Men In Aorõk In Ibbem Ilo Jãbi Bũdej Ko

“A men in aurõk in ibem ej ilo jãbi brij ko, bwe maroñ eo e kanuij lap en jen Anij, im jab jen kim.”​—2 DRI KORINT 4:7.

1. Joñok eo an Jesus en kar rejañ kij ilo wãwen et?

KE Jehovah ear jek nalõmen ijin ion lal, Jesus ear make lo mõjno ko an armij. Joñok eo an kin an kejbãrok an tiljek en kanuij rejañ kij! Ri jilek eo ej jiroñ kij: “Im emwij kir kom ñõn men in: bwe Kraist e ar iñtan kin kom, im likit joñok ñõn kom, bwe komin anõke jenkwõn ne ko neen.” (1 Piter 2:21) Ilo an kõttãik e bwe ren jek nalõmen, Jesus ear anjo ion lal. Ear bareinwõt kaberan ri jilek ro an ñan erom ro rej bõk anjo. (Jerbal 4:13, 31; 9:27, 28; 14:3; 19:8) Im ear lelok nan in rejañ ko remõn ilo jemlokin katak eo an eliktata ñan ir! Ear keañ: “Men kein I ar konono ñõn kom, bwe ilo Ña komin ainemõn. Ilo lõl komij iñtan: a komin mõnõnõ; Ña I ar bõk anjo ion lõl.”​—Jon 16:33.

2. Ilo keidi ibben bilo eo an lal, meram et eo ewõr ibbed?

² Eindein, elikin an keidi bilo eo me “anij in lõl in” ej bõktoke ibben “maram in gospel” eo, ri jilek Paul ear ba kin jerbal in kwalok nan eo ad eaorõk: “A men in aurõk in ibem ej ilo jãbi brij ko, bwe maroñ eo e kanuij lap en jen Anij, im jab jen kim; Ilo ial ko otemjej kimij obrõk, a jab jobõj; kimij biuk, a e jañin joko kejatrikrik; Rej matõrtõre kim, a kim jab mõke iam; rej jolõllok kim, a kim jab joko.” (2 Dri Korint 4:4, 7-9) Meñe jej “jãbi brij ko” remõjno, kin an emõn an Anij jek nalõmeid kin jitõb eo an jemaroñ lukkun anjo ion lal eo an Satan.​—Dri Rom 8:35-39; 1 Dri Korint 15:57.

Jek Nalõmen ilo Israel eo Etto

3. Ewi wãwen Isaiah ear kwalok kin jek nalõmen eo an ailiñ in Ri Jew ro?

³ Jehovah ej jek nalõmen ejjab kajjojo armij wõt ak bareinwõt aolepen juõn ailiñ. Ñan wanjoñok, ke Israel eo etto ear kõttãik e ñan an Anij jek nalõmen, ailiñ eo ear lo elap tõbrak. Ak ear kabin buruen ilo juõn ial in kiblia. Tokjen men in, Ri Kõmanmõn eo an Israel ear bõktok “wo” ion. (Aiseia 45:9) Ilo ebeben eo kein karalitok B.C.E., Isaiah ear konono ibben Jehovah kin jerawiwi ko relap an Israel, ilo an ba: “O Jeova, Kwe jemem; kim kle, im Kwe am potter; im kim otemjej men in kõmõn an peõm. . . . emwij kejebeplok jikem otemjej rej men in mõnõnõ.” (Aiseia 64:8-11) Kar jek Israel juõn jãbi ej tellokin kajeebeploke.

4. Ta wanjoñok eo Jeremiah ear kõmmane?

⁴ Juõn ebeben tokelik, ke ran in idenwõne eo ear ebaktok, Jehovah ear jiroñ Jeremiah ñan bõk juõn jãbi bũdej im etal ibben jet maan ritto ro in Jerusalem ñan Komlal in Hinnom, im ear jiroñ e: “Kwoj aikwij rupe jãbi eo iman mejen maan ro rej etal ibbam. Im kwoj aikwij ba ñan ir, ‘Eñin men eo Jehovah in inelip ej ba: “Ilo ejja wãwen in I naj rupe armij rein im jikin kwelok in einwõt juõn armij ej kabedakilkil jãbi an juõn potter bwe ejelok juõn en maroñ kõmmane bwe en bar einwõt kar mokta.”’”​—Jeremiah 19:10, 11, New World Translation.

