebrew, “lomor” ekkã melelen kadeod ak kõtlok jen ijjibed ak jen juõn kowadoñ, mij eo ejelok ien eo kar karõk ñane. Ñan wanjoñok, ilo an kir Jehovah “Ri Letok ialin ko,” David ear ba: “Jeova aõ ejman im aõ me, im aõ Dri lomor; Kwoj lomor iõ jen men in kokkure. I naj kir ñõn Jeova, eo ej tellokõn bwe ren nebar E; ein drein naj lomor iõ jen ro rej kijirãte iõ.” (2 Samuel 22:​2-4) David ear jelã bwe Jehovah ej roñjake ñe ro ri karejaran retiljek rej kir ñan jibañ.​—Sam Ko 31:22, 23; 145:19.

4. Ta kejatdikdik eo kin mour eo ilo ilju eo ej itok Christian ri karejar ro jinoin an Jehovah rar bõke?

⁴ Christian ri karejar ro jinoin an Jehovah rar bareinwõt bõk kejatdikdik eo kin juõn mour ilo ilju eo ej itok. (Job 14:13-​15; Aiseia 25:8; Daniel 12:​13, NW) Ilo mol, elõñ ian kallimur ko kin kadeod ko jej loi ilo Jeje ko ilo Hebrew rar menin kanan kin juõn lomor eo elaplok​—juõn eo ej tellok ñan mour indio. (Aiseia 49:​6, 8; Jerbal 13:47; 2 Dri Korint 6:2) Ilo ran ko an Jesus, elõñ ri Jew ro rar kejatdikdik kin mour indio, ak rar makoko in bõk Jesus einwõt key eo ñan kile kejatdikdik eo air. Jesus ear jiroñlok ri tel ro an kabuñ ilo ien ko an: “Komij bukot ilo Jeje ko, bwe ilo ir komij lemnak ami mour in drio; im kein rej kennan kin Iõ.”​—Jon 5:​39.

5. Ta eo ej melelen lomor eo eliktata?

⁵ Ikijen Jesus, Anij ear kwalok likieo in melelen lomor. Ej kobaik rõlok jen iroij eo an jerawiwi, jen kamakoko ñan kabuñ wan, jen lal eo ej bed iumin maroñ eo an Satan, jen mijak armij, im meñe jen mijak kin mij. (Jon 17:16; Dri Rom 8:2; Dri Kolosse 1:​13; Reveles̃õn 18:​2, 4) Eliktata, ñan ri karejar ro retiljek an Anij, lomor eo ikijen Anij melelen ejjab ñan rõlok wõt jen ijjibed im eñtan ak bareinwõt ien emõn ñan an wõr mour indio. (Jon 6:​40; 17:3) Jesus ear katakin bwe ñan juõn “bwij edik,” lomor melelen air jerkakbiji ñan mour ilañ ñan bõk kunair ibben Christ ilo Ailiñ eo ej iroij. (Luk 12:32) Ñan bwen armij ro jet, lomor melelen juõn jeblak ñan mour wãppen im kõtan eo ibben Anij eo Adam im Eve rar lañliñ kake ilo jikin kallip eo ilo Eden mokta jen air kar jerawiwi. (Jerbal 3:​21; Dri Epesõs 1:​10) Mour indio iumin kain wãwen rot kein ilo paradise kar karõk eo jinointata an Anij ñan armij. (Jenesis 1:​28; Mark 10:30) Ak, ewi wãwen, an juõn kajeblak eo ñan wãwen rot kein maroñ?

Bedbed eo ñan Lomor​—Binmour eo

6, 7. Ta jerbal eo an Jesus ilo lomor eo ad?

⁶ Lomor eo ñan indio emaroñ ikijen wõt katok in binmour eo an Christ. Etke? Bible ej kamelele bwe ke Adam ear jerawiwi, ear “wia” kake e make im ro otemjej bwijin ilo ien ko tokelik ekoba kij, ñan loan jerawiwi​—kin menin ear kõmman bwe en menin aikwij juõn binmour bwe armij en maroñ wõr an kejatdikdik eo ejimwe. (Dri Rom 5:​14, 15; 7:​14) Bwe Anij en kar maroñ letok juõn binmour ñan armij otemjej menin kar annañelok ikijen menin katok ko kin menin mour ko iumin Kien eo ikijen Moses. (Dri Hibru 10:​1-​10; 1 Jon 2:2) Jesus kar e eo katok eo an ear kajejjet kitien kanan in pija kein. Enjel eo an Jehovah ear keañ mokta jen an Jesus lotak: “E naj lomoren ro dron jen jerawiwi ko air.”​—Matu 1:​21; Dri Hibru 2:​10.

