Ri Potter Eo Elap In Jerbal Eo An
“[Kwon erom juõn] jãbi ñõn nebar, . . . pojõk ñõn jerbal remõn otemjej.”—2 TIMOTE 2:21.
1, 2. (a) Ewi wãwen men in kõmanmõn an Anij kin maan im kõrã juõn jerbal ekabwilõñlõñ? (b) Ri Potter eo Elap ear kõmman Adam im Eve ñan un et eo?
JEHOVAH ej Ri Potter eo Elap. Juõn ian men in kõmanmõn eo emejaja ian men in kõmanmõn ko an kar eo jemed moktata, Adam. Bible eo ej jiroñ kij: “Im Jeova Anij e ar kõmõn im nawãwen armij jen bõñõlñõl in ene; im E ar ukwi ilo bodin menono in mour; im armij eo ej mour,” melelen, juõn “men in kõmanmõn eo ej menono.” (Jenesis 2:7, footnote) Men in kõmanmõn eo moktata armij ear wãppen, kar kõmmane ilo wãwen wõt Anij, juõn men in kamol kin meletlet eo An ekwojarjar im yokwe kin wãnik eo emol im ekajet jimwe.
2 Ilo an kajerbal mõttan ko in dri in katin Adam, Anij ear eik bareinwõt juõn rejetan im ri jibañ an maan—kõrã. Aibujuij eo ejelok likjap ie an Eve ear le jen meñe kõrã ro redeeo tata rainin. (Jenesis 2:21-23) Bareinwõt, kar lelok ñan ri belele ro ruo moktata enbwin im lemnak ko kar elmokoti ilo wãppen ñan kõtõbrak jerbal eo kar karõke ñan ir ñan kõmman lal in bwe en juõn paradise. Kar bareinwõt lelok ñan ir kajur ñan kajejjet kien eo an Anij emwij je ilo Jenesis 1:28: “Komin timon im orlok, im kobrõk lõl, im kajur jen e; im komin iroij ion iik in lojit, im ion bao in mejatoto, im ion men otemjej rej mour im makõtkit ion lõl.” Eliktata, jikin kallip eo ibelakin lal en kar karmije kin elõñ billion armij ro relañliñ, im lukluk ibben don ilo yokwe eo me ej “kein lukwõj ej kowãppemi.”—Dri Kolosse 3:14.
3. Ewi wãwen jemed im jined eo moktata rar erom jãbi ko ñan wan, im kin tokjen et eo?
3 Ekaburomõjmõj, bwe jemed im jined ro moktata rar kãlet ñan jumae maroñ eo an Ri Kõmanmõn Iroij Bõtata eo air, Ri Potter eo Elap. Ial eo air ear erom einwõt wãwen eo Aiseia 29:15, 16 ej kwalok kake: “Wo ñõn ro rej kanuij noj air bebe jen Jeova, im jerbal ko air rej ilo marok, im rej ba, Wõn eo ej lo kim? im wõn eo e jela kim? . . . Ren lemnok dri potter einwõt kle; bwe men in kõmõn en ba ñõn eo e ar kõmõn e, E ar jab kõmõnmõn iõ; a men in nawãwen en ba ñõn eo e ar nawãwen e, Ejelok jela iben ke?” Kiblia eo air ear bõktok jorrãn—liakelok ñan mij indio. Bareinwõt, armij otemjej ro rar waloktok jen ir rar jolet jerawiwi im mij. (Dri Rom 5:12, 18) Aibujuij in men in kõmanmõn eo an Ri Potter eo Elap ear mũlal an jorrãn.
4. Jemaroñ jerbal einwõt jãbi ñan aibujuij kin karõk et eo?
4 Bõtab, meñe jej bed ilo jab wãppen, kij ro nejin ri jerawiwi eo Adam jemaroñ nebar Jehovah ilo nan ko an Sam 139:14: “I naj kamolol Yuk, bwe Am kõmõnmõn iõ men in lelñoñ im bwilõñ: jerbal ko Am men in bwilõñ; im men in, aõ e kanuij jelakake.” Ak, elap an kaburomõjmõj bwe men in kõmanmõn eo jinoin an Ri Potter eo Elap ear lukkun jorrãn!
Ri Potter eo Ej Kalaplok Jerbal eo An
5. Kabel eo an Ri Potter eo Elap ear jerbal ilo wãwen et?
5 Ekamõnõnõ, bwe kabel eo an Ri Kõmanmõn eo ad einwõt juõn Ri Potter ear jerbal ele jen an eik men in kõmanmõn eo an ilo jinoin kin armij. Ri jilek Paul ej jiroñ kij: “O armij, a wõn kwe kwoj uak jumae Anij? Ta, men in kõmõn en ba ke ñõn eo e ar kõmõn e, Etke kw’ar kõmõn iõ im einwõt? Ta, dri potter e jab maroñ ke ion kle, bwe en kõmõn jen juõn wõt iõkin, juõn jãbi ñõn aibujuij, im juõn ñõn wan?”—Dri Rom 9:20, 21.
6, 7. (a) Ewi wãwen elõñ rainin rej kãlet ñan air jek nalõmeiir kin wan? (b) Ewi wãwen ro rewãnik rej jek nalõmeiir kin aibujuij?
6 Aet, jet ian jerbal ko an Ri Potter eo Elap naj nalõmeiir ñan emõn, im jet, ñan wan. Ro rej kãlet ñan lor lal in ke ej wanlallok ilo bedkat in mour enana rej nalõmeiir ilo juõn wãwen enaj kakõlleik ir ñan jorrãn. Ñe King eo eaibujuij, Christ Jesus, enaj itok ñan bõktok ekajet, jãbi rot kein ñan wan renaj koba aolep armij ro ebin burueir me renaj, einwõt Matu 25:46 ej ba: “ilok ñan jorrãn eo indio.” Ak “ro remõn” einwõt sheep, ro kar nalõmeiir ñan jerbal “emõn,” renaj jolet “mour indio.”
7 Ilo ettã buru, rein rewãnik naj kõttãik ir ñan air jek nalõmeiir ilo kwojarjar. Rar deloñ ilo ial in mour eo an Anij. Rar bõk nan in kakabilek eo jemaroñ loe ilo 1 Timote 6:17-19: “Ren jab kejatrikrik ir kin mweiuk ko mweiuk torlok, a kin Anij, eo Ej wujleptok ñõn kij men ko otemjej bwe jen mõnõnõ kaki.” Rar jerbale nan kein ñan ir make: “bwe ren kõmõnmõn emõn, bwe ren mweie kin jerbal ko remõn, im ren mol kab pojõk in lelok men in tiriamo: Im ren mõke kamweiukwiuk ir kin foundes̃õn emõn mae ien ej itok, bwe ren bõk mour eo emol.” Kar jek lõmeiir ikijen mol eo ekwojarjar im rej jerbale tõmak eo ebin ilo men in letok eo an Jehovah ikijen Christ Jesus, eo “e ar mõke lelok E bwe En binmour ñõn armij otemjej” bwe en kajeblak aolep men ko rar jako kin jerawiwi eo an Adam. (1 Timote 2:6) Inem, jej aikwij bokake ilo mõnõnõ nan in kakabilek eo an Paul ñan “kõnõk armij ekãl, kõkãl e [kar eiki ekkar] ñõn jelalokjen im ilo wãwen Eo e ar kõmõnmõne”!—Dri Kolosse 3:10.
Naj Kain Jãbi Rot Kwe?
8. (a) Ta eo ej beek kin kain jãbi rot naj juõn armij? (b) Ta men ko ruo rej jek nalõmen juõn armij?
8 Ta eo ej beek kin naj kain jãbi rot juõn armij? Lemnak eo an im mwilin. Mokta kõnan ko an buru rej nawãwen men kein. King eo emeletlet Solomon ear ba: “Buruen juõn armij ej kine ial eo an; a Jeova ej kajime jetñakin neen.” (Jabõn Kennan Ko 16:9) Kein karuo, men ko jej roñjaki im loi, ro jej tel ad ibbeir im experience ko ad rej nawãweid. Inem, elap an aorõk bwe jen bokake nan in kakabilek eo: “Kwon etetal iben ro dri meletlet, inem kwo naj meletlet; a eo ej komao iben ro dri bwebwe, e naj jorran kake.” (Jabõn Kennan Ko 13:20) Einwõt 2 Piter 1:16 ej kakkõl kij, jej aikwij bõprae ad “kajeoñwe bwebwenato wan ko an dri kabel,” ak ekkar ñan Knox’s Roman Catholic version, “inoñ ko kine in armij.” Men kein rekoba elõñ katak ko im kwojkwoj in kabuñ ko an ri buñ jen tõmak eo Christendom.
9. Ewi wãwen jemaroñ emmakit ilo emõn ñe Ri Potter eo Elap ej jek nalõmeid?
9 Inem, ekkar ñan uak eo ad, Anij emaroñ nalõmeid. Iman Jehovah ilo ettã buru, jemaroñ elij jar eo an David: “Kwon kalimjek iõ, O Anij, im jela buruõ: Kwon melejoñ iõ im jela lemnok ko aõ. Im Kwon lo elañe jabrewõt ial enana iba: im Kwon tel iõ ilo ial ej ñõn in drio.” (Sam 139:23, 24) Jehovah ej karõk bwe ren kwalok kin ennan in Ailiñ eo. Buruõd ear uak ilo kamolol ñan news eo emõn im ñan tel eo an elaplok. Ikijen dolul eo an ear letok ñan kij jerammõn ko ewõr kõtair ñan kwalok nan kin news eo emõn; jen bõki im kaorõki.—Dri Pilippai 1:9-11.
10. Ewi wãwen jen kate kij ilo ad lor program ko kin men ko lor jitõb?
10 Eaorõk bareinwõt bwe jen liñore Nan in Anij, im ran otemjej lor juõn program in read Bible im kõmman bwe Jeje ko im jerbal eo an Jehovah en juõn bedbed in bwebwenato ibben family ko ad im ibwiljin ro mõttad. Program in kabuñ rej kõmmane ilo jibboñ ibben kajjojo family in Bethel im kumi in missionary an Ri Kennan ro an Jehovah ekkã an koba, ilo kajjojo week elikin juõn week ikõtan week eo tok juõn, juõn karõk in read Bible ekadu ak kin Yearbook eo ekãl. Family eo am emaroñ ke kõmman juõn karõk einlok wõt in? Bareinwõt, kij aolep jenaj bõk tokjen ko relap ikijen ad koba ibben don ilo congregation in Christian, ilo ad kwelok ibben don, im elaptata ilo ad bõk kunad ilo katak in Imõniaroñroñ kajjojo week!
Nalõmeid ñan Kijenmij kin Melejoñ ko
11, 12. (a) Ewi wãwen jemaroñ jerbale nan in kakabilek eo an James ikijen melejoñ ko ilo ad mour jen ran ñan ran? (b) Ewi wãwen experience eo an Job ej rejañ kij ñan kejbãrok ad tiljek?
11 Ilo mour ko ad jen ran ñan ran, Anij ej kõtlok bwe jet wãwen ko ren walok, jet iair remaroñ bin ad kijenmij kaki. En ewi wãwen ad lemnak kin men kein? Einwõt Jemes 4:8 ej kakabilek, ren jab kõmman ad meo, ak jen ebaklok ñan Anij, liki e kin aolepen buruõd, im tõmak bwe ñe jej ‘druaklok ñõn Anij, E naj druakwoj ñõn [kij].’ Emol, jenaj aikwij kijenmij kin abañ ko im melejoñ ko, ak rej jibañ ñan nalõmeid, kin juõn tokjen ekamõnõnõ. Jemes 1:2, 3 ej kamol ñan kij: “Ro jãtiõ, komin likit e men in lõñliñ otemjej ñe melejoñ kaju wãweir rej kabol kom; Bwe kom jela men in kamol ami tõmak ej jerbale kijenmij.”
12 Jemes ear bareinwõt ba: “Ejelok armij en ba ñe kabo e, Anij ej kabo iõ: bwe men ko renana re ban kabo Anij, im Ej kabo ejelok armij: A emwij kabo jabrewõt armij ñe mõm ko an rej karel buruen im kamej e.” (Jemes 1:13, 14) Melejoñ ko ñan kij remaroñ lõñ im oktak jen don, ak einwõt kar ñan Job, rej aolep jerbal ñan jek nalõmeid. Jeje ko rej letok juõn nan in kamol elap ilo Jemes 5:11: “Lo, jej likit ir remõnõnõ ro r’ar kijenmij; kom ar roñ kin an Job kijenmij, im kom ar lo jemlok eo jen Iroij, ekijkan Iroij e kanuij joij im tiriamokake.” Einwõt jãbi ko ilo pein Ri Potter eo Elap, jen kejbãrok ad tiljek ien otemjej, ilo liki kin tokjen eo einwõt kar Job!—Job 2:3, 9, 10; 27:5; 31:1-6; 42:12-15.
Jek Nalõmen Ro Nejid Redik
13, 14. (a) Ñããt eo ro jemen im jinen ren jino jek nalõmen ajiri ro nejiir? (b) Ta tokjen ko rekamõnõnõ kwomaroñ kwalok kaki?
13 Ro jemen im jinen remaroñ bõk kunair in jek nalõmen ajiri ro nejiir redik, jen ien rej niñniñ, im rein remaroñ rittolok im ri kejbãrok tiljek ro remõntata! (2 Timote 3:14, 15) Men in ear mol meñe ilo ien ko ke ear lap melejoñ ko. Jet yiõ ko remotlok, ke ear lap matõrtõr ilo ailiñ in Africa, juõn family etiljek ear lale jerbal eo rar aikwij kõmmane ilo ittino kin jeje Imõniaroñroñ ilo juõn em jidikdik ilo melan in mweo imweir. Juõn ran ri tarinae ro rar itok ilo ial eo, im bukõti likao ro jen em ñan em ñan kadeloñ ir ilo jar in tarinae eo. Ear wõr wõt ien ñan an likao ro ruo nejin family eo tilekek, ak tokjen men in elañe rar bukõte ir ri tarinae ro renaj kar lo printing press eo. Men in emaroñ kar tellok ñan air kaeñtan ak meñe mõn aolepen family eo. Ta eo remaroñ kõmmane? Likao ro ruo rar konono, im ilo beran rar elij nan ko ilo John 15:13: “Ejelok yokwe iben armij elap jen yokwe in, bwe armij en lelok an mour kin ro jeran.” Rar akwelap in bedwõt ilo room in bwebwenato eo ilo mweo imwiir. Ri tarinae ro renaj lo ir im ejelok bere renaj kaeñtan ir ilo lej ak meñe mõn ir ñe remakoko in deloñ ilo jar in tarinae eo. Ak reban wõnmanlok wõt im etale mween. Inem printing press eo im ro jet uan family eo naj deod. Bõtab, juõn men in kabwilõñlõñ ear walok. Ri tarinae ro rar le jen mwein, im etal ñan em ko jet! Jãbi in armij rein kar nawãwen kin emõn rar deod, im bareinwõt printing press eo, ñan wõnmanlok im kõmman ekan ko lor jitõb. Juõn ian ladik ro ruo im kõrã eo jein rej kiõ jerbal ilo Bethel; ladik eo ej kajerbal wõt printing press eo.
14 Jemaroñ katakin ro redik kilen jar, im Anij ej uak jar ko air. Juõn wanjoñok ekabwilõñlõñ kin men in ear walok ilo torlokbõke kin armij ro ilo Rwanda. Ke ri kijirãt ro rar keboj ledik eo jiljino yiõ dettan im jemen im jinen ñan mõn ir kin juõn hand grenade, ledik eo ear jar jen buruen ilo juõn ainikien elaj bwe ren deod jen jorrãn bwe ren maroñ wõnmanlok ilo jerbal eo an Jehovah. Men in kar kamakit ri uror rein ñan kõtlok ir, im rar ba, “Kim jab maroñ mõn kom kin ledik jidikdik in.”—1 Piter 3:12.
15. Paul ear kakkõl kin ta kilan ko renana?
15 Jarlepju in ajiri ro nejid rejjab aikwij kijenmij iumin wãwen ko joñan air bin einwõt ko kar kwalok kaki ilañ, ak ewõr melejoñ ko rej aikwij jelmae ilo school, im ilo jukjuk im bed in rainin: nan ko retton, pija in kelwan, men in kamõnõnõ ko renana, im ijjibed ko jen ro mõttair ñan kõmman manit ko renana me rej jededlok ilo elõñ jikin ko. Elõñ alen, ri jilek Paul ear kakkõl nae kilan kein.—1 Dri Korint 5:6; 15:33, 34; Dri Epesõs 5:3-7.
16. Ewi wãwen juõn armij emaroñ erom juõn jãbi ñan nebar?
16 Elikin an jitõñlok ñan jãbi ko kar kõmmane “ñõn nebar im jet ñõn jekron,” Paul ej ba: “Inem elañe armij ej mõke karreo e jen men kein, e naj jãbi ñõn nebar, ekwojarjar im ekar ñõn an Iroij kõmõn kake, im pojõk ñõn jerbal remõn otemjej.” Inem jen rejañ jodikdik ro nejid ñan kejbãrok ro rej tel air ibbeir. Kõtlok bwe ren “ko jen mõm ko an likao, im kwon lor kwojarjar, tõmak, yokwe, ainemõn iben ro rej jar ñõn Iroij jen buru erreo.” (2 Timote 2:20-22) Juõn program an family eo ñan “kalek don” emaroñ aorõk ñan nalõmen jodikdik ro nejid. (1 Dri Tessalonika 5:11; Jabõn Kennan Ko 22:6) Read im katak Bible kajjojo ran, ilo kajerbal book ko an Society, emaroñ juõn men in jibañ emõn.
Jek Nalõmen Armij Otemjej
17. Ewi wãwen kaje emaroñ jek nalõmeid, im kin ta tokjen emõn?
17 Ñan jek nalõmeid, Jehovah ej letok ñan kij nan in kakabilek ko jen Nan eo an im ikijen dolul eo an. Jab jumae nan in kakabilek rot kein rekwojarjar! Uak ñan i ilo meletlet, im kõtlok bwe ren jek nalõmõm ñan nebar me Jehovah emaroñ kajerbale. Jabõn Kennan Ko 3:11, 12 ej kakabilek: “Nejiõ, kwon jab kejekron kaje an Jeova, im kwon jab mõk kin An kowe yuk; Bwe Jeova ej kowe eo ej yokwe, einwõt, juõn jemen ñõn nejin eo ej mõnõnõ kake.” Bar juõn nan in kakabilek einwõt jen juõn jemen rej letoke ilo Hibru 12:6-11: “Bwe Iroij ej kajeik eo Ej yokwe e . . . Jabrewõt kaje, ilo ien in e jab men in mõnõnõ, a men in buromõj; ijoke tokelik ej jebar leen kwojarjar e ainemõn ñõn ro emwij kajeik ir kake.” Ial eo elaptata ñan bõk nan in kaje rot in ej aikwij Nan in kakõrmol an Anij.—2 Timote 3:16, 17.
18. Ikijen ukwelok, ta eo jemaroñ katak jen Luke chapter 15?
18 Jehovah ej bareinwõt tiriamokake. (Exodus 34:6) Ijo rej kwalok ukwelok eo mol kin meñe jerawiwi eo elaptata, ej jolok air bwid. Meñe ‘ri jerwan ro’ ilo ran kein remaroñ nalõmeiir ñan jãbi ko kin nebar. (Luk 15:22-24, 32) Jerawiwi ko ad remaroñ jab joñan wõt an nana einwõt ko an ri jerwan eo. Ak uak eo ad ilo ettã buru ñan nan in kakabilek eo jen Jeje ko ien otemjej naj tellok ñan air jek nalõmeid kin nebar.
19. Ewi wãwen jemaroñ wõnmanlok ñan jerbal einwõt jãbi ko ñan nebar ilo pein Jehovah?
19 Ilo jinoin ke jej kab katak mol eo, jaar mõnõnõ in kõtlok bwe Jehovah en jek nalõmeid. Jaar jolok ad lor wãwen ko an lal in, jaar jino kõnak armij eo ekãl, im erom Christian ro emwij air wujleplok air mour im baptais. Jaar bokake nan in kakabilek eo ilo Dri Epesõs 4:20-24, ‘komin wutik armij emor ekar ñõn ami etetal mokta, eo e nanalok ekar ñõn mõm ko in mon; Im komin erom ekal ilo buruemi, Im bwe komin kõnõk armij ekal, eo ekar ñõn Anij emwij kõmõne ekal ilo wãnik im kwojarjar in mol.’ Jen wõnmanlok wõt ilo an bidodo eik kij ilo pein Jehovah, Ri Potter eo Elap, im jerbal einwõt jãbi ko ñan nebar!
Ilo Elij
◻ Ta karõk eo an Ri Potter eo Elap ikijen lal in ad?
◻ Ewi wãwen remaroñ jek nalõmõm ñan nebar?
◻ Ilo wãwen et jemaroñ jek nalõmen ajiri ro nejid?
◻ Ta lemnak eo jen bõke ikijen kaje?
[Pija eo ilo peij 4]
Renaj jek nalõmõm ñan nebar ke ak ñan karmijeteik yuk?
[Pija eo ilo peij 6]
Remaroñ jek nalõmen ro redik jen ien air niñniñ