5. Ewi lapin kar ekajet eo an Jehovah nae Israel?

⁵ Ilo 607 B.C.E., Nebuchadnezzar ear kajeebeplok Jerusalem im temple eo an im bõk Ri Jew ri jibokwe ro ñan Babylon. Ak elikin air jibokwe iumin 70 yiõ ko, Ri Jew ro rar ukwelok rar maroñ jeblak ñan kõkãl Jerusalem im temple eo an. (Jeremiah 25:11, NW) Bõtab, tok ñan ebeben eo kein kajuõn C.E., ailiñ eo ear bar ilok jen Ri Potter eo Elap, im eliktata ear kõmman jorrãn eo elaptata ilo an urõte eo make Nejin Anij. Ilo 70 C.E., Anij ear kajerbal Kajur in Lal eo an Ri Rome einwõt ri idenwõne eo an ñan kokkure jukjuk im bed eo an Ri Jew ro, im kajeebeplok Jerusalem im temple eo an. Jehovah eban bar jek nalõmen Ailiñ in Israel einwõt juõn men “ekwojarjar im aibujuij.”a

Jek Nalõmen juõn Ailiñ ilo Jitõb

6, 7. (a) Ewi wãwen Paul ej kwalok kin jek nalõmen eo an Israel eo ilo jitõb? (b) Ta oran eo eyu kin “jãbi ko an tiriamo,” im ewi wãwen kar ejaake?

⁶ Ri Jew ro me rar bõk Jesus kar jek nalõmeiir einwõt bedbed in ro uan juõn ailiñ ekãl, “Israel an Anij” ilo jitõb. (Dri Galetia 6:16) Inem, nan ko an Paul rekkar: “Ta, dri potter e jab maroñ ke ion kle, bwe en kõmõn jen juõn wõt iõkin, juõn jãbi ñõn aibujuij, im juõn ñõn wan? . . . Anij, ke E kõnan kwalok An illu, im kalikar An kajur, E ar kijenmij ilo elap meanwõr kin jãbi ko an illu re pojõk ñõn kokkure: Im bwe En kalikar mweien An aibujuij ilo jãbi ko an tiriamo, ko E kar kapojõk ir mokta ñõn aibujuij.”​—Dri Rom 9:21-23.

⁷ Tokelik Jesus eo ear jerkakbiji ear kalikar bwe “jãbi ko an tiriamo” renaj 144,000 orair. (Reveles̃õn 7:4; 14:1) Ke Israel ilo kanniek ear jab maroñ kauñ oran in, Jehovah ear kalaplok tiriamo eo an ñan kobaik armij in ailiñ ko. (Dri Rom 11:25, 26) Congregation in Christian eo ekãl ear laplok ilo mõkaj. Iloan wõt 30 yiõ ko news eo emõn kar “kwalok e ñõn ro otemjej rej ber iomin lõñ.” (Dri Kolosse 1:23) Men in ear aikwiji air lolorjake elõñ congregation ko rej jebliklik ilo bukwon eo.

8. Wõn ro rar ejaake governing body eo jinoin, im ewi wãwen kumi in ear eddeklok?

⁸ Jesus ear keboj 12 ri jilek ro ñan air erom governing body eo mokta, im kamineneik ir im bareinwõt ro jet ilo jerbal in kwalok nan. (Luk 8:1; 9:1, 2; 10:1, 2) Ilo Pentecost 33 C.E., kar kajutak congregation eo in Christian, im tokelik governing body eo kar kalaploke ñan kobaik “ro dri jilik im elder ro” ilo Jerusalem. Iumin juõn ien eaetok, James jatin Jesus, meñe ear jab juõn ian ri jilek ro, ear jerbal einwõt ri tel. (Jerbal 12:17; 15:2, 6, 13; 21:18) Ekkar ñan ri jeje bwebwenato Eusebius, ri jilek ro rar erom kein kajeroro kin matõrtõr im jebliklok ñan territory ko jet. Ejaak in governing body eo ear oktak ekkar ñan aikwij.

9. Ta wãwen eo ekaburomõjmõj Jesus ear kanan kake bwe enaj walok?

⁹ Ilo tu-jemlokin ebeben eo kein kajuõn, ‘dri kijirãt, Devil eo,’ ear ‘jeor tãõ ko” ibwiljin ri jolet ro kin “ailiñ in lõñ” rej einwõt wheat. Jesus ear kanan bwe renaj kõtlok an walok men in ekaburomõjmõj mae ien madmõd eo ilo “lokõn lõl.” Inem, ilo ien eo ‘ro remõn re naj rabõlbõl im einwõt al ilo ailiñ in Jemeir.’ (Matu 13:24, 25, 37-43) Men in enaj walok ñããt?