⁷ Jesus ear kabwilõñlõñ an lotak ñan virgin eo Mary, im einwõt Nejin Anij, ear jab jolete mij jen Adam. Mol in koba ibben ialin tiljek eo an ewãppen ear lelok mour eo an eo aorõkin kar menin aikwij ñan wiaik armij jen jerawiwi im mij. (Jon 8:​36; 1 Dri Korint 15:22) Ilo an jab einwõt aolep armij ro jet, Jesus kar jab kaliaiki ñan mij kin jerawiwi. E ar ilo karõk itok ñan lal “bwe en binmour ñan ro relõñ.” (Matu 20:28) Ke ear dedelok an kõmman eindein, kiõ Jesus eo kar kajerkakbiji im likit ilo throne ej bed ilo juõn bed eo ñan lelok lomor ñan ro otemjej rej tõbar menin aikwij ko an Anij.​—Reveles̃õn 12:10.

Ta eo Ej Menin Aikwij ñan Bõk Lomor?

8, 9. (a) Ewi wãwen an kar Jesus uake kajitõk eo an juõn iroij jodikdik ri mweie kin lomor? (b) Ewi wãwen an kar Jesus kajerbal ien in ñan katakin ri kalor ro an?

⁸ Juõn ien, juõn ri mweie likao dikdik iroij in Israel ear kajitõkin Jesus: “Ta eo in kõmõn bwe en aõ jolit mour in drio?” (Mark 10:17) Kajitõk eo an emaroñ kar jelet lemnak eo ekajur an ri Jew ro ilo ien ko an​—bwe Anij ej aikwiji jet kain jerbal im bwe elañe ebwe kõmmani jerbal kein, juõn emaroñ bõk lomor jen Anij. Ak kain tiljek rot in emaroñ jebar jen emmakit in kibbon. Jerbal rot in ear likjap in lelok juõn kejatdikdik eo emol kin lomor, ke ejelok armij jab wãppen emaroñ lukkun mour ekkar ñan kien ko an Anij.

⁹ Ilo uak ñan kajitõk eo an leo, Jesus ear baj kakememej wõt e bwe ej aikwij bokake kien ko an Anij. Iroij dikdik eo ear mõkaj im kamol ñan Jesus bwe ear kejbãroki jen ke ear dik mantak. Uak eo an ear kamakit Jesus ñan an eñjake an yokwe e. Jesus ear ba ñan e: “Juõn men eo kwoj aikwij; kwon ilok im wiakaki men ko otemjej am, im lelok ñõn ro dri jeramel, im e naj or mweiõm i lõñ; im itok im lor Iõ.” Bõtab, likao dikdik eo ear ilok ilo an buromõj, “bwe elõñ mweien.” Elikinlok Jesus ear kalikar ñan ri kalor ro an bwe an tarjen joñan bõk mweiuk ko an lal in ej kabañ bõk lomor. Ak Jesus ear etal wõt im kamol ñan ir: “Armij re bane, a e jab einwõt iben Anij; bwe Anij ej maroñ kin men otemjej.” (Mark 10:18-​27; Luk 18:18-​23) Ewi wãwen an lomor maroñ?

10. Ta wãwen ko jej aikwij ioni ñan bõk lomor?

¹⁰ Lomor ej juõn menin letok jen Anij, ak ejjab make bed im itok. (6:​23) Ewõr jet wãwen bedbed ko kajjojo armij ej aikwij tõbari ñan an tellokin bõk menin letok in. Jesus ear ba: “Bwe kin an Anij yokwe lõl, E ar letok juõn wõt Nejin E ar keutak, bwe jabrewõt eo ej liki E en jab joko, a en mour in drio.” Im ri jilek John ear kobaiktok: “Eo ej liki Nejin, mour in drio an: im eo e jab liki Nejin e jamin lo mour.” (Jon 3:​16, 36) Ealikar, Anij ej aikwiji liki im bokake jen kajjojo armij eo ej kejatdikdik ñan bõk lomor eo ej indio. Kajjojo ej aikwij kõmman bebe ñan bõk binmour eo im ñan lor jenkwon neen Jesus.

11. Ewi wãwen an juõn armij jab wãppen maroñ bõk melim eo an Jehovah?

¹¹ Ke jejjab wãppen, ejjab wãwen eo ad in ñan itok wõt in bokake im jejjab maroñ bokake ilo wãppen. Eñin unin Jehovah ear letok juõn binmour ñan kalibubu jerawiwi ko. Mekarta, jej aikwij etal wõt im kate kij mour ekkar ñan ial ko an Anij. Einwõt an Jesus kar jiroñlok iroij dikdik eo emweie, jej aikwij kejbãrok kien ko an Anij. Ad kõmman eindein ej bõktok ejjab kowãppen eo an Anij wõt ak bareinwõt elap lañliñ, bwe “kien ko An re jab erro”; rej “juõn menin kaemlolo.” (1 Jon 5:3; Proverbs 3:​1, 8, NW) Ak, ejjab bidodo eddeb wõt ñan kejatdikdik in lomor eo.

“Jutak kin Juõn Tarinae Ebin kin Tõmak eo”

12. Ewi wãwen an kejatdikdik eo kin lomor kakajurlok juõn Christian ñan jumae kabo ko kin mour etton?

¹² Ri kalor Jud ear kõnan jeje ñan Christian ro jinoin kin “lomor eo [rar debiji] eo ekkã jelã kake.” Bõtab, mejatoto in mour eo enana im kajur ear kamakit e ñan kakabilek ro jein im jatin bwe ren “jutak kin juõn tarinae ebin kin tõmak eo.” Aet, ñan bõk lomor ejjab bwe ñan an wõr tõmak, ñan eddeb ñan tõmak eo emol an Christian, im ñan bokake ñe men otemjej rej etal wõt ilo meoeo. Tiljek eo ad ñan Jehovah ej aikwij bwe an kajur ñan jibañ kij jumae kabo ko im kareelel ko an mour etton. Ak, mour ko etarjen joñan an likao im jiroñ im oktaklok jen ial eo ak jerbal eo ejimwe, jab kautiej ro rej bõk maroñ, jebelbel ko, im bere ko rar kananaiki wãwen lemnak im mour an congregation eo ilo ebeben eo kein-kajuõn. Ñan jibañ ir tarinaik kain kareelel rot in, Jud ear rejañ Christian ro mõttan ñan debij wõt an alikar ilo air lemnak mejenkajjik eo air: “A komeo, ro jitenburu, komin mõke kalek kom ion ami tõmak ekwojarjar otem kwojarjar, komin jar ilo Jitõb Kwojarjar, Im kejbãrok kom ilo yokwe an Anij, im komin kõtõmene kin tiriamokake an ar Iroij Jisõs Kraist ñan mour in drio.” (Jud 3, 4, 8, 19-​21) Kejatdikdik eo kin bõk lomor ear maroñ kakajurlok ir ilo tarinae eo air ñan air bed wõt ilo mour erreo.

13. Ewi wãwen ad maroñ kwalok bwe jejjab likjap jen karõk in joij eo an Anij?

¹³ Jehovah Anij ej watõk joñok in mwil erreo ion mõttan ro enaj kõtlok lomor ñan ir. (1 Dri Korint 6:​9, 10) Bõtab, debij wõt kien ko in mour erreo eo an Anij, ejjab melelen oktak im ri ekajet kin ro jet. Ejjab kij eo jej beek jemlok eo ej indio an armij ro mõttad. Ak, Anij enaj kõmman eindein, einwõt an Paul kar jiroñlok ri Greek ro ilo Athens: “Bwe E ar likit juõn ran, iomin ran eo E naj ekajet ro dri lõl ilo wãnik kin armij eo E ar kãlete”​—Jesus Christ. (Acts 17:​31, NW; Jon 5:​22) Elañe jej mour kin tõmak ilo binmour eo an Jesus ejelok unin ad aikwij mijak juõn rainin ekajet eo ej itok. (Dri Hibru 10:38, 39) Men eo elap tokjen ej bwe jej aikwij jab “bõk joij eo ejjab tellokin bõke an Anij [bar jeblak eo kin kõtan eo ad ñane ikijen binmour] im likjap jen karõk eo an” ikijen ad lelok kij make bwe ren kabo kij ñan lemnak im mwil eo ebwid. (2 Corinthians 6:​1, NW) Kobatok ibben menin, ilo ad jibañ ro jet ñan bõk lomor, jej kwalok bwe jaar jab likjap jen karõk in tiriamokake eo an Anij. Ewi wãwen ad maroñ jibañ ir?

Jake Kejatdikdik eo kin Lomor

14, 15. Wõn ro Jesus ear kabbek ir ñan kwalok kin news eo emõn kin lomor?

¹⁴ Ilo elij nan ko an ri kanan Joel, Paul ear je: “Bwe ro otemjej rej kir etan Jehovah re naj mour.” Inem ear kobaiktok: “Bõtab, ekijkan air naj kir ñõn Eo r’ar jab liki E? im ekijkan air naj liki Eo rar jab roñ kin E? im ekijkan air naj roñ ñe ejelok dri kwalok?” Jejjo eon ko tokelik, Paul ej kalikar bwe tõmak ejjab make bed im itok; ak, ej “lortok men eo kar roñjake,” einwõt ba, “kin nan eo kin Kraist.”​—Romans 10:13, 14, 17, NW; Joel 2:​32, NW.

¹⁵ Wõn enaj bõktok “nan eo kin Kraist” ñan ri ailiñ ko? Jesus ear kabbek jerbal eo ñan ri kalor ro an​—ro ededelok air kar katakin ir “nan” eo.” (Matu 24:14; 28:19, 20; Jon 17:​20) Ñe jej bõk kunad ilo jerbal in kwalok nan eo an Ailiñ eo im jerbal in kõmman ri kalor eo, jej kõmmane men eo ri jilek Paul ear jeje kake, ilo ien in ej elij nan ko an Isaiah: “Enañin wõleo neen ro rej keañ kin news eo emõn kin men ko remõn!” Meñe elõñ rejjab bõk news eo emõn jej bõklok, need rej “itok” wõt ñan Jehovah.​—Romans 10:15, NW; Aiseia 52:7.

16, 17. Ta unin mweñan ko-ruo jerbal in kwalok nan eo ad ej jerbale?

¹⁶ Kajejjet kitien jerbal in ej jerbale ruo karõk ko raorõk. Moktata, news eo emõn rej aikwij kwalok nan kake bwe etan Anij ren kalaplok im ro rej kõnan lomor ren jelã ia eo ren oktaklok ñane. Paul ear melele wãwen in kin jerbal eo. E ar ba: “Ilo mol, Jehovah ear likit kien eo iom ilo nan kein, ‘I ar kãlet kom einwõt juõn meram in ailiñ ko, bwe komin juõn lomor ñan ijo ettoloktata ilal.’ ” Eindein, einwõt ri kalor ro an Christ, kajjojo iad ej aikwij wõr kunan ilo ennan in lomor eo ñan armij ro.​—Jerbal 13:47; Aiseia 49:6.

¹⁷ Kein karuo, jerbal in kwalok nan eo kin news eo emõn ej likit bedbed eo ñan ekajet kwojarjar eo an Anij. Kin ekajet in, Jesus ear ba: “A ñe Nejin armij e naj itok ilo wuj eo An, im enjel ro otemjej iben, ien eo E naj jijõt ion tron in wuj eo An. Im naj kokweloktok dri ailiñ otemjej iman mejen; im E naj kijbil ir jen dron, einwõt s̃eperd ej kijbil s̃ip ko jen goat ko.” Meñe ekajet im kejebel eo naj kadedelok “ñe Nejin armij e naj itok ilo wuj eo An,” jerbal in kwalok nan eo ej letok ñan armij ro rainin ien emõn ñan kile ro jein im jatin Christ ilo jitõb im kin menin ñan jerbal ilo rejetak ir kin lomor eo air make ñan indio.​—Matu 25:31-​46.

Debij wõt “Obrak kin Liki in Kejatdikdik eo”

18. Ewi wãwen ad maroñ debij wõt an meram “kejatdikdik in lomor” eo ad?

¹⁸ Ad niknik in bõk kunad ilo jerbal in kwalok nan eo ej bareinwõt juõn wãwen ñan jibañ kij kejbãrok wõt an meram kejatdikdik eo ad. Paul ear je: “A kim kõnan bwe komin otemjej niknikemi wõt juõn ñõn obrõk̃ kin liki in kejatrikrik, aet ñõn jemlokin.” (Dri Hibru 6:​11) Inem, kajjojo iad, jen bõke “einwõt juõn helmet kejatdikdik eo kin lomor,” im kin menin kememej bwe “Anij e ar jab likit kij ñõn illu, a ñõn tõbõr lomor kin ar iroij Jisõs Kraist.” (1 Dri Tessalonika 5:​8, 9) Jen bareinwõt bõk ñan buruõd nan in kõketak eo an Peter: “Kin men in komin kapojõk buruemi, komin jadõr im kejatrikrik kom wõt kin joij eo naj bõktok ñõn kom.” (1 Piter 1:​13) Ro otemjej rej kõmman eindein renaj lo “kejatdikdik in lomor” eo air ilo an dedelok an jejjet kitien!

19. Ta eo naj etale ilo katak in tok ilokan?

¹⁹ Ilo tõre in, ta eo ej aikwij lemnak eo ad kin bwen ien in ebed ñan jukjuk im bed in? Ewi wãwen ad maroñ kajerbal ien in ñan bõk lomor ñan kij make im ro jet? Jenaj etale kajitõk kein ilo katakin tok ilokan.

Kwo Maroñ Ke Kamelele?

• Etke jej aikwij debij wõt an meram “kejatdikdik in lomor” eo ad?

• Ta eo ekoba ilo lomor?

• Ta eo jej aikwij kõmmane ñan bõk menin letok eo kin lomor?

• Ta eo jerbal in kwalok nan eo ad ej kõtõbrake ilo an errã ibben karõk eo an Anij?

[Pija ko ilo page 22]

Lomor elaplok melelen jen baj ellã wõt jen jorrãn