“Kabin Buruemi”

“Bwe emõn komin kijenmij bwe, mõjen ami kõmõnmõn ankil an Anij, komin bõk men in kalimur eo.”​—DRI HIBRU 10:36.

1, 2. (a) Ta eo ear walok ñan elõñ Christian ro ilo ebeben eo kein kajuõn? (b) Etke ebidodo bwe tõmak en mõjnolok?

IAN AOLEP ri jeje Bible ro, ejelok juõn ear konono kin tõmak elõñlok alen jen ri jilek Paul. Im elõñ alen, ear konono kin ro im tõmak eo air ear mõjnolok ak mij. Ñan wanjoñok, Hymenaeus im Alexander “r’ar rup im mejõljõllok jen tõmak.” (1 Timote 1:19, 20) Demas ear ilok jen Paul “kin an yokwe lõl in.” (2 Timote 4:10) Jet, ikijen makitkit ko air rejjab an Christian im rej kwalok air jab kea, rej “kariõp [air] tõmak.” Ro jet kar mone ir kin jelãlokjen ko rewan im rar “jebwãbwe jen tõmak.”​—1 Timote 5:8; 6:20, 21.

² Etke Christian ri kabit rein rar jorrãn ilo wãwen kein? Eokwe, “tõmak ej einwõt liki kin men ko jej kejatrikrik kij kaki, im rel buruer kin men ko je jab loi.” (Dri Hibru 11:1) Jej jerbale tõmak ilo men ko jejjab loi. Jejjab aikwiji kin men ko jemaroñ loi. Ebidodolok jerbal ñan mweiuk ko jej loi jen mweie ko ilo jitõb im jejjab maroñ loi. (Matu 19:21, 22) Elõñ men ko jemaroñ loi​—einwõt “mõm ko an kõniek, [im] mõm ko an mej ko”​—elap an kareel kanniekiir ejjab wãppen im emaroñ kamõjnoik tõmak eo ad.​—1 Jon 2:16.

3. Juõn Christian en kaddek kain tõmak rot?

³ Ak, Paul ej ba, “eo ej itok ñõn Anij, emõn en tõmak kin an Anij ber, im kin An lelok jinekjij ñõn ro rej kabukot E.” Ear wõr an Moses tõmak einwõt in. Ear “lemnok kin jinekjij eo” im ear “kijenmij einwõt an lo Eo re ban lo E.” (Dri Hibru 11:6, 24, 26, 27) Juõn Christian ej aikwiji kain tõmak rot in. Einwõt jaar loe ilo katak eo lok juõn, Abraham kar juõn joñok emõn kin men in.

Joñok eo an Abraham kin Tõmak

4. Ewi wãwen tõmak ear jelet wãwen mour eo an Abraham?

⁴ Abraham ear bed ilo Ur ke ear bõk kallimur eo an Anij bwe enaj jemen juõn ine eo enaj kajerammõn armij ro jen ailiñ ko otemjelok. (Jenesis 12:1-3; Jerbal 7:2, 3) Ion bedbed in kallimur in, Abraham ear bokake Jehovah, im ear emmakit ñan Haran mokta inem tokelik ñan Canaan. Ijo, Jehovah ear kallimur ñan lelok ene eo ñan inen Abraham. (Jenesis 12:7; Nihimaia 9:7, 8) Bõtab, elõñ ian men ko Jehovah ear kallimur kaki renaj kar jejjet kitiir elikin mij eo an Abraham. Ñan wanjoñok, ear ejelok jikin Abraham make ilo Canaan​—ijellokin roñ eo an Machpelah, eo ear wiaiki einwõt juõn jikin kalbwini ro remij. (Jenesis 23:1-20) Meñe eindein, ear tõmak nan eo an Jehovah. Ilõñin men otemjej, ear tõmak ilo “jikin kwelok eo, eor an foundes̃õn, im Anij e ar kalek im kõmõnmõn.” (Dri Hibru 11:10) Tõmak rot in ear kakajur e ilo aolepen mour eo an.

5, 6. Ilo wãwen et kar melejoñe tõmak eo an Abraham ikijen kallimur eo an Jehovah?