Jek Nalõmen Israel an Anij Rainin

10, 11. (a) Ewi wãwen jek nalõmen eo an Israel an Anij ilo ran kein ear ijjino? (b) Ta katak ko rej idaptõk ibben don jemaroñ loi ilo Christendom im bwiljin Ri Katak Bible ro rekijejeto?

¹⁰ Ilo 1870, Charles Taze Russell ear ejaake juõn kumi in katak Bible ilo Pittsburgh, Pennsylvania, U.S.A. Ilo 1879 ear jino kõmman magazine eo kajjojo alliñ rej jelã kake rainin einwõt Imõniaroñroñ. Ri Katak Bible rein, einwõt kar kir ir, ejjabto rar kile bwe Christendom ear tõmak ilo katak ko rejjab wawa ion Bible an ri pagan, einwõt aan armij ejjab maroñ mij, hades einwõt jikin kijeek eo ijo rej kaeñtan armij ie, purgatory, jilu anij ilo juõn, im baptais ajiri ro.

¹¹ Ak, elaplok an aorõk armij rein rej yokwe mol ko ilo Bible rar kajeblak irinekatak ko remol ilo Bible, einwõt bõk lomor ikijen katok in binmour eo an Jesus im jerkakbiji ñan mour indio ilo juõn paradise eainemõn ion lal iumin Ailiñ in Anij. Ilañin men otemjej, rar lukkun kalikar bwe ien eo ñan kautiej Jehovah Anij einwõt Iroij Bõtata eo ijoko otemjej ear ebak. Ri Katak Bible ro rar tõmak bwe Jar eo an Iroij ear bojak in uake: “Jememuij i lõñ, En kwojarjar Etõm. En itok Am ailiñ. Ren kõmõnmõn ankil Am einwõt i lõñ, bareinwõt ion lõl.” (Matu 6:9, 10) Jitõb kwojarjar an Anij ear jek nalõmeiir ilo juõn dolul in Christian ro rej yokwe ainemõn ibelakin lal.

12. Ewi wãwen Ri Katak Bible ro rar itok in kile juõn ran eaorõk?

¹² Juõn katak emũlal kin Daniel jebta 4 im kanan ko jet rar kamol ñan Ri Katak Bible ro bwe bed eo an Jesus einwõt King in Messiah eo ear ebak. Rar kile bwe 1914 kar ien eo im “ien ko an dri ailiñ ko” enaj jemlok. (Luk 21:24; Ezekiel 21:26, 27, NW) Ri Katak Bible ro rar mõkaj in kalaplok jerbal eo air, im ejaake class ko in katak Bible (tokelik kar naetair congregation ko) ilujen United States. Ilo jinoin yiõ ko ilo 1900, jerbal eo air in katakin Bible ear jededlok ilo Europe im Australasia. Juõn karõk eo emõn ear juõn men in aikwij.

13. Ri Katak Bible ro rar bõk lajrak et eo ekkar ñan kien, im jerbal et eo ekabwilõñlõñ president eo mokta an Society ear kõmmani?

¹³ Ñan kõmman bwe Ri Katak Bible ro ren jerbal ekkar ñan kien, kar kõmman Zion’s Watch Tower Tract Society ilo juõn corporation ilo 1884 ilo United States, im headquarter eo ear bed ilo Pittsburgh, Pennsylvania. Director ro rej jerbal einwõt juõn central Governing Body, im lolorjake jerbal in kwalok kin Ailiñ in Anij ibelakin lal. President eo mokta an Society, Charles T. Russell, ear je jiljino volume ko kin Studies in the Scriptures im ear kõmman elõñ trip ko in kwalok nan. Ear bareinwõt jabawõt kin money ko an make ear korloke mokta jen ear jino katak Bible ñan jerbal in kwalok nan kin Ailiñ eo ibelakin lal. Ilo 1916, ke Tarinae eo Elap ear wõnmanlok ilo Europe, Brother Russell eo ear mõk ear mij ilo juõn ian trip in kwalok nan eo an. Ear lelok aolepen mour im mweiuk ko an make ñan kajededlok jerbal in kwalok nan kin Ailiñ in Anij.

14. Ewi wãwen J. F. Rutherford ear ‘tõrinae tõrinae emõn’? (2 Timote 4:7)

¹⁴ Joseph F. Rutherford, eo ear juõn ri ekajet iumin jidik ien ilo Missouri, ear erom president eo tok juõn. Tokjen an rejetak mol ko ilo Bible ilo beran, ri tel ro an Christendom rar koba ibben ro rej jerbal ilo kien ñan “kõmõn men in kejorran kin kien.” Ilo June 21, 1918, rar kalbuj Brother Rutherford im bar jet jiljilimjuõn ri tel ro an Ri Katak Bible ro, kin elõñ kaje kin kalbuj ko rej 10 lok ñan 20 yiõ ko aetokin im rej jerbal ilo ejja ien eo wõt. Ri Katak Bible ro rar jumae bebe in. (Sam 94:20; Dri Pilippai 1:7) Ke rar appeal (kajitõk bwe bar juõn en ekajete ir), kar kõtlok ir ilo March 26, 1919, im tokelik kar lukkun karreo etair jen ruõn eo ewan kin air jumae kien eo.b Experience in ear jerbal ñan jek nalõmeiir ri keañ kin mol eo. Kin jibañ jen Jehovah, rar kajerbal jabdewõt wãwen remaroñ ñan anjo ilo tarinae eo ilo jitõb ñan keañ kin news eo emõn jekdon jumae eo an Babylon eo Elap. Tarinae in ej wõnmanlok wõt tok ñan yiõ in 1999.​—Keidi Matu, chapter 23; Jon 8:38-47.

15. Etke yiõ eo 1931 ear juõn ien eaorõk ilo bwebwenato eo an Ri Kennan ro an Jehovah?

¹⁵ Ilo yiõ ko ilo 1920 ko im 1930 ko, Israel eo an Anij ro emwij kabit ir rar wõnmanlok im jek nalõmeiir iumin tel eo an Ri Potter eo Elap. Meram in kanan jen Jeje ko rar romaklok, im lelok nebar ñan Jehovah im jitõñlok ñan Ailiñ in Messiah eo an Jesus. Ilo 1931 Ri Katak Bible ro rar lañliñ ñan bõk ãt eo ekãl, Ri Kennan ro an Jehovah.​—Aiseia 43:10-12; Matu 6:9, 10; 24:14.

16 im book eo ilo page 13. Ñããt eo oran in 144,000 ear uñ, im ta men in kamol eo kin men in?

¹⁶ Ilo yiõ ko ilo 1930 ko oran “ro dri kir, ro ar kãlet ir, im retiljek,” 144,000 eo, ear alikar an uñ orair. (Reveles̃õn 17:14; lale book eo ilo page 13.) Jej jaje jete ri kabit ro kar aini ir jen ibwiljin “tãõ ko” ilo ebeben ko remarok ilo kõkkar kin buñ jen tõmak eo elap an Christendom. Ak ilo 1935 ear wõr joñan in 52,465 ri kwalok ro ibelakin lal, jen joñan eo elaptata in 56,153, ro rar kalikar kejatdikdik eo air kin mour ilañ ilo air bõk bread im wine eo ilo ien Kwojkwoj in Kejota eo. Ta eo enaj ilju eo an ro relõñ rejañin aini ir?

“Lo! Jar Elap”

17. Ta men eo ear walok ilo bwebwenato eo an Ri Kennan ro an Jehovah ilo 1935?

¹⁷ Ilo juõn convention eo ear walok jen May 30 ñan June 3, 1935, ilo Washington, D.C., U.S.A., Brother Rutherford ear kwalok juõn katak ekabwilõñlõñ etan “Jar eo Elap.”c Kumi in, “eo ejelok armij ej maroñ in bwinir,” enaj kar walok ñe seal eo eliktata an 144,000 in Israel eo ilo jitõb ear ebak an dedelok. Rein bareinwõt renaj jerbale tõmak ilo kajur in binmour eo an “bõtõktõkin Lam,” Jesus, im rej karejar ekkar ñan lajrak in kabuñ ilo temple eo an Jehovah. Einwõt juõn kumi, renaj “itok jen iñtan eo elap” im mour, ñan jolet Paradise eo ion lal ijo “e naj ejelok bar mij.” Iumin jet yiõ ko mokta jen convention eo, rar konono kake kumi in einwõt Jonadab ro.​—Reveles̃õn 7:9-17; 21:4; Jeremiah 35:10, NW.

18. Ilo wãwen et ko yiõ eo 1938 ear aorõk?

¹⁸ Yiõ eo 1938 ear aorõk ñan kalikar kin class ko ruo. Magazine in The Watchtower an March 15 im April 1, 1938, rar kwalok kin katak eo ruo mõttan in kin “Bwij eo An” im rar kalikar kin jikin ko rekkar an bwen ri kabit ro im ro mõttair, jar eo elap. Inem magazine ko in June 1 im June 15 rar kwalok kin katak ko ikijen “Lajrak eo,” eo ear wawa ion Aiseia 60:17. Kar rejañ aolep congregation ko ñan kajitõk ibben Governing Body eo ñan jitõñ servant ro ilo bukwon eo, im ilo wãwen in kajutak juõn lajrak emõnlok, ijitõñ in Anij, im theocratic. Congregation ko rar kõmman eindein.

19 im footnote. Ta men in kamol ko rej kalikar bwe kir eo kin “sheep ro jet” ear wõnmanlok iumin 60 yiõ ko?

¹⁹ Report eo ilo 1939 Yearbook of Jehovah’s Witnesses ear ba: “Ri kabit ro ri kaloran Christ Jesus ion lal kiõ reiet, im orair eban laplok. Ilo Jeje ko rej kir rein einwõt ‘bwen’ nejin Zion, dolul eo an Anij. (Rev. 12:17) Iroij eo ej aini kiõ ‘sheep ro jet’ an, ro rej ejaak in ‘jar eo elap.’ (John 10:16) Ro rej aini kiõ rej ro mõttan bwen ri kabit ro. Jen ien in manlok ro rej mõttan ‘sheep ro jet’ renaj laplok mae ien emwij aini ‘jar eo elap.’” Bwen ri kabit ro kar jek nalõmeiir ñan lale ainitok eo an jar eo elap. Rein bareinwõt aikwij jek nalõmeiir.d

20. Ta oktak ko ilo lajrak rar walok jen 1942?

²⁰ Ilo January 1942, ke ear bwiltõñtõñ Bata eo an Lal Kein Ka II, Joseph Rutherford ear mij im Nathan Knorr ear bõk jikin einwõt president. Rej kememej ilo yokwe president eo kein kajilu an Society eo kin an kajutak theocratic school ko ilo congregation ko im School in Gilead ñan kamineneik missionary ro. Ilo annual meeting eo an Society ilo 1944, ear kejelã bwe renaj kõkãl charter eo an Society bwe air mõttan ro uan kumi eo enaj wawa ion mour in jitõb eo air, im jab joñan jabawõt eo air. Iumin 30 yiõ ko man tok, oran ri jerbal ro rej kwalok nan ear laplok jen 156,299 ñan 2,179,256 ibelakin lal. Ilo 1971-75 rar aikwij kõmman oktak ko jet ilo dolul eo. Ejako an juõn armij eo ej jerbal einwõt president maroñ lolorjake aolep jerbal ko kin Ailiñ eo ibelakin lal. Governing Body eo, me chairman eo ej oktak kajjojo ien, kar laplok ñan 18 uan ri kabit ro, enañin jimettan iair ear dedelok mour eo air ion lal.

21. Ta eo ear kõmman bwe ro uan bwij eo edik en tellokin bõk Ailiñ eo?

²¹ Bwen ro uan bwij eo edik kar jek nalõmeiir iumin elõñ yiõ ko in air bõk melejoñ ko. Rej bõk rejañ, kin an alikar bwe ‘Jitõb Ej mõke kennan ñõn air.’ Jesus ear jiroñ ir: “A komeo, ro r’ar ber iba ilo men ko r’ar kabo Iõ kaki. Im Ij likit ñõn kom juõn ailiñ einwõt Jema e ar likit ñõn Iõ: Bwe komin mõña im irak iturin Aõ tebel ilo Aõ ailiñ; im kom naj jijõt ion tron ko, im ekajet joñoul im ruo bwijin Israel.”​—Dri Rom 8:16, 17; Luk 12:32; 22:28-30.

22, 23. Ewi wãwen rej jek nalõmen bwij eo edik im sheep ro jet?

²² Ke oran bwen ri kabit ro ear diklok, kar lelok ñan brother ro rej ritto ilo jitõb jen jar eo elap maroñ eo ñan lolorjake men ko lor jitõb an enañin aolep congregation ko ibelakin lal. Im ñe ri kabit Ri Kennan eo eritto im eliktata ej kadedelok ial in mour eo an ion lal, bwirak sa·rimʹ ro an sheep ro jet naj bojak in lolorjake eddo ko einwõt class in iroij ion lal.​—Ezekiel 44:3, NW; Aiseia 32:1.

²³ Bwij eo edik im sheep ro jet jimor rej wõnmanlok im jek nalõmeiir ñan jãbi ko ñan nebar. (Jon 10:14-16) Meñe kejatdikdik eo ad ej ñan “lõñ ko rekãl” ak “lõl ekãl,” jen uak kin aolepen buruõd ñan nan in kir eo an Jehovah: “A komin mõnõnõ im lõñliñ in drio kin men ko Ij kõmõni; bwe lo, Ij kõmõn Jerusalem men in mõnõnõ, im armij ro an bwe ren lõñliñ.” (Aiseia 65:17, 18) Jej kejatdikdik bwe kij armij ro remõjno jenaj karejar ilo ettã buru ien otemjej, im bwe “maroñ eo e kanuij lap” en jek nalõmeid​—kajur eo an Anij ikijen jitõb kwojarjar!​—2 Dri Korint 4:7; Jon 16:13.

[Kõmel̦el̦e ko itulal̦]

Kwoj Kememej Ke?

◻ Ilo an kõttãik e ñan an Jemen jek nalõmen, ewi wãwen Jesus ear Joñok eo ad?

◻ Jek nalõmen et eo ear walok ilo Israel eo etto?

◻ Ewi wãwen rej jek nalõmen “Israel an Anij” ñan kiõ?

◻ Kar jek nalõmen “sheep ro jet” kin ta un eo?

[Bo̦o̦k eo ilo peij 12]

Nalõmen ko Jet ilo Christendom

Juõn ennan ilo Associated Press jen Athens, Greece, ear report kin ri tel eo ekãl kar jitõñ e ilo Kabuñ an Greek Orthodox: “En kar juõn ri keañ kin ainemõn. Ak ri tel eo an Kabuñ an Greek Orthodox ej einwõt juõn general ej kebojak ñan tarinae.

“‘Jej bojak, elañe ewõr juõn aikwij, ñan katorlok bõtõktõk im kõmman men in katok ko. Kij, einwõt juõn kabuñ, jej jar kin ainemõn . . . Ak jej kajerammõn kein tarinae ko rekwojarjar ñe jej aikwij,’ Archbishop Christodoulos ear ba ilo ran eo ekwojarjar in Assumption of the Virgin, eo rej bareinwõt kememe einwõt ran eo rej kautiej ri tarinae ro ilo Greece.”

[Bo̦o̦k eo ilo peij 13]

“Ejelok Korlok!”

Ilo juõn ien kadiojlok jen School in Gilead ilo 1970, Frederick Franz, vice-president ilo ien eo an Watch Tower Society, ear jiroñ ri school ro kin maroñ eo bwe ir, ro aolepeir rar mõttan sheep ro jet ibben kejatdikdik eo kin mour ion lal, renaj baptais juõn armij eo emaroñ ba bwe ej juõn ian bwen ri kabit ro. Men in emaroñ ke walok? Eokwe, ear kamelele bwe John Ri Baptais ear juõn ian sheep ro jet, im ear baptais Jesus im jet ian ri jilek ro. Inem ear kajitõk elañe ear wõr wõt juõn nan in kir ñan aini ro jet ian bwen ri kabit ro. “Jab, ejelok korlok!” ear ba. “Kir in ear jemlok etto lok ilo 1931-35! Ejelok korlok. Inem, wõn rein reiet rej kab koba ibbed im rej bõk bread im wine ilo Kwojkwoj in Kejota? Elañe rej mõttan bwen ri kabit ro, rej ro rej bõk jikin ro jet! Ir, rejjab korlok in bwen ri kabit ro, ak rej ro rej bõk jikin ro rar buñ jen tõmak.”

[Pija eo ilo peij 9]

Elap ad kaorõk men in aorõk in kin jerbal in kwalok nan!

[Pija eo ilo peij 10]

Israel eo etto ear erom juõn jãbi ebojak wõt ñan kokkure