⁵ Men in ej alikar elaptata ilo kallimur eo bwe inen Abraham enaj erom juõn ailiñ elap. Ñan an men in walok, Abraham ear aikwiji juõn nejin ladik, im etto an kar kõttar mokta jen ear bõk jerammõn in. Jejjab jelã jete an yiõ ke ej kab roñ kin kallimur in an Anij, ak ke ear kõmmane trip eo an eaetok ñan Haran, Jehovah ejañin kar lelok ñan e juõn nejin. (Jenesis 11:30) Ebwe an to an kar bed ilo Haran ñan an kakonkon ‘men ko otemjej rar aini, im ro otemjej rar jibarek ir,’ im ke ear emmakit ñan Canaan, ear 75 an yiõ im Sarah kar 65. Meñe eindein, ejañin kar wõr juõn nejin ladik. (Jenesis 12:4, 5) Ke Sarah ear tõbar jiljilimjuõnñoul jima yiõ, ear lemnak bwe ebwe an kar ritto ñan an keotak juõn nejin ñan Abraham. Kin men in, ñan lor juõn manit ilo ien eo, ear lelok lio ri karejaran Hagar ñan Abraham, im ear wõr juõn nejin ladik jen e. Ak ear jab ajiri eo kar kallimur kake. Hagar im nejin, Ishmael, kar jilkinlok ir tokelik. Meñe eindein, ke Abraham ear owar ilo etair, Jehovah ear kallimur ñan kajerammõn Ishmael.​—Jenesis 16:1-4, 10; 17:15, 16, 18-20; 21:8-21.

⁶ Ilo ien eo Anij ear karõke​—elõñ yiõ ko elikin ien eo rar jino roñ kin kallimur eo​—Abraham eo kar 100 an yiõ im Sarah eo kar 90 an yiõ kar wõr juõn nejiir ladik, Isaac. Ear juõn ien elap an kabwilõñlõñ! Ñan ri belele rein reritto, ear einwõt juõn jerkakbiji ke enbwiniir e “mij” ear kwalok juõn mour ekãl. (Dri Rom 4:19-21) Etto air kar kõttar, ak ke ear jejjet kitien kallimur eo, ear wõr tokjen air kar kõttar.

7. Ewi wãwen tõmak ej ekkejel ion kijenmij?

⁷ Wanjoñok eo an Abraham ej kakememej kij bwe tõmak en jab ñan jidik wõt ien. Paul ear kwalok bwe tõmak ej ekkejel ion kijenmij ke ear je: “Bwe emõn komin kijenmij bwe, mõjen ami kõmõnmõn ankil an Anij, komin bõk men in kalimur eo. . . . A kijeo, je jab ian ro rej jenliklik ñõn kokkure; a ian ro rej tõmak ñõn lomorir.” (Dri Hibru 10:36-39) Elõñ etto air kar kõttar ñan bõk jejjet in kitien kallimur eo. Jet rar kõttar aolepen mour eo air. Tõmak eo air ekajur ear kakajur ir. Im, einwõt Abraham, renaj bõk jinekjej eo ilo ien eo Jehovah ej karõke.​—Habakkuk 2:3.

Bokake Anij

8. Ewi wãwen ad eoroñ Anij rainin, im etke men in enaj kakajurlok tõmak eo ad?

⁸ Ewõr emen men ko rar kakajur tõmak eo an Abraham, im ejja men kein wõt remaroñ jibañ kij. Mokta, ear kwalok an ‘tõmak bwe Anij ej bed’ ilo an bokake ke Jehovah ear konono. Kin men in, ear einjuõn jen Ri Jew ro ilo ran ko an Jeremiah, ro rar tõmak ilo Jehovah ak rar jab tõmak nan ko an. (Jeremiah 44:15-19) Rainin, Jehovah ej konono ibbed ikijen peij ko ilo Bible eo, Nan in kakõrmol eo an, eo Peter ear ba ej einwõt “maram ej romak ijo e marok . . . ilo buruemi.” (2 Piter 1:19) Ñe jej readi Bible eo, jenaj “bõk kakajur kin nan in tõmak ko.” (1 Timothy 4:6, New World Translation; Dri Rom 10:17) Bareinwõt, ilo ran kein eliktata, “ri karejar eo etiljek im meletlet” ej letok “ekan [ko lor jitõb] ilo ien ekar,” nan in tel ko ñan jerbale nan in kakabilek ko ilo Bible im ñan melele kanan ko ilo Bible. (Matthew 24:45-47, NW) Bokake Jehovah ikijen wãwen kein ej aorõk ñan bõk tõmak ekajur.

9. Ta eo enaj walok elañe jej lukkun tõmak ilo kejatdikdik eo an Christian?

⁹ Tõmak eo an Abraham ear bed ebak ñan kejatdikdik eo an. “Ej tõmak ilo kejatrikrik, bwe en jemen elõñ dri ailiñ ko.” (Dri Rom 4:18) Men in ej men eo kein karuo me emaroñ jibañ kij. Jej aikwij jab meloklok bwe Jehovah ej “lelok jinekjij ñõn ro rej kabukot E.” Ri jilek Paul ear ba: “Kin men in kimij jerbal, im kate kim, bwe kimij kejatrikrik kim kin Anij emour.” (1 Timote 4:10) Elañe ej mol ad tõmak ilo kejatdikdik in Christian, aolepen mour eo ad enaj kalikar tõmak eo ad, einwõt Abraham ear kõmmane.

Konono Ibben Anij

10. Kain jar rot enaj kakajurlok tõmak eo ad?

¹⁰ Abraham ear konono ibben Anij, im men in ej men eo kein kajilu me ear kakajurlok an tõmak. Rainin, kij bareinwõt jemaroñ konono ibben Jehovah, ilo ad kajerbal men in letok eo kin jar ikijen Jesus Christ. (Jon 14:6; Dri Epesõs 6:18) Kar elikin an kwalok kin juõn parable eo ej kalikar kin aikwij eo ñan wõnmanlok im jar ke Jesus ear bõkmantak kajitõk eo: “Ñe Nejin armij e naj itok, E naj lo tõmak ion lõl ke?” (Luk 18:8) Jar eo ej kalek tõmak ejjab walok ilo am jab lemnak kake ak ej automatic an walok. Emũlal an wõr meleleir. Ñan wanjoñok, jej aikwiji jar ko rej itok jen buru ñe jej aikwij kõmman bebe ko raorõk ak ñe jej bed iumin ijjibed ko.​—Luk 6:12, 13; 22:41-44.

11. (a) Ewi wãwen Abraham ear bõk kakajur ke ear kabellok buruen ñan Anij? (b) Ta eo jemaroñ katak jen experience eo an Abraham?

¹¹ Ke Abraham ear rittolok im Jehovah ejañin kar lelok ñan e inen eo kar kallimur kake, ear konono ibben Anij kin inebata eo an. Jehovah ear kainemõn e. Ta tokjen eo ear walok? Abraham “e ar tõmak Jeova; im Ej watõk men in ñõn e einwõt wãnik.” Inem, Jehovah ear lelok juõn kakõlle ñan kamol nan ko an. (Jenesis 15:1-18) Elañe jej kabellok buruõd ñan Jehovah ilo jar, bõk nan in kallimur ko an Jehovah ilo Nan eo an, Bible eo, im bokake e ilo tõmak, inem Jehovah enaj kakajurlok tõmak eo ad bareinwõt.​—Matu 21:22; Jud 20, 21.

12, 13. (a) Ewi wãwen Abraham ear bõk jerammõn ke ear lor tel eo an Jehovah? (b) Kain experience rot renaj kakajurlok tõmak eo ad?

¹² Men eo kein kemen im ear kakajurlok tõmak eo an Abraham kar jibañ eo Jehovah ear lelok ñan e ke ear lor tel eo an Anij. Ke Abraham ear etal im lomoren Lot jen king ro rar jodik e, Jehovah ear kõmman bwe en bõk anjo. (Jenesis 14:16, 20) Ke Abraham ear jokwe einwõt juõn ruwamaejet ilo ene eo ro inen renaj jolete, Jehovah ear kajerammõn e ikijen mweiuk. (Keidi Jenesis 14:21-23.) Jehovah ear tel ri karejaran ñan lo juõn belen ejejjet ñan Isaac. (Jenesis 24:10-27) Aet, Jehovah “e ar kejerammõn Ebream ilo men ko otemjej.” (Jenesis 24:1) Tokjen men in joñan an kajur tõmak eo an im joñan an ebak kõtan eo an ibben Jehovah Anij ear naetan “jeran Anij.”​—Aiseia 41:8; Jemes 2:23.

¹³ Emaroñ ke wõr ibbed tõmak rot in ekajur? Aet. Elañe kij, einwõt Abraham, jej likit Jehovah ilo melejoñ ilo ad bokake kien ko an, enaj kajerammõn kij bareinwõt, im men in enaj kakajurlok ad tõmak. Ñan wanjoñok, ilo am lale 1998 Service Year Report ej kwalok bwe elõñ rar bõk jerammõn ilo juõn wãwen ekabwilõñlõñ ke rar bokake kien eo an ñan kwalok kin news eo emõn.​—Mark 13:10.

Juõn Lokbook kin Tõmak Rainin

14. Ewi wãwen Jehovah ear kajerammõn jerbal in kajededlok News kin Ailiñ eo No. 35?

¹⁴ Ilo October 1997, jerbal in kajededlok News kin Ailiñ eo No. 35 ibelakin lal ear lap an wõr tõbrak, kamolol kin kijejeto eo an million Ri Kennan ro kajjojo. Kolmãn kar men eo ear walok ilo Ghana. Enañin 2.5 million copy ko kar kajededloke ilo emen kajin ko, im tokjen men in rar bõk tarrin 2000 kajitõk kin Bible study ko. Ilo Cyprus ruo Ri Kennan ro me rar kajededlok News kin Ailiñ eo rar lo an juõn priest lor ir. Elikin jidik ien, rar lelok ñan e juõn copy kin News kin Ailiñ eo. Emwij an kar bõk juõn copy im ear ba: “Elap aõ kar bwilõñ kin ennan eo im I ar kõnan kajerammõn armij ro rar keboje.” Ilo Denmark, 1.5 million copy ko kin News kin Ailiñ eo kar kajededloke kin tokjen ko remõn. Juõn kõrã eo ear jerbal ilo jerbal in kõmman kõtan ko remõn ear ba: “Tract eo ewõr juõn ennan ñan aolep armij. Ebidodo ñan melele, im ej kamakit yuk, im ej bõkmantak juõn kõnan ñan kalaplok am jelã. Ej lukkun jejjet!”

15. Ta experience ko rej kwalok bwe Jehovah ear kajerammõn jibadbad eo ñan jibadõk armij ro ijoko otemjej?

¹⁵ Ilo 1998 kar kõmman juõn jibadbad ñan kwalok nan ñan armij ejjab ilo mweo imwiir wõt ak ilo jabdewõt jikin. Ilo Côte d’Ivoire ruo missionary ri belele ro rar lolok 322 wa ko ilo wharf eo. Rar lelok 247 book ko, 2,284 magazine ko, 500 brochure ko, im elõñ buki tract ko, im bareinwõt video ko bwe sailor ro ren maroñ aluiji ñe rej jerakrõk. Ilo Canada juõn Ri Kennan ear etal ñan juõn jikin kõmman wa ko. Owner eo ear itoklimo, im brother eo ear bed iumin emen im jimettan awa ko, meñe awa eo ear kajerbale ñan kwalok nan kar enañin juõn awa jimma ibben armij ro rar itok ñan jikin eo. Eliktata, rar karõk ñan katak Bible ilo 10:00 p.m. Ak, jet ien rar jab jino mae lukkun boñ im wõnmanlok ñan ruo awa jibboñtata. Schedule eo kar juõn abañ, ak tokjen ko remõn kar walok jen e. Leo ear bebe ñan kili jikin jerbal eo ilo ran in Sunday bwe en maroñ bed ilo kwelok ko. Ejjabto tokelik e im family eo an rar kõmman wõnmanlok ko remõn.

16. Ta experience ko rej kwalok bwe Jen Kõmmane brochure eo im book eo Knowledge rej kein jerbal ko rekajur ilo jerbal in kwalok nan im katakin?

¹⁶ Brochure eo Ta Eo Anij Ekõnan Bwe Jen Kõmmane? im book eo Knowledge That Leads to Everlasting Life rej kein jerbal ko rekajur ilo jerbal in kwalok nan im katakin. Ilo Italy juõn nun eo ear kõttar juõn bus ear bõk juõn copy in News kin Ailiñ eo. Ran eo tok juõn, rar bar kebak e im ear bõk Jen Kõmmane brochure eo. Kajjojo ran ko elikin ien eo, ear katak Bible iumin 10- ñan 15 minute ko turin jikin kõttar bus eo. Elikin juõn im jimettan alliñ, ear bebe in etal jen convent (mõn sister ro) eo im rol ñan Guatemala ñan wõnmanlok kin katak eo an. Ilo Malawi juõn armij ekijejeto ilo kabuñ eo an etan Lobina ear jab mõnõnõ ke limaro nejin rar jino katak Bible ibben Ri Kennan ro an Jehovah. Meñe eindein, limaro rar jaketo-jaketak mol ko ilo Bible ibben jineir ñe rej maroñ. Ilo June 1997, Lobina ear lo book eo Knowledge im ear itoklimo ilo nan ko “Jelãlokjen eo Ej Tellok.” Ilo July ear errã ñan bõk juõn katak kin Bible. Ilo August ear bed ilo district convention eo im ear liñõre aolepen program eo. Ilo tujemlokin alliñ eo, ear ilok jen kabuñ eo an im ear tellokin juõn ri kwalok nan ejañin baptais. Ear baptais ilo November 1997.

17, 18. Ewi wãwen video ko an Society kar kamol air keie in jibañ armij ñan “lo” men ko lor jitõb?

¹⁷ Video ko an Society rar jibañ elõñ ñan “lo” men ko lor jitõb. Ilo Mauritius juõn emaan ear ilok jen kabuñ eo an kin air jab burukuk. Juõn missionary ear kwalok ñan e burukuk eo an Ri Kennan ro an Jehovah, ilo an kajerbal video eo etan United by Divine Teaching (Burukuk Ikijen Katak ko Rekwojarjar). Ilo bwilõñ, leo ear ba: “Kom Ri Kennan ro an Jehovah ededelok ami bed ilo juõn Paradise!” Ear errã kin juõn katak kin Bible. Juõn sister ilo Japan ear kaluij leo belen ejjab tõmak video eo etan Jehovah’s Witnesses​—The Organization Behind the Name (Ri Kennan ro an Jehovah​—Dolul eo Ilikin Ãt In), im kar kamakit e ñan ekkeini an katak Bible. Elikin an aluiji video eo etan United by Divine Teaching, ear kõnan erom juõn ian Ri Kennan ro an Jehovah. Video eo jilu mõttan in etan The Bible​—A Book of Fact and Prophecy (Bible eo​—Juõn Book kin Mol im Kanan) ear jibañ e ñan jerbale nan in kakabilek ko ilo Bible ilo mour eo an. Eliktata, Jehovah’s Witnesses Stand Firm Against Nazi Assault (Ri Kennan ro an Jehovah Rej Jutak Bin Nae Nitbwil eo an Nazi) ear kwalok ñan e bwe Jehovah ej kakajurlok armij ro An nae nitbwil ko an Satan. Emaan in ear baptais ilo October 1997.

¹⁸ Men kein rej jejjo ian elõñ experience ko jar lañliñ kaki ilo yiõ in jerbal eo ej kab motlok. Rej kwalok bwe Ri Kennan ro an Jehovah ewõr juõn tõmak ej jerbal im bwe Jehovah ej kakajurlok tõmak in ilo an kajerammõn jerbal eo air.​—Jemes 2:17.

Kaddek Tõmak Rainin

19. (a) Ewi wãwen jikin eo jej bed ie ej emõnlok jen eo an Abraham? (b) Jete armij rar kweloktok yiõ eo lok ñan kememe katok in mij eo an Jesus? (c) Ailiñ et ko kar wõr oran ko rekabwilõñlõñ kin joñan armij rar bed ilo kwojkwoj in Kejota eo ilo yiõ eo lok? (Lale chart eo ilo peij 12 ñan 15.)

¹⁹ Ilo elõñ wãwen ko kij ilo ran kein jej bed ilo juõn jikin emõnlok jen eo an Abraham. Je jelã bwe Jehovah ear kajejjet kitien aolep kanan ko an ñan Abraham. Ro nejin Abraham rar jolet Canaan, im rar erom juõn ailiñ elap. (1 Kiñ Ro 4:20; Dri Hibru 11:12) Bareinwõt, enañin 1,971 yiõ ko elikin Abraham ear ilok jen Haran, juõn armij jen line eo an, Jesus, John ri baptais ear baptais e ilo den inem Jehovah make ear kabiti kin jitõb kwojarjar ñan erom Messiah eo, Inen Abraham ilo wãwen eo eyu im ilo jitõb. (Matu 3:16, 17; Galetia 3:16) Ilo Nisan 14, 33 C.E., Jesus ear lelok mour eo an einwõt juõn binmour ñan ro rej jerbale tõmak ilo e. (Matu 20:28; Jon 3:16) Elõñ million kiõ remaroñ bõk kajerammõn ikijen e. Yiõ eo lok, 13,896,312 armij rar kweloklok ibben don ilo Nisan 14 ñan kememe jerbal in yokwe in. Ear juõn kautiej elap kin Jehovah, eo Elap an Kejbãrok kallimur ko!

20, 21. Ewi wãwen armij ro jen ailiñ ko otemjelok rar bõk kajerammõn ikijen Inen Abraham ilo ebeben eo kein kajuõn, im ewi wãwen rej bõk kajerammõn rainin?

²⁰ Ilo ebeben eo kein kajuõn, elõñ jen ailiñ ko otemjej​—jino jen Israel ilo kanniek​—rar jerbale tõmak ilo Inen Abraham im erom ri kabit ro nejin Anij, ro uan “Israel an Anij” ekãl im ilo jitõb. (Galetia 3:26-29; 6:16; Jerbal 3:25, 26) Rar bõk juõn kejatdikdik ebin kin mour indio ilo lañ einwõt Iroij ro mõttan Jesus ilo Ailiñ in Anij. 144,000 wõt renaj bõk jerammõn in, im ewõr jejjo wõt iair ijin ion lal. (Reveles̃õn 5:9, 10; 7:4) Yiõ eo lok, 8,756 rar kwalok tõmak eo air bwe rej mõttan oran in ilo air bõk bread im wine eo ilo kwojkwoj in Kejota eo.

²¹ Enañin aolep Ri Kennan ro an Jehovah rainin rej mõttan “jar eo elap” kar kanan kake ilo Reveles̃õn 7:9-17. Kinke rej bõk kajerammõn ikijen Jesus, rej bõk kejatdikdik eo kin mour indio ilo paradise ion lal. (Reveles̃õn 21:3-5) 5,888,650 ro rar bõk kunair ilo jerbal in kwalok nan ilo 1998 rej kein kamol bwe jar in ej mol an “lap.” Elap an kairuj lojed in lo bwe ej kab juõn alen Russia im Ukraine jimor rar report elõñlok jen 100,000 ri kwalok ro. Ekabwilõñlõñ, bareinwõt, kar report eo jen United States​—1,040,283 ri kwalok ro ilo August! Ailiñ kein kar jilu ian ailiñ ko 19 rar report elõñlok jen 100,000 ri kwalok ro ilo yiõ eo lok.

Kejatdikdik eo Ejjabto Enaj Jejjet Kitien

22, 23. (a) Etke jej aikwij kabin buruõd rainin? (b) Ewi wãwen jemaroñ kamol kij bwe jej einlok wõt Abraham, im jab einwõt ro ejelok air tõmak im Paul ear konono kake?

²² Ro rar bed ilo kwojkwoj in Kejota eo kar kakememej ir kin joñan an ebak ien eo ñe Jehovah enaj kajejjet kitien kallimur ko an. Ilo 1914, kar kairoij Jesus einwõt Kiiñ ilo Ailiñ in Anij ilañ, im jinoin bed eo an ilo iroij in Ailiñ eo. (Matu 24:3; Reveles̃õn 11:15) Aet, Inen Abraham ej kiõ iroij ilo lañ! James ear ba ñan Christian ro ilo ran ko an: “Komin bareinwõt mijmijlolõmi; komin kabin buruemi: bwe [bed eo an Iroij] ej ebak.” (Jemes 5:8) Eokwe, bed eo an ej alikar kiõ! Ej juõn un elap ñan ad kõmman bwe en bin buruõd!

²³ Jen kakajurlok liki eo ad ilo kallimur ko an Anij ilo ad keini ad katak Bible im ilo jar. Ñe jej bokake Nan eo an ejamin bõjrak ad lo jerammõn jen Jehovah. Inem jenaj einwõt Abraham, jab einwõt ro ear mõjno tõmak eo air im rar mij, einwõt Paul ear konono kake. Ejelok juõn men enaj kejebel kij jen tõmak eo ad ekwojarjar. (Jud 20) Kimij jar bwe men in en mol kin aolep ri karejaran Jehovah ilo yiõ in jerbal eo ilo 1999 im wõnmanlok ilo juõn ilju ej indio.

Kwoj Jelã ke?

◻ Ewi wãwen ad maroñ eoroñ Anij rainin?

◻ Ta tokjen ko remaroñ walok jen jar ko ñan Anij ewõr meleleir?

◻ Elañe ilo bokake jej lor tel eo an Jehovah, ewi wãwen men in enaj kakajurlok tõmak eo ad?

◻ Ta men ko ilo report in yiõ eo (peij 12 ñan 15) kwar lo bwe elap an kabwilõñlõñ?

[Jaat eo ilo peij 12-15]

1998 SERVICE YEAR REPORT OF JEHOVAH’S WITNESSES WORLDWIDE

(Lale bok in)

[Pija ilo peij 16]

Elañe jej bokake Nan eo an Jehovah, liki eo ad ilo kallimur ko an enaj kajurlok

[Pija ilo peij 18]

Tõmak eo ad ej kajurlok ñe jej bõk kunad ilo jerbal in kwalok